Read Nomaande Mat 24 Bible Online

Mat 24 - Nomaande bible

Mat 24

¹Yésus ŋaá bá waá hámɔ́kɔ́na eé *Ciíbe cɛ Bandɔ́mɛsɛ́, anyía weé súéte. Aáná bááyɛ́ *baákɔ́nɛ́na ŋe bú bíkósíti nááyá, bé ŋé wuúci tóŋínyi ambányɛ́kɛ́ yɛ́ nyɛfalɛfa yí Ciíbe cɛ Bandɔ́mɛsɛ́.

²Mbá ɔsɛ : « Nu ŋa nɔ́ lɛ́ca bɛnyɛ́ma eébí bikime e ? Ɛ ŋa mɛ́ banɔ́ láana aá taaká isíʼo : Ta nyɛndányɛ́ nyɛ́mɔtɛ́ tɛ́ kɔ́ɔ́ lɔ́bɔ aaha nyɛtálánɔ́ ɔ sɔ́ɔ́kɔ́ ɔ ɔmuaná, ekime kéé fúŋulueke. »

³Yésus ŋe ke límíne ɔ ɔmɛsɛ́ a nɔkɔndɔ nú Molifié. Bááyɛ́ *baákɔ́nɛ́na ŋe bú wuúci súéténé a mafákálɛ́ana, bé ŋé wuúci báta, báyɛ : « Ɔ́ɔ basɔ́ láána : Nyíényí bɛsana eébí káá bɛ́kɛ́láka, hibílícínyínyí hɛ́ yaátɛ́ hí kóó tóŋínyi na nyiɔ́wɔ nyɛkahálɔ́mɔ́na na nyɛmana nyɛ́ ɔmɛsɛ́ e ? »

⁴Mbá ɔsɛ náábɔ́ : « Énu bíkékényíki ; ta ɔɔcɔ tɛ banɔ́ néŋé !

⁵Yááŋa anyía baacɔ beéŋí ká bɔ́ fáakɔna eémi eé nyiínyi, hú naányɛ́ u kɔɔnaka ɔsɛ : “Yaŋɔ́, ya mɛ́ŋa Mesíi”. Bé ké bú néŋéke baacɔ beéŋí.

⁶Ekúlú ayɛ́ nu ká nɔ́ lɔ́kɔ́máka bá kɔ́ɔnaka anyía mɔnɔŋɔ ŋaá nua biité meéme ne meéme, ta anyía nu lɛcaka baacɔ ɔɔ́nɔ́kɔ́nɔ́ e biité, nuti líkíméke ta bɔkɔ, ananyía bɛsana eébí ŋá nyɛmána bɛ́ ɔbɛ́kɛ́láka ; mbá tɛ́ cáŋa hí e ekúlú eéyé ɔmɛsɛ́ káá mána.

⁷Baacɔ bá bunɔŋɔ a búmɔtɛ́ ká bɔ́ támbána biité na baacɔ bá bunɔŋɔ bú etémbí ; butéŋí a búmɔtɛ́ kɔ́ɔ́ tɔ́kɔ butéŋí bú etémbí ; mecíli káá bá meéŋí, ɛmɛsɛ́ bínyíékínyi bɛhaála bɛhaála.

⁸Bɛsana eébí bikime káá bá bɛsana bí nyitúme nyɛ́ ɔbɛ́nyíá mɔɔhɔ.

⁹Aáná baacɔ ká bɔ́ banɔ́ fíímbieke i indekese, bá banɔ́ ɔɔ́nɔ́kɔ. Baacɔ bá mɔnɔŋɔ mekime ká bɔ́ banɔ́ líŋekine aámɛ a asana.

¹⁰Asana eéyé káá kɛla anyía baacɔ beéŋí ábɔ́ bɛ́yúátáka úúbú olumitinine. Bé ke bú túékénéne, bé líŋekenene.

¹¹Behémúnyi bɛsana bá bɛfala beéŋí ká bɔ́ hálaka ; bé ke bú bísúékíne baacɔ beéŋí ne munéŋéne.

¹²Bɔɔbɛ́ ká yaányákána bɛhaála bikime a nyɛnamá enyí bú kéé témbúnyísíki nulénéne nɔ́ baacɔ.

¹³Mbá ɔɔcɔ ewú u kéé yeéhíkínyínyi muuyé ɔ ɔkɔɔ́háma a nyɛmana, Bandɔ́mɛsɛ́ kéé wuúci nohi.

¹⁴Bé kéé húlikinyi baacɔ bekime bá ɔmɛsɛ́ okime Ambányɛ yɛ́ Ɛsɔ́ma yí *Butéŋí bɔ́ Ɔmuaná, ananyía be-ti-wuúci-menyí bekime ébú yiíyi lɔ́kɔ́máka. E elime eécí aná ɔmɛsɛ́ káá mána. »

¹⁵« Ekúlú eéyé, nu ká nɔ́ lɛca “aabɛ́ yí ekume” eliménénú a *haála e hefúúménénú. Yiíye eéyé *muhémúnyi bɛsana mɔ Bandɔ́mɛsɛ́, *Tániɛl, ŋaá táŋáká. (Mɔfana asana eeye ŋá nyɛmána mu o yiíyi lɔ́kɔ́máka bɔmbányɛ !)

¹⁶Yaátɛ́ asana, baacɔ a bá ká bɔ́ bá i iisí ci Yuté ká bɔ́ nyɛ́mana bá ɔcabakɛna ɔ ɔkɔbɛ́námbaka a tɔkɔndɔ.

¹⁷Ɔɔcɔ awɔ́ u káá bá e cuunyi cɛ ciayɛ́ ciíbe tɛ sɔ́ɔ́na anyía wé yóófíne eé ciíbe o okohíite bɛnyɛ́ma bí osúéténe.

¹⁸Híáná tɔ́na, ɔɔcɔ awɔ́ u káá bá e esíéné tɛ káá nyɛ́mana wu ɔhálɔ́mɔ́na o ooki o okohíite búáyɛ́ bɔlaka bú nyiike.

¹⁹Mahana ne né beénjú bé efume ne né eebe a bá ká bɔ́ bámɔ́kɔ́na e meele ɔ mɔɔ́sɛ́ etéemé !

²⁰Ánɔ bɛ́cɔ́kɔ́lɔ́kɛ́na Bandɔ́mɛsɛ́ anyía ekúlú yɛ́ ɔcabakɛna tɛ bámɔ́kɔ́na e ekúlú yɛ́ ɛfɔŋa cɛ́ tɔbɔ́lá, ta anyía a *buɔ́sɛ́ bú ehélúme bú *Besuif.

²¹Yááŋa anyía ɔ mɔɔ́sɛ́ etéemé, baacɔ ká bɔ́ lɔ́kɔ́máka muuyé buéŋí ɔ ɔhɔla muuyé amɔ́ bá ma bɔ́ lɔ́kɔ́máka o otúme e ekúlú ayɛ́ Bandɔ́mɛsɛ́ ŋe kétíki na ɔmuaná na ɔmɛsɛ́ ɔ ɔkɔɔ́háma aámbáya. Bá tɛ ká háná ábɔ́ lɔ́kɔ́ma nyɛnamá nyí muuyé eényí.

²²Mbɔ́kɔ Bandɔ́mɛsɛ́ tɛ́ á sɔ́mba mekúti mɔɔ́sɛ́ etéemé, keyé ta ɔɔcɔ ɔmɔtɛ́ tɛ ɔ́mɔɔ́ bá wu ɔnɔhɔ. Mbá u ŋaá sɔ́mba mekúti mɔɔ́sɛ́ eémé a asana na bááyɛ́ baacɔ abá u ŋɔ lɔ́tɔ́kɔ.

²³Etéeyé ekúlú, mbɔ́kɔ ɔɔcɔ ŋá banɔ́ láana ɔsɛ : “Ɔ́ɔ lɛcá *Mesíi ooci aaha !” ta anyía : “Mesíi ocinyíé ehenyíé !”, nuti lumítíne.

²⁴Yááŋa anyía ne bemesíi bá bɛfala ne *behémúnyi bɛsana bá bɛfala ká bɔ́ hámɔ́kɔ́na, bé tóŋgínyi tubílícínyínyí, bá kɛ́laka bɛandándá bí *bikéki bɛ́ bɛsana, anyía bébú néŋéke te eebe abá Bandɔ́mɛsɛ́ ŋɔ lɔ́tɔ́kɔ, ɔ́kɔ yááŋa yɛ́ ɔbá aáná.

²⁵Ɛ́ná, ɛ́ ma mɛ́ caŋacaŋa ɔ banɔ́ oókisiki. »

²⁶« Aáná, ekúlú ayɛ́ bá á banɔ́ laana anyía : “Ɛ́náka, *Mesíi áŋa ehenyíé i iisí cɛ ɔsɛ́bɛ́á !”, nɔtɛ cɔba hɔ́á. Ta anyía bá banɔ́ laana báyɛ : “Ícíoci, ú má bɛ́námba aaha !”, nuti lumítíne.

²⁷Yááŋa anyía nyɛkahálɔ́mɔ́na nyɛ́ Ɔɔ́nɔ́ u ɔɔcɔ káá bá háyɛ ɔmanyɛma ú ɛŋɔ́lɔ́muaná : Wá manyɛ́mɛ́ta a aháŋá yɛ́ nyɛháma nyɛ́ ɔɔ́cɔ́, eese ŋa kaáháma a nyɛfiana nyɛ́ ɔɔ́cɔ́ ;

²⁸háyɛ ɛnjaba eeci : “Haála ahá hɛsamba é wé, hɔ́á tɔfɔmbɔ naŋa túá bɛ́bándákána.”[63]

²⁹Hí e elime cɛ mɔɔ́sɛ́ me muuyé eémé, ɔɔ́cɔ́ kéé nyíme, oólí tɛ háná nɔ́ma, tunjoti tɔ́ ɛŋɔ́lɔ́muaná káá kúákɔna ; bɛnyɛ́ma bɛ́ makɛ́nda bɛ́ ɛŋɔ́lɔ́muaná kéé bínyíékinyi.[64]

³⁰Aáná hibílícínyínyí hɛ́ Ɔɔ́nɔ́ u ɔɔcɔ kéé bítóŋínyi ɛ ɛŋɔ́lɔ́muaná ; tɔnyɛ́nɔ́ tɔ́ baacɔ tukime tɔ́ ɔmɛsɛ́ túó túme ɔháya mukéké. Tú káá lɛ́caka Ɔɔ́nɔ́ u ɔɔcɔ á fáakɔna a bɛlɔndɔ́ noómi, wuúci na makɛ́nda meéŋí ne nuúmi nuéŋí.

³¹Yaandándá yɛ́ ɛsɛ́bɛ́ káá bɛ́átábɔ́tɔ́na, Ɔɔ́nɔ́ u ɔɔcɔ yɔ́ tɔ́mɔ́kɔ́na bíáyɛ́ *bililé bɛ́ masɔ́ma e *tubéŋú túnyíse tɔ́ ɔmɛsɛ́ ɔ ɔkɔɔ́bánda bááyɛ́ baacɔ ɔ bɔlɔtɔ́kɔ́nɔ́, bé húlúkúne e tubéŋú tukime tɔ́ ɔmɛsɛ́. »

³²« Ánɔ lɛcá nyiékúnyi enyí bufikié ŋe yiínjie : Ekúlú eyí cííyí ɛndáfɛ á yáaŋa ɔ ɔtɔsɔ, nu ŋe nú ményi anyía tɔbɔ́lá á yáaŋa hoóhi.

³³Híáná tɔ́na, ekúlú ayɛ́ nu ká nɔ́ lɛ́caka bɛsana eébí á bɛ́kɛ́láka, énu menyí anyía yaŋɔ́ Ɔɔ́nɔ́ u ɔɔcɔ kokóokó !

³⁴Aá taaká taaká, ɛ ŋa mɛ́ banɔ́ láana ɛsɛ́ : Baacɔ bá hɛɛya eehi ti ké bú wéékúne bekime ɛ́cɛ bɛsana eebi bikime tɛ ŋáa bɛ́kɛ́la.

³⁵Na ɔmɛsɛ́ na ɔmuaná káá mána, mbá taaká cɛ́ bíámɛ bɛsana tɛ káá mána ta buɔ́sɛ́. »

³⁶« Yááŋa anyía, ta ɔɔcɔ ti ŋé menyi ekúlú eéyé, ta buɔ́sɛ́, te onjéŋí ; te hú *bililé bɛ́ masɔ́ma bɛ́ Bandɔ́mɛsɛ́, ta hú Ɔɔ́nɔ́ u Bandɔ́mɛsɛ́, mbá hú ciamɛ Síkíne bímuócí u ŋe ményi.

³⁷Ánɔ bɛ́tááka anyía bɛsana a bɛ́ ŋa bɛ́kɛ́láka ɔ mɔɔ́sɛ́ amá Nɔ́a ŋaá bá weé líhéke káá bɛ́kɛ́láka híáná ɔ buɔ́sɛ́ bɔ́ nyɛkahálɔ́mɔ́na nyɛ́ Ɔɔ́nɔ́ u ɔɔcɔ.

³⁸Yááŋa anyía e ekúlú eéyé, baacɔ ŋaá bá bábɔ́ nyíáka, bá muákɛ́na, bá bátɛ́ákɛ́na beénjú, bé tónyíki itónyi ɔ ɔkɔɔ́háma ɔ buɔ́sɛ́ abɔ́ Nɔ́a ŋo yóófíne a yaandándá yí hikóló.

³⁹Manɔ́ŋɔ́ tí beébe kátɛ́á ɔ ɔkɔɔ́háma ayɛ́ yaandándá yí olondí ŋeé túme ɔnaa, yó beébe ɔɔ́nɔ́kɔ bekime. Híáná bú káá bá ɔ buɔ́sɛ́ bɔ́ nyɛkahálɔ́mɔ́na nyɛ́ Ɔɔ́nɔ́ u ɔɔcɔ.

⁴⁰E ekúlú eéyé, a banɔ́mɔcɔ́ béfendí a bá ká bɔ́ bá bábɔ́ nyíɔkɔ e esíéné, bé kéé súéténe ɔmɔtɛ́, bó síke ooci a wɔmɔtɛ́.

⁴¹E beénjú béfendí a bá ká bɔ́ bá bábɔ́ ɔɔ́lɔkɔ bɛnyɛ́ma a nɔsɔ́lɔ́ nɔ́mɔtɛ́, bé kéé súéténe ɔmɔtɛ́, bó síke ooci a wɔmɔtɛ́.

⁴²Nɔtɛ hɛ́táka hiiné aná, anyía nu ti ŋé nú menyi buɔ́sɛ́ ebú uunú Otéŋí a Waáŋá ká ka hálɔ́mɔ́na.

⁴³Énu menyí bɔmbányɛ anyía mbɔ́kɔ muútí ooki é menyúkúne ekúlú eyí weébi áŋa wu ɔfaaya nebutúé, keyé u naŋa wɔɔ́ lɔ́bɔ wɔɔ́sɔ anyía u ti wuúci katɛ́na.

⁴⁴Yaátɛ́ asana, énu limíne babɛ́tábɔ́nákánɔ́ bikúlú bikime, anyía Ɔɔ́nɔ́ u ɔɔcɔ ká ka hálɔ́mɔ́na o onjéŋí awɔ́ nu tɛ ŋá nɔ́ bɛ́táá anyía u káá fáaya. »

⁴⁵« Munyiɔnɔ a muáŋa ne injiŋé, u nyíóyísíkínyi bɛsana, áŋa munyiɔnɔ eemu emú uuyé waáŋá ŋe wuúci télímínyi ne o otétényi ciíbe ne o owiínjie bɔnyiɔnɔ bé etémbí bɛnyɛ́ma bɛ́ ɔnyíá hí e bikúlú a bɛ́ á nyɛ́mana.

⁴⁶Bɔmbányɛ ná munyiɔnɔ eémú ekúlú eyí uuyé waáŋá ká ka hálɔ́mɔ́na, yó muúmu kuana wɔɔ́ nyíɔkɔ buólí eébú a nyɛnamá eényí.

⁴⁷Aá taaká taaká ɛ ŋa mɛ́ banɔ́ láana ɛsɛ́ uuyé waáŋá kéé muúmu cumeke bíáyɛ́ bɛnyɛ́ma bikime.

⁴⁸Mbá, mbɔ́kɔ munyiɔnɔ ti ŋé nyíóyísínyi buólí, mu káá kɔɔ́na mɔsɛ : “Háá, uumi waáŋá ti ŋé tényí ka hálɔ́mɔ́na”,

⁴⁹múó túme osúbe bɔsɔ́ɔ́kɔ́ bɔnyiɔnɔ, mbá mu nyíáka, mu múákɛ́na ɔlɔŋɔ ne behíólo meluku,

⁵⁰uuyé waáŋá ká ka hálɔ́mɔ́na na ɔ buɔ́sɛ́ abɔ́ munyiɔnɔ tɛ ŋáá bɛ́táta, ne o onjéŋí ewú mu ti ŋée ményi ;

⁵¹u kéé muúmu íínjie muuyé a mɔ á hɔ́la, i iŋetí ci eemu amɔ́ ɛ náŋa bé yíínjíékíne baacɔ bá tɔbɛ́mbɛ túfendí. Munyiɔnɔ eémú káá lɛ́laka, múɔ́ bíkótóko bɛkɛkɛ. »