Read Nomaande Mat 28 Bible Online

Mat 28 - Nomaande bible

Mat 28

¹E elime ci ehélúme yí *Besuif, a alalɛ yɛ́ ɔyá, buɔ́sɛ́ bɔ́ sɔ́ndɛ, na Malíi, itónyi cɛ Makatala, na Malíi ooci a wɔmɔtɛ́, ŋa bɔ́ hátɔ́na, bɔ́ cɔba ɔ ɔkɔlɛ́ca eenyie.

²Bé ŋe síké ebú bítéme ɔmɛsɛ́ me bínyíétínyi na makɛ́nda buéŋí ; yááŋa anyía *elilé yɛ́ bɔsɔ́ma yí Otéŋí a Waáŋá a yɛ́mɔtɛ́ ŋée húle ɔ Ɔmuaná, yó fúŋulisi yaandándá yɛ́ nyɛndányɛ́, yí ŋé limíne ɔ ɔmuaná.

³Elilé yɛ́ bɔsɔ́ma eéyé ŋaá bá yá mányɛmaka, búáyɛ́ bɔlaka fúúmékéne háyɛ ɔlɔndɔ́.

⁴Aáná bulíkílíki ŋeé tímbíé bibulúsu, bɛ́ nákamaka hú bakɔ bakɔ bakɔ ; bɛ́ ŋa lɔ́ndaka háyɛ biwéewé.

⁵Mbá elilé yɛ́ bɔsɔ́ma eéyé ŋaá táŋɛ́tá, yɔ́ láana beénjú yɛ́sɛ : « Aá banɔ́, nuti líkíméke, i ŋé mi menyi bɔmbányɛ anyía nu ŋa nɔ́ áamba Yésus awɔ́ bá ŋa yáátákɛ́na ɔ ɔmbásá.

⁶U tɛ á bá tɔ́na aaha, ú ma háanyua o owé háyɛ u ŋaá kɔ́ɔ́na. Ánɔ faáya, nú ka lɛca haála ehé bé ŋeé fíényínyi úúyé omime áŋa etémbí.

⁷Énu tényí cɔba fiaŋɔ yáaŋa ɔ ɔkɔláana bááyɛ́ *baákɔ́nɛ́na anyía ú maá háanyua e biwéewé, ú me búéke a *Kalilé ; hɔ́á nu ké nú wuúci lɛcaka. Asana ayɛ́ yamɛ bá ne yiíyi yɛ́ ɔ banɔ́ laána, íyéeyé. »

⁸Bé ŋé tényí ábɔ́ hatɔ́na fiaŋɔ e eenyie. Ɛtɛ́má inyíóyókónú ne bulíkílíki ne obíléne áyá hú mbiɔ́kɛ. Bé ŋé súéte, bá cábakɛna ɔ ɔkɔláana baákɔ́nɛ́na ɛsɔ́ma eécí.

⁹Hikúlúkúlú, bá ŋa lɛca Yésus á fáakɔna eebú eé buúse, mbá ɔsɛ : « Ɛ ŋa mɛ́ banɔ́ téŋítiʼo ! » Aáná bé ŋe bú bíkósíti nááyá, bé ŋe wuúci bítímbíé a akɔlɔ́, bé wuúci nyemiki.

¹⁰Mbá Yésus ɔsɛ : « Nuti líkíméke, ánɔ cɔba yáaŋa nú kaá láána báámɛ benyíinyí anyía bá cɔba a Kalilé ; hɔ́á bá ká bɔ́ mɛ́ lɛcaka. »

¹¹Beénjú eébé ŋa bɔ́ bá bá búánaŋa o ohónyí, ekúlú ayɛ́ baacɔ ɔ bɔ́mɔtɛ́ bá ɔlɔŋɔ ú bibulúsu a bɛ́ ŋaá bá bíá tátáka eenyie ŋa ka bɔ́ hálɔ́mɔ́na a bálɛ́ka o okowóókísi betéŋínyi *beluli nyiínjie bɛsana bikime a bɛ́ ŋá bɛ́kɛ́láka.

¹²Ɛŋakɛlá ne betéŋínyi beluli nyiínjie na *baáŋá bé Besuif ábɔ́ bɛ́bándákána, bɔ́ lɔ́kɔ́mákána ; bé ŋé bú íínjíé bibulúsu mɔɔnyɛ́ meéŋí,

¹³mbá báyɛ náábɔ́ : « Ánɔ kɔɔna nɔsɛ : “Bááyɛ́ baákɔ́nɛ́na ŋe ke bú wuúci éébé nebutúé, basɔ́ e hiiné.”

¹⁴Aáná, mbɔ́kɔ Kɔ́mɛ́na ŋá lɔ́kɔ́ma asana eéyé, basɔ́ tu ŋe sú menyi anyána tu ké sú wuúci cibúnékíne ; aáná nu tɛ ká nɔ́ bɔ́ŋɔ muuyé. »

¹⁵Bibulúsu ŋe bú hiíte mɔɔnyɛ́ eémé, bɔ́ kɛ́láka háyɛ bé ŋeé beébe laákɛ́na. Yaátɛ́ asana bá yánáŋa o obíkéti híáná a asana eéyé ɛ ɛkatɛ́katɛ́ ci Besuif ɔ ɔkɔɔ́háma hɛ́nánɔ eécí.

¹⁶Aáná baákɔ́nɛ́na bɔ́ɔ́hátá na ɔmɔtɛ́ ŋa bɔ́ cɔba a Kalilé a nɔkɔndɔ enú Yésus ŋeé beébe bɛ́lɛ́háká.

¹⁷Ɛ́makɛ́la bá ka bɔ́ hámá, bá ŋa lɛca Yésus ; nyi wuúci nyemiki eényí. Ta híáná, bɔsɔ́ɔ́kɔ́ a bɔ́mɔtɛ́ ŋa bɔ́ bá ne isuŋí ɛ ɛtɛ́má anyía bébú lumitinine.

¹⁸Aáná Yésus ŋeé bíkósíti náábɔ́, mbá ɔsɛ : « Bandɔ́mɛsɛ́ áŋa o mi iínjíénú makɛ́nda mekime me otéŋgínyi na ɔ ɔmuaná noómi na ɔ ɔmɛsɛ́ áyá.

¹⁹Ánɔ cɔba aná, nu ka kɛlaka anyía baacɔ bá mɔnɔŋɔ mekime á bámɔ́kɔ́na báámɛ baákɔ́nɛ́na, nú beébe ootokine eé nyiínyi nyí Síkíne Bandɔ́mɛsɛ́, na nyɛ́ Ɔɔ́nɔ́ ne nyí *Efúúménénú yí Elilé ;

²⁰nú beébe éékúnyíki ɔlátɛ́na bɛsana bikime abɛ́ ɛ ŋa mɛ́ banɔ́ tóŋgínyí. Ánɔ bá na mɔŋɔlɛ́ anyía ya mɛ́ŋa na banɔ́ mɔɔ́sɛ́ mekime ɔ ɔkɔɔ́háma a nyɛmana nyɛ́ ɔmɛsɛ́. »