Read Nomaande Mat 21 Bible Online

Mat 21 - Nomaande bible

Mat 21

¹Ekúlú ayɛ́ bá ŋa bɔ́ bá bá bɔ́áŋa hoóhi ne Yelúsalɛm, ɛ́cɛ bá ma ka bɔ́ háma a Bɛ́tɛ́fasɛ ɔ ɔbáátáka a nɔkɔndɔ nú Molifié, Yésus ŋá tɔ́ma *baákɔ́nɛ́na béfendí,

²ɔsɛ náábɔ́ : « Ánɔ cɔba a bunɔŋɔ eebu eenú eé buúse. Ahɛ́ nu ŋga nɔ́ háma, nu ŋa nɔ́ kúana ɔ ɔkuana yiinyí yɛ́ abaŋabɛbɛa esúŋénú, ne uúyé ɔɔ́nɔ́ a maabána. Énu biíbi súŋúne, núé mi biíbi héléníne.

³Mbɔ́kɔ ɔɔcɔ á banɔ́ báta bɔkɔ, ánɔ bɛ́káma nɔsɛ : “Otéŋí a Waáŋá ŋeé biíbi yáamba.” Hú a yaátɛ́ ekúlú, u ŋa cɔba ɔ ɔnyɛana anyía nué biíbi héléne aaha. »

⁴Yááŋa anyía asana eéyé ŋaá bɛ́kɛ́láka aáná, anyía Ciɔɔ́ŋɛ́ cí *muhémúnyi bɛsana mɔ Bandɔ́mɛsɛ́ e bínyíoyísinyi ; cɛ́ ŋaa kɔ́ɔ́na cɛ́sɛ :

⁵« Ánɔ laána ɔbɔ́la u bálɛ́ka ci *Síon anyía : “Lɛca, uuwe otéŋí oócí wa yáaŋa ɔ ɔfaakɔna nɔ́ɔ́wɔ ne osiotóto yɛ́ ɔtɛ́má ekime ; ú maá bááta né yiinyí yɛ́ abaŋabɛbɛa ɔ ɔmuaná, otóŋo yɛ́ abaŋabɛbɛa.”[58] »

⁶Aáná baákɔ́nɛ́na ŋa bɔ́ cɔ́ba, bɔ́ kɛ́laka háyɛ Yésus ŋeé beébe laakɛ́na anyía bá kɛlaka.

⁷Bá ŋga hálámánáná ne yiinyí yɛ́ abaŋabɛbɛa ne uuyé ɔɔ́nɔ́. Bé ŋé biíbi táláka bíábɔ́ bɛlaŋa bí nyiike, bé ŋé limísínyi Yésus ɔ ɔmuaná.

⁸Baacɔ beéŋí ŋa bɔ́ aányɛ́áká bíábɔ́ bɛlaŋa bí nyiike o ohónyí ɔ ɔmuaná ; bɔsɔ́ɔ́kɔ́ a bɔ́mɔtɛ́ sɔ́mbáka bɛcala e bisíéné, bé biíbi aanyɛaka o ohónyí o owiínjie Yésus bɔɔcɔ.

⁹Bitúte bɛ́ baacɔ a bɛ́ ŋaá bá bíé buékeke, na a bɛ́ ŋaá bá bíé wuúci látáka, ŋaá bá bɛ́ɔ́ bɛ́sɔ́mɔ́kɔ́ okelú ɔ ɔmuaná bɛ́sɛ : « *Hɔsáána ná Ɔɔ́nɔ́ u Táfit ! Bandɔ́mɛsɛ́ á sáyábɛ́na ooci awɔ́ u ŋa fáaya eé nyiínyi nyí Otéŋí a Waáŋá ! Hɔsáána fáátɛ ɔ Ɔmuaná noómi ! »

¹⁰Ɛŋakɛlá Yésus e yóófíne eé Yelúsalɛm, ci ŋé bínyíétínyi, baacɔ beéŋí bataka báyɛ : « Mbá aányɛ́ ooci wáŋa e ? »

¹¹Bé beébe bɛ́kámáka báyɛ : « Yésus wáŋa ! Muhémúnyi bɛsana mɔ Bandɔ́mɛsɛ́ mɔ *Násalɛt, i iisí cɛ *Kalilé. »

¹²E elime eécí, Yésus ŋo yóófíne eé *Ciíbe cɛ Bandɔ́mɛsɛ́. U ŋé túme ɔwɔɔ́ŋɛ́na bakɛla onduné bekime bé Ciíbe cɛ Bandɔ́mɛsɛ́. U ŋé kúbúlíékéne ne tébíli cɛ́ babaŋalanana mɔɔnyɛ́[59], ne bilimíníne bí betúé tubúbé.

¹³Mbá ɔsɛ náábɔ́ : « Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : “Ciamɛ Ciíbe káá bá Ciíbe cɛ ɔbɛ́cɔ́kɔ́lɛ́na.” Mbá banɔ́, nú me nú ciíci ceŋisi ciíbe ecí beébi ŋa bɔ́ bɛ́námba noómi. »

¹⁴Aáná ne bendíméndíme na baacɔ e bé ŋe bú síndólo ŋe bú bíkósíki nááyá eé Ciíbe cɛ Bandɔ́mɛsɛ́ noómi, u ŋé beébe eéŋúnyísíki.

¹⁵Ne betéŋínyi *beluli nyiínjie ne *beékúnyi bikotí ŋa bɔ́ lɛ́cáka *bikéki bɛ́ bɛsana eébí ebí Yésus ŋaá kɛ́láka, bɔ́ lɔ́kɔ́máka tɔ́na háyɛ banásɛ́ ŋa bɔ́ bá bábɔ́ bɛ́sɔ́mɔ́kɔ Yésus okelú ɔ ɔmuaná eé Ciíbe cɛ Bandɔ́mɛsɛ́ báyɛ : « *Hɔsáána ná Ɔɔ́nɔ́ u Táfit ! » Ɛŋakɛlá bábɔ́ lɛ́cáka aáná, bé ŋé cunjéke.

¹⁶Bá ŋa bɔ́ bátá Yésus báyɛ : « Mbá ɔ ŋɔɔ́ lɔ́kɔ́ma háyɛ banásɛ́ eebe ŋa bɔ́ kɔɔna e ? » Mbá ɔsɛ : « Ɛ́ɛ, ɛ ŋaá mɛ lɔ́kɔ́ma, mbá banɔ́, nu tɛ ŋá nɔ́ fána ta buɔ́sɛ́ mehúnyi amá Ciɔɔ́ŋɛ́ ŋa kɔ́ɔna másɛ : “Ɔ ŋɔɔ́ kɛláka anyía na banásɛ́ ne iŋéné áyá ébú o nyemíki” e ? »

¹⁷Nyíáyɛ́ nyi beébe síke eényí, u ŋa hatɔ́na aáhá a bálɛ́ka, u ŋé súéte a Bɛtani ɔ ɔkɔfíanɛna hɔ́á.

¹⁸Ɔ ɔyá ɔyá, Yésus ŋaá hatɔ́na ɔ ɔhálɔ́mɔ́na a bálɛ́ka ; ɛcaná ŋe túme o wuúci nuana.

¹⁹Waá hɔ́laka o ohónyí, u ŋá lɛca bufikié a maabána ; u ŋé bíkósíti i indíné, mbá u ŋá kuána hú tuányɛ na tuányɛ ; mbá ɔsɛ né bufikié : « Ɔ tɛ kɔ́ háná ɔ háá atámá ta buɔ́sɛ́. » Hú a yaátɛ́ ekúlú bufikié ŋa kɔ́táká ɔkɔ́táka.

²⁰Ahɛ́ *baákɔ́nɛ́na ŋa bɔ́ lɛ́cá aáná, bé ŋé kéke buéŋí, mbá báyɛ né Yésus : « Anyána bufikié eebu má kɔ́táka ɔ ɔkɔ́táka aana e ? »

²¹Mbá ɔsɛ : « Ɛ ŋa mɛ́ banɔ́ láana aá taaká isíʼo : Mbɔ́kɔ nu ŋé nú lúmítíníne, nu ti suŋúnyi e cíínú ɛtɛ́má noómi, tɛ́ cáŋa hú asana ayɛ́ ɛ́ ma mɛ́ kɛla bufikié eebu nu ká nɔ́ kɛla, mbá nua nɔ́ŋa nú ɔlaana nɔkɔndɔ eenu anyía nɔ́ á hatɔ́na aaha, nɔ́ á ka bɛ́áhɛ́na aá nuɔmɔ́ nɔ́ makɛ́lɛ́, búɔ́ bɛ́kɛ́láka híáná.

²²Aáná bɔkɔ bukime abɔ́ nu ká nɔ́ báta Bandɔ́mɛsɛ́ na mɔŋɔlɛ́ mekime, nu ká nɔ́ bá ne buúbu. »

²³Yésus ŋaá cɔ́ba eé *Ciíbe cɛ Bandɔ́mɛsɛ́, u ŋé túme oweékúnyi baacɔ. Aáná ne betéŋínyi *beluli nyiínjie na *baáŋá bé *Besuif ŋa bɔ́ fáaya nááyá, mbá báyɛ : « Na makɛ́nda ma háányɛ́ ɔ ŋɔɔ́ kɛla bɛsana e ? Aányɛ́ ú ŋo yóo cuméke makɛ́nda me o biíbi kɛlaka e ? »

²⁴Yésus ɔsɛ náábɔ́ : « Yaŋɔ́ tɔ́na, míɔ cɔba ɔ ɔ banɔ́ báta hú ɛmbataka ɛmɔtɛ́ ; mbɔ́kɔ nu ŋá nɔ́ mɛ bɛ́káma, yaŋɔ́ tɔ́na míɔ cɔba ɔ ɔ banɔ́ laána aányɛ́ u ŋé mi cúméke makɛ́nda ma ɔkɛlaka bɛsana.

²⁵Ánɔ mɛ laána : Bandɔ́mɛsɛ́ u ŋaá tɔ́ma Sáaŋ o okowóotine baacɔ ayɛ́ʼ baacɔ e ? » Bé ŋé túme osuŋunyinyi beébe ne beébe báyɛ : « Mbɔ́kɔ túásɔ́ bɛ́káma anyía Bandɔ́mɛsɛ́ u ŋaá tɔ́má Sáaŋ o okowóotine baacɔ, keyé u ŋaá basɔ́ bata ɔsɛ : “Anyíatɛ́ nú ti ómo nú wuúci lumitinine aná e ?”

²⁶Mbá mbɔ́kɔ túásɔ́ bɛ́káma anyía baacɔ bé ŋe bú wuúci tɔ́ma, tu ŋá sɔ́ nyɛ́mana tu olíkíméke nyɛkɔca, anyía baacɔ bekime ŋe bú lúmitinine anyía Sáaŋ ŋaá bá taaká ci *muhémúnyi bɛsana mɔ Bandɔ́mɛsɛ́. »

²⁷Aáná bá ŋa bɔ́ bɛ́káma báyɛ : « Tu ti ŋé sú menyi. » Mbá ɔsɛ náábɔ́ : « Aáná e, oo, ta yaŋɔ́ tɔ́na ɛ tɛ ŋá mɛ banɔ́ láana aányɛ́ u ŋé mi cúméke makɛ́nda ma ɔkɛlaka bɛsana abɛ́ ɛ ŋa mɛ́ kɛla. »

²⁸Yésus ŋoó sólínyi ɔsɛ : « Anyána nú ŋa nɔ́ lɛ́ca asana eeye e ? Ɔɔcɔ a wɔmɔtɛ́ ŋaá bá na bááyɛ́ baáná a banɔ́mɔcɔ́ béfendí. U ŋɔ́ lɔ́ŋɛ́ta u buúse, u ŋé wuúci laána ɔsɛ : “Ɔɔ́nɔ́, cɔbá hɛ́nánɔ e esíéné ɔ ɔkɔɔ́nyiɔ buólí.”

²⁹Mbá ɔɔ́nɔ́ ɔsɛ : “Ɛ tɛ ŋá mɛ cɔcɔbaka.” E elime, u ŋá bɛ́kákálákɛ́na nyíáyɛ́ nyɛbɛ́káma, u ŋá cɔba ɔ ɔkɔɔ́nyiɔ.

³⁰Aáná ɔɔcɔ oócí ŋɔɔ́ lɔ́ŋɛ́tá sɔ́ɔ́kɔ́ u ɔláta, yó wuúci tɔ́ma e esíéné háyɛ u ŋaá tɔ́ma u buúse. Ɔɔ́nɔ́ ŋaá bɛ́káma ɔsɛ : “Oo, Taatá, ɛ ŋa mɛ́ cɔcɔbaka.” Mbá wuúci ta ɔcɔba ta haála.

³¹A baáná eébé béfendí, sɔ́ɔ́kɔ́ u háányɛ́ u ŋaá kɛ́láka nyiléne nyí síkíne e ? » Mbá báyɛ : « Sɔ́ɔ́kɔ́ u buúse u ŋaá kɛ́láka nyiléne nyí síkíne. » Mbá Yésus ɔsɛ : « Ɛ ŋa mɛ́ banɔ́ láana aá taaká anyía ne *betúé etéési ne bekendí bé beénjú ká bɔ́ cáŋa owoofokine e *Butéŋí bɔ́ Bandɔ́mɛsɛ́ na banɔ́.

³²Yááŋa anyía, Sáaŋ Batis ŋaá fááya náánɔ́, yɔ́ banɔ́ tóŋgínyi atálɛ́mánánɔ́ yí ohónyí, banɔ́ te o wuúci lumitinine ; yiíyi anyía ne betúé etéési ne bekendí bé beénjú ŋe bú lúmítíníne nyíáyɛ́ nyɛkɔɔna. Ta ayɛ́ nú ŋa nɔ́ lɛ́cáká aáná, banɔ́ ta ɔbɛ́kákálɛ́na maanɔ́ maabɛ́, anyía núénú wuúci lúmítíníne. »

³³Mbá Yésus ɔsɛ : « Ánɔ lɔ́kɔ́ma ɛnjaba a cɛmɔtɛ́ eeci : Muútí esíéné a mumɔtɛ́ ŋɔɔ́ nyíɔ́kɔ yááyɛ́ esíéné, yɔ́ bɔŋɔlɔkɛna na hɛkáká, yɔ́ tábɔ́náka nuáta hɔ́á ; yó béétíki nyindúmé nyɛ́ bɛtáta. E elime eécí, u ŋe yiínjíé esíéné ɔ cɔ́ɔ́kɛ né betétényi, u ŋé súéte ɔ ɔkanda ú haaca.

³⁴Ahɛ́ ekúlú yɛ́ ɔbándáka bɛyɔyɛ́ ŋa kaáhámá, u ŋá tɔ́ma bááyɛ́ bɔnyiɔnɔ a bɔ́mɔtɛ́ né betétényi esíéné o okohííte núáyɛ́ nuafa, háyɛ bé ŋe bú cíkílíékéne.

³⁵Mbá betétényi esíéné ŋe bú beébe hatɛ́ákɛ́na ; bé ŋé súbéke a mumɔtɛ́, bá ŋa sɔ́mba sɔ́ɔ́kɔ́ a wɔmɔtɛ́ aatɔ́, bá ŋá ɔ́ɔ́nɔ́kɔ tɔ́na sɔ́ɔ́kɔ́ u elime na andányɛ́.

³⁶Muútí esíéné ŋé túné tɔ́ma bɔnyiɔnɔ bé etémbí, beébe beéŋí ɔ ɔhɔla bé buúse. Mbá betétényi esíéné ŋa bɔ́ kɛ́láka bɔsɔ́ɔ́kɔ́ eébé bɔkɔ búmɔtɛ́ háyɛ bá ŋa bɔ́ kɛ́láka bɔsɔ́ɔ́kɔ́ bé buúse.

³⁷Aáná u ŋeé bíóndísínyí ɔtɔ́ma uuyé ɔɔ́nɔ́ né betétényi esíéné eébé, u bílúmíkínyi ɔsɛ : “Bá ŋa bɔ́ cɔba ɔ ɔlɔ́kɔ́mɛ́na uumi ɔɔ́nɔ́.”

³⁸Mbá ekúlú eyí betétényi esíéné ŋa bɔ́ lɛca ɔɔ́nɔ́, bé ŋé túme ɔkɔɔna beébe ne beébe báyɛ : “Ɔɔcɔ ooci u kéé hííteke bisíkénéne bí síkíne. Túé wuúci ɔ́ɔ́nɔ́kɔ, mbá esíéné káá basɔ́ bɛ́lɔ́kɔ́mɛ́na.”

³⁹Bé ŋe bú wuúci míɔ́mɛ́na, bé ŋé wuúci hámánána e esíéné, nyi wuúci ɔ́ɔ́nɔ́kɔ eényí. »

⁴⁰Mbá Yésus ɔsɛ : « Ekúlú eyí muútí esíéné káá fáaya a yááyɛ́ esíéné, aátɛ́ mu káá kɛ́laka betétényi esíéné eébé e ? »

⁴¹Aáná bé ŋe bú wuúci bɛ́káma báyɛ : « Mu kɔ́ɔ́ yɔ́ɔ́nɔ́kɔ tɛ́ka na mahana baŋána bé betétényi esíéné eébé, múó wiínjie esíéné ɔ cɔ́ɔ́kɛ né betétényi bé etémbí e bé ké búle ebú muúmu iínjie bɛyɔyɛ́ e ekúlú a yá nyɛ́mana. »

⁴²Mbá ɔsɛ : « Yaŋɔ́ ɛsɛ́ nu na maá nɔ́ fánáka Ciɔɔ́ŋɛ́ cɛ́ Bandɔ́mɛsɛ́ a cɛ́ ŋaá kɔ́ɔna cɛ́sɛ : “Nyɛndányɛ́ anyɛ́ bafalɛfa ciíbe ŋe bú óomboko, nyiínyi nyɛ́ má bɛ́cáŋa nyɛndányɛ́ a nyɛ́ ma bɛ́túáhɛ́na ciíbe. Aáná Otéŋí a Waáŋá ŋa kɛ́láka asana eéyé. Yɛ́ ŋaá basɔ́ kékísi buéŋí.”

⁴³Yaátɛ́ asana ɛ ŋa mɛ́ banɔ́ láana ɛsɛ́ : Bá káá banɔ́ ááŋɛ́na *Butéŋí bɔ́ Bandɔ́mɛsɛ́, bó buúbu íínjie ná baacɔ bá bunɔŋɔ bú etémbí a bá ŋa bɔ́ kɛla bɛsana a bɛ́ a nyɛ́mana ne buúbu. [

⁴⁴Ɔɔcɔ okime awɔ́ u káá kúákɔna a nyɛndányɛ́ eényí ɔ ɔmuaná káá bɛ́nɔ́kɔ́tɔ́kɔna ; mbá, mbɔ́kɔ nyɛndányɛ́ eényí ŋá kúákɔ́nákɛ́na ɔɔcɔ a wɔmɔtɛ́, nyí kéé wuúci ɔ́ɔ́kɔ́sɔ́kɔ.] »

⁴⁵Ɛŋakɛlá ne betéŋínyi *beluli nyiínjie na *Bafalisiɛ́ŋ ábɔ́ lɔ́kɔ́máká ɛnjaba ci Yésus eécí, bé ŋé menyí anyía yáábɔ́ asana u ŋaá bá waá táŋáka.

⁴⁶Aáná bé ŋe bú túme ɔwaamba ohónyí wú o wuúci hatɛna ; mbá bá ŋa bɔ́ bá bébú líkíméke nyɛkɔca nyɛ́ baacɔ a nyɛ́ ŋaá bá nyɛ́á lɛcaka anyía Yésus áŋa *muhémúnyi bɛsana mɔ Bandɔ́mɛsɛ́.