Read Nomaande Mat 23 Bible Online

Mat 23 - Nomaande bible

Mat 23

¹Yésus ŋaá laána na baacɔ bá nyɛkɔca na bááyɛ́ *baákɔ́nɛ́na ɔsɛ :

²« Ne *beékúnyi bikotí na *Bafalisiɛ́ŋ, beébe bá náŋa bébú eékúnyíki baacɔ *bikotí ebí *Moyís ŋeé télímíkínyí.

³Aáná nuánɔ́ nyɛmána nu o beébe lɔ́kɔ́mákɛ́na, nu látákɛ́na nyíábɔ́ nyiékúnyi nyikime. Asana ɔ́mɔtɛ́, nɔtɛ látákɛ́na máábɔ́ mekilíkínyí. Yááŋa anyía máábɔ́ mekilíkínyí áŋa náányia na nyíábɔ́ nyiékúnyi.

⁴Bé ŋe bú túéhínyi baacɔ bé etémbí bɛandándá bɛ́ malamɔ́, yiíyi anyía beébe bɛ́muátá, bá tɛ ábɔ́ bá bé o meéme hetutunyi ta na hɛnɔɔ́nɔ́ !

⁵A bɛsana bikime abɛ́ bá ŋa bɔ́ kɛla, bá ŋa bɔ́ áamba anyía baacɔ é beébe lɛcáka ; aáná bé ŋe bú bísúŋe bɛandándá bɛ́ bɛkáŋá bí bikélékéti bí tufule tɔ́ Bandɔ́mɛsɛ́, na a tɔbɔlɔ na a aabá ; bé ŋe bú céhisi *tubéŋú tɔ́ bíábɔ́ bɛlaŋa bɛ́ ɔbɛ́cɔ́kɔ́lɛ́na.[61]

⁶Bé ŋe bú léne ɔtáfa elimíné cá bɔɔcɔ na a bɛandándá bɛ́ manáka na a *bɛndaŋía bɛ́ ɔbɛ́cɔ́kɔ́lɛ́na bí *Besuif ;

⁷bé lénéke anyía baacɔ é beébe téŋíki na bɔɔcɔ haála ahá baacɔ beéŋí á bɔ́ŋa, bé beébe ciekinyi, báyɛ : “Muékúnyi”.

⁸Mbá banɔ́, nuti lumítíne anyía bá banɔ́ lɔ́ŋɔ́kɔ báyɛ “Muékúnyi”. Yááŋa anyía muékúnyi náánɔ́ áŋa hú mumɔtɛ́ ; banɔ́ bekime, benyíinyí.

⁹Nuti ciényi ta ɔɔcɔ ta ɔmɔtɛ́ aaha ɔ ɔmɛsɛ́ anyía “Síkíne”, anyía nua nɔ́ŋa hú ne Síkíne ɛmɔtɛ́ : Wuúci wáŋa ɔ Ɔmuaná.

¹⁰Nuti lumítíne tɔ́na anyía bá banɔ́ lɔ́ŋɔ́kɔ anyía “Otéŋí”, anyía nua nɔ́ŋa hú ne Otéŋí ɔmɔtɛ́ : Wuúci wáŋa *Mesíi.

¹¹Aáná, waáŋá aanɔ́ ɛ ɛkatɛ́katɛ́ á nyɛmana wu ɔbá munyiɔnɔ mɔ bɔsɔ́ɔ́kɔ́ bekime,

¹²anyía ɔɔcɔ okime ewú u ŋee bílóosi, Bandɔ́mɛsɛ́ kéé wuúci bééti.

¹³Mahana ná banɔ́, ne *beékúnyi bikotí na *Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋe nú kúéyinyi baacɔ ohónyí ewú ú ŋe yiínjie omenyi ú Bɛsana bɛ́ Bandɔ́mɛsɛ́ ; banɔ́ bɛ́muátá, nu tɛ kánda eé wuúci ; aáná, baacɔ a bá ŋa bɔ́ áamba ɔkanda hɔ́á, nuó beébe kotiki. [

¹⁴Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋa nɔ́ hɔ́ɔnɔ bisíké bí beénjú bíábɔ́ bɛnyɛ́ma, nu cehisiki ɔbɛ́cɔ́kɔ́lɛ́na anyía baacɔ á banɔ́ kékéke. A yaátɛ́ asana Bandɔ́mɛsɛ́ káá banɔ́ kélísíki na nyɛŋána ɔ ɔhɔla nyɛnamá enyí u kéé kélísíki bɔsɔ́ɔ́kɔ́ bé etémbí. ]

¹⁵Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋe húle ánɔ kánda na aá tuɔmɔ́ ne i iisí cí etémbí, nu aambaka obísúéne ta ɔɔcɔ ɔmɔtɛ́ e úúnú ɔlɔŋɔ ú balátɛ́na *bikotí bí *Moyís. Mbá, ekúlú eyí núénú bísúétíne ɔmɔtɛ́, yó lumitinine, nu ŋe nú wuúci ceŋisi aabɛ́ yɛ́ ɔɔcɔ awɔ́ Bandɔ́mɛsɛ́ á nyɛmana wu ɔbɔ́nɔ́sia bikúlú bífendí ɔ ɔ banɔ́ hɔ́la.

¹⁶Mahana ná banɔ́, ne beékúnyi bikotí na Bafalisiɛ́ŋ. Nu ŋe nú bíkéti anyía nu ŋe nú kéndi bɔsɔ́ɔ́kɔ́, yiíyi anyía nua nɔ́ŋa bendíméndíme. Ɛ náŋa nuanɔ́ kɔ́ɔnaka nɔsɛ bú tɛ á bá bɔnyɛmánánɔ́ mbɔ́kɔ ɔɔcɔ ŋá súátɛ́na eé nyiínyi nyí *Ciíbe cɛ Bandɔ́mɛsɛ́. Mbá, búáŋa bɔnyɛmánánɔ́ ɔ ɔhɔla mbɔ́kɔ ɔɔcɔ ŋaá súátɛ́na eé nyiínyi nyí kóolo cɛ ciayɛ́ Ciíbe.

¹⁷Nua nɔ́ŋa bɛála, banɔ́ bendíméndíme ! A nyíánɔ́ʼo, ne kóolo ne Ciíbe cɛ Bandɔ́mɛsɛ́, aátɛ́ yááŋa yaáŋá ɔ ɔhɔla e, kóolo ayɛ́ʼ Ciíbe cɛ Bandɔ́mɛsɛ́ e cí ŋe fúúmínyi kóolo e ?

¹⁸Ɛ náŋa nuanɔ́ kɔ́ɔnaka tɔ́na nɔsɛ bú tɛ á bá bɔnyɛmánánɔ́ mbɔ́kɔ ɔɔcɔ ŋaá súátɛ́na eé nyiínyi nyí nyindúmé nyí nyiluli nyiínjie, mbá búáŋa bɔnyɛmánánɔ́ ɔ ɔhɔla mbɔ́kɔ ɔɔcɔ ŋaá súátɛ́na eé nyiínyi nyí nyiínjie nyí nyindúmé nyí nyiluli.

¹⁹Nua nɔ́ŋa bendíméndíme ɔ ɔhɔla ! A nyíánɔ́ʼo, ne nyindúmé nyí nyiluli ne nyiínjie, aátɛ́ yááŋa yaáŋá ɔ ɔhɔla e, nyiínjie ayɛ́ʼ nyindúmé e nyí ŋe fúúmínyi nyiínjie e ?

²⁰Ɛ́ɛhɛ́ ɔɔcɔ awɔ́ u ŋa súátɛ́na eé nyiínyi nyí nyiluli nyiínjie má súátɛ́na ne eé nyiínyi nyí nyindúmé nyí nyiluli nyiínjie ne eé nyiínyi nyɛ́ bɔkɔ bukime a búáŋa hɔ́á.

²¹Ɔɔcɔ awɔ́ u ŋaá súátɛ́na eé nyiínyi nyí Ciíbe cɛ Bandɔ́mɛsɛ́ má súátɛ́na ne eé nyiínyi nyɛ́ ciayɛ́ Ciíbe ne eé nyiínyi nyɛ́ Bandɔ́mɛsɛ́ ewú u ŋe límíne hɔ́á.

²²Ɔɔcɔ awɔ́ u ŋaá súátɛ́na eé nyiínyi nyɛ́ Ɔmuaná ŋaá súátɛ́na ne eé nyiínyi nyɛ́ nɔkɔná nɔ́ Bandɔ́mɛsɛ́ ne eé nyiínyi nyɛ́ Bandɔ́mɛsɛ́ a wáŋa límine eé nuúnu.

²³Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋe nú iínjie Bandɔ́mɛsɛ́ nuafa númɔtɛ́ nɔ́ tuafa túɔ́hátá tú tuhútíhúti háyɛ ne bicéŋí, ne ikótóko, na tɔɔlɔ ; mbá nuɔ́ bɛ́hɔ́yáka ɔkɛla baacɔ taaká cɛ́ bɛsana ebí bikotí ŋá yaámba. Bɛ́áŋa anyía : Na ɔlátɛ́na taaká, na ɔbɛ́cáma baacɔ mahana, ne onyíóyísíkínyi bɛsana e bí ŋeé bíléníne Bandɔ́mɛsɛ́. Bɛsana eébí nuánɔ́ nyɛ́mana nu ɔkɛlaka, nu tɛ bɛ́hɔ́ya a bɛ́mɔtɛ́ bí etémbí.

²⁴Nu ŋe nú bíkéti anyía nu ŋe nú kéndi bɔsɔ́ɔ́kɔ́, yiíyi anyía nua nɔ́ŋa bendíméndíme ɔ ɔhɔla ! Ɛ naŋa nuanɔ́ bálɔnaka máánɔ́ meluku ɔ ɔwaáŋɛ́áka tuciící, anyía nu ti tuútu mɛnáka. Yiíye anyía nu ŋa nɔ́ mɛ́na samó ikimekime.

²⁵Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋe nú fúúmínyi ne elime cɛ na amúánɛ́ná na anyíáná, mbá nú me nú biíbi nyióyísíki hú mbiɔ́kɛ na bɛnyɛ́ma na bɛ́ búánɔ́ buébi na a bɛ́ ŋaá banɔ́ hámɛ́na ɛ ɛtɛ́má.

²⁶Ééʼ, kuɔŋɔ́ Falisiɛ́ŋ, ɔ ɔ́ŋa ondíméndíme ! Cáŋacáŋa ofúúmíkínyi noómi cɛ na yɔ́ɔ́wɔ amúánɛ́ná na yɔ́ɔ́wɔ anyíáná ; aáná elime kéé fúúméne ciíci bɛ́muátá.

²⁷Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋa nɔ́ hɔ́á biinyie ebí bé me híkisiki bɔmbányɛ e elime, bó biíbi fúúmíkínyi, yiíyi anyía bɛ́áŋa binyíóyókónú noómi ne biúhé ne bifonyíki bí biwéewé.[62]

²⁸Híáná banɔ́ tɔ́na nua nɔ́ŋa : Nu ŋa nɔ́ lɛ́cana bɛtálɛ́mánánɔ́ bɛ́ baacɔ, yiíyi anyía cíínú ɛtɛ́má áŋa inyíóyókónú na bɛɛbɛ́ bí ibíkéti hú mbiɔ́kɛ, banɔ́ na tɔbɛ́mbɛ túfendí.

²⁹Mahana ná banɔ́, ne beékúnyi bikotí na Bafalisiɛ́ŋ. Nua nɔ́ŋa tɔbɛ́mbɛ túfendí, anyía nu ŋa nɔ́ tábɔ́nɛ́na *behémúnyi bɛsana bá Bandɔ́mɛsɛ́ bɛmbányɛ́kɛ́ bí biinyie, nu híkisiki bɛ́ bɛtálɛ́mánánɔ́ bɛ́ baacɔ ;

³⁰nu kɔɔnaka nɔsɛ : “Mbɔ́kɔ tuasɔ́ bá e ekúlú yí bocóónyí, keyé tu ti ómo sú beébe bɛ́láta ɔ ɔwɔɔ́nɔ́kɔ behémúnyi bɛsana bá Bandɔ́mɛsɛ́.”

³¹Nyíánɔ́ nyɛkɔɔna eényí ŋo tóŋínyi anyía nua nɔ́ŋa na nyɛhatɛ́ i iŋetí cɛ bɔɔ́nɔ behémúnyi bɛsana bá Bandɔ́mɛsɛ́.

³²Ánɔ cɔba ne buúse aná, núá bɛ́ásɛ́ta buólí bú cíínú sɔ́kɔ́nɔ́ !

³³Banɔ́ mɔɔ́hɔ eeme, bɔnyɛ ɛhɛ́nyɛ, énu menyúkúne bɔmbányɛ anyía nu tɛ anɔ́ bá nú ɔsámbáka bɔ́nɔ́sɛa cɛ Bandɔ́mɛsɛ́.

³⁴Yaátɛ́ asana, míɔ cɔba ɔ ɔ banɔ́ tɔ́mɔ́kɔ́nɛ́na ne behémúnyi bɛsana bá Bandɔ́mɛsɛ́, ne benjiŋénjíŋe, ne beékúnyi bikotí. Nu ká nɔ́ ɔɔ́nɔ́kɔ ɔ bɔ́mɔtɛ́, nu beébe aátákɛ́na ɛ ɛmbásá ; nuó súbéke bɔsɔ́ɔ́kɔ́ ɔ bɔ́mɔtɛ́ ne mesue a *bɛndaŋía bɛ́ ɔbɛ́cɔ́kɔ́lɛ́na. Ɔ bɔ́mɔtɛ́ tɔ́na, núó beébe tekeseke, nu beébe hetukunyi a bálɛ́ka eeci, nu beébe látákɛ́na ne indekese eécí a bálɛ́ka cí etémbí.

³⁵I ké mi beébe tɔ́mɔ́kɔ́na aáná anyía bá banɔ́ bátáka manɔ́ŋɔ́ o otúme ma atálɛ́mánánɔ́ yɛ́ ɔɔcɔ *Abɛl, ɔ ɔkɔɔ́háma a ma Sakali, ɔɔ́nɔ́ u Balaki. Wuúci nú ŋa nɔ́ ɔɔ́nɔ́kɔ a bɔkatɛ́katɛ́ bú ne nyiluli nyiínjie nyɛ́ nɔháatɛ́ ne Ciíbe cɛ Bandɔ́mɛsɛ́.

³⁶Aá taaká ɛ ŋa mɛ́ banɔ́ láana ɛsɛ́ Bandɔ́mɛsɛ́ káá bátaka baacɔ bá hɛɛya eehi manɔ́ŋɔ́ mekime ma baacɔ eébé !

³⁷Banɔ́, baacɔ bé Yelúsalɛm, banɔ́ Yelúsalɛm ! Banɔ́, nu naŋa nuanɔ́ ɔɔ́nɔ́kɔ behémúnyi bɛsana bá Bandɔ́mɛsɛ́, nu ɔɔlɔkɔ na andányɛ́ ɛndɔ́ma cɛ́ Bandɔ́mɛsɛ́ ! Ɛ ŋa mɛ́ aambáka bikúlú biéŋí ɔ banɔ́ bánda a nyɛnamá enyí yiinyí yɛ́ ɛkɔkɛ́ náŋa yá bándáka bááyɛ́ baáná eéyé e bibéku ; mbá banɔ́, nu ŋe nú kínéke.

³⁸Ánɔ lɛcá aná, Bandɔ́mɛsɛ́ kéé hélúmúnyi cianɔ́ ciíbe ahátátá.

³⁹Yááŋa anyía ɛ ŋa mɛ́ banɔ́ láana ɛsɛ́ o otúme aámbáya nu tɛ ká háná anɔ́ mɛ́ lɛca ɔ ɔkɔɔ́háma ekúlú ayɛ́ nu ká nɔ́ kɔɔna nɔsɛ : “Bandɔ́mɛsɛ́ á sayábɛ́na ooci awɔ́ u ŋaá fáaya eéyé eé nyiínyi !” »