Read Nomaande Mat 9 Bible Online

Mat 9 - Nomaande bible

Mat 9

¹Yésus ŋe yóófíne ɔ ɔkɔkɔ́, u ŋá hálɔ́mɔ́na, u ŋá háná látɛ́na nuɔmɔ́ ; u ŋá cɔbá aá ciayɛ́ bálɛ́ka.[38]

²Aáná bé ŋeé wuúci héléníné asákála asámbálɛ́ánánɔ́ e nyibúyé. Ɛŋakɛlá waá lɛ́cá olumitinine ú baacɔ eébé, mbá ɔsɛ ná asákála : « Ɔɔ́nɔ́, bɛ́kɛ́ndɛ́naʼo ! Ɛ́ mɔ mɛ́ ɔ nyɛanɛnɛna mɔɔwɔ maabɛ́. »

³Eéyé ekúlú *beékúnyi bikotí ɔ bɔ́mɔtɛ́ ŋe bú túmé obílúmínyi, mbá báyɛ : « Ɔɔcɔ ooci áŋa o oféníne Bandɔ́mɛsɛ́. »

⁴U ŋé ményí cííbú ibíkéti, mbá ɔsɛ náábɔ́ : « Anyíatɛ́ nua nɔ́ŋa na bɛɛbɛ́ bí ibíkéti eébí aáná e ?

⁵Aátɛ́ yɛ́ ŋa hɔ́la ɔnata e ? Ɔkɔɔna anyía : “Ɛ́ mɔ mɛ́ ɔ nyɛanɛna mɔɔwɔ maabɛ́”, ayɛ́ʼ ɔkɔɔna anyía : “Hatɔ́na ɛndánáka, kandáka” e ?

⁶Ɛ́náʼo, ɛ ŋaá mɛ aamba núénú ményi anyía Ɔɔ́nɔ́ u ɔɔcɔ áŋa na makɛ́nda ɔ ɔmɛsɛ́ ma ɔnyɛanakɛnɛna baacɔ maabɛ́. » Mbá ɔsɛ ná asákála : « Hatɔ́na ɛndánáka, hiíte nyíɔ́wɔ nyibúyé, eélúé oówo o ookiʼo. »

⁷Ɔɔcɔ ŋá hatɔ́na ɛndánáka, nyiélue eényí e úúyé ooki.

⁸Ɛ́makɛ́la baacɔ ábɔ́ lɛ́cá aáná, bulíkílíki ŋé beébe nyióyíki ɛ ɛtɛ́má hú mbiɔ́kɛ ; bé iínjíékíne Bandɔ́mɛsɛ́ nuúmi a asana na nyɛnamá nyɛ́ makɛ́nda anyɛ́ wáŋa owíínjíékínénú baacɔ.

⁹Yésus ŋa hátɔ́na aáhá, yó súéte. Waá hɔ́laka enenyíé o ohónyí, u ŋá lɛca ɔɔcɔ a wɔmɔtɛ́ nyiínyi ɛ́cɛ Matío, oliménénú a nyíáyɛ́ nyinyiɔ buólí nyí *betúé etéési. Mbá ɔsɛ nááyá : « Mɛ látáka. » Matío ŋá hatɔ́na ɛndánáka, u ŋé wuúci látáka.

¹⁰Yésus ŋaá bá ɔ ɔnyíá bɛnyɛ́ma bɛ́ ɔnyíá o ooki ú Matío. Ne betúé etéési beéŋí na bakɛla maabɛ́ a bɔ́mɔtɛ́ ŋa bɔ́ fáákɔ́na hɔ́á o okonyíényi ne wuúci na bááyɛ́ *baákɔ́nɛ́na.

¹¹Ɛ́makɛ́la *Bafalisiɛ́ŋ ábɔ́ lɛ́cá aáná, bá ŋá batá bááyɛ́ baákɔ́nɛ́na báyɛ : « Anyíatɛ́ muanɔ́ muékúnyi ŋeé nyíényi ne betúé etéési na bakɛla maabɛ́ bé etémbí e ? »

¹²Ɛ́makɛ́la Yésus á lɔ́kɔ́má Bafalisiɛ́ŋ ábɔ́ bátaka aáná, mbá ɔsɛ : « Tɛ́ cáŋa ba-tɛ-kɔnɔ́ bá ŋa bɔ́ áamba muándánána, mbá bɔkɔnɔ́kɔ́nɔ.

¹³Ánɔ ka aákɔ́nákɛ́na mehúnyi eeme ma Ciɔɔ́ŋɛ́ a má ŋa kɔ́ɔna másɛ : “Ɔtɛ́má ú ɔbɛ́cáma baacɔ mahana ú ŋeé mi bíléníne ɔ ɔhɔla bɛfɔná bí bitúké abɛ́ bá ŋa mɛ sɔ́mbɛ́na.” Yááŋa anyía ɛ tɛ́ ɔ́mɔɔ́ fáaya ɔ ɔmɛsɛ́ ooci ɔ ɔkɔláana baacɔ e bé ŋe bú bíhííte háyɛ bɛtálɛ́mánánɔ́ bɛ́ baacɔ ɛsɛ́ : “Ánɔ bɛ́kákálákɛ́na maanɔ́ maabɛ́”, mbá bakɛla maabɛ́. »

¹⁴Baákɔ́nɛ́na bá Sáaŋ Batis ŋe bú bíkósíti né Yésus, mbá báyɛ nááyá : « Anyíatɛ́ na basɔ́ na *Bafalisiɛ́ŋ tú naŋa tuésú bíkíilieke ɔnyíá bɛnyɛ́ma, mbá bɔ́ɔ́wɔ *baákɔ́nɛ́na tɛ kɛla aáná e ? »

¹⁵Mbá Yésus ɔsɛ náábɔ́ : « Nu ŋe nú bíkéti anyía baacɔ abá bɔ́ lɔ́ŋɔ́kɔ e nusíke á bɔ́ŋa bé osúlubueke ekúlú ekime ayɛ́ ɔnɔ́mɛ áŋa ne beébe e ? Mbá ekúlú káá fáaya ayɛ́ bá kɔ́ bɔ́ sɔ́mɔ ɔnɔ́mɛ aabɔ́ ɛ ɛkatɛ́katɛ́ ; aáná bé ké bú bíkíilie ɔnyíá. »

¹⁶« Ta ɔɔcɔ ti ŋé hiite ekéti yɛ́ bɔlaka a buɔ́sɔ anyía wáá látákɛ́na e elunénú yɛ́ bɔlaka. Mbɔ́kɔ ɔɔcɔ ŋá kɛ́láka aáná, keyé ekéti a yɔɔ́sɔ káá láhɔ́na ebulunénú, yó wééŋényísíki nyɛlahɛa.

¹⁷Híáná tɔ́na, ta ɔɔcɔ ti ŋe cébínyi mecekí e bilunénú bɛ́ bɛsɔ́mɔ ; mbɔ́kɔ ɔɔcɔ ŋá kɛ́láka aáná, keyé bɛsɔ́mɔ káá sáaliaka, mɔ́ hámɔ́kɔ́na mekime, bɛsɔ́mɔ bɛ́ɔ cáŋiaka bikime. Mbá ɔɔcɔ ŋá nyɛmána wu ɔháya mecekí a bɛsɔ́mɔ a bɛɔ́sɔ. Aáná bífendí eébí káá háma bɔmbányɛ. »

¹⁸Ekúlú eyí Yésus ŋaá bá waá táŋáka bɛsana eébí ne beébe, mutéŋínyi *Besuif a mumɔtɛ́ nyɛkaáháma eényí ; u ŋé wuúci túmíne eŋéndu, mbá ɔsɛ : « Uumi ɔɔ́nɔ́ e woónjú mé lésíkínyi hí aámbáya aámbáya ; mbá cɔ́kɔ́lɛ, faáya é ké wuúci tála aabá a cɛɛ́tɔ, mbá wá haanyua o owé. »

¹⁹U ŋaá hátɔ́na, u ŋé wuúci láta ɔlɔŋɔ na bááyɛ́ *baákɔ́nɛ́na.

²⁰Oónjú a wɔmɔtɛ́ ŋaá bá aáhá, manɔ́ŋɔ́ ŋaá bá meé wuúci hámɔ́kɔ́na, tuɔŋɔ a yáaŋa túɔ́hátá ne túfendí. U ŋée bíkósíti né Yésus eeyé e elime, u ŋé bítíse hibéŋú hɛ́ búáyɛ́ bɔlaka.

²¹Yááŋa anyía u ŋeé bíkéti ɔɔyɔ́ ɔ ɔtɛ́má noómi ɔsɛ : « Mbɔ́kɔ ya mɛ́ŋa te wu obítíse bú bítíse búáyɛ́ bɔlaka, ɛ ŋaá mɛ aáŋɔ́núaka. »

²²Yésus ŋaá bɛ́kúálɛ́ta, yɔ́ lɛca oónjú oócí, mbá ɔsɛ : « Meemé, bɛ́kɛ́ndɛ́naʼo. Uúwú olumitinine mó yóo nohi. » Hí a yaátɛ́ ekúlú, oónjú nyɛáŋɔ́nua eényí.

²³Yésus ŋá kaá háma o ooki ú mutéŋínyi Besuif. Ɛ́makɛ́la wá lɛcá anyía baháya maŋana á bɔ́áŋa hoóhi ne munyienene, u ŋa lɛcá tɔ́na nyɛkɔca nyɛ́ baacɔ nyíé bíyébíki buéŋí,

²⁴mbá ɔsɛ : « Ánɔ hámɔ́kɔ́na, u tɛ á bá owéénú, wáŋa e hiiné. » Baacɔ ŋé túmé o wuúci cɛ́ca.

²⁵Ɛ́makɛ́la bé hémúkúnyi baacɔ bekime a nɔháatɛ́, Yésus ŋé oofíne e ekéti yí ciíbe, u ŋé tímbíe ɔbɔ́la ɔ ɔɔbɔ́ ; ɔbɔ́la nyɛhatɔna ɛndánáka eényí.

²⁶Aáná nulumí nɔ́ asana eéyé ŋaá lɔ́kɔ́máná a aháŋá yí iisí ekime etéeyé.

²⁷Ekúlú eyí Yésus ŋaá hátɔ́na o osúéte, bendíméndíme béfendí ŋé bú túme o wuúci látɛ́na, bá kɔɔnaka okelú ɔ ɔmuaná báyɛ : « Ɔɔ́nɔ́ u Táfit, cɔ́kɔ́lɛ, basɔ́ bɛ́cáma mahanaʼo ! »

²⁸Ɛ́makɛ́la wá kaáháma o ooki, bendíméndíme eébé ŋé bú bíkósíti nááyá, mbá ɔsɛ náábɔ́ : « Nu ŋe nú lumitinine anyía ya mɛ́ŋa wu ɔ banɔ́ eéŋúnyísi e ? » Báyɛ : « Ɛ́ɛ, Taatá, tu ŋe sú lumitinine aáná. »

²⁹Aáná u ŋeé beébe sɔ́lɔ́náká eése, mbá ɔsɛ : « Bú á bɛ́kɛ́láka háyɛ nuénú lumitinine. »

³⁰Nyíábɔ́ nyitúme ɔlɛcana eényí. Aáná u ŋeé beébe siséke ɔsɛ : « Nɔtɛ bɛ́lɛ́áŋɔ́nɛ́na ta ɔɔcɔ ta ɔmɔtɛ́ anyía yaŋɔ́ ɛ́ ma mɛ́ banɔ́ eéŋúnyísi. »

³¹Mbá ta híáná, hí ahɛ́ bé ŋe bú súété, bé ŋé túmé o húlé owoómísi nyiínyi nyí Yésus a bunɔŋɔ bukime eébú.

³²Ɛ́makɛ́la bendíméndíme eébé ebú súéte, bé ŋé héléníne Yésus ɔɔcɔ a wɔmɔtɛ́ awɔ́ *aabɛ́ yí elilé ŋoó mómísi, ɔ tɛ táŋa.

³³Ɛ́makɛ́la Yésus é hémúnyi aabɛ́ yí elilé né múkúmúku eémú, ɔɔcɔ ŋá háná túme ɔtáŋa. Nyɛkɔca nyɛ́ baacɔ a nyɛ́ ŋaá bá aáhá ŋeé kékéke, mbá nyɛ́sɛ : « Bá tɛ ŋá lɛ́ca ta buɔ́sɛ́ nyɛnamá nyɛ́ asana á bɛ́kɛ́láka aáná a bunɔŋɔ bú *Islayɛ́l. »

³⁴Mbá *Bafalisiɛ́ŋ a bá ŋa bɔ́ bá aáhá ŋa bɔ́ bá bábɔ́ kɔ́ɔnaka báyɛ : « Tɛ́ka a makɛ́nda ma Sátan, mutéŋínyi *bɛɛbɛ́ bí bililé, u ŋeé hémúnyi bɛɛbɛ́ bí bililé a baacɔ e ? »

³⁵Yésus ŋaá bá u húlé á kándaka na a bálɛ́ka ciéŋí na ɔ mɔnɔŋɔ meéŋí ; u eékúnyíki baacɔ a *bɛndaŋía bɛ́ ɔbɛ́cɔ́kɔ́lɛ́na bí *Besuif, u beébe hulikinyi Ambányɛ yɛ́ Ɛsɔ́ma yí *Butéŋí bɔ́ Ɔmuaná, u eéŋúnyísíki na bɔkɔnɔ́kɔ́nɔ bekime na baacɔ bá bɛfɛ́kɛ́ bekime.

³⁶Ɛŋakɛlá wá lɛ́cáka akɔca cá baacɔ ceéŋí abɛ́bándákánɔ́, mahana ŋé wuúci tímbie buéŋí a baacɔ eébé, anyía bá ŋa bɔ́ bá bɔtɔmbɔ́kɔ́nɔ́, beébe tɔ́na bakasákánɔ́ ; bá hɔ́áka ɛtɔ́mbá a cɛ́ tɛ á bá ne mutétényi.

³⁷Aáná u ŋaá laána bááyɛ́ *baákɔ́nɛ́na ɔsɛ : « Bɛyɔyɛ́ bɛ́ ɔbándáka áŋa biéŋí, mbá babánda á bɔ́ŋa betíkítíki.

³⁸Ánɔ bɛ́cɔ́kɔ́lɔ́kɛ́na aná muútí bɛyɔyɛ́ wá háná tɔ́mɔ́kɔ́na baacɔ ɔ ɔkɔɔ́bánda bíáyɛ́ bɛyɔyɛ́. »