Read Nomaande Mat 6 Bible Online

Mat 6 - Nomaande bible

Mat 6

¹« Énu bíkékényíki anyía buólí abɔ́ nu ŋa nɔ́ nyíɔnɔ Bandɔ́mɛsɛ́ tɛ bámɔ́kɔ́nɛ́na háyɛ obítóŋínyi e eése cá baacɔ. [30] Mbɔ́kɔ aáná yááŋa, cianɔ́ Síkíne cɛ Ɔmuaná tɛ ká banɔ́ námaka.

²Ekúlú eyí o ŋoó wiínjie ɔsɔ́kásɔ́ka bɔkɔ o o wuúci ɔɔ́lɛ́ta, atɛ cáŋa súbéke hikóló i iŋetí cɛ baacɔ bá tɔbɛ́mbɛ túfendí anyía baacɔ bekime é menyí. Bá náŋa bábɔ́ kɛ́laka aáná na a *bɛndaŋía bɛ́ ɔbɛ́cɔ́kɔ́lɛ́na bí *Besuif noómi ne i ihényí anyía baacɔ é beébe íínjíékíne nuúmi. Ɛ ŋa mɛ́ banɔ́ láana aá taaká ɛsɛ́, bíábɔ́ bɛnamá eébí bé ŋe bú híite aáná.

³Mbá kuɔŋɔ́, ekúlú ekime eyí o ŋoó wiínjie basɔ́kásɔ́ka bɛnyɛ́ma, úúwe ɔɔbɔ́ ú meényi tɛ ɔ́mɔ́ nyɛ́mana wú omenyi bɔkɔ abɔ́ ɔɔbɔ́ ú manɔ́mɛ á kɛla.[31]

⁴Aáná nyíɔ́wɔ nyiínjie káá bá a nyɛnamba noómi ; ciɔwɔ Síkíne yɔ́ kuɔŋɔ́ námaka, anyía u ŋa lɛca aátɛ́ ɔ ŋɔɔ́ kɛla a nyɛnamba noómi. »

⁵« Ekúlú ekime ayɛ́ nu ŋa nɔ́ bɛ́cɔ́kɔ́lɛ́na, nɔtɛ hɔ́áka baacɔ bá tɔbɛ́mbɛ túfendí, beébe bá naŋa bébú lénéke ɔbɛ́cɔ́kɔ́lɛ́na Bandɔ́mɛsɛ́ ɛndánáka na a *bɛndaŋía bɛ́ ɔbɛ́cɔ́kɔ́lɛ́na bí *Besuif na a maabána me ihényí anyía baacɔ é beébe lɛcáka. Ɛ ŋa mɛ́ banɔ́ láana aá taaká anyía bíábɔ́ bɛnamá eébí bé ŋe bú híite aáná.

⁶Mbá ekúlú ekime ayɛ́ kuɔŋɔ́ ɔ ŋɔɔ́ waamba ɔbɛ́cɔ́kɔ́lɛ́na Bandɔ́mɛsɛ́, oofíne oówo e ekéti yí ciíbe yɛ́ ɔfianaka, simíne ehenyi ; mbá á bɛ́cɔ́kɔ́lɔ́kɛ́na ciɔwɔ Síkíne aá haála eéhé a hááŋa a nyɛnamba noómi. Aáná wuúci u kɔ́ yɔ́ɔ namaka, anyía u ŋa lɛca aátɛ́ ɔ ŋɔɔ́ kɛla a nyɛnamba noómi.

⁷Ekúlú ekime ayɛ́ nú ŋa nɔ́ bɛ́cɔ́kɔ́lɛ́na Bandɔ́mɛsɛ́, nɔtɛ hɔláka ɔhálɔ́mɔ́nɛ́na mehúnyi meéŋí a má tɛ ŋɔ́ yɔ́ɔ́lɔ, i iŋetí ecí be-ti-menyí Bandɔ́mɛsɛ́ naŋa bábɔ́ kɛ́laka. Bé ŋe bú bíkéti anyía ɔkɔɔnaka mehúnyi meéŋí, eé wuúci Bandɔ́mɛsɛ́ ŋa bɛ́káma úúbú ɔbɛ́cɔ́kɔ́lɛ́na.

⁸Nuti beébe ketíkínyínyi ; yááŋa anyía, cianɔ́ Síkíne a yáaŋa o omenyi aátɛ́ yɛ́ ŋaá banɔ́ bɛ́ámbɛ́na ɛ́cɛ nú ti ŋe nú wuúci batá ta bɔkɔ.

⁹Aana nuánɔ́ nyɛmána nú o búle bɛ́cɔ́kɔ́lɛ́na Bandɔ́mɛsɛ́ : Ciasɔ́ Síkíne cɛ Ɔmuaná, nyiɔ́wɔ nyiínyi á bá nyifúúménénú ;

¹⁰búɔ́wɔ Butéŋí á faáya, bɛsana ebí o ŋoó léne á bɛ́kɛ́láka aaha ɔ ɔmɛsɛ́ háyɛ ɔ Ɔmuaná.

¹¹Basɔ́ íínjíé hɛ́nánɔ bɛnyɛ́ma bɛ́ ɔnyíá a bɛ́ á basɔ́ nyɛmána.

¹²Basɔ́ nyɛanɛ́nɛ́na máásɔ́ maabɛ́, háyɛ basɔ́ bɛ́muátá tu naŋa tuasɔ́ nyɛ́ánakɛnɛna tɔ́na baacɔ a bá ŋa bɔ́ basɔ́ kɛla bɔɔbɛ́.

¹³Eti lumitine anyía tuásɔ́ kuakɔ́na a mɔɔ́kɛ́tánána noómi, mbá ɔ́ basɔ́ haŋɔ́náka ná aabɛ́ yɛ́ ɔɔcɔ.[32] Yááŋa anyía ne butéŋí, na makɛ́nda, ne eese bɛ́áŋa bíɔ́wɔ bikúlú bikime. Híáná yááŋa.

¹⁴Yááŋa anyíaʼo, mbɔ́kɔ nu ŋa nɔ́ nyɛ́ánɛnɛna bɔsɔ́ɔ́kɔ́ maabɛ́ amá bá ŋá bɔ́ banɔ́ kɛ́la, cianɔ́ Síkíne cɛ Ɔmuaná káá banɔ́ nyɛ́ánakɛnɛna tɔ́na máánɔ́ maabɛ́.

¹⁵Mbá, mbɔ́kɔ banɔ́ nu tɛ ŋá nɔ́ nyɛ́ánɛnɛna bɔsɔ́ɔ́kɔ́, cianɔ́ Síkíne cɛ Ɔmuaná tɛ káá banɔ́ nyɛ́ánɛnɛna tɔ́na. »

¹⁶« Ekúlú ekime eyí nú ŋe nú bíkíilie ɔnyíá, nuti sulúbúéke i iŋetí cɛ baacɔ bá tɔbɛ́mbɛ túfendí ; bé ŋe bú súŋe meése anyía bébú tóŋgínyi bɔmbányɛ baacɔ anyía bé me bú bíkíilieke ɔnyíá. Aá taaká ɛ ŋa mɛ́ banɔ́ laana anyía bíábɔ́ bɛnamá eébí bé ŋe bú hiíte aáná.

¹⁷Mbá kuɔŋɔ́, ekúlú ekime eyí o ŋoó bíkíilie ɔnyíá, bɛ́súáka buúse, mbá e bífééfíki ɔsɔŋɔ yí enumbé ;

¹⁸anyía mbá eti tóŋínyi baacɔ anyía ó moó bíkíilie ɔnyíá. Aáná o kóó tóŋínyi hú ná ciɔwɔ Síkíne a wáŋa a nyɛnamba noómi ; wuúci u kɔ́ yɔ́ɔ namaka, anyía u ŋa lɛca aátɛ́ ɔ ŋɔɔ́ kɛla a nyɛnamba noómi. »

¹⁹« Nɔtɛ bátɛ́ákɛ́na búánɔ́ bɔnɔ́mɛ aaha ɔ ɔmɛsɛ́ ooci, haála ehé ne tufike na nyɛnyía áŋa bí o buúbu caŋgɛna ; ta anyía haála ehé beébi á bɔ́ŋa bá ɔkataka ciíbe, bó buúbu eébéke.

²⁰Ánɔ bátɛ́ákɛ́na yáaŋa búánɔ́ bɔnɔ́mɛ a Bunɔŋɔ bɔ́ Ɔmuaná, haála ehé te tufike, ta nyɛnyía tɛ a bá bí o buúbu caŋgɛna, te beébi tɛ abɔ́ bá bá ɔkataka ciíbe, bó buúbu eébéke.

²¹Yááŋa anyía aá haála ahá búɔ́wɔ bɔnɔ́mɛ áŋa, hí a hɔ́á tɔ́na úúwe ɔtɛ́má áŋa. »

²²« Eése áŋa háyɛ *lámba cɛ cɛɛ́tɔ ; ekúlú ekime ayɛ́ cɔ́ɔ́wɔ eése áŋa ambányɛ, ciɔwɔ cɛɛ́tɔ ikime áŋa e eese noómi.

²³Mbá, mbɔ́kɔ cɔ́ɔ́wɔ eése tɛ á bá ambányɛ, ciɔwɔ cɛɛ́tɔ ikime áŋa i ibíne noómi. Mbɔ́kɔ aná eese a yáaŋa nɔ́ɔ́wɔ áŋa ibíne, ibíne eécí kéé fíítene fííʼ ɔ ɔhɔla. »

²⁴« Ta munyiɔnɔ mumɔtɛ́ tɛ á bá mu ɔnyiɔkɛna síkíne cí buólí ífendí, anyía keyé u ké búle é léne eeci, u lénéke ecinyíé ɔ ɔhɔla ; ta anyía keyé u ké búle á bábɛ́na síkíne eeci, u lɔ́kɔ́mákɛ́na ecinyíé. Nu tɛ anɔ́ bá nú ɔhákɛ́nɛ́na bɔkɔ búmɔtɛ́ na Bandɔ́mɛsɛ́ na bɔnɔ́mɛ bɔ́ ɔmɛsɛ́ ooci.

²⁵Yaátɛ́ asana ɛ ŋa mɛ́ banɔ́ láana anyía nɔtɛ bɛ́ákákɛ́na a asana na bɛnyɛ́ma bɛ́ ɔnyíá anyía núénú líhéke, mbá ta a asana na bɛlaŋa abɛ́ nu ŋa nɔ́ láŋabaka. Yaŋɔ́ ɛsɛ, olíhe ŋa hɔ́la bɛnyɛ́ma bɛ́ ɔnyíá, cɛɛ́tɔ hɔlaka bɛlaŋa e ?

²⁶Ánɔ lɛcáka bɔmbányɛ tunonyí ; tú tɛ ŋɔ́ yɔ́ɔ́nɔ bɛnyɛ́ma, tú ti biíbi sáŋa, aáná tú tɛ a bá ta na afɛná, ta na tɔɔ́la. Mbá ta híáná, cianɔ́ Síkíne cɛ Ɔmuaná ŋeé tuútu túke. Énu menyí anyía nú ŋa nɔ́ hɔ́la buéŋí tunonyí.

²⁷Aá banɔ́ eebe, aányɛ́ wáŋa wu osolinyi ta buɔ́sɛ́ búmɔtɛ́ e úúyé olíhe ɔ ɔbɛ́ákɛ́na awɔ́ ú ŋa bɛ́ákɛ́na e ?

²⁸Mbá anyíatɛ́ nú ŋa nɔ́ bɛ́ákɛ́na aná a asana na bɛlaŋa bɛ́ ɔlaŋabaka e ? Ánɔ lɛcáka bɔmbányɛ bɛsama bí bihuti bɛ́ bɛtúalɔ́ : Bɛ́ tɛ ŋɔ́ nyiɔ buólí, bɛ́ tɛ tábɔ́na bɛlaŋa.

²⁹Ta híáná, ɛ ŋa mɛ́ banɔ́ láana anyía te Otéŋí Sálɔmɔn a nɔhɛka nɔ́ búáyɛ́ bɔnɔ́mɛ noómi tɛ ɔ́mɔ bá na nyɛnamá nyɛ́ bɛmbányɛ bɛ́ bɛlaŋa háyɛ asama yiíyi ɔ́mɔtɛ́.

³⁰Mbɔ́kɔ Bandɔ́mɛsɛ́ ŋe híkisi bihuti bɛ́ bɛtúalɔ́ a bɛ́áŋa ɛndánáka hɛ́nánɔ, nɔɔyá bé o biíbi luliki, mbá anyána aná u tɛ káá banɔ́ láŋaka, banɔ́ abá nua nɔ́ŋa ne hilumitininelúmítíníne e ?

³¹Nɔtɛ bɛ́ákákɛ́na aná, nu kɔɔnaka nɔsɛ : “Aátɛ́ tú ŋa sɔ́ nyíáka e ; na aátɛ́ tú ŋa sɔ́ muaka e ? Ta anyía aátɛ́ tú ŋa sɔ́ láŋabaka e ?”

³²Baacɔ bá ɔmɛsɛ́ ooci, be-ti-menyí Bandɔ́mɛsɛ́, beébe bé ŋe bú bíyébi ɔ ɔwaamba bɛnyɛ́ma eébí bikime. Mbá aá banɔ́, cianɔ́ Síkíne cɛ Ɔmuaná ŋeé menyi aátɛ́ yɛ́ ŋaá banɔ́ bɛ́ámbɛ́na.

³³Ánɔ hɔláka obíyébi ɔ ɔwaamba ne *Butéŋí bɔ́ Bandɔ́mɛsɛ́ ne efúúménénú yí olíhe e yí ŋe wuúci bíléníne ; aáná u káá banɔ́ sólikinyinyi bɛnyɛ́ma eébí bí etémbí bikime.

³⁴Nɔtɛ bɛ́ákákɛ́na aná a bɛsana bɛ́ nɔɔyá, anyía nɔɔyá káá bá na bíáyɛ́ bɛsana. Na ɔyá na múáyɛ́ muuyé. »