Read Nomaande Mak 11 Bible Online

Mak 11 - Nomaande bible

Mak 11

¹Ekúlú ayɛ́ bá ŋa bɔ́ bá bá búáŋa ɔ ɔkɔɔ́háma na a Bɛ́tɛ́fasɛ na a Bɛtani, mɔnɔŋɔ a má ŋaá bá hoóhi ne Yelúsalɛm, a maabána ma nɔkɔndɔ nú Molifié, Yésus ŋá tɔ́ma *baákɔ́nɛ́na béfendí,

²ɔsɛ náábɔ́ : « Ánɔ cɔbá a bunɔŋɔ eebu eenú eé buúse. Ahɛ́ nu ŋga nɔ́ háma, nu ŋa nɔ́ kúana ɔɔ́nɔ́ u abaŋabɛbɛa osúŋénú. Ta ɔɔcɔ tɛ ŋá cáŋa á bááta. Énu wuúci súŋúne, núé héléne.

³Mbɔ́kɔ ɔɔcɔ ŋá banɔ́ báta ɔsɛ : “Anyíatɛ́ nú ŋe nú wuúci súŋúne e ?”, ánɔ bɛ́káma nɔsɛ : “Otéŋí a Waáŋá ŋeé wuúci yáamba.” Hú a yaátɛ́ ekúlú, u ŋa cɔba ɔ ɔnyɛana anyía nué wuúci héléne aaha. »

⁴Baákɔ́nɛ́na eébé béfendí ŋa bɔ́ cɔ́ba ; bɔ́ kuána ɔɔ́nɔ́ u abaŋabɛbɛa osúŋénú a nɔháatɛ́ eé buúse bú ehenyi yí ciíbe a cɛ́ ŋaá bá a maabána me ohónyí, nyíábɔ́ nyi wuúci súŋúne eényí.

⁵Baacɔ a bɔ́mɔtɛ́ a bá ŋa bɔ́ bá hɔ́á báyɛ náábɔ́ : « Háá ! Aátɛ́ eéyé nu ŋa nɔ́ kɛ́la e ? Anyíatɛ́ nú ŋe nú súŋúne ɔɔ́nɔ́ u abaŋabɛbɛa oócí e ? »

⁶Baákɔ́nɛ́na ŋá bɛ́káma háyɛ Yésus ŋeé beébe laána ; aáná bé ŋeé beébe nyɛána anyía bé súéténe ɔɔ́nɔ́ u abaŋabɛbɛa,

⁷bé ŋge wuúci hálámánána né Yésus. Bé ŋé wuúci táláka bíábɔ́ bɛlaŋa bí nyiike e elime. Yésus ŋá bááta o olimine.

⁸Baacɔ beéŋí ŋa bɔ́ aányɛ́áká bíábɔ́ bɛlaŋa bí nyiike o ohónyí ɔ ɔmuaná ; bɔ́mɔtɛ́ ŋá sɔ́mbáka tuányɛ tɔ́ maatɛ́ e bisíéné, bé tuútu aanyɛaka o ohónyí ɔ ɔmuaná o owiínjie Yésus bɔɔcɔ.

⁹Na baacɔ a bá ŋaá bá bébú búékeke ne Yésus na bɔsɔ́ɔ́kɔ́ a bá ŋaá bá bébú wuúci látáka ŋaá bá bábɔ́ bɛ́sɔ́mɔ́kɔ okelú ɔ ɔmuaná báyɛ : « *Hɔsáána ! Bandɔ́mɛsɛ́ á sáyábɛ́na ooci awɔ́ u ŋa fáaya eé nyiínyi nyí Otéŋí a Waáŋá !

¹⁰Bandɔ́mɛsɛ́ á sáyábɛ́na Otéŋí awɔ́ u ŋa fáaya. Búáyɛ́ butéŋí káá bámɔ́kɔ́na háyɛ bɔ́ ciasɔ́ sɔ́kɔ́nɔ́ Táfit. Hɔsáána fáátɛ ɔ Ɔmuaná noómi. »

¹¹Aáná Yésus ŋo yóófíne eé Yelúsalɛm, yɔ́ kɔɔ́háma eé *Ciíbe cɛ Bandɔ́mɛsɛ́ noómi. Ɛŋakɛlá wé yóófíne, yó bísíémúkúnyi bɛháŋá bikime, u ŋá cɔba a Bɛtani na bááyɛ́ baákɔ́nɛ́na bɔ́ɔ́hátá ne béfendí, anyía buɔ́sɛ́ ŋaá bá búá yáaŋa ɔ ɔmana.

¹²Ɔ ɔyá ɔyá, bébú húlúkúne a Bɛtani, ɛcaná ŋe túme ɔnuana Yésus.

¹³U ŋá lɛcá bufikié haaca, buúbu na tuányɛ. Aáná u ŋeé bíkósíti i indíné anyía wá lɛca mbɔ́kɔ wáŋa wu ɔbɔ́ŋɔ ta atámá ɔ́mɔtɛ́. Mbá u ŋaá kuána hú tuányɛ na tuányɛ, anyía tɛ́ cáŋa ekúlú yɛ́ ɔkátáka bufikié yɛ́ ŋaá bá.

¹⁴Mbá ɔsɛ né bufikié : « O otúme aámbáya ta ɔɔcɔ tɛ ká háná nyíá yɔ́ɔ́wɔ atámá ta buɔ́sɛ́. Ɔmanɔ́ oócí ! » Bááyɛ́ baákɔ́nɛ́na ŋa bɔ́ lɔ́kɔ́má ɔtáŋa ú Yésus oócí.

¹⁵E elime eécí, bá ŋga bɔ́ háma eé Yelúsalɛm. Yésus ŋó óófíne eé *Ciíbe cɛ Bandɔ́mɛsɛ́, u ŋé túme ɔwɔɔ́ŋɛ́na bakɛla onduné bá hɔ́á. U ŋé kúbúlíékéne ne tébíli cɛ́ babaŋalanana mɔɔnyɛ́[21] ne bilimíníne bí betúé tubúbé.

¹⁶Wuúci te olumitine anyía ɔɔcɔ á bɛ́túáhɛ́na bɔkɔ ɔ ɔlátɛ́ánána Ciíbe cɛ Bandɔ́mɛsɛ́.

¹⁷Aáná u ŋe limíne o o beébe eékúnyi, ɔsɛ : « Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : “Ciamɛ Ciíbe káá bá Ciíbe cɛ ɔbɛ́cɔ́kɔ́lɛ́na a baacɔ bá mɔnɔŋɔ mekime.” Mbá banɔ́, nú me nú ciíci ceŋisi ciíbe ecí beébi ŋa bɔ́ bɛ́námba noómi. »

¹⁸Ne betéŋínyi *beluli nyiínjie ne *beékúnyi bikotí ŋa bɔ́ lɔ́kɔ́máka bɛsana eébí, nyíábɔ́ nyitúme eényí ɔwaamba ohónyí wú o wuúci ɔ́ɔ́nɔ, mbá bé wuúci líkíméke, anyía nyɛkɔca nyɛ́ baacɔ nyikime ŋaá bá nyíé kékéke buéŋí nyíáyɛ́ nyiékúnyi.

¹⁹Ahɛ́ nyiɔ́fɔ́ ŋaá faáya, ne Yésus na bááyɛ́ *baákɔ́nɛ́na ŋa bɔ́ hatɔ́na eé Yelúsalɛm.

²⁰Ahɛ́ ɔyá ŋaá yá, bábɔ́ hɔ́laka o ohónyí, *baákɔ́nɛ́na ŋa bɔ́ lɛca anyía bufikié ebú Yésus ŋɔ́ lɔ́mɔ́kɔ búocí ma kɔ́táka, na bɛkaŋá áyá !

²¹Mbá Bíel ŋá bɛ́táá asana a yɛ́ ŋaá bɛ́kɛ́láka búocí ne bufikié eébú, yɔ́ láana Yésus ɔsɛ : « Láábi, lɛcá ! Bufikié abɔ́ ɔ ŋɔ́ɔ lɔ́mɔkɔ búocí ma kɔ́táka bukime. »

²²Yésus ɔsɛ ná bááyɛ́ baákɔ́nɛ́na : « Ɛ ŋa mɛ́ banɔ́ laána aá taaká isíʼo : Ánɔ hákɛ́na mɔŋɔlɛ́ ná Bandɔ́mɛsɛ́ !

²³Mbɔ́kɔ ɔɔcɔ ŋá láana nɔkɔndɔ eenu anyía nɔ́ á hatɔ́na aaha, nɔ́ á ka bɛ́áhɛ́na aá nuɔmɔ́ nɔ́ makɛ́lɛ́, wuúci bɛ́muátá tɛ́ka ne isuŋí e úúyé ɔtɛ́má, yó lúmitinine anyía asana ayɛ́ u ŋa kɔ́ɔna káá bɛ́kɛ́láka, híáná yɛ́ káá bɛ́kɛ́láka.

²⁴A yaátɛ́ asana, ɛ ŋa mɛ́ banɔ́ laana ɛsɛ́ : Bɔkɔ bukime abɔ́ nú ŋa nɔ́ báta Bandɔ́mɛsɛ́, énu bíkéti ɔ ɔtɛ́má anyía nú me nú buúbu bɔ́ŋɔ ; aáná u káá banɔ́ buúbu iínjie.

²⁵Ekúlú ayɛ́ ɔ́ ŋɔɔ́ bɛ́cɔ́kɔ́lɛ́na, mbɔ́kɔ ɔ ɔ́ŋa e nyiitíé na sɔ́ɔ́kɔ́, wuúci nyɛanɛ́nɛ́na. Aáná cianɔ́ Síkíne cɛ Ɔmuaná noómi káá banɔ́ nyɛ́ánakɛnɛna tɔ́na maanɔ́ maabɛ́.

²⁶[Mbá, mbɔ́kɔ nu tɛ ŋá nɔ́ nyɛ́ánɛ́nɛ́na bɔsɔ́ɔ́kɔ́, cianɔ́ Síkíne tɔ́na cɛ Ɔmuaná noómi tɛ káá banɔ́ nyɛ́ánɛ́nɛ́na maanɔ́ maabɛ́.] »

²⁷Bé ŋe túné abɔ́ hálɔ́mɔ́na eé Yelúsalɛm. Yésus ŋaá bá wá kándaka eé *Ciíbe cɛ Bandɔ́mɛsɛ́ noómi, ne betéŋínyi *beluli nyiínjie ne *beékúnyi bikotí na *baáŋá bé *Besuif ŋa bɔ́ fááya nááyá,

²⁸mbá báyɛ : « Na makɛ́nda ma háányɛ́ ɔ ŋɔɔ́ kɛ́la bɛsana e ? Aányɛ́ u ŋo yóo cúméke makɛ́nda me o biíbi kɛlaka e ? »

²⁹Yésus ɔsɛ náábɔ́ : « Yaŋɔ́ tɔ́na, míɔ cɔba ɔ ɔ banɔ́ báta hú ɛmbataka ɛ́mɔtɛ́ ; mbɔ́kɔ nu ŋa nɔ́ mɛ bɛ́káma, ɛ ŋa mɛ́ banɔ́ laána aányɛ́ u ŋe mí cuméke makɛ́nda ma ɔkɛlaka bɛsana.

³⁰Ánɔ mɛ laána : Bandɔ́mɛsɛ́ u ŋaá tɔ́ma Sáaŋ o okowóotine baacɔ ayɛ́ʼ baacɔ e ? »

³¹Bé ŋé túme osuŋunyinyi beébe ne beébe báyɛ : « Mbɔ́kɔ túásɔ́ bɛ́káma anyía Bandɔ́mɛsɛ́ ŋaá tɔ́má Sáaŋ o owootine baacɔ, keyé u ŋaá basɔ́ bata ɔsɛ : “Anyíatɛ́ nú ti ómo nú wuúci lumitinine aná e ?”

³²Mbá, mbɔ́kɔ túásɔ́ bɛ́káma anyía baacɔ bé ŋe bú wuúci tɔ́má… » Bá ŋa bɔ́ bá bébú líkíméke nyɛkɔca, anyía baacɔ bekime ŋe bú lúmítíníne anyía Sáaŋ ŋaá bá taaká ci *muhémúnyi bɛsana mɔ Bandɔ́mɛsɛ́.

³³Aáná bá ŋa bɔ́ bɛ́káma báyɛ : « Tu ti ŋé sú menyi. » Mbá ɔsɛ náábɔ́ : « Aáná e, oo, ta yaŋɔ́ ɛ tɛ ŋá mɛ banɔ́ láana aányɛ́ u ŋe mí cuméke makɛ́nda ma ɔkɛlaka bɛsana. »