Read Nomaande Mak 13 Bible Online

Mak 13 - Nomaande bible

Mak 13

¹Ekúlú eyí Yésus ŋaá bá waá hámɔ́kɔ́na eé *Ciíbe cɛ Bandɔ́mɛsɛ́, *muákɔ́nɛ́na a mumɔtɛ́ a bááyɛ́ *baákɔ́nɛ́na ŋeé wuúci laána ɔsɛ : « Muékúnyi, lɛcá na bɛandándá bɛ́ andányɛ́ eebi na ambányɛ́kɛ́ yɛ́ nyɛfalɛfa eeye ! »

²U ŋeé wuúci bɛ́kámá ɔsɛ : « Ɔ ŋɔɔ́ lɛca ambányɛ́kɛ́ yɛ́ nyɛfalɛfa eeye e ? Ta nyɛndányɛ́ nyɛ́mɔtɛ́ tɛ́ kɔ́ɔ́ lɔ́bɔ nyɛtálánɔ́ ɔ sɔ́ɔ́kɔ́ ɔ ɔmuaná ; ekime kéé fúŋulueke. »

³Yésus ŋe ke límíne ɔ ɔmɛsɛ́ a nɔkɔndɔ nú Molifié, u lɛcaka *Ciíbe cɛ Bandɔ́mɛsɛ́. Ne Bíel, na Sáak, na Sáaŋ, na *Andɛlɛ́ ŋe bú wuúci batá a mafákálɛ́ana báyɛ :

⁴« Ɔ́ɔ basɔ́ láána, nyíényí bɛsana eébí káá bɛ́kɛ́láka e ? Hibílícínyínyí hɛ́ yaátɛ́ hí kóó tóŋínyi ekúlú ayɛ́ bɛsana eébí bikime káá bɛ́kɛ́láka e ? »

⁵Yésus ɔsɛ : « Énu bíkékényíki ; ta ɔɔcɔ tɛ banɔ́ néŋé.

⁶Yááŋa anyía baacɔ beéŋí ká bɔ́ fáakɔna eémi eé nyiínyi, hú náányɛ́ u kɔɔnaka ɔsɛ : “Yaŋɔ́, ya mɛ́ŋa Mesíi”. Bé ké bú néŋéke baacɔ beéŋí.

⁷Ekúlú ayɛ́ nu ká nɔ́ lɔ́kɔ́máka bá kɔ́ɔnaka anyía mɔnɔŋɔ ŋaá nua biité meéme ne meéme, ta anyía nɔ lɛcaka baacɔ ɔ́ɔ́nɔ́kɔ́nɔ e biité, nuti líkíméke ananyía bɛsana eébí ŋá nyɛmána bɛ́ ɔbɛ́kɛ́láka. Mbá tɛ́ cáŋa hí e ekúlú eéyé ɔmɛsɛ́ káá mána.

⁸Baacɔ bá bunɔŋɔ a búmɔtɛ́ ká bɔ́ támbána biité na baacɔ bá bunɔŋɔ bú etémbí ; butéŋí a búmɔtɛ́ kɔ́ɔ́ tɔ́kɔ butéŋí bú etémbí ; ɛmɛsɛ́ bínyíékínyi bɛhaála bɛhaála ; mecíli káá bá tɔ́na meéŋí. Bɛsana eébí káá bá bɛsana bí nyitúme nyɛ́ ɔbɛ́nyíá mɔɔhɔ.

⁹Mbá banɔ́, énu bíkékényíki. Baacɔ káá banɔ́ fíimbieke né bekélísi bɛsana, bá banɔ́ súbéke ne mesue a *bɛndaŋía bɛ́ ɔbɛ́cɔ́kɔ́lɛ́na bí *Besuif. Nu ká nɔ́ tálɛ́mákɛ́na a nyɛkála eé buúse bú bekélísi ne e betíkítíki na a *baáŋá áyá aámɛ a asana, anyía nuánɔ́ hakɛ́na ɛmbasɔ́ eebú eé buúse.

¹⁰Bá ŋá nyɛmána ɔcaŋácáŋa ohulikinyi baacɔ bá mɔnɔŋɔ mekime Ambányɛ yɛ́ Ɛsɔ́ma.

¹¹Ekúlú ayɛ́ bá káá banɔ́ fíimbieke né bekélísi bɛsana, nɔtɛ caŋá ɔbɛ́ákákɛ́na a bɛsana abɛ́ nu ká nɔ́ kɔ́ɔnaka. Mbá, ekúlú eéyé, ánɔ táŋáka bɛsana abɛ́ Bandɔ́mɛsɛ́ káá banɔ́ hákɛ́na e nyuúté. Tɛ́ cáŋa banɔ́ nu ká nɔ́ táŋáka, mbá *Efúúménénú yí Elilé yɛ́ káá táŋáka náánɔ́.

¹²Baacɔ a bɔ́mɔtɛ́ ké bú iínjíékíne mahɛ́ndɛ́ a baacɔ anyía bé beébe ɔɔ́nɔ́kɛ́na báábɔ́ benyíinyí bá bɛ́muátá. Híáná tɔ́na, síkíne káá kɛla ɔɔ́nɔ́. Baáná ké bú núúsiki bíábɔ́ bibíényi, bó ko wiínjíékíne mahɛ́ndɛ́ a baacɔ anyía bé ke bú beébe ɔ́ɔ́nɔ́kɛ́na.

¹³Baacɔ bekime ká bɔ́ banɔ́ líŋekine aámɛ a asana, mbá asana ɔ́mɔtɛ́, ɔɔcɔ ewú u kéé yééhíkínyínyi muuyé ɔ ɔkɔɔ́háma a nyɛmana, Bandɔ́mɛsɛ́ kéé wuúci nohi. »

¹⁴« Ekúlú eéyé, nu ká nɔ́ lɛ́ca “aabɛ́ yí ekume”[23] eliménénú haála ahá yɛ́ tɛ́ ɔ́mɔ́ nyɛ́mana yé olimine. (Mɔfana asana eéyé é yiíyi lɔ́kɔ́ma bɔmbányɛ.) Yaátɛ́ asana, baacɔ a bá ká bɔ bá i iisí ci Yuté ká bɔ́ nyɛ́mana bá ɔcabakɛna ɔ ɔkɔbɛ́námbaka a tɔkɔndɔ.

¹⁵Ɔɔcɔ awɔ́ u káá bá limine e cuunyi cɛ ciayɛ́ ciíbe tɛ sɔ́ɔ́na anyía wé yóófíne eé ciíbe o okohíite bɛnyɛ́ma bí osúéténe.

¹⁶Híáná tɔ́na, ɔɔcɔ awɔ́ u káá bá e esíéné tɛ káá nyɛ́mana wu ɔhálɔ́mɔ́na o ooki o okohíite búáyɛ́ bɔlaka bú nyiike.

¹⁷Mahana ne né beénjú bé efume ne né eebe a bá ká bɔ́ bá e meele ɔ mɔɔ́sɛ́ etéemé !

¹⁸Ánɔ bɛ́cɔ́kɔ́lɔ́kɛ́na Bandɔ́mɛsɛ́ anyía bɛsana eébí tɛ́ bɛ́kɛ́láka e ekúlú yɛ́ ɛfɔŋa cɛ́ tɔbɔ́lá.

¹⁹Yááŋa anyía ɔ mɔɔ́sɛ́ etéemé, baacɔ ká bɔ́ lɔ́kɔ́máka muuyé buéŋí ɔ ɔhɔla muuyé amɔ́ bá ma bɔ́ lɔ́kɔ́máka o otúme e ekúlú ayɛ́ Bandɔ́mɛsɛ́ ŋe kétíki na ɔmuaná na ɔmɛsɛ́ ɔ ɔkɔɔ́háma aámbáya. Bá tɛ ká háná ábɔ́ lɔ́kɔ́ma nyɛnamá nyí muuyé eényí.

²⁰Mbɔ́kɔ Otéŋí a Waáŋá tɛ́ á sɔ́mba mekúti mɔɔ́sɛ́ etéemé, keyé ta ɔɔcɔ ɔmɔtɛ́ tɛ ɔ́mɔɔ́ bá wu ɔnɔhɔ. Mbá u ŋaá sɔ́mba mekúti mɔɔ́sɛ́ eémé a asana na bááyɛ́ baacɔ abá u ŋɔ lɔ́tɔ́kɔ.

²¹Etéeyé ekúlú, mbɔ́kɔ ɔɔcɔ ŋaá banɔ́ laána ɔsɛ : “Ɔ́ɔ lɛcá, *Mesíi ooci aaha”, ta anyía “Mesíi ocinyíé ehenyíé”, nuti lumítíne.

²²Yááŋa anyía, ne bemesíi bá bɛfala ne *behémúnyi bɛsana bá bɛfala ká bɔ́ hámɔ́kɔ́na, bé tóŋgínyi tubílícínyínyí, bá kɛ́laka *bikéki bɛ́ bɛsana anyía bébú néŋéke eebe abá Bandɔ́mɛsɛ́ ŋɔ lɔ́tɔ́kɔ, ɔ́kɔ yááŋa yɛ́ ɔbá aáná.

²³Mbá banɔ́, énu bíkékényíki aná. Ɛ́ ma mɛ́ caŋacaŋa ɔ banɔ́ óókísíki bɛsana bikime. »

²⁴« Ɔ mɔɔ́sɛ́ etéemé, e elime ci muuyé eémú, ɔɔ́cɔ́ kéé nyíme, oólí tɛ háná nɔ́ma,

²⁵tunjoti tɔ́ ɛŋɔ́lɔ́muaná káá kúákɔnaka ; bɛnyɛ́ma bɛ́ makɛ́nda a bɛ́áŋa ɛ ɛŋɔ́lɔ́muaná kéé bínyíékinyi.[24]

²⁶Ekúlú eéyé, bá káá lɛca Ɔɔ́nɔ́ u ɔɔcɔ á fáakɔna a bɛlɔndɔ́ noómi na na makɛ́nda meéŋí ne nuúmi.

²⁷U káá tɔ́mɔ́kɔ́na bíáyɛ́ *bililé bɛ́ masɔ́ma e *tubéŋú túnyíse tɔ́ ɔmɛsɛ́ ɔ ɔkɔɔ́bánda bááyɛ́ baacɔ ɔbɔlɔtɔ́kɔ́nɔ́, bé húlúkúne e tubéŋú tukime tɔ́ na ɔmɛsɛ́ na ɔmuaná. »

²⁸« Ánɔ lɛcá nyiékúnyi enyí bufikié ŋó tóŋínyi : Ekúlú eyí cííyí ɛndáfɛ á yáaŋa ɔ ɔtɔsɔ, nu ŋe nú menyi anyía tɔbɔ́lá á yáaŋa hoóhi.

²⁹Híáná tɔ́na, ekúlú ayɛ́ nu ká nɔ́ lɛcaka bɛsana eébí á bɛ́kɛ́láka, énu menyí anyía yaŋɔ́ Ɔɔ́nɔ́ u ɔɔcɔ kokóokó !

³⁰Aá taaká taaká, ɛ ŋa mɛ́ banɔ́ laána ɛsɛ́ baacɔ bá hɛɛya eehi ti ké bú wéékúne bekime ɛ́cɛ bɛsana eébí bikime tɛ ŋáa bɛ́kɛ́la.

³¹Na ɔmuaná na ɔmɛsɛ́ káá mána, mbá taaká cɛ́ bíámɛ bɛsana tɛ káá mána ta buɔ́sɛ́. »

³²« Yááŋa anyía, ta ɔɔcɔ ti ŋeé menyi ekúlú eéyé, ta buɔ́sɛ́, te onjéŋí ; te hú *bililé bɛ́ masɔ́ma bɛ́ Bandɔ́mɛsɛ́, ta hú Ɔɔ́nɔ́ u Bandɔ́mɛsɛ́, mbá hú ciamɛ Síkíne bímuócí u ŋe menyi.

³³Énu bíkékényíki, nɔtɛ hɛ́táka hiiné, anyía nu ti ŋé nú menyi ekúlú ayɛ́ bɛsana eébí káá bɛ́kɛ́láka.

³⁴Bú káá bɛ́kɛ́láka bɔkɔ búmɔtɛ́ háyɛ ɔɔcɔ áŋa wu osúéte ɔ ɔkanda, yó síke ciayɛ́ ciíbe ná bááyɛ́ bɔnyiɔnɔ anyía bé síke tétényíki ; yó síkíne hú náányɛ́ buólí bú osíke nyiɔkɔ ; yɔ́ laána mutétényi ehenyi anyía ɔ tɛ hɛ́ta hiiné.

³⁵Nɔtɛ hɛ́táka hiiné aná, anyía nu ti ŋé nú menyi ekúlú eyí muútí ooki ká ka hálɔ́mɔ́na, nanyiɔ́fɔ́ ayɛ́ʼ na ɛ ɛkatɛ́katɛ́ ci butúé e ? A bɛaka bɛ́ ɛkɔkɛ́ ayɛ́ʼ nɔɔ́nɔyá e ?

³⁶Énu bíkékényíki anyía u tɛ banɔ́ kuána e hiiné, mbɔ́kɔ ú ŋgaá hálɔ́mɔ́na hú huasɛ !

³⁷Asana eeye ayɛ́ ɛ́ ŋa mɛ́ banɔ́ láana ŋa lɛ́ca baacɔ bekime : Nɔtɛ hɛ́táka hiiné. »