Read Nomaande Mat 4 Bible Online

Mat 4 - Nomaande bible

Mat 4

¹E elime eécí, *Efúúménénú yí Elilé ŋaá cɔ́bána Yésus i iisí cɛ ɔsɛ́bɛ́á anyía Musɔ́mɛ́na é wuúci kɔkɔ́náka.

²Ɛ́makɛ́la wéé límékíne mɔɔ́sɛ́ etíne éfendí, u tɛ nyíá ta bɔkɔ, ɛcaná ŋé wuúci nuakɛ́na.

³Mɔkɔkɔna baacɔ ŋá faaya aáyá a maabána, mbá ɔsɛ nááyá : « Mbɔ́kɔ asɛ ɔ ɔ́ŋa Ɔɔ́nɔ́ u Bandɔ́mɛsɛ́, laána andányɛ́ eece cá bɛ́cáŋáka biléti. »

⁴Mbá Yésus ɔsɛ : « Ɔɔcɔ ti ŋéé líhe hú na bɛnyɛ́ma bɛ́ ɔnyíá biíbi ne biíbi, mbá u ŋeé líhe tɔ́na ne mehúnyi mekime a má ŋá háma e nyuúté nyɛ́ Bandɔ́mɛsɛ́. »

⁵Ekúlú eéyé, Musɔ́mɛ́na ŋeé wuúci súéténé eé Yelúsalɛm, efúúménénú yɛ́ bálɛ́ka ; u ŋé wuúci béétísi ɔ ɔkaka ú *Ciíbe cɛ Bandɔ́mɛsɛ́,

⁶mbá ɔsɛ nááyá : « Mbɔ́kɔ asɛ ɔ ɔ́ŋa Ɔɔ́nɔ́ u Bandɔ́mɛsɛ́, cimé ɔ ɔmɛsɛ́, anyía Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Bandɔ́mɛsɛ́ kéé yíínjíékíne bíáyɛ́ *bililé bɛ́ masɔ́ma makɛ́nda a yɔ́ɔ́wɔ asana, bɛ́ɔ́ kuɔŋɔ́ bɛ́túáhákɛ́na a cáábɔ́ aabá anyía úúwu ɔkɔlɔ́ ti kúféténe a nyɛndányɛ́.” »

⁷Mbá Yésus ɔsɛ : « Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna tɔ́na cɛ́sɛ : “Atɛ kɔkɔ́náka Otéŋí a Waáŋá, ciɔwɔ Bandɔ́mɛsɛ́.” »

⁸Musɔ́mɛ́na ŋé túné wuúci súéténe a acahacaha yɛ́ nɔkɔndɔ ɔ ɔmuaná ; u ŋé wuúci tóŋgínyi na mɔnɔŋɔ mekime ma ɔmɛsɛ́, na núábɔ́ nɔhɛka nukime.

⁹Mbá ɔsɛ nááyá : « I ŋe mí o wiínjíékíne bɛnyɛ́ma eébí bikime, mbɔ́kɔ o ŋóo mi túmíne eŋéndu o o mi nyemi. »

¹⁰Mbá Yésus ɔsɛ : « Hatɔ́na eémi eé buúse, *Sátan, anyía Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Nyémíki Otéŋí a Waáŋá, ciɔwɔ Bandɔ́mɛsɛ́, mbá é wuúci nyiɔkɛna buólí hú wááyá bímuócí.” »

¹¹Musɔ́mɛ́na ŋé wuúci nyɛána. Bililé bɛ́ masɔ́ma bɛ́ Bandɔ́mɛsɛ́ nyɛfaakɔna eényí a maabána me Yésus o o wuúci sókóbi.

¹²Ɛ́makɛ́la Yésus á lɔ́kɔ́má anyía bá ma hátɛna Sáaŋ, bó wuúci háya eé ciíbe cɛ ɛcaná, u ŋá hálɔ́mɔ́na a *Kalilé.

¹³U ti ómó ko límine a *Násalɛt, mbá u ŋge límékíne a Kabɛlnawum[15], bálɛ́ka a cɛmɔtɛ́ a asálá yɛ́ nuɔmɔ́ nɔ́ Kalilé i iisí cɛ na Sabulɔŋ na cɛ Nafɛtali.[16]

¹⁴Bú ŋaá bɛ́kɛ́láka aáná anyía mehúnyi eeme me *muhémúnyi bɛsana *Ɛsayí é bínyióyísínyi :

¹⁵« Iisí cɛ Sabulɔŋ, iisí cɛ Nafɛtali, a aháŋá yɛ́ nuɔmɔ́ e ecinyíé caányɛ́ cɛ Sulutɛ́ŋ, Kalilé cɛ baacɔ bá mɔnɔŋɔ me etémbí ;

¹⁶bunɔŋɔ bɔ́ baacɔ a bá ŋa bɔ́ bá bébú líhéke i ibíne noómi káá lɛ́caka yaandándá yí eese. Aáná eese káá nɔ́makɛna baacɔ eébé a bá ŋa bɔ́ bá i ibíne noómi cɛ bunɔŋɔ bú biwéewé. »[17]

¹⁷E ekúlú eéyé Yésus ŋeé túme o húle hulinyi baacɔ Ambányɛ yɛ́ Ɛsɔ́ma, u kɔɔnaka ɔsɛ : « Ánɔ bɛ́kákálákɛ́na máánɔ́ maabɛ́, mbá nɔ sɔ́mba ɔkɔlɔ́ eé meéme, anyía Bandɔ́mɛsɛ́ a yáaŋa hoóhi ne otéŋgínyi baacɔ ! »

¹⁸Búmɔtɛ́ buɔ́sɛ́, Yésus ŋaá bá a asálá yɛ́ nuɔmɔ́ nɔ́ *Kalilé. U ŋá lɛcá benyíinyí béfendí : Ne Símon awɔ́ bá ŋaá lɔá nyiínyi anyía Bíel, ne onyíinyí *Andɛlɛ́ ; bábɔ́ áahakɛna mɔhɔ́tɔ́ aá nuɔmɔ́ noómi, anyía bá ŋa bɔ́ bá belumbelumbe.

¹⁹Mbá ɔsɛ náábɔ́ : « Ánɔ mɛ látákɛ́na, mbá ɛ ká mɛ́ banɔ́ céŋisiki be-mi-súéne baacɔ. »

²⁰Hí a yaátɛ́ ekúlú, bá ŋá bɛ́yúátáka ɔbɛ́yúátáka máábɔ́ mɔhɔ́tɔ́, bé ŋé wuúci látákɛ́na.

²¹U ŋa cɔ́bɛ́tɛ́ta ne buúse, yó túné lɛca nyɛ́mɔtɛ́ nyiinyí : Na Sáak na Sáaŋ, baáná bé Sebeté ; beébe a yáábɔ́ ɔkɔkɔ́ noómi na cíábɔ́ síkíne, bábɔ́ tábɔ́náka máábɔ́ mɔhɔ́tɔ́. Yésus ŋé beébe lɔ́ŋɛ́ta.

²²Hí a yaátɛ́ ekúlú, bífendí bɛ́ baacɔ eébé ŋá bɛ́yúátáká na yáábɔ́ ɔkɔkɔ́ na ciabɔ́ síkíne, nyɛlátákɛ́na Yésus eényí.

²³Yésus ŋaá bá u húle á kándaka i iisí cɛ Kalilé ikime ; wé éékúnyíki a *bɛndaŋía bɛ́ ɔbɛ́cɔ́kɔ́lɛ́na bí *Besuif bí iisí ikime eécí, u hulikinyi baacɔ Ambányɛ yɛ́ Ɛsɔ́ma yí *Butéŋí bɔ́ Ɔmuaná, we ééŋúnyísíki tɔ́na baacɔ ne cííbú ɛkɔnɔ ikime na bíábɔ́ bɛfɛ́kɛ́ bikime.

²⁴Bá ŋaá bá bé yóómísíki nyíáyɛ́ nyiínyi a bunɔŋɔ bukime bú Silíi[18], bé wuúci hélékéníne na baacɔ bekime a bá ŋa bɔ́ kɔ́nɔ anamánamá cá ɛkɔnɔ ikime, ne eebe abá bɛɛbɛ́ bí bililé ŋaá bá bíé yébíki, ta bɔkɔnɔ yiílíli, ta bɛsákála. Yésus beébe eéŋúnyísíki bekime.

²⁵Bitúte bɛ́ baacɔ ɔmbana weéŋí ŋaá bá bíé wuúci látáka ; bí húlúkúne na a Kalilé, ne i iisí cɛ Tɛkabólo[19], ne eé Yelúsalɛm, ne eé Yuté, ne i iisí ci ecinyíé caányɛ́ ci nuúci nú Sulutɛ́ŋ.