Read Nomaande Mak 1 Bible Online

Mak 1 - Nomaande bible

Mak 1

¹Nyitúme nyɛ́ Ambányɛ yɛ́ Ɛsɔ́ma yí *Yésus *Kilís, Ɔɔ́nɔ́ u *Bandɔ́mɛsɛ́.

²Yááŋa yɔɔ́ŋɔ́kɔ́nɔ́ e nufule nú *muhémúnyi bɛsana mɔ Bandɔ́mɛsɛ́, *Ɛsayí, anyía : « Yaŋɔ́ Bandɔ́mɛsɛ́, í me mí buekisi uumi ɔɔcɔ u bɔsɔ́ma ɔ ɔ kuɔŋɔ́ tábɔ́nɛ́na ohónyí.

³U ŋo sóbi okelú ɔ ɔmuaná i iisí cɛ ɔsɛ́bɛ́á ɔsɛ : “Ánɔ tábɔ́náka ohónyí ú Otéŋí a Waáŋá ; énu nyimíkínyi cííyí ihényí.” »

⁴Aáná Sáaŋ ŋaá hámá i iisí cɛ ɔsɛ́bɛ́á, u ŋeé túmé owootine baacɔ, u sobiki ɔsɛ : « Ánɔ bɛ́kákálákɛ́na máánɔ́ maabɛ́, mbá nɔ sɔ́mba ɔkɔlɔ́ eé meéme ; mbá nu bíótókíne, aáná Bandɔ́mɛsɛ́ káá banɔ́ nyɛ́anakɛnɛna máánɔ́ maabɛ́. »

⁵Híáná baacɔ bekime ne bé *Yelúsalɛm ne bé iisí ci *Yuté ikime ŋaá bá bábɔ́ fáakɔna ná Sáaŋ, bá bɛ́kɔ́tɔ́kɔ máábɔ́ maabɛ́ ɛ ɛkatɛ́katɛ́ cɛ baacɔ, u beébe ootokine eé nuúci nú Sulutɛ́ŋ.

⁶Sáaŋ ŋaá bá waá láŋabaka bɔlaka a bú ŋaá bá bunuákánɔ́ na bɛhɔcá bɛ́ ɛnyama acɛ́ bɔ́ ŋɔɔ́ lɔ́ŋɔ anyía samó, u bísúŋéke kandá cɛ yɔɔfa a nɔsɛ́ŋá. U ŋaá bá waá nyíáka na bɛtandá na buɔ́yɔ́ abɔ́ u ŋaá bá u húle ɔ bɔ́ŋgɔ́na ;

⁷u laakɛna baacɔ ɔsɛ : « Ɔɔcɔ awɔ́ á mɛ hɔla a makɛ́nda kokóokó eémi e elime. Ɛ tɛ ŋa mɛ́ nyɛmána ooci a wáŋa wu okutimine o ohembuleke tukolí tɔ́ bíáyɛ́ bɛkandɛ́na.

⁸Yaŋɔ́, ɛ́ ma mɛ́ banɔ́ ootokine ne menyífé. Mbá wuúci, u káá banɔ́ óotokine ne *Efúúménénú yí Elilé. »

⁹Ɔ mɔɔ́sɛ́ eémé, Yésus ŋeé húlé a bunɔŋɔ bɔ́ *Násalɛt i iisí cɛ *Kalilé ; u ŋga háma eé nuúci nú Sulutɛ́ŋ. Sáaŋ ŋé wuúci ootíne.

¹⁰Hú ayɛ́ Yésus ŋaá hámá e menyífé, u ŋa lɛ́cá Ɔmuaná me bíhúúne, *Efúúménénú yí Elilé á sɔ́ɔ́náka nááyá i ihúényínyí ci hibúbé.

¹¹Okelú ŋá lɔ́kɔ́mána ú húlúkúne ɔ Ɔmuaná, ú kɔɔnaka ɔ́sɛ : « Ɔ ɔ́ŋa uumi ɔɔ́nɔ́ u ɔtɛ́má ; ya mɛ́ŋa ne obíléne weéŋí nɔ́ɔ́wɔ. »

¹²Hí e elime eécí, *Efúúménénú yí Elilé ŋé wuúci súéténe i iisí cɛ ɔsɛ́bɛ́á.

¹³U ŋge límékíne hɔ́á mɔɔ́sɛ́ etíne éfendí ; *Sátan yó wuúci kɔkɔnaka. Yésus ŋaá bá weé líhéke na ɛnyama cí eciké, *bililé bɛ́ masɔ́ma bɛ́ Bandɔ́mɛsɛ́ wuúci sókóbíki.

¹⁴Yésus ŋeé súété a *Kalilé, u húlé húlikinyi baacɔ Ambányɛ yɛ́ Ɛsɔ́ma yɛ́ Bandɔ́mɛsɛ́. Bá ŋaá bá ɛ́cɛ bá maá hátɛna Sáaŋ, bó wuúci háya eé ciíbe cɛ ɛcaná.

¹⁵Yésus ŋaá bá waa láakɛna baacɔ, ɔsɛ : « Ekúlú ma nyɛ́mana. Aámbáya Bandɔ́mɛsɛ́ yɔ́ cɔba o otéŋgínyi ! Ánɔ bɛ́kákálákɛ́na máánɔ́ maabɛ́, mbá nɔ sɔ́mba ɔkɔlɔ́ eé meéme ; énu lumítíníne Ambányɛ yɛ́ Ɛsɔ́ma ! »

¹⁶Ahá Yésus ŋaá bá waá kándaka a asálá yɛ́ nuɔmɔ́ nɔ́ Kalilé, u ŋá lɛca ne Símon ne onyíinyí *Andɛlɛ́, bábɔ́ áahakɛna mɔhɔ́tɔ́ aá nuɔmɔ́, anyía bá ŋa bɔ́ bá belumbelumbe.

¹⁷Mbá ɔsɛ náábɔ́ : « Ánɔ mɛ látákɛ́na, mbá ɛ ká mɛ́ banɔ́ céŋisiki be-mi-súéne baacɔ. »

¹⁸Hí a yaátɛ́ ekúlú, bá ŋá bɛ́yúátáka ɔ ɔbɛ́yúata máábɔ́ mɔhɔ́tɔ́, nyi wuúci látákɛ́na eényí.

¹⁹Yésus ŋá cɔ́bɛ́tɛ́ta ne buúse, yɔ́ lɛ́ca na Sáak ne onyíinyí Sáaŋ, baáná bé Sebeté. Beébe a yáábɔ́ ɔkɔkɔ́ noómi, bábɔ́ tábɔ́náka máábɔ́ mɔhɔ́tɔ́.

²⁰Yésus ŋé beébe lɔ́ŋɛ́ta ɔlɔ́ŋɛ́ta, bá ŋá bɛ́yúáta na ciabɔ́ síkíne Sebeté na bɔnyiɔnɔ ɔ ɔkɔkɔ́ noómi, nyɛlátákɛ́na Yésus eényí.

²¹Ne Yésus na bááyɛ́ *baákɔ́nɛ́na ŋa bɔ́ cɔ́ba a bálɛ́ka cɛ Kabɛlnawum. A *buɔ́sɛ́ bú ehélúme bú *Besuif, Yésus ŋo yóófíne a yáábɔ́ *andaŋía yɛ́ ɔbɛ́cɔ́kɔ́lɛ́na, yó túme o otúme oweékúnyi baacɔ Bɛsana bɛ́ Bandɔ́mɛsɛ́.[1]

²²Baacɔ ŋe bú kékéke buéŋí a asana na nyíáyɛ́ nyɛnamá nyí oweékúnyíki baacɔ bɛsana. Yááŋa anyía u ŋaá bá weé yeékúnyíki na bɔɔcɔ bukime ; tɛ́ cáŋa a nyɛnamá nyí *beékúnyi bikotí.

²³Hí e ekúlú eyí Yésus ŋaá bá we yéékúnyíki, ɔmɔtɛ́ ɔɔcɔ na *aabɛ́ yí elilé ŋaá hámá hú huasɛ a yáábɔ́ andaŋía yɛ́ ɔbɛ́cɔ́kɔ́lɛ́na, u ŋá kɔɔ́na okelú ɔ ɔmuaná ɔsɛ :

²⁴« Yésus, ɔɔcɔ u *Násalɛt ! Aátɛ́ yááŋa na basɔ́ na kuɔŋɔ́ e ? Ɔ ŋɔɔ́ faáya aaha ɔ ɔ basɔ́ súlisi e ? I ŋe mí menyi bɔmbányɛ anyía ɔ ɔ́ŋa Ofúúménénú u Bandɔ́mɛsɛ́ ! »

²⁵Yésus ŋaá laána elilé ne esise ɔsɛ : « Lésíkínyi mbuumu, háma aá cɛɛ́tɔ cɛ ɔɔcɔ ooci ! »

²⁶Aáná aabɛ́ yí elilé ŋeé fúkíté ɔɔcɔ na makɛ́nda, yí ŋé bókíte buáŋá, nyɛháma eényí a ciayɛ́ cɛɛ́tɔ.

²⁷Baacɔ bekime ŋá bɔ aálɛ́áka eété, bá bɛ́bátáka beébe ne beébe báyɛ : « Aátɛ́ eeye e ? Yɔɔ́sɔɔ́sɔ yí nyiékúnyi na bɔɔcɔ ayɛ́ʼ ? Ɔɔcɔ ooci ŋe téŋínyi ta hú *bɛɛbɛ́ bí bililé, bí wuúci lɔ́kɔ́mákɛ́na ! »

²⁸Aáná nulumí nú Yésus ŋe tényí á lɔ́kɔ́mána i iisí ikime cɛ *Kalilé.

²⁹Ne Yésus, na Sáak, na Sáaŋ ŋa bɔ́ hámá a *andaŋía yɛ́ ɔbɛ́cɔ́kɔ́lɛ́na yí *Besuif, bá ŋá cɔba ɔ ɔcɔba eé ciíbe cɛ ne Símon na *Andɛlɛ́.

³⁰Iinyíkíné ci Símon ŋaá bá fíanɛna, u kɔnɔkɔ nyiike ; aáná bé ŋe bíkétíkínyi o obíkétíkínyi Yésus ɔkɔnɔ ú oónjú oócí.

³¹U ŋé bíkósíti nááyá, u ŋé wuúci tímbie ɔ ɔɔbɔ́, yó wuúci hetunyi. Nyiike ŋá mana ɔmana, oónjú ŋe túme ó beébe sókóbi.

³²Nanyiɔ́fɔ́, e elime cɛ nyɛfianɛna nyɛ́ ɔɔ́cɔ́, baacɔ ŋe bú hélékéníne Yésus bɔkɔnɔ́kɔ́nɔ bekime na baacɔ a bá ŋa bɔ́ bá na *bɛɛbɛ́ bí bililé, bí beébe yébíki.

³³Baacɔ bekime bá bálɛ́ka ŋa ka bɔ́ bɛ́bándákáná eé buúse bú ehenyi yí ciíbe ecí Yésus ŋaá bá noómi.

³⁴Yésus ŋe yeéŋúnyísíki bɔkɔnɔ́kɔ́nɔ beéŋí a bá ŋaá bá na anamánamá cá ɛkɔnɔ, yó hémúkúnyi tɔ́na bɛɛbɛ́ bí bililé biéŋí. U ŋaá bá u tɛ á yaátába anyía bɛ́ á táŋáka, anyía bí ŋaá bá bíé wuúci menyukune.

³⁵Tútútú, ne tuélelíe, Yésus ŋa hátɔ́na yɔ́ háma eé ciíbe. U ŋé súéte haaca na bálɛ́ka, a mafákálɛ́ana, u ŋé túme ɔbɛ́cɔ́kɔ́lɛ́na.

³⁶Ne Símon na baláayɛ́ ŋe bú túme o húle wuúci aamba.

³⁷Ahá bé ŋge bú wuúci kuána, báyɛ nááyá : « Baacɔ bekime ŋa bɔ́ ɔ waamba. »

³⁸Mbá ɔsɛ náábɔ́ : « Tué súéte haála hé etémbí, a mɔnɔŋɔ ma maabána. Ɛ ŋá mɛ́ nyɛmána tɔ́na wu ohulikinyi baacɔ Ambányɛ yɛ́ Ɛsɔ́ma hɔ́á, yaátɛ́ asana i ŋe mí húle ɔ Ɔmuaná. »

³⁹Aáná u ŋaá bá u húle á kándaka i iisí cɛ *Kalilé ikime, u húle húlikinyi baacɔ Ambányɛ yɛ́ Ɛsɔ́ma a *bɛndaŋía bɛ́ ɔbɛ́cɔ́kɔ́lɛ́na bí *Besuif, u hémúkúnyi *bɛɛbɛ́ bí bililé a baacɔ.

⁴⁰Oónuúnu a wɔmɔtɛ́ ŋaá fááya né Yésus, u ŋé wuúci túmíne eŋéndu, yó wuúci bata nyiɔ́lɔ ɔsɛ : « Cɔ́kɔ́lɛ, mbɔ́kɔ o ŋoó léne, ɔ ɔ́ŋa wu o mi eéŋúnyísi. »

⁴¹Yésus ŋé wuúci bɛ́cáma mahana, u ŋá nandɔ́na ɔɔbɔ́, u ŋé wuúci bítíse, mbá ɔsɛ : « Ɛ́ɛ, i ŋeé mi léne, aáŋɔ́núá ! »

⁴²Hí a yaátɛ́ ekúlú ciínú ŋá maná, ɔɔcɔ ŋá aáŋɔ́núá.

⁴³Yésus ŋeé wuúci laána, yó woónyísínyi ne esise ɔsɛ : « Atɛ laána ta ɔɔcɔ bɔkɔ, mbá ké ke bítóŋínyi né *mululi nyiínjie, mbá iínjie *abɛ́sámbá eyí *Moyís ŋaá kɔɔ́na anyía bé búle iínjie o otóŋínyi baacɔ bekime anyía ɔ́ mɔ́ waáŋɔ́núa. » Aáná u ŋeé wuúci ólísí o owólísi.

⁴⁴

⁴⁵Mbá ta híáná, ɛ́makɛ́la ɔɔcɔ oócí é súété, nyitúme eényí o húle hulinyi baacɔ bɛhaála bikime asana eéyé. Yaátɛ́ asana Yésus tɛ ɔ́mɔ́ bá wu ɔ háná bítóŋgínyi a miányɛ́ a bálɛ́ka a cɛ́mɔtɛ́ ; mbá u ŋaá bá weé limekine hú a bɛhaála abɛ́ baacɔ tɛ á bá. Baacɔ ŋaá bá bábɔ́ fáakɔna nááyá, bé húlúkúne bɛhaála bikime.