Read Nomaande Mat 22 Bible Online

Mat 22 - Nomaande bible

Mat 22

¹Yésus ŋa háná e beébe túmékíne ɛnjaba ɔsɛ :

²« Ɛ́náʼo, *Butéŋí bɔ́ Ɔmuaná ŋaá hɔ́ánána asana yí otéŋí a wɔmɔtɛ́ awɔ́ u ŋaá tánáka bɔnáka bɔ́ nyɛtɔ́nɔ́ nyí uuyé ɔɔ́nɔ́.

³Aáná u ŋaá tɔ́mɔ́kɔ́ná bááyɛ́ bɔnyiɔnɔ ɔ ɔkɔláana baacɔ abá u ŋɔɔ́ lɔ́ŋɔ́kɔ́ anyía bá faakɔ́na. Mbá baacɔ eébé ti ómo bú léne ɔfaaya.

⁴Ɛ́ɛhɛ́ u ŋaá tɔ́mɔ́kɔ́ná bɔnyiɔnɔ bé etémbí ; u ŋé beébe laána ɔsɛ : “Ánɔ ka láákɛ́na baacɔ abá ɛ ŋaá mɛ lɔ́ŋɔ́kɔ́ anyía ɛ́ maá mɛ námbáka bɛnyɛ́ma bɛ́ ɔnyíá biéŋí. Ne cíími káwɔ na bíámɛ bitúké a bɛ́tɔ́lɔ́kɔ́nɔ́ á yáaŋa bɛ́ɔ́nɔ́kɔ́nɔ́ ; bɛnyɛ́ma bikime á yáaŋa bɛtábɔ́nákánɔ́, bá faakɔ́na ɔ ɔkɔɔ́nyíá.”

⁵Mbá baacɔ eébé te ohiite ɔlɔ́ŋɔlɔ́ŋɔ eéyé háyɛ bɔkɔ, bá ŋá hɔláka aabɔ́ a masɔ́ma : Ooci ŋé síe a yááyɛ́ esíéné, ooci a wɔmɔtɛ́ ŋé súéte e úúyé onduné.

⁶Bɔsɔ́ɔ́kɔ́ a bɔ́mɔtɛ́ ŋa bɔ́ míɔ́mɔ́kɛ́na bɔnyiɔnɔ bé otéŋí eébé, bé ŋé beébe súbéke bɔmbányɛ, bé ŋé beébe ɔ́ɔ́nɔ́kɔ.

⁷Aáná hilóbi ŋeé tímbíe otéŋí oócí, u ŋá tɔ́ma bíáyɛ́ bicénji anyía bɛ́ kɔ ɔ́ɔ́nɔ́kɔ bɔɔ́nɔ baacɔ eébé, mbá bá cíákɛ́na ciabɔ́ bálɛ́ka.

⁸E elime eécí, u ŋaá laána bááyɛ́ bɔnyiɔnɔ ɔ bɔ́mɔtɛ́ ɔsɛ : “Bɛnyɛ́ma bɛ́ ɔnyíá bɛ́ nyɛtɔ́nɔ́ á yáaŋa bɛtábɔ́nákánɔ́, mbá baacɔ abá ɛ ŋaá mɛ lɔ́ŋɔ́kɔ tɛ ɔ́mɔɔ́ bɔ́ bá eebe á bábɔ́ nyɛmána bé o biíbi nyíáka.

⁹Yaátɛ́ asana ánɔ cɔbáka aná a cɛálɔ́nána cí ihényí, núɔ́ kɔ lɔ́ŋɔ́kɔ baacɔ bekime abá nua nɔ́ŋa nu ɔkuanaka hɔ́á, bá faákɔ́na ɔ ɔkɔɔ́nyíá bɛnyɛ́ma bɛ́ nyɛtɔ́nɔ́.”

¹⁰Bɔnyiɔnɔ ŋa bɔ́ cɔ́báka i ihényí, bɔ́ ŋɔ́ lɔ́ŋɔ́kɔ baacɔ bekime abá bá ŋa bɔ́ kúánáka : Na bɛɛbɛ́ bɛ́ baacɔ na bɛmbányɛ áyá ; bé ŋgé nyíóyóko a andaŋía yɛ́ bɔnáka hú mbiɔ́kɛ.

¹¹Otéŋí ŋo yoófíne a andaŋía yɛ́ bɔnáka anyía weé bísíémúkúnyi bekenyí bá nyɛtɔ́nɔ́. Wuúci aáhá o obísíémúnyi, u ŋá lɛcá ɔ ɔlɛca ɔɔcɔ a wɔmɔtɛ́ tɛ́ka na bɔlaka bɔ́ nyɛtɔ́nɔ́.

¹²Mbá ɔsɛ nááyá : “Aláamɛ, anyána ɔ́ɔ kɛlaka o owoofine aaha, kuɔŋɔ́ tɛ́ka na bɔlaka bɔ́ nyɛtɔ́nɔ́ e ?” Mbá ɔɔcɔ te o wuúci ɔbɛ́káma.

¹³Aáná Otéŋí ŋaá laána bááyɛ́ bɔnyiɔnɔ ɔsɛ : “Énu wuúci ɔ́ɔ́tɔ́kɔ́kɔ na aabá na akɔlɔ́, núé wuúci hémúnyi a nɔháatɛ́ i ibíne noómi. Hɔ́á ú ŋaá cɔ́baka ɔ ɔlɛlaka, u bíkótóko bɛkɛkɛ.” »

¹⁴Yésus ŋé solínyi ɔsɛ : « Baacɔ ɔbɔ́lɔ́ŋɔ́kɔ́nɔ́ á bɔ́ŋa beéŋí, mbá a batáfákánɔ́ betíkítíki. »

¹⁵E elime eécí, *Bafalisiɛ́ŋ a bɔ́mɔtɛ́ ŋa bɔ́ táŋákɛ́ná Yésus hɛtɔkɛ, anyía bábɔ́ bɔ́ŋɔ ohónyí ú o wuúci kúfítínyi na ɛmbataka a cɛ́mɔtɛ́.

¹⁶Aáná bé ŋe bú wuúci tɔ́mɛ́ná na báábɔ́ *baákɔ́nɛ́na ɔ bɔ́mɔtɛ́ na baacɔ a bɔ́mɔtɛ́ bé hitúlé hí *Elóot, anyía bá ka laána Yésus báyɛ : « Muékúnyi, tu ŋe sú ményi anyía ɔ ŋɔɔ́ kɔɔna bɛsana a bɛtálɛ́mánánɔ́, e éékúnyíki baacɔ anyána bábɔ́ nyɛmána bé olíhéke háyɛ Bandɔ́mɛsɛ́ ŋa yáamba. O ti ŋóo líkíme ta ɔɔcɔ anyía ɔ tɛ ɔ́ bá ne mebeé.

¹⁷Ɔ́ɔ basɔ́ laána aná : Ɔ nyiɔ́wɔ, yááŋa ambányɛ yɛ́ asana a bíásɔ́ *bikotí anyía tu ŋa sɔ́ nyɛ́mána tú ɔwɔɔ́ndɔ́kɔ etéési ná *Sɛsáal, ayɛ́ʼ yɛ́ tɛ á bá ambányɛ e ? »

¹⁸Mbá, u ŋaá bá weé ményukune máábɔ́ menjiŋé, mbá ɔsɛ náábɔ́ : « Banɔ́, baacɔ bá tɔbɛ́mbɛ túfendí eebe, anyíatɛ́ nú ŋa nɔ́ mɛ bɛ́tɔ́ɔ́lɛ́na e ?

¹⁹Énu mi tóŋínyi eléŋú yɛ́ mɔɔnyɛ́ ayɛ́ bɔ́ ŋɔ yɔɔ́ndɛ́na e etéési. » Bé ŋé wuúci yiíyi tóŋínyi.

²⁰Mbá ɔsɛ náábɔ́ : « Hibílícínyínyí hɛ́ aányɛ́ eehi hɛ́áŋa, ne nyiínyi eenyi e ? »

²¹Báyɛ : « Ne hibílícínyínyí ne nyiínyi nyɛ́ Sɛsáal bɛ́áŋa. » Mbá ɔsɛ : « Énu íínjíékíne aná bɛnyɛ́ma bɛ́ Sɛsáal ná Sɛsáal, nu íínjíékíne bɛ́ Bandɔ́mɛsɛ́ ná Bandɔ́mɛsɛ́ ! »

²²Ayɛ́ bá ŋa bɔ́ lɔ́kɔ́ma nyɛbɛ́káma eényí, nyí ŋé beébe kékísi buéŋí. Nyɛ́ábɔ́ nyi wuúci síke eényí aáhá, bé ŋé súétéke.

²³Hú buátɛ́ buɔ́sɛ́, *Basatusiɛ́ŋ ɔ bɔ́mɔtɛ́ ŋa bɔ́ faáya né Yésus. (Bá náŋa bé ti ebú lúmítíne anyía biwéewé ŋa háanyua.) Aáná bé ŋe bú wuúci bícónyi báyɛ :

²⁴« Muékúnyi, *Moyís ŋaá kɔ́ɔ́na ɔsɛ : “Mbɔ́kɔ ɔnɔ́mɔcɔ́ ŋá bátɛ́na oónjú, mbá yó wé tɛ́ka ne obíéne ɔɔ́nɔ́, onyíinyí ké síké bísúétíne esíké, yó wuúci bíénékíne baáná.”

²⁵Ɔ́ɔ lɛca aná : Náásɔ́ aaha, benyíinyí a banɔ́mɔcɔ́ bétíndétú nɔ́mɔ ŋe bú líhéké ; u buúse ŋaá bátɛ́ná oónjú, u ŋé wé. Ɛ́ɛhɛ́, háyɛ u tɛ ɔ́mɔɔ́ bá na ɔɔ́nɔ́, onyíinyí ŋé bísúétíne esíké.

²⁶Híáná bú ŋaá bɛ́kɛ́láka ne onyíinyí u ɔláta na u bátátɔ́ ɔ ɔkɔɔ́háma o onyíinyí u bétíndétú nɔ́mɔ.

²⁷E elime eécí, oónjú ŋé wé tɔ́na.

²⁸Yaátɛ́ asana tu ŋa sɔ́ ɔ bata anyía : E ekúlú eyí biwéewé káá háanyuaka, sɔ́ɔ́kɔ́ awɔ́ háányɛ́ u káá bá ɔnɔ́mɛ u oónjú oócí aná e ? Yááŋa anyía bekime bétíndétú nɔ́mɔ ŋe bú wuúci bátɛ́ákɛ́ná. »

²⁹Yésus ŋeé beébe bɛ́kámá ɔsɛ : « Nú ma nɔ́ nána, anyía nu tɛ ŋá nɔ́ lɔ́kɔ́ma bɔmbányɛ ta Ciɔɔ́ŋɛ́ cɛ́ Bandɔ́mɛsɛ́, ta mááyɛ́ makɛ́nda.

³⁰Yááŋa anyíaʼo, ekúlú eyí biwéewé káá háanyuaka, banɔ́mɔcɔ́ tɛ ká bɔ́ bátɛ́ákɛ́na, beénjú tɛ́ tɔnɔ, mbá bé ké búle ebú líhe háyɛ *bililé bɛ́ masɔ́ma bɛ́ Bandɔ́mɛsɛ́ ŋeé líhe a Bunɔŋɔ bɔ́ Ɔmuaná.

³¹Mbá a asana a yɛ́ ŋa lɛ́ca nyɛhaanyua nyí biwéewé, nu tɛ ɔ́mɔɔ́ nɔ́ fána ɔtáŋa awɔ́ Bandɔ́mɛsɛ́ ŋaá banɔ́ láákɛ́na ɔsɛ :

³²“Ya mɛ́ŋa Bandɔ́mɛsɛ́ cɛ *Abɛ́laham, Bandɔ́mɛsɛ́ cɛ *Isak, Bandɔ́mɛsɛ́ cɛ Yákɔb.”[60] » Yésus ŋoo sólínyi ɔsɛ : « Énu menyí anyía Bandɔ́mɛsɛ́ áŋa Bandɔ́mɛsɛ́ cɛ baacɔ ɔ bɔɔ́sɔ, tɛ́ cáŋa Bandɔ́mɛsɛ́ cɛ bɛlɔ́ŋɔ́. »

³³Nyɛkɔca nyɛ́ baacɔ a nyɛ́ ŋaá bá hɔ́á ŋeé kékéke buéŋí nyíáyɛ́ nyiékúnyi.

³⁴*Bafalisiɛ́ŋ ŋa bɔ́ lɔ́kɔ́ma anyía Yésus ŋoó mómísíki *Basatusiɛ́ŋ, bá ŋá bɛ́bándákána.

³⁵Ɛ́ɛhɛ́ *muékúnyi bikotí ɔ mumɔtɛ́ eé beébe ŋaá báta Yésus ɛmbataka anyía wé wuúci kúfítínyi, ɔsɛ :

³⁶« Muékúnyi, okotí ayɛ́ háányɛ́ yá hɔ́la *bikotí bikime e ? »

³⁷U ŋé wuúci bɛ́káma ɔsɛ : « Lénéke uuwu Otéŋí a Waáŋá Bandɔ́mɛsɛ́ ne úúwu ɔtɛ́má okime, na ciɔwɔ injiŋé ikime, ne hííwu hɛtányɛ́ hikime ;

³⁸yiíyi yááŋa ne okotí yí buúse ne okotí a yɛ́ á hɔ́láka bikotí bikime bí etémbí.

³⁹Yɛ́ ɔláta e yí ŋe yiíyi hɔ́á áŋa anyía : “Lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá.”

⁴⁰Bikotí eébí bífendí bɛ́áŋa bitímbíénú ne bikotí bikime bí *Moyís ne nyiékúnyi nyikime nyí *behémúnyi bɛsana bá Bandɔ́mɛsɛ́ áyá. »

⁴¹*Bafalisiɛ́ŋ ŋaá bá babɛ́bándákánɔ́, Yésus ŋé beébe báta,

⁴²ɔsɛ : « Aátɛ́ nu ŋe nú bíkéti a asana ne Mesíi e ? A nyíánɔ́, *Mesíi áŋa u bɔnyɛ aányɛ́ e ? » Mbá báyɛ nááyá : « Wáŋa u bɔnyɛ Táfit. »

⁴³Mbá ɔsɛ : « Anyíatɛ́ aná Táfit, ekúlú eyí *Efúúménénú yí Elilé ŋeé wuúci oofíne aá cɛɛ́tɔ, ŋɔɔ́ lɔ́ŋɛ́tá Mesíi ɔsɛ : “Uumi Otéŋí a Waáŋá” e ? Yááŋa anyía Táfit ŋaá kɔ́ɔ́na ɔsɛ :

⁴⁴“Otéŋí Bandɔ́mɛsɛ́ ŋaá laána uumi Otéŋí a Waáŋá ɔsɛ : Faáya ké limíne aámɛ a maabána a aháŋá yí uumi ɔɔbɔ́ ú manɔ́mɛ, ekúlú ekime ayɛ́ ɛ ká mɛ́ kɛ́la anyía óo limékíníne bɔ́ɔ́wɔ beliŋine a bɛɛtɔ́.”

⁴⁵Mbɔ́kɔ Táfit ŋeé wuúci lɔ́ŋɔ anyía uuyé Otéŋí a Waáŋá, anyána aná wáŋa wu ɔbá tɔ́na u bɔnyɛ Táfit e ? »

⁴⁶Aáná ta ɔɔcɔ eé beébe tɛ ɔ́mɔɔ́ bɔ́ŋɔ buhúnyi bɔ́ ɔbɛ́káma. O otúme a buɔ́sɛ́ eébú, ta ɔɔcɔ ta ɔ háná bɛ́kána o wuúci bata ɛmbataka.