Read Nomaande Mat 26 Bible Online

Mat 26 - Nomaande bible

Mat 26

¹Ɛ́makɛ́la Yésus á máná oweékúnyi bááyɛ́ *baákɔ́nɛ́na, mbá ɔsɛ náábɔ́ :

²« Nu ŋe nú menyi anyía *Basíka mɔ lɔ́bɔ mɔɔ́sɛ́ méfendí ; bé ŋeé fiimbieke Ɔɔ́nɔ́ u ɔɔcɔ, bó wuúci aátákɛ́na ɔ ɔmbásá. »

³Aáná ne betéŋínyi *beluli nyiínjie na *baáŋá bé *Besuif ŋa bɔ́ bɛ́bándákána o ooki ú Kayífe, *mutéŋínyi beluli nyiínjie a muáŋá.

⁴Bá ŋá sɔ́mbɔ́tɔ́na anyía bá ŋá bɔ́ nyɛ́mána bá ɔhatɛna Yésus e menjiŋé, bé wuúci ɔ́ɔ́nɔ.

⁵Bá kɔɔnaka báyɛ : « Mbá bú tɛ́ ɔ́mɔɔ́ nyɛ́mana bú ɔbɛ́kɛ́láka e ekúlú yɛ́ bɔŋanda, keyé baacɔ bá bunɔŋɔ ké bú líŋeke, bó héléne etuŋulinyi. »

⁶Buɔ́sɛ́ a búmɔtɛ́ ebú Yésus ŋaá bá a Bɛtani o ooki ú Símon awɔ́ u ŋa cáŋa á bá oónuúnu,

⁷oónjú a wɔmɔtɛ́ ŋeé bíkósíti nááyá ne hindeŋé ɔ ɔɔbɔ́. Hɛ́ ŋaá bá hɛtábɔ́nákánɔ́ na nyɛndányɛ́ nyɛ́ alabatɛ́l, hiíhi hinyíóyónú na taaká cɛ ɔsɔŋɔ yɛ́ náal yɛ́ mɔɔnyɛ́ meéŋí ; yí númbéke. Ekúlú eyí Yésus ŋaá bá waá nyíáka, oónjú oócí ŋé wuúci ootókíne ɔsɔŋɔ eéyé a aatɔ́.

⁸Ɛ́makɛ́la *baákɔ́nɛ́na ábɔ́ lɛ́cá aáná, bé ŋe cunjéke, mbá báyɛ : « Anyíatɛ́ ú maá cáŋgɛna ɔsɔŋɔ eéyé aáná e ?

⁹Yiíye anyía bá ŋaá bá bé o yiíyi túé mɔɔnyɛ́ meéŋí, bɔ́ wáafakɛna basɔ́kásɔ́ka mɔɔnyɛ́ eémé. »

¹⁰Ɛ́makɛ́la Yésus á lɔ́kɔ́máká ɔtáŋa oócí, mbá ɔsɛ náábɔ́ : « Énu wuúci nyɛána mbuumu. Anyíatɛ́ nu ŋe nú wuúci yébi e ? Ú maa mɛ kɛlaka ambányɛ yɛ́ asana.

¹¹Yááŋa anyíaʼo, nua nɔ́ŋa na basɔ́kásɔ́ka aanɔ́ ɛ ɛkatɛ́katɛ́ bikúlú bikime. Mbá yaŋɔ́, ɛ tɛ ámɛ bá aanɔ́ ɛ ɛkatɛ́katɛ́ bikúlú bikime.

¹²Oónjú ooci meé mi ootokine ɔsɔŋɔ yí enumbé aá cɛɛ́tɔ ɔ ɔ mɛ tábɔ́nɛ́na muamɛ munyienene.

¹³Aá taaká taaká ɛ ŋa mɛ́ banɔ́ láana isíʼo : Ɔ ɔmɛsɛ́ okime, bɛhaála bikime ebí bé kéé húlikinyi baacɔ Ambányɛ yɛ́ Ɛsɔ́ma eeye, bé kéé bíkétíkínyi tɔ́na baacɔ asana eyí oónjú ooci áŋa ɔkɛlákánɔ́, bé wuúci bɛ́tááka. »

¹⁴Eéyé ekúlú, ɔmɔtɛ́ u *baákɔ́nɛ́na bɔ́ɔ́hátá ne béfendí bé Yésus, nyiínyi ɛ́cɛ Yútas Iskaliót, ŋa kaá kúána betéŋínyi *beluli nyiínjie ;

¹⁵mbá ɔsɛ náábɔ́ : « Aátɛ́ nú ŋe nú mi íínjíékíne, mbɔ́kɔ ɛ ŋa mɛ́ banɔ́ fiimbine Yésus e ? » Aáná baacɔ eébé ŋa bɔ́ fánáka biléŋú bɛ́ mɔɔnyɛ́ nyitíne na bíɔ́hátá, bé ŋé wuúci íínjíé.

¹⁶O otúme ekúlú eéyé, Yútas ŋaá bá wa yáambaka ekúlú a yambányɛ yí o beébe fiimbine Yésus.

¹⁷Buɔ́sɛ́ bú buúse abɔ́ bá ŋaá bá bá nyíáka biléti a bɛ́ tɛ á bá ne enutisi, *baákɔ́nɛ́na bé Yésus ŋe bú bíkósíti nááyá, báyɛ : « Háányɛ́ o ŋoó léne anyía tú ka sɔ́ ɔ tábɔ́nákɛ́na Basíka e ? »

¹⁸Mbá ɔsɛ náábɔ́ : « Ánɔ cɔbá ; ɛ́kɛlá núénú óófíne a bálɛ́ka, núá lɛca tááná ; énu wuúci laána nɔsɛ : “Taatá, muasɔ́ muékúnyi maá basɔ́ tɔ́ma nɔ́ɔ́wɔ, ɔsɛ yááyɛ́ ekúlú ma nyɛ́mana ; oówo o ooki u ŋaá nyíáka *Basíka na bááyɛ́ baákɔ́nɛ́na.” »

¹⁹Baákɔ́nɛ́na ŋa bɔ́ cɔ́bá, bá ŋgá kɛ́láka háyɛ Yésus ŋeé beébe laákɛ́na, bá ŋá tábɔ́náka Basíka.

²⁰Nanyiɔ́fɔ́, Yésus ŋé limíne ɔ ɔnyíá na bááyɛ́ baákɔ́nɛ́na bɔ́ɔ́hátá ne béfendí.

²¹Bébú nyíékínyi aáná, mbá ɔsɛ náábɔ́ : « Aá taaká ɛ ŋa mɛ́ banɔ́ láana isíʼo : Ɔɔcɔ ɔmɔtɛ́ aá banɔ́ eebe ŋa cɔ́ba o o mí fiimbie. »

²²Ɛ́makɛ́la wá táŋɛ́tá aáná, bé ŋé cunjéke buéŋí beébe bekime ; bé ŋe túme o wuúci bata ɔmɔtɛ́ ɔmɔtɛ́ báyɛ : « Otéŋí a Waáŋá, ɔ́kɔ, tɛ́ka tɛ́ cáŋa yaŋɔ́ e ? »

²³Mbá ɔsɛ : « Ɔɔcɔ ewú é nyiekínyi atáásɛ ɔ́mɔtɛ́ na yaŋɔ́, wuúci yɔ́ cɔ́ba o o mí fiimbie.

²⁴Ɛ́ɛ, Ɔɔ́nɔ́ u ɔɔcɔ ŋa cɔ́ba o owé háyɛ Ciɔɔ́ŋɛ́ ŋé bíkéti a yááyɛ́ asana, mbá mahana ná ɔɔcɔ ewú u ŋeé wuúci fiimbie. Yɛ́ ŋa hɔ́la ɔhɛka nááyá anyía keyé bó tí ómó wuúci bíéne ! »

²⁵Aáná Yútas mu-wuúci-fiimbie ŋa bata tɔ́na ɔsɛ : « Muékúnyi, ɔ́kɔ tɛ́ka tɛ́ cáŋa yaŋɔ́ e ? » Mbá Yésus ɔsɛ : « Eéʼeé, kuɔŋɔ́. »

²⁶Bébú nyíékínyi aáná, Yésus ŋé hiíte eléti ; u ŋé íínjíé Bandɔ́mɛsɛ́ bitéŋíti, u ŋé yiíyi bákáka, u ŋé iínjíékíne *baákɔ́nɛ́na, ɔsɛ : « Énu hiítéke, núá nyíáka banɔ́ bekime ; ciamɛ cɛɛ́tɔ eeci cɛ́áŋa. »

²⁷E elime eécí, u ŋé hiíte hindeŋé hí meluku, u ŋé íínjíé Bandɔ́mɛsɛ́ bitéŋíti ; u ŋé beébe íínjíé, ɔsɛ : « Énu hiíte, núá múákɛ́na meluku eeme, banɔ́ bekime.

²⁸Maamɛ manɔ́ŋɔ́ eeme mááŋa, meéme Bandɔ́mɛsɛ́ ŋo yoónyísínyínyi nyíáyɛ́ nyɛlata nyí bumbénú. Meéme mé ŋó yóotieke a asana yɛ́ baacɔ beéŋí anyía mbá Bandɔ́mɛsɛ́ é beébe nyɛánákɛ́nɛ́na maabɔ́ maabɛ́.

²⁹Ɛ ŋa mɛ́ banɔ́ láana isíʼo : O otúme aámbáya ɛ tɛ ká háná ámɛ múána meluku, ɔ ɔkɔɔ́háma ekúlú eyí tu ké sú muékínyi mecekí na banɔ́ e Butéŋí bɔ́ ciamɛ Síkíne. »

³⁰Ɛ́makɛ́la bábɔ́ hákɛ́na maŋana me onyemiki Bandɔ́mɛsɛ́,[65] nyíábɔ́ nyɛcɔba eényí a nɔkɔndɔ nú Molifié.

³¹Yésus ŋaá laána bááyɛ́ *baákɔ́nɛ́na ɔsɛ : « Buutú bɔ́ hɛ́nánɔ eebu, banɔ́ bekime nu ŋa nɔ́ cɔ́baka ɔ ɔ mɛ bɛ́yúátaka. Yááŋa anyía Ciɔɔ́ŋɛ́ ŋa kɔ́ɔna cɛ́sɛ : “Ɛ ká mɛ́ ɔ́ɔ́nɔ musókóbi ɛtɔ́mbá, ɛtɔ́mbá cíɔ sasiaka.” »

³²U ŋo sólinyi ɔsɛ : « Ta híáná, ekúlú ayɛ́ ɛ ká mɛ haanyua o owé, ɛ ká ka mɛ́ banɔ́ tátáka a *Kalilé. »

³³Bíel ɔsɛ nááyá : « Ta yɛ́ cáŋa á bá anyía bɔsɔ́ɔ́kɔ́ bekime ŋa bɔ́ ɔ bɛ́yúátáka, yaŋɔ́ ɛ tɛ ká mɛ ɔ bɛ́yuáta ta buɔ́sɛ́. »

³⁴Mbá Yésus ɔsɛ nááyá : « Ɛ ŋa mɛ́ ɔ laana aá taaká isíʼo : Hí e buutú eebu, ɔkɛla anyía yaaka yɛ́ ɛkɔkɛ́ é síke á bɛ́lɛ́ta, ɛ́cɛ o no moó mi bínéŋítíkínyi bikúlú bɛ́tátɔ́. »

³⁵Mbá Bíel ɔsɛ : « I ti ké mí o bínéŋítínyi ta buɔ́sɛ́, ta yɛ́ cáŋa á bá anyía túésú wéényi. » Híáná baákɔ́nɛ́na bekime ŋa bɔ́ kɔɔ́náka bɔkɔ búmɔtɛ́.

³⁶Yésus ŋa kaáhámá ɔlɔŋɔ na bááyɛ́ *baákɔ́nɛ́na aá haála a hɔ́mɔtɛ́ nyiínyi anyía Kɛtɛsɛmanɛ́ ; mbá ɔsɛ náábɔ́ : « Énu limíne aaha ; míɔ cɔba ɔ ɔkɔbɛ́cɔ́kɔ́lɛ́na Bandɔ́mɛsɛ́. »

³⁷U ŋɔ́ lɔ́ŋɛ́ta ne Bíel na baáná béfendí bé Sebeté, bé ŋé súéte. Bulíkílíki ŋé túme o wuúci tímbie, mááyɛ́ manɔ́ŋɔ́ kátákáta.

³⁸Mbá ɔsɛ náábɔ́ : « Ɔtɛ́má ŋa mɛ nua e nyiwééné. Énu limíne aaha bɔɔ́sɔ ɔlɔŋɔ na yaŋɔ́. »

³⁹Ɛ́makɛ́la wé beébe laána aáná, u ŋá cɔbɛ́ta ne buúse, u ŋé bísúbúlíéne ɔ ɔmɛsɛ́, u ŋé túme ɔbɛ́cɔ́kɔ́lɛ́na Bandɔ́mɛsɛ́ ɔsɛ : « Ééʼ, Taatá, mbɔ́kɔ búáŋa bɔ́ ɔbɛ́kɛ́láka, cɔ́kɔ́lɛ mɛ ááŋɛ́na hindeŋé hí muuyé eehi eé buúse. Mbá ta híáná, atɛ kɛla háyɛ i ŋe mí léne, mbá kɛláka háyɛ o ŋoó léne. »

⁴⁰U ŋá hatɔ́na ɛndánáka, u ŋgá hálɔ́mɔ́na haála ahá baákɔ́nɛ́na eébé bátátɔ́ ŋaá bá, u ŋé beébe kuána e hiiné. Mbá ɔsɛ né Bíel : « Ɛ́cɛ anyía nu tɛ ɔ́mɔ́ nɔ́ bá nú olimine bɔɔ́sɔ na yaŋɔ́ onjéŋí ɔ́mɔtɛ́ e ?

⁴¹Énu limíne bɔɔ́sɔ, ánɔ bɛ́cɔ́kɔ́lɔ́kɛ́na Bandɔ́mɛsɛ́ anyía muɔ́kɛ́tánana tɛ banɔ́ hámɛ́na. Ɔɔcɔ áŋa na ɔtɛ́má ɛ ɛcálɛ cɛ ɔkɛlaka bɔmbányɛ, mbá yuúhé tɛ́ka. »

⁴²U ŋé túné beébe bɛ́álɔ́na e bikúlú bífendí ɔkɔbɛ́cɔ́kɔ́lɛ́na Bandɔ́mɛsɛ́, ɔsɛ : « Ééʼ, Taatá, mbɔ́kɔ ɔ tɛ ɔ́ bá wu ɔwaáŋia hindeŋé hí muuyé eehi eémi eé buúse, yaŋɔ́ tɛ́ka o o hiíhi múá, bú a bɛ́kɛ́láka háyɛ o ŋoó léne. »

⁴³U ŋgá hálɔ́mɔ́na a maabána ma bááyɛ́ baákɔ́nɛ́na, u ŋé túné beébe kuána e hiiné ; yááŋa anyía hiiné ŋaá bá híé beébe yébíki buéŋí.

⁴⁴Aáná u ŋeé beébe bɛ́álɔ́na, u ŋá cɔba, u ŋé túmé ɔbɛ́cɔ́kɔ́lɛ́na e bikúlú bɛ́tátɔ́, u kɔɔnaka hú bɛsana abɛ́ u ŋa cáŋa ɔ bɛ́cɔ́kɔ́lɛ́na Bandɔ́mɛsɛ́ eé biíbi.

⁴⁵E elime eécí, u ŋgá hálɔ́mɔ́na ná baákɔ́nɛ́na, mbá ɔsɛ náábɔ́ : « Híánáʼo, ánɔ hɛ́táka, nu hélúméke bɔmbányɛ ! Ɛ́ná, ekúlú á yáaŋa hoóhi. Bá ɔcɔba bé é fiimbie Ɔɔ́nɔ́ u ɔɔcɔ ná bakɛla maabɛ́.

⁴⁶Ánɔ hatɔ́na, túé súéte ! Ɛ́ná, ɔɔcɔ ewú u ŋeé mi fiimbie, ooci ú maá kaáháma. »

⁴⁷Ekúlú eyí Yésus ŋaá bá wa yánáŋa ɔ ɔtáŋa, Yútas, ɔmɔtɛ́ u *baákɔ́nɛ́na bɔ́ɔ́hátá ne béfendí, ŋá ka háma ɔlɔŋɔ na yaandándá yí etúte yɛ́ baacɔ ; bá ŋa bɔ́ bá ne meléfényí : Na tɔsala tɔ́ ɛhána na tɔŋɛndá. Yááŋa anyía ne betéŋínyi *beluli nyiínjie na *baáŋá bé *Besuif ŋe bú beébe tɔ́ma.

⁴⁸Yútas, mufiimbie Yésus, ŋaá bɛ́nyɔ́ŋɛ́na etúte yɛ́ baacɔ eéyé anyána bá ŋa bɔ́ cɔ́ba o omenyi waáta ɔɔcɔ. U ŋeé beébe laána ɔsɛ : « Ɔɔcɔ ewú i ŋeé mi bíémbi, íciócí ; énu wuúci mɛɔ́mɛ́na. »

⁴⁹Hí ahɛ́ Yútas ŋa kaáháma, yó bíkósíti nááyá, mbá ɔsɛ : « Muékúnyi, ciɔwɔ eécí e ? » Nyi wuúci bíémbi eényí.

⁵⁰Mbá Yésus ɔsɛ nááyá : « Aláamɛ, bɔkɔ abɔ́ ɔ́ mɔɔ́ faaya ɔ ɔkɔkɛla aaha, buúbu kɛláka fiaŋɔ ! » Eéyé ekúlú, baacɔ a bá ŋa bɔ́ bá na Yútas ŋa bɔ́ bɛ́lɔ́cɛ́na Yésus, bé ŋé wuúci mɛɔ́mɛ́na.

⁵¹Ekúlú eéyé, ɔɔcɔ ɔmɔtɛ́ a baacɔ bá ɔlɔŋɔ ú Yésus ŋɔɔ́ sɔ́mɔ́ núáyɛ́ nɔsala nɔ́ ɔhána, yó súbíne munyiɔnɔ mu *mutéŋínyi beluli nyiínjie a muáŋá, u ŋé wuúci cála ɔ ɔcala ootú.

⁵²Mbá Yésus ɔsɛ nááyá : « Hélúmúnyi núɔ́wɔ nɔsala nɔ́ ɔhána a abákála. Yááŋa anyía ɔɔcɔ okime ewú u kéé hétunyi nɔsala nɔ́ ɔhána ɔ ɔwɔɔ́nɔ sɔ́ɔ́kɔ́ kéé wé nɔsala nɔ́ ɔhána.

⁵³O ti ŋóo menyi anyía ya mɛ́ŋa wu ɔbáŋgɛna ciamɛ Síkíne, yɔ́ mɛ tɔ́mɛ́na ɔ ɔtɔ́mɛ́na ɛlɔŋɔ ciéŋí ci *bililé bɛ́ masɔ́ma bí biité bɛ́ hɔ́laka tɔ́sɛ́na cíɔ́hátá ne ífendí e ?

⁵⁴Mbá, mbɔ́kɔ yámɛ kɛla aáná, keyé anyána bɛsana bɛ́ Ciɔɔ́ŋɛ́ cɛ́ Bandɔ́mɛsɛ́ kéé bínyióyísíkínyi e ? Yááŋa anyía cɛ́ ŋa kɔ́ɔna cɛ́sɛ bɛsana ŋá nyɛmána bɛ́ ɔbɛ́kɛ́láka híáná. »

⁵⁵E ekúlú eéyé, u ŋá báta baacɔ e bé ŋe bú wuúci mɛɔ́mɛ́na ɔsɛ : « Anyíatɛ́ nú ma nɔ́ fáakɔna ɔ ɔ kɔ́ mɛ mɛɔ́mɛ́na na tɔsala tɔ́ ɛhána na tɔŋɛndá, háyɛ anyía ya mɛ́ŋa ocónjólóŋó yɛ́ ɔɔcɔ e ? Yiíyi anyía mɔɔ́sɛ́ mekime ɛ ŋaá mɛ bá yémi limekine o oweékúnyi baacɔ eé *Ciíbe cɛ Bandɔ́mɛsɛ́ ; mbá anyíatɛ́ nu tɛ ɔ́mɔ nɔ́ mɛ mɛɔ́mɛ́na e ?

⁵⁶Mbá bú ma bɛ́kɛ́láka aáná ananyía bɛsana ebí *behémúnyi bɛsana bá Bandɔ́mɛsɛ́ ŋa bɔ́ ɔɔ́ŋɔ́kɔ́ e bínyióyísinyi. » Aáná baákɔ́nɛ́na bekime ŋe bú wuúci bɛ́yúata, nyíábɔ́ nyɛcabakɛna eényí.

⁵⁷E elime eécí, baacɔ a bá ŋa bɔ́ mɛɔ́mɛ́na Yésus ŋe bú wuúci cɔbána ná Kayífe, mutéŋínyi beluli nyiínjie a muáŋá. Hɔ́á, ne *beékúnyi bikotí na baáŋá bé Besuif ŋa bɔ́ bɛ́bándáná.

⁵⁸Bíel ŋaá bá waá látákɛ́na Yésus e elime haaca, ɔ ɔkɔɔ́háma a nɔháatɛ́ nú mutéŋínyi beluli nyiínjie a muáŋá. Ɛ́makɛ́la wé yóófíne a nɔháatɛ́ eénú, u ŋe fúle límine ne bibulúsu, anyía wá lɛcáka háyɛ asana ŋá cɔba o obíóndísínyi.

⁵⁹Ne betéŋínyi beluli nyiínjie na baacɔ bé Hitúlé a hiáŋá bekime ŋa bɔ́ bá bábɔ́ áambaka hɛkɔma hɛ́ bɛfala hɛ́ ɔwɔɔ́nɛ́na Yésus e hiíhi.

⁶⁰Mbá ta híáná, beébe te o hiíhi bɔ́ŋɔ, ta yɛ́ cáŋa á bá anyía baacɔ beéŋí ŋa bɔ́ faákɔ́na o okoó wuúci sɔ́mbɛ́na bɛsana. E elime eécí, baacɔ béfendí ŋá ka tálɛ́mɛ́na,

⁶¹mbá báyɛ : « Basɔ́ eebe tua sɔ́ŋa balɔ́kɔ́mákánɔ́ baabá eeye á kɔɔnaka ɔsɛ : “Ya mɛ́ŋa wu ɔkataka Ciíbe cɛ Bandɔ́mɛsɛ́ eeci, mío ciíci falɛfɔtɔkɔna ɔ mɔɔ́sɛ́ matátɔ́.” »

⁶²Mutéŋínyi beluli nyiínjie a muáŋá ŋá hatɔ́na ɛndánáka, mbá ɔsɛ né Yésus : « Ɔ tɛ ŋɔ́ɔ bɛ́sɔ́mɔ ta hɛkɔma a tɔkɔma eetu atɔ́ baacɔ eebe ŋé bú o túme e ? »

⁶³Mbá Yésus ŋeé lésíkínyi hú mbuumu. Mutéŋínyi beluli nyiínjie a muáŋá ŋé wuúci bícónyi ɔsɛ : « Ɛ ŋɔ mɛ́ ɔ laána eé nyiínyi nyɛ́ Bandɔ́mɛsɛ́ a wáŋa wɔɔ́sɔ anyía, basɔ́ bɛ́káma aámbáya “Ɛ́ɛ”, ta anyía “Eéʼeé” : Ɔ ɔ́ŋa *Mesíi, Ɔɔ́nɔ́ u Bandɔ́mɛsɛ́ e ? »

⁶⁴Mbá Yésus ɔsɛ : « Kuɔŋɔ́, ɔ́ mɔɔ́ kɔɔna aáná. Mbá aá yaŋɔ́, ɛ ŋa mɛ́ banɔ́ láana ɛsɛ́ : Nu ká nɔ́ lɛ́cáka Ɔɔ́nɔ́ u ɔɔcɔ oliménénú a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́ Alámakɛ́nda, nuó wuúci lɛ́caka tɔ́na weé húlúkúne a bɛlɔndɔ́ bɛ́ ɛŋɔ́lɔ́muaná noómi. »

⁶⁵Ɛ́makɛ́la mutéŋínyi beluli nyiínjie a muáŋá á lɔ́kɔ́má aáná, hilóbi ŋe wuúci timbie ; u ŋá laháka bíáyɛ́ bɛlaŋa, mbá ɔsɛ : « Aátɛ́ tɔ́na ! Tu tɛ ŋá háná asɔ́ aamba tɔkɔma tú etémbí. Nú ma nɔ́ lɔ́kɔ́ma na cáánɔ́ eetú háyɛ ú ŋe féníne Bandɔ́mɛsɛ́ !

⁶⁶A nyíánɔ́ʼo ? » Mbá báyɛ, ú maá kua asana, bá ŋá nyɛmána bé o wuúci ɔ́ɔ́nɔ.

⁶⁷Aáná bé ŋe bú túme o wuúci túéne maatá eé buúse, bé wuúci túméke tɔnjɔkɔ ; bɔ́mɔtɛ́ wuúci aátákɛ́na ɛbɛ́lɛ́, bá kɔɔnaka báyɛ :

⁶⁸« Ɔɔcɔ u bɔsɔ́ɔ́kɔ́ Mesíi ! Ɔ́ɔ basɔ́ laana, aányɛ́ ú mó yóo súbe e ? »

⁶⁹Bíel ŋaá bá wa yánáŋa limíne a nɔháatɛ́, ekúlú eyí munyiɔnɔ e muénjú a mumɔtɛ́ mu *mutéŋínyi beluli nyiínjie a muáŋá ŋo yoófíne. Mu ŋeé bíkósíti nááyá, mbá mɔsɛ : « Ɔ́kɔ, tɛ́ka kuɔŋɔ́ tɔ́na ɔ ŋɔɔ́ bá ɔlɔŋɔ ne Yésus, ɔnɔ́kɔ́ yɛ́ *Kalilé eeye e ? »

⁷⁰Mbá Bíel ŋeé bínéŋítínyi eé buúse bɔ́ baacɔ bekime, ɔsɛ : « Ɛ tɛ ŋá mɛ lɔ́kɔ́ma aátɛ́ ɔ ŋɔɔ́ waamba ɔkɔɔna. »

⁷¹U ŋá hatɔ́na ɔ ɔháma. Munyiɔnɔ e muénjú a mumɔtɛ́ ŋé wuúci lɛcá ; u ŋó tóŋínyi baacɔ a bá ŋá bɔ́ bá hɔ́á ɔsɛ : « Nu ŋa nɔ́ lɛ́ca, ɔɔcɔ ooci ŋaá bá ɔ ɔlɔŋɔ ú Yésus, ɔnɔ́kɔ́ yɛ́ *Násalɛt. »

⁷²Bíel ŋe túné bínéŋítínyi Yésus, ɔsɛ : « Háá, ɛ ŋa mɛ́ súátɛ́na aá taaká ɛsɛ́ : I ti ŋé mi menyi ɔɔcɔ oócí buúse bukime ! »

⁷³Hikúlúkúlú, baacɔ a bá ŋa bɔ́ bá aáhá ŋa bɔ́ láana Bíel tɔ́na báyɛ : « Taatá, isuŋí tɛ á bá ɛmbányɛ, ɔ ɔ́ŋa u ɔlɔŋɔ oócí. Nyiɔ́wɔ nyɛnɔkɛna nyɛ́ ɔtáŋa ŋo tóŋínyi bɔmbányɛ haála ehé o ŋoó húle. »

⁷⁴Aáná Bíel ŋeé túme ɔtáŋa, u súátákɛ́na, u bɛ́sɔ́mɔ́kɔ biinyie, ɔsɛ : « Aá taaká, i ti ŋé mí menyi ɔɔcɔ oócí ! » Hú a yaátɛ́ ekúlú, yaaka yɛ́ ɛkɔkɛ́ ŋá bɛ́lɛ́ta ɔ ɔbɛ́lɛ́ta.

⁷⁵Aáná Bíel ŋaá bɛ́táá ɔtáŋa ewú Yésus ŋeé wuúci laána, ɔsɛ : « Ɔkɛla anyía yaaka yɛ́ ɛkɔkɛ́ é síke a bɛ́lɛ́ta, ɛ́cɛ o no moó mi bínéŋítíkínyi bikúlú bɛ́tátɔ́ asɛ o ti ŋóo mi menyi. » Aáná Bíel ŋaá hámá a nɔháatɛ́, nyíáyɛ́ nyitúme ɔkɔlɛ́la eényí na mahana mekime.