Read Nomaande Mak 12 Bible Online

Mak 12 - Nomaande bible

Mak 12

¹Yésus ŋeé túmé o beébe túmíne ɛnjaba ɔsɛ : « Ɔɔcɔ a wɔmɔtɛ́ ŋɔɔ́ nyíɔ́kɔ yááyɛ́ esíéné, yɔ́ wɔ́ɔ́nɔ́kɔ bɛnyɛ́ma, yɔ́ bɔ́ŋɔlɔkɛna na hɛkáká, yɔ́ tábɔ́náka nuáta hɔ́á, yó béétíki nyindúmé nyɛ́ bɛtáta. E elime eécí, u ŋé iínjíé esíéné ɔ cɔ́ɔ́kɛ né betétényi, u ŋé súéte ɔ ɔkanda ú haaca.

²Ahɛ́ ekúlú yɛ́ ɔbándáka bɛyɔyɛ́ ŋa kaáháma, u ŋá tɔ́ma munyiɔnɔ a mɔmɔtɛ́ né betétényi esíéné anyía mú keé hiíte núáyɛ́ nuafa, háyɛ bé ŋe bú cíkílíékéne.

³Mbá betétényi esíéné ŋe bú muúmu hatɛ́na, bé ŋé muúmu súbéke, bé ŋé muúmu óólísi aabá éfendí.

⁴Muútí esíéné ŋe túné tɔ́ma munyiɔnɔ mu etémbí ; Etéemú, bé ŋe bú muúmu kɔlɔ́kɛ́na bɔmbányɛ bɔmbányɛ, bé ŋé muúmu ɔɔ́mbɔ́náka.

⁵Aáná muútí esíéné ŋe túné a tɔ́ma munyiɔnɔ mɔ bátátɔ́. Oócí sɔ́ɔ́kɔ́, bé ŋe bú wuúci ɔ́ɔ́nɔ́ ; híáná bá ŋa bɔ́ kɛ́láka bɔnyiɔnɔ bekime a bá ŋa bɔ́ látáká : Bé súbéke eebe a bɔ́mɔtɛ́, bá ɔ́ɔ́nɔ́kɔ eebe a bɔ́mɔtɛ́.

⁶Hú uuyé ɔɔ́nɔ́ u ɔtɛ́má ú ŋeé wuúci lɔbɛ́na tɛ́ka ɔ ɔtɔ́ma. Nyíáyɛ́ nyi wuúci tɔ́ma eényí né betétényi esíéné, u bílúmíkínyi ɔsɛ : “Bá ŋa bɔ́ cɔ́ba ɔ ɔlɔ́kɔ́mɛ́na uumi ɔɔ́nɔ́.”

⁷Mbá betétényi esíéné ŋé bú túmé ɔkɔɔna beébe ne beébe báyɛ : “Ɔɔcɔ ooci u kéé hiíteke bisíkénéne bí síkíne. Túé wuúci ɔ́ɔ́nɔ́kɔ, mbá esíéné káá basɔ́ bɛ́lɔ́kɔ́mɛ́na.”

⁸Bé ŋe bú wuúci míɔ́mɛ́na, bé ŋé wuúci hámánána e esíéné, nyi wuúci ɔ́ɔ́nɔ́kɔ eényí. »

⁹Mbá Yésus ɔsɛ : « A nyíánɔ́ nyɛlɛca, aátɛ́ muútí esíéné káá kɛ́laka e ? Tɛ́ka u kɔ́ kɔ yɔɔ́nɔ́kɔ betétényi esíéné eébé, yó wiínjie né betétényi bé etémbí e ?

¹⁰Yaŋɔ́ ɛsɛ nu na ma nɔ́ fanáka Ciɔɔ́ŋɛ́ cɛ́ Bandɔ́mɛsɛ́ a cɛ́ ŋaa kɔ́ɔna cɛ́sɛ : “Nyɛndányɛ́ anyɛ́ bafalɛfa ciíbe ŋe bú óómbóko, nyiínyi nyɛ́ ma bɛ́cáŋa nyɛndányɛ́ a nyɛ́ ma bɛ́túáhɛ́na ciíbe.

¹¹Aáná Otéŋí a Waáŋá ŋa kɛ́láka asana eéyé. Yɛ́ ŋaá basɔ́ kékísi buéŋí.” »

¹²Baacɔ ebé Yésus ŋaá bá waá láakɛna bɛsana eébí ŋe bú ményí anyía wáábɔ́ ú meé túmíne ɛnjaba eeci. Bé ŋe bú túmé ɔwaamba ohónyí wú o wuúci hatɛna. Mbá bá ŋa bɔ́ bá bébú líkíméke nyɛkɔca nyɛ́ baacɔ. Bá ŋá hɔláka, bé ŋé wuúci síke.

¹³Bá ŋaá tɔ́mɛ́na Yésus na *Bafalisiɛ́ŋ a bɔ́mɔtɛ́ na baacɔ bé hitúlé hí *Elóot a bɔ́mɔtɛ́ anyía bé wuúci kúfítínyi na ɛmbataka a cɛmɔtɛ́.

¹⁴Bá ŋga bɔ́ háma, báyɛ nááyá : « Muékúnyi, tu ŋe sú ményi anyía ɔ ŋɔɔ́ kɔɔna bɛsana a bɛtálɛ́mánánɔ́, tu menyukune anyía o ti ŋóo líkíme ta ɔɔcɔ. O ŋoó weékúnyi baacɔ anyána bábɔ́ nyɛ́maná olíhéke háyɛ Bandɔ́mɛsɛ́ ŋa yáamba. Ɔ́ɔ basɔ́ laána aná : Yááŋa ambányɛ yɛ́ asana a bíásɔ́ *bikotí anyía tu ŋa sɔ́ nyɛmána tú ɔwɔɔ́ndɔ́kɔ etéési ná *Sɛsáal ayɛ́ʼ yɛ́ tɛ á bá ambányɛ e ? »

¹⁵Yésus ŋaá bá weé ményukune túábɔ́ tɔbɛ́mbɛ túfendí, mbá ɔsɛ náábɔ́ : « Anyíatɛ́ nu ŋa nɔ́ mɛ bɛ́tɔ́ɔ́lɛ́na e ? Énu mi héléníne eléŋú yɛ́ mɔɔnyɛ́, yémí yiíyi lɛcá. »

¹⁶Bé ŋé wuúci héléníne eléŋú yɛ́ mɔɔnyɛ́, mbá ɔsɛ : « Hibílícínyínyí hɛ́ aányɛ́ eehi hɛ́áŋa, nyiínyi nyɛ́ aányɛ́ eenyi nyɛ́áŋa e ? » Mbá báyɛ : « Hibílícínyínyí hɛ́ Sɛsáal hɛ́áŋa, ne nyiínyi áyá. »

¹⁷Yésus ɔsɛ náábɔ́ : « Énu íínjíékíne aná bɛnyɛ́ma bɛ́ Sɛsáal ná Sɛsáal ; nu íínjíékíne bɛ́ Bandɔ́mɛsɛ́ ná Bandɔ́mɛsɛ́. » Nyíáyɛ́ nyɛbɛ́káma ŋeé beébe kékísí buéŋí.

¹⁸*Basatusiɛ́ŋ a bɔ́mɔtɛ́ ŋa bɔ́ fáaya né Yésus. Bá náŋa bé ti ebú lúmítíne anyía biwéewé ŋa háanyua. Aáná bé ŋe bú bícónyí Yésus báyɛ :

¹⁹« Muékúnyi, *Moyís ŋaá basɔ́ ɔ́ɔ́ŋɔ́kɛ́na okotí eeye ɔsɛ : “Mbɔ́kɔ ɔnɔ́mɔcɔ́ ŋá bátɛ́na oónjú, mbá yó wé tɛ́ka ne obíéne ɔɔ́nɔ́, onyíinyí ké síke bísúétíne esíké, yó wuúci bíénékíne baáná.”

²⁰Ɔ́ɔ lɛca aná : Benyíinyí a banɔ́mɔcɔ́ bétíndétú nɔ́mɔ ŋe bú líhéke. U buúse ŋá bátɛ́na oónjú, yó wé tɛ́ka ne obíéne ɔɔ́nɔ́.

²¹U béfendí ŋé bísúétíne esíké. Wuúci tɔ́na yó wé tɛ́ka ne obíéne ɔɔ́nɔ́. Híáná bú ŋaá bɛ́kɛ́láka ne onyíinyí u bátátɔ́.

²²Ta ɔmɔtɛ́ e bítíndétú nɔ́mɔ eébí te obíéne ɔɔ́nɔ́ ne yiíyi. E elime eécí, oónjú tɔ́na ŋé wé.

²³Yaátɛ́ asana tu ŋa sɔ́ ɔ bata anyía : E ekúlú eyí biwéewé káá háanyuaka, sɔ́ɔ́kɔ́ awɔ́ háányɛ́ u káá bá ɔnɔ́mɛ u oónjú oócí aná e ? Yááŋa anyía bekime bétíndétú nɔ́mɔ ŋe bú wuúci bátɛ́ákɛ́ná. »

²⁴Yésus ŋeé beébe bɛ́kámá ɔsɛ : « Nú ma nɔ́ nána, anyía nu tɛ ŋá nɔ́ lɔ́kɔ́ma bɔmbányɛ ta Ciɔɔ́ŋɛ́ cɛ́ Bandɔ́mɛsɛ́, ta maayɛ́ makɛ́nda.

²⁵Yááŋa anyíaʼo, ekúlú eyí biwéewé káá háanyuaka, banɔ́mɔcɔ́ tɛ ká bɔ́ bátɛ́ákɛ́na beénjú ; beénjú tɛ tɔ́nɔ́, mbá bé ké búle ebú líhe háyɛ *bililé bɛ́ masɔ́ma bɛ́ Bandɔ́mɛsɛ́ ŋeé líhe a Bunɔŋɔ bɔ́ Ɔmuaná.

²⁶Mbá, a asana a yɛ́ ŋa lɛ́ca ne biwéewé na nyíábɔ́ nyɛhaanyua, nu tɛ ɔ́mɔ nɔ́ fána e Nufule nú Moyís a haála ehé u ŋe bíkéti asana yí hikitékíté a hɛ́ ŋaá bá hɛ́á lɔ́laka e ? Hɔ́á, Bandɔ́mɛsɛ́ ŋaá laána Moyís ɔsɛ : “Ya mɛ́ŋa Bandɔ́mɛsɛ́ cɛ *Abɛ́laham, Bandɔ́mɛsɛ́ cɛ *Isak, Bandɔ́mɛsɛ́ cɛ *Yákɔb.”[22] »

²⁷Yésus ŋoo sólínyi ɔsɛ : « Énu menyi anyía Bandɔ́mɛsɛ́ áŋa Bandɔ́mɛsɛ́ cɛ baacɔ ɔ bɔɔ́sɔ, tɛ́ cáŋa cɛ bɛlɔ́ŋɔ́. Aáná nua nɔ́ŋa a yaandándá yɛ́ nyɛnana noómi. »

²⁸Muékúnyi *bikotí ɔ mumɔtɛ́ ŋaá lɔ́kɔ́máká bébú súŋgunyinyi, yɔ́ lɔ́kɔ́ma háyɛ nyɛbɛ́káma nyí Yésus ŋaá bá nyɛmbányɛ. Aáná u ŋee bíkósíti né Yésus, mbá ɔsɛ : « Okotí ayɛ́ háányɛ́ yá hɔ́la bikotí bikime e ? »

²⁹Yésus ŋaá bɛ́káma ɔsɛ : « Okotí a yɛ́ á hɔla bikotí bikime eeye : “Banɔ́, baacɔ bé *Islayɛ́l, ánɔ lɔ́kɔ́ma : Hú Otéŋí, ciasɔ́ Bandɔ́mɛsɛ́, wáŋa Otéŋí a Waáŋá ;

³⁰lénéke ciɔ́wɔ Síkíne Bandɔ́mɛsɛ́ ne úúwu ɔtɛ́má okime, ne hííwu hɛtányɛ́ hikime, na mɔɔwɔ makɛ́nda mekime, na ciɔwɔ injiŋé ikime.”

³¹Yɛ́ ɔláta áŋa anyía : “Lénéke sɔ́ɔ́kɔ́ háyɛ o ŋoó léne ciɔwɔ cɛɛ́tɔ cɛ bɛ́muátá.” Okotí yí etémbí tɛ́ á bá a yɛ́ á hɔ́la bikotí bífendí eébí. »

³²Mbá *muékúnyi bikotí ɔsɛ : « Híánáʼo, Muékúnyi, ɔ ŋɔɔ́ táŋa taaká ! Hú Otéŋí Bandɔ́mɛsɛ́ wáŋa Otéŋí a Waáŋá. U etémbí tɛ á bá.

³³Aáná ɔɔcɔ á nyɛmána wu olénéke Bandɔ́mɛsɛ́ ne úúyé ɔtɛ́má okime, na ciayɛ́ injiŋé ikime, na mááyɛ́ makɛ́nda mekime ; yó lénéke tɔ́na sɔ́ɔ́kɔ́ háyɛ u ŋeé léne ciayɛ́ cɛɛ́tɔ cɛ bɛ́muátá. Búáŋa bɔmbányɛ buéŋí ɔ ɔhɔla ɛnyama ecí bé ŋé lúlinyi Bandɔ́mɛsɛ́ ; buúbu tɔ́na bɔmbányɛ ɔ ɔhɔla nyiínjie nyɛ́ anamánamá cá *bɛbɛ́sámbá. »

³⁴Ɛ́makɛ́la Yésus á lɛ́cá anyía ɔɔcɔ ma bɛ́káma ne injiŋé, mbá ɔsɛ nááyá : « Ɔ tɛ ɔ́ bá haaca ne owoofine e *Butéŋí bɔ́ Bandɔ́mɛsɛ́. » E elime eécí, ta ɔɔcɔ ta ɔ háná bɛ́kána o wuúci bata ɛmbataka.

³⁵Ahɛ́ Yésus ŋaá bá we yéékúnyíki baacɔ eé *Ciíbe cɛ Bandɔ́mɛsɛ́, u ŋé beébe batá ɔsɛ : « Anyána *beékúnyi bikotí á bɔ́ŋa bá ɔkɔɔna anyía *Mesíi áŋa u bɔnyɛ Táfit e ?

³⁶Yááŋa anyía Táfit wuúci bɛ́muátá, *Efúúménénú yí Elilé ŋeé wuúci oofine a cɛɛ́tɔ, u ŋá kɔɔ́na ɔsɛ : “Otéŋí Bandɔ́mɛsɛ́ ŋaá laána né uumi Otéŋí a Waáŋá ɔsɛ : Faáya ké limíne aámɛ a maabána a aháŋá yí úúmi ɔɔbɔ́ ú manɔ́mɛ, ekúlú ekime ayɛ́ ɛ ká mɛ́ kɛla anyía óo limékíníne bɔ́ɔ́wɔ beliŋine a bɛɛtɔ́.”

³⁷Mbɔ́kɔ Táfit bɛ́muátá ŋeé wuúci lɔ́ŋɔ anyía uuyé Otéŋí a Waáŋá, anyána wáŋa wu ɔbá tɔ́na u bɔnyɛ Táfit e ? » Yaandándá yɛ́ nyɛkɔca ŋaá bá yé bílénékíne ɔtáŋa ú Yésus.

³⁸Ekúlú eyí Yésus ŋaá bá we yéékúnyíki baacɔ, u beébe laákɛ́na ɔsɛ : « Énu bíkékényíki na nyɛbɛ́kɛ́lɛ́na nyí *beékúnyi bikotí. Bé ŋe bú léne ɔbɛ́náŋála na bɛlaŋa a bɛcaha o obítóŋgínyi, bé lénéke anyía bé beébe téŋíki na bɔɔcɔ haála ahá baacɔ á bɔ́ŋa.

³⁹Bé ŋe bú léne olimine eé buúse na a *bɛndaŋía bɛ́ ɔbɛ́cɔ́kɔ́lɛ́na na a bɛandándá bɛ́ manáka.

⁴⁰Bá ŋa bɔ́ hɔ́ɔ́nɔ bisíké bí beénjú bíábɔ́ bɛnyɛ́ma ; híáná tɔ́na, bé ŋe bú céhisi ɔbɛ́cɔ́kɔ́lɛ́na anyía bé beébe kékéke. Bá ká bɔ́ bɔ́ŋgɔ́na muuyé muéŋí ɔ ɔhɔla mu bɔsɔ́ɔ́kɔ́ bé etémbí. »

⁴¹Yésus ŋe límíne a maabána me hikóló hí nyiínjie hí *Ciíbe cɛ Bandɔ́mɛsɛ́, u lɛcaka baacɔ ábɔ́ hákɛ́na mɔɔnyɛ́ hɔ́á. Ɛnɔ́mɛ cɛ́ baacɔ ciéŋí ŋá hákɛ́na mɔɔnyɛ́ meéŋí.

⁴²Hɛsɔ́kásɔ́ka hí esíké yí oónjú ŋá faáya, yɔ́ háya tɔ́la ífendí.

⁴³Yésus ŋɔ́ lɔ́ŋɛ́ta bááyɛ́ *baákɔ́nɛ́na, mbá ɔsɛ náábɔ́ : « Aá taaká taaká ɛ ŋa mɛ́ banɔ́ láana isíʼo : Hɛsɔ́kásɔ́ka hí esíké yí oónjú eéhí meé yíínjie nyiínjie e hikóló ɔ ɔhɔla baacɔ bé etémbí bekime.

⁴⁴Beébe, bé me bú íínjíékíne anyía bá bɔ́ŋa na bɔnɔ́mɛ buéŋí e bú ti ŋé beébe ɔɔ́lɔ. Mbá wuúci, e úúyé ɔsɔ́ka, ú me yíínjie bɔkɔ bukime abɔ́ waá bá ne buúbu anyía wé líhékíne. »