Read Nomaande Mat 25 Bible Online

Mat 25 - Nomaande bible

Mat 25

¹« Yááŋa anyía *Butéŋí bɔ́ Ɔmuaná káá hɔ́ákánana asana eeye yɛ́ babɔ́la bɔ́ɔ́hátá : Bé ŋe bú hiítéke ciíbú *lámba anyía bá ka bɔ́ tátáka mubátɛ́na oónjú buɔ́sɛ́ bɔ́ nyíáyɛ́ nyɛtɔ́nɔ́.

²Bátáánɔ eé beébe ne injiŋé, bátáánɔ a bɔ́mɔtɛ́ tɛ́ka ne injiŋé.

³Eebe bá kɛlá injiŋé ŋe bú hiítéke lámba, mbá beébe te ohiite ɔsɔŋɔ yí etémbí.

⁴Mbá eebe bé injiŋé ŋe bú hiítéke ne ciíbú lámba na ɔsɔŋɔ a yɛ́mɔtɛ́ e tundeŋé.

⁵Mubátɛ́na oónjú te o tényí fáaya ; aáná babɔ́la eébé bekime ŋe bú túmé ɔmɔ́ŋɛ́na, bá ŋá fianákɛ́na e hiiné.

⁶Na ɛkatɛ́katɛ́ ci buutú, bá ŋaá lɔ́kɔ́má okelú, ú kɔ́ɔnaka ɔ́sɛ : “Mubátɛ́na kokóokóʼo ! Ánɔ hatɔ́kɔ́na o okoó wuúci káhaʼo !”

⁷Aáná babɔ́la eébé bekime ŋa bɔ́ háányúáka e hiiné, bɔ́ hátɔkɔna, bá ŋá ciáka cííbú lámba.

⁸Babɔ́la bá kɛla injiŋé ŋá bɔ́ kɔ́ŋɛ́na bɔsɔ́ɔ́kɔ́ bé injiŋé báyɛ : “Ánɔ basɔ́ iínjítíte yáánɔ́ ɔsɔŋɔ, anyía cíísú lámba a yáaŋa o onyíme.”

⁹Mbá bɔsɔ́ɔ́kɔ́ bé injiŋé báyɛ : “Eéʼeé, buaka ; yɛ́ tɛ á bá yeéŋí yɛ́ ɔ basɔ́ nyɛ́mana basɔ́ bekime, na basɔ́ na banɔ́. Ánɔ cɔba yáaŋa haála ehé bé ŋeé túé, núá ka bɛ́ɔ́ndɛ́na yáánɔ́ hɔ́á.”

¹⁰Ekúlú ayɛ́ babɔ́la bá kɛla injiŋé ŋa bɔ́ cɔ́bá o okoó yiíyi ɔ́ɔ́ndɔ, mubátɛ́na oónjú nyisíké kaáháma eényí. Aáná bɔsɔ́ɔ́kɔ́ a bá ŋa bɔ́ bɛ́tábɔ́náka ŋe bú óófíne ne wuúci a andaŋía yí nusíke, bá ŋá facá ehenyi.

¹¹E elime eécí, babɔ́la e bé ŋe bú súéte ɔ ɔkɔɔ́wɔɔ́ndɔ ɔsɔŋɔ ŋé síke kaáháma, bé ŋé túme ɔkɔɔna báyɛ : “Cɔ́kɔ́lɛ, Taatá, basɔ́ kuúne !”

¹²Mbá mubátɛ́na ɔsɛ : “Aá taaká, ɛ ŋa mɛ́ banɔ́ láana ɛsɛ́ ɛ tɛ ŋá mɛ banɔ́ ményi buúse bukime.” »

¹³Yésus ŋo sólínyi ɔsɛ : « Ɛ́ɛhɛ́ nɔtɛ hɛ́táka hiiné, anyía nu ti ŋé nú ményi te ekúlú, te onjéŋí ú nyiámɛ nyɛkahálɔ́mɔ́na. »

¹⁴« *Butéŋí bɔ́ Ɔmuaná káá hɔ́ákánána asana eeye yɛ́ bɔnyiɔnɔ bátátɔ́ : Ɔɔcɔ a wɔmɔtɛ́ ŋɔɔ́ lɔ́ŋɔ́kɔ́ bááyɛ́ bɔnyiɔnɔ, wa yáambaka osúéte ɔ ɔkanda, yó beébe iínjíékíne, hú naányɛ́, nyɛnamá nyɛ́ búáyɛ́ bɔnɔ́mɛ a bɔ́mɔtɛ́.

¹⁵Né ooci, u ŋé íínjíé ikute cí biléŋú bɛ́ mɔɔnyɛ́ ɛ́táánɔ ; né ooci a wɔmɔtɛ́, ikute ífendí ; né u bátátɔ́, ikute ɛ́mɔtɛ́. U ŋé yíínjíékíne hú náányɛ́, háyɛ maayɛ́ makɛ́nda áŋa ; u ŋé súéte.

¹⁶Munyiɔnɔ emú bé ŋe yiínjíé ikute cí biléŋú bɛ́ mɔɔnyɛ́ ɛ́táánɔ ŋe tényí é súéte o okoótúme onduné ne biíbi, yɔ́ hɔ́ma ikute cí etémbí cí biléŋú bɛ́ mɔɔnyɛ́ ɛ́táánɔ.

¹⁷Eemu emú bé ŋe yiínjíé ikute cí biléŋú bɛ́ mɔɔnyɛ́ ífendí ŋa kɛ́láka híáná, yɔ́ hɔ́ma ikute ífendí cí etémbí.

¹⁸Mbá sɔ́ɔ́kɔ́ ewú bé ŋe yiínjíé ikute ci biléŋú bɛ́ mɔɔnyɛ́ ɛ́mɔtɛ́ ŋe keé tíméke ɔmɛsɛ́ o o ciíci namba.

¹⁹Ɛ́makɛ́la ekúlú á hɔ́láká yeéŋí, waáŋá u bɔnyiɔnɔ eébé ŋa ka hálɔ́mɔ́ná, u ŋé beébe lɔ́ŋɔ́kɔ. U ŋé beébe batáka anyía bébú wuúci tóŋgínyi anyána bé ŋe síké abɔ́ bɛ́kɛ́lákɛ́na na mááyɛ́ mɔɔnyɛ́.

²⁰Mu buúse ŋaá faáya, múó wíínjie ikute cɛ́ɔ́hátá, mbá mɔsɛ : “Otéŋí, o ŋoó mi íínjie ikute cí biléŋú bɛ́ mɔɔnyɛ́ ɛ́táánɔ, ɛ́ ŋá mɛ hɔ́ma ɛ́táánɔ cí etémbí.”

²¹Uuyé waáŋá ɔsɛ : “Ɛ́hɛ́ɛ, bɔmbányɛ ! Ɔ ɔ́ŋa ambányɛ yɛ́ munyiɔnɔ mɔ mɔŋɔlɛ́. Ahá ó moó mi tóŋínyi anyía ɔ ɔ́ŋa ɔɔcɔ u mɔŋɔlɛ́ a tɔnyɛ́mányɛ́ma, i ŋe mí o télímíkínyi mutéŋínyi mɔ bɛnyɛ́ma biéŋí. Bílénéke aaha na yaŋɔ́ʼo.”

²²Aáná sɔ́ɔ́kɔ́ u ɔláta ewú bé ŋe yiínjíé ikute cí biléŋú bɛ́ mɔɔnyɛ́ ífendí ŋaá fáaya tɔ́na ; múó wíínjie ínyíse, mbá ɔsɛ : “Otéŋí, o ŋoó mi íínjie ikute cí biléŋú bɛ́ mɔɔnyɛ́ ífendí, ɛ́ ŋá mɛ hɔ́ma ífendí cí etémbí.”

²³Mbá waáŋá ɔsɛ : “Ɛ́hɛ́ɛ, bɔmbányɛ ! Ɔ ɔ́ŋa ambányɛ yɛ́ munyiɔnɔ mɔ mɔŋɔlɛ́. Ahá ó moó mi tóŋínyi anyía ɔ ɔ́ŋa ɔɔcɔ u mɔŋɔlɛ́ a tɔnyɛ́mányɛ́ma, i ŋe mí o télímíkínyi mutéŋínyi mɔ bɛnyɛ́ma biéŋí. Bílénéke aaha na yaŋɔ́ʼo.”

²⁴Aáná sɔ́ɔ́kɔ́ u bátátɔ́, ooci ewú bé ŋe yiínjíé ikute ci biléŋú cɛ́ mɔɔnyɛ́ ɛ́mɔtɛ́, u ŋeé bíondísínyi ɔfaaya, mbá ɔsɛ : “Otéŋí, ɛ ŋa mɛ́ bá yemí menyukune anyía ɔ ɔ́ŋa na nyɛhatɛ́. Ɔ ŋɔɔ́ sáŋa haála ahá ɔ tɛ ɔ́mɔ wɔɔ́nɔ, e hueke bɛnyɛ́ma abɛ́ ɔ tɛ ɔ́mɔɔ́ nyɛ́ma.

²⁵Bulíkílíki ŋeé mi tímbíé, ɛ́ɛhɛ́ í ŋgeé mi tímíné mɔɔwɔ mɔɔnyɛ́ ɔ ɔmɛsɛ́ noómi. Ímeémé, meéme hiíte !”

²⁶Mbá uuyé waáŋá ɔsɛ : “Aátɛ́ ! Aabɛ́ yɛ́ munyiɔnɔ lataka ne butise ! Ɔ ŋɔɔ́ bá oó menyukune anyía ɛ ŋaá mɛ sáŋa haála ahá ɛ tɛ ɔ́mɔ́ wɔɔ́nɔ́, i hueke bɛnyɛ́ma abɛ́ ɛ tɛ ɔ́mɔɔ́ nyɛ́ma.

²⁷Ɔ ŋɔɔ́ nyɛmána wu ɔkɔɔ́háya aná maamɛ mɔɔnyɛ́ a haála ahá baacɔ naŋa bá ka bɔ́ fɔ́lɔ́kɔ anyía, a nyiámɛ nyɛkahálɔ́mɔ́na mío koó meéme hiíte na bɛtálá.

²⁸Ánɔ mɛ cáhɔ́nɛ́na ikute ci biléŋú bɛ́ mɔɔnyɛ́ eécí, núé ciíci íínjíé ná ɔɔcɔ a wáŋa ne ikute cí biléŋú bɛ́ mɔɔnyɛ́ cíɔ́hátá.

²⁹Yááŋa anyíaʼo, ɔɔcɔ okime a wáŋa na bɛnyɛ́ma, wuúci bé kéé sólikinyinyi bí etémbí anyía wá bámɔ́kɔ́nɛ́na ne biéŋí ; mbá asana ɔmɔtɛ́, ɔɔcɔ okime awɔ́ u tɛ á bá na bɔkɔ, bá káá aáŋíá ta hú bɔkɔ abɔ́ wáŋa ne buúbu.

³⁰Mbá a aháŋá na munyiɔnɔ eemu a mu tɛ ŋɔ́ yɔ́ɔ́lɔ ta a bɔkɔ, énu wuúci hémúnyi a nɔháatɛ́, i ibíne noómi, haála ahá u ké búle a lɛ́la, u bíkótóko bɛkɛkɛ.” »

³¹« Ekúlú ayɛ́ Ɔɔ́nɔ́ u ɔɔcɔ ka ká hálɔ́mɔ́na eéyé eé nuúmi noómi, ɔlɔŋɔ na bíáyɛ́ *bililé bɛ́ masɔ́ma bikime, u kéé límine aáyá a yaandándá yɛ́ nɔkɔná na bɔɔcɔ bukime.

³²Baacɔ bá mɔnɔŋɔ mekime ká bɔ́ bɛ́bándákána eéyé eé buúse ; aáná u kéé beébe salɔtɔna tuafa túfendí, háyɛ mutétényi bitúké náŋa waá sálɔtɔna tuafa túfendí na ɛtɔ́mbá ne ibúnyi.

³³U káá hákɛ́na ibúnyi a aháŋá yí úúyé ɔɔbɔ́ ú manɔ́mɛ, bibébí a aháŋá yí úúyé ɔɔbɔ́ ú meényi.

³⁴Aáná Otéŋí káá láana baacɔ bá aháŋá yí úúyé ɔɔbɔ́ ú manɔ́mɛ ɔsɛ : “Banɔ́ baacɔ eebe, ciamɛ Síkíne ŋaá banɔ́ sáyábákɛ́na. Énu téŋgínyi, anyía ciamɛ Síkíne ŋaá banɔ́ bátɛ́nɛ́ná Butéŋí eébú o otúme a nyɛbɔ́ta nyɛ́ na ɔmɛsɛ́ na ɔmuaná.

³⁵Yááŋa anyíaʼo, ekúlú ayɛ́ ɛcaná ŋaá mɛ́ nuakɛ́na, nu ŋa nɔ́ mɛ aafakɛna ; nyimóti ŋaá mɛ́ nuakɛ́na, núó mi íínjíékíne menyífé ma ɔmúá ; ɛ ŋaá mɛ bá okenyí, núɔ́ mɛ káháka eénú eé meébe.

³⁶Ekúlú ayɛ́ ɛ ŋaá mɛ bá cɛɛ́tɔ etémbí, nu ŋa nɔ́ mɛ laŋáka ; míɔ kɔnɔkɔ, núo mi tétényíki. Yaŋɔ́ eé ciíbe cɛ ɛcaná, nu ŋga nɔ́ mɛ lɛcáka.”

³⁷Aáná bɛtálɛ́mánánɔ́ bɛ́ baacɔ eébí ké bú wuúci báta báyɛ : “Háá ! Otéŋí a Waáŋá, nyíényí tu ŋa sɔ́ ɔ lɛcáka ɛcaná ɔ́ yɔ́ɔ nuakɛna, tuɔ́ kuɔŋɔ́ aafakɛna e, kuɔŋɔ́ ne nyimóti, tuɔ́ kuɔŋɔ́ íínjíékíne menyífé ma ɔmúá e ?

³⁸Kuɔŋɔ́ okenyí, tuɔ́ kuɔŋɔ́ káháka e, kuɔŋɔ́ cɛɛ́tɔ etémbí, tuɔ́ kuɔŋɔ́ laŋáka e ?

³⁹Nyíényí ɔ ŋɔɔ́ kɔnɔ́kɔ ta anyía ɔ ŋɔ́ɔ bá eé ciíbe cɛ ɛcaná, tuɔ́ kɔ́ kuɔŋɔ́ téŋíki e ?”

⁴⁰Aáná Otéŋí a Waáŋá kéé beébe bɛ́káma ɔsɛ : “Ɛ ŋaá mɛ banɔ́ láana aá taaká isíʼo : Ekúlú ekime ayɛ́ nú ŋa nɔ́ kɛ́lákɛ́na ta hɛnɔ́sɛ́nɔ́sɛ́ hɛ́mɔtɛ́ a báámɛ benyíinyí eebe, yaŋɔ́ oócí nu ŋa nɔ́ kɛ́lákɛ́na aáná.”

⁴¹E elime eécí u káá láana baacɔ bá aháŋá yí uúyé ɔɔbɔ́ ú meényi ɔsɛ : “Ánɔ hatɔ́kɔ́na eémi eé buúse, ciamɛ Síkíne ŋaá banɔ́ lɔ́mɔ́kɔ ! Énu ko oofókíne o oocó ú ekúlú ekime awɔ́ bá ŋaá tábɔ́nákɛ́ná na Musɔ́mɛ́na na bíáyɛ́ bililé bɛ́ masɔ́ma !

⁴²Yááŋa anyíaʼo, ekúlú ayɛ́ ɛcaná ŋa mɛ́ nuakɛ́na, nu tɛ́ ɔ́mɔ nɔ́ mɛ aafɛna ; nyimóti ŋá mɛ nuakɛ́na, banɔ́ te o mi íínjie menyífé ma ɔmúá ;

⁴³ɛ ŋaá mɛ bá okenyí, banɔ́ ta ɔ mɛ káha eénú eé meébe. Ekúlú ayɛ́ ɛ ŋaá mɛ bá cɛɛ́tɔ etémbí, banɔ́ ta ɔ mɛ laŋá. Míɔ kɔnɔkɔ, ta anyía yaŋɔ́ eé ciíbe cɛ ɛcaná, banɔ́ te okoó mi téŋi.”

⁴⁴Aáná baacɔ eébé ké bú wuúci bata tɔ́na báyɛ : “Háá ! Otéŋí a Waáŋá, nyíényí tu ŋa sɔ́ ɔ lɛcáka na ɛcaná ne nyimóti bɛ́ ɔ́ yɔ́ɔ nuakɛna e, kuɔŋɔ́ okenyí, ta anyía ɔɔ́ kɔnɔkɔ, ta anyía kuɔŋɔ́ eé ciíbe cɛ ɛcaná, basɔ́ ta ɔ kuɔŋɔ́ ɔɔ́lɛ́ta e ?”

⁴⁵Mbá u kéé beébe bɛ́káma ɔsɛ : “Ɛ ŋaá mɛ banɔ́ láana aá taaká isíʼo : Ekúlú ekime ayɛ́ nu tɛ ɔ́mɔ nɔ́ kɛ́lɛna ta hɛnɔ́sɛ́nɔ́sɛ́ hɛ́mɔtɛ́ a banásɛ́ eebe, yaŋɔ́ oócí nú tɛ ɔ́mɔ nɔ́ kɛ́lɛna aáná.”

⁴⁶Ɛ́ɛhɛ́ baacɔ eébé ké bú óofine e muuyé mu ekúlú ekime. Mbá bɛtálɛ́mánánɔ́ bɛ́ baacɔ bíó woofine ɔ yɔɔ́sɔɔ́sɔ yí olíhe yí ekúlú ekime. »