Read Nomaande Mak 14 Bible Online

Mak 14 - Nomaande bible

Mak 14

¹Mɔɔ́sɛ́ ŋaá bá mɔ́ mɔ lɔ́bɔ méfendí ɔ ɔkɔɔ́háma buɔ́sɛ́ bɔ́ maŋanda eeme : Na bɔ́ *Basíka na abɔ́ bá ŋaá bá bá nyíáka biléti abɛ́ bá ŋaá bá bá tɛ́ a háya enutisi. Ne betéŋínyi *beluli nyiínjie ne *beékúnyi bikotí ŋa bɔ́ bá bábɔ́ áambaka ɔhatɛna Yésus e menjiŋé o o wuúci ɔ́ɔ́nɔ.

²Yááŋa anyía bá ŋa bɔ́ bá bábɔ́ kɔ́ɔnaka báyɛ : « Bú tɛ́ ɔmɔ́ nyɛ́mana bú ɔbɛ́kɛ́láka e ekúlú yɛ́ maŋanda, keyé baacɔ ké bú héléne etuŋulinyi. »

³Buɔ́sɛ́ a bɔ́mɔtɛ́ Yésus ŋaá bá a Bɛtani eé ciíbe ci Símon, oónuúnu ewú ú ŋé yeéŋúnyísi. U ŋaá bá wa nyíáka. Oónjú a wɔmɔtɛ́ ŋó yóófónóno hindeŋé a hɛ́ ŋaá bá hɛtábɔ́nákánɔ́ na nyɛndányɛ́ nyɛ́ alabatɛ́l. Hɛ́ ŋaá bá na taaká cɛ ɔsɔŋɔ yɛ́ náal e yí ŋe númbe ; yɛ́ ŋaá bá onduné ɔ ɔmuaná buéŋí. U ŋaá bácá hindeŋé, yó súkunekinine Yésus ɔsɔŋɔ ekime a aatɔ́.

⁴Bɔ́mɔtɛ́ baacɔ a bá ŋa bɔ́ bá aáhá ŋa bɔ́ lɔ́kɔ́má bɔɔbɛ́, bé ŋé túme ɔkɔɔna beébe ne beébe báyɛ : « Aátɛ́ yɛ́ ŋɔ yɔ́ɔlɔ ɔ ɔcaŋgɛna ɔsɔŋɔ eeye aáná e ?

⁵Yiíyi anyía bá ŋaá bá bé o yiíyi túé ɔ ɔhɔla hɔ́ndɛ́tɛ cɛ́ mɔɔnyɛ́ ɛ́tátɔ́[25], bó meéme aafakɛna a basɔ́kásɔ́ka ! » Nyíábɔ́ nyɛkákálákɛna eényí oónjú oócí buéŋí.

⁶Mbá Yésus ɔsɛ : « Énu wuúci nyɛána mbuumu. Anyíatɛ́ nu ŋe nú wuúci yébi e ? Ú maa mɛ́ kɛlaka ambányɛ yɛ́ asana.

⁷Yááŋa anyíaʼo, nua nɔ́ŋa na basɔ́kásɔ́ka aanɔ́ ɛ ɛkatɛ́katɛ́ bikúlú bikime. Nua nɔ́ŋa nú o beébe ɔ́ɔ́lɔ́kɔ bikúlú bikime ebí nú ŋe nú léne, mbá yaŋɔ́, ɛ tɛ ámɛ bá aanɔ́ ɛ ɛkatɛ́katɛ́ bikúlú bikime.

⁸Bɔkɔ ebú oónjú ooci ma mɛ́ kɛlaka, ú ma kɛ́laka háyɛ maayɛ́ makɛ́nda ó yóóndo. Ú meé mi ootokine ɔsɔŋɔ yí enumbé aá cɛɛ́tɔ ɔ ɔ mɛ tábɔ́nɛ́na muamɛ munyienene.[26]

⁹Aá taaká taaká ɛ ŋa mɛ́ banɔ́ láana isíʼo : Ɔ ɔmɛsɛ́ okime, bɛhaála bikime ebí bé kéé húlikinyi baacɔ Ambányɛ yɛ́ Ɛsɔ́ma eeye, bé kéé bíkétíkínyi tɔ́na baacɔ asana eyí oónjú ooci áŋa ɔkɛlákánɔ́, bé wuúci bɛ́tááka. »

¹⁰Aáná Yútas Iskaliót, ɔmɔtɛ́ u *baákɔ́nɛ́na bɔ́ɔ́hátá ne béfendí bé Yésus, ŋa kaá kuána betéŋínyi *beluli nyiínjie o o beébe fiimbine Yésus.

¹¹Ɛ́makɛ́la bábɔ́ lɔ́kɔ́má aáná, bé ŋé bílénéke buéŋí. Aáná bá ŋa bɔ́ bɛ́tánɛ́na o wuúci iínjie mɔɔnyɛ́. Aáná Yútas ŋeé túme ɔwaamba ekúlú a yambányɛ yí o beébe fiimbine Yésus.

¹²Buɔ́sɛ́ bú buúse abɔ́ bá ŋaá bá bá nyíáka biléti a bɛ́ tɛ á bá ne enutisi, buɔ́sɛ́ abɔ́ bá ŋaá bá bɔ́ yɔ́ɔ́nɔ́kɔ baáná bá ɛtɔ́mbá, bá ɔnyíáka a *Basíka, *baákɔ́nɛ́na bé Yésus báyɛ nááyá : « Háányɛ́ o ŋoó léne anyía tú ka sɔ́ ɔ tábɔ́nákɛ́na Basíka e ? »

¹³Aáná u ŋá tɔ́ma baákɔ́nɛ́na béfendí, ɔsɛ náábɔ́ : « Ánɔ cɔbá, ɛ́kɛlá núénú óófíne a bálɛ́ka, nu ŋa nɔ́ ɔɔ́ndɛ́mánána na ɔɔcɔ, weé húlúkúne ɔkɔɔ́tɔ́ka menyífé ; énu wuúci látáka ;

¹⁴nú oofíne eé ciíbe ecí u ŋo yóofine, mbá núá laána muútí ooki anyía Muékúnyi ŋa báta anyía háányɛ́ u ŋa cɔ́ba ɔ ɔnyíáka Basíka na bááyɛ́ baákɔ́nɛ́na e ?

¹⁵Aáná ú ŋa cɔ́ba ɔ ɔ banɔ́ tóŋínyi yaandándá yí ekéti yí ciíbe yɛ́ ɔnɔŋɔ a yááŋa na bɛnyɛ́ma bikime a bɛ́ ŋaá bɛ́ámba. Ánɔ basɔ́ tábɔ́nákɛ́na Basíka hɔ́á. »

¹⁶Baákɔ́nɛ́na ŋa bɔ́ cɔba a bálɛ́ka, bá ŋá kuána bɛsana bikime háyɛ Yésus ŋeé beébe laákɛ́na, bá ŋá tábɔ́náka Basíka.

¹⁷Nanyiɔ́fɔ́, Yésus ŋá ka háma na bááyɛ́ baákɔ́nɛ́na bɔ́ɔ́hátá ne béfendí.

¹⁸Ekúlú ayɛ́ bá ŋaá bá bébú nyíékínyi, Yésus ɔsɛ : « Aá taaká ɛ ŋa mɛ́ banɔ́ láana isíʼo : Ɔɔcɔ ɔmɔtɛ́ aá banɔ́ ewú tu ŋe sú nyíényi ŋa cɔ́ba o o mi fiimbie. »

¹⁹Ɛ́makɛ́la wá táŋɛ́tá aáná, bé ŋé cunjéke beébe bekime, hú náányɛ́ wá báta ɔsɛ : « Ɔ́kɔ yaŋɔ́ e ? »

²⁰Mbá ɔsɛ : « Ɔmɔtɛ́ aá banɔ́ bɔ́ɔ́hátá ne béfendí ewú tu ŋe sú nyíényi atáásɛ ɔ́mɔtɛ́.

²¹Ɛ́ɛ, Ɔɔ́nɔ́ u ɔɔcɔ ŋa cɔ́ba o owé háyɛ Ciɔɔ́ŋɛ́ ŋe bíkéti a yááyɛ́ asana, mbá mahana ná ɔɔcɔ ewú u ŋeé wuúci fiimbieke ! Yɛ́ ŋa hɔ́la ɔhɛka nááyá anyía keyé bé ti ómó wuúci bíéne. »

²²Bébú nyiékínyi aáná, Yésus ŋé hiíte eléti, u ŋé iínjie Bandɔ́mɛsɛ́ bitéŋíti, u ŋé yiíyi bákáka, u ŋé beébe iínjíékíne, ɔsɛ : « Énu hiíte, ciamɛ cɛɛ́tɔ eeci cɛáŋa. »

²³E elime eécí, u ŋé hiíte hindeŋé hí meluku, u ŋe iínjíé Bandɔ́mɛsɛ́ bitéŋíti, u ŋé beébe íínjíé, bá ŋa múákɛ́na meluku eeme beébe bekime, bé hiíhi hulikinyinyi.

²⁴Mbá Yésus ɔsɛ : « Maamɛ manɔ́ŋɔ́ eeme mááŋa, meéme Bandɔ́mɛsɛ́ ŋó yoónyísinyinyi nyíáyɛ́ nyɛlata nyí bumbénú. Meéme mé ŋé yoótieke a asana yɛ́ baacɔ beéŋí.

²⁵Ɛ ŋa mɛ́ banɔ́ láana aá taaká anyía ɛ tɛ ká háná ámɛ múána meluku ɔ ɔkɔɔ́háma ekúlú ayɛ́ ɛ ká mɛ́ múákɛ́na mecekí e *Butéŋí bɔ́ Bandɔ́mɛsɛ́. »

²⁶Ɛ́makɛ́la bábɔ́ hákɛ́ná maŋana me onyemikinyi Bandɔ́mɛsɛ́, nyíábɔ́ nyɛcɔba eényí a nɔkɔndɔ nú Molifié.

²⁷Yésus ŋaá laána bááyɛ́ *baákɔ́nɛ́na ɔsɛ : « Banɔ́ bekime, nu ŋa nɔ́ cɔ́baka ɔ ɔ mɛ bɛ́yuátaka. Yááŋa anyía Ciɔɔ́ŋɛ́ ŋa kɔ́ɔna cɛ́sɛ : “Ɛ ká mɛ́ ɔ́ɔ́nɔ musókóbi ɛtɔ́mbá, ɛtɔ́mbá cíɔ sasiaka.” »

²⁸U ŋo sólinyi ɔsɛ : « Ta híáná, ekúlú ayɛ́ ɛ ká mɛ́ haanyua e biwéewé, ɛ ká ka mɛ banɔ́ tátáka a *Kalilé. »

²⁹Bíel ɔsɛ nááyá : « Ta yɛ́ cáŋa á bá anyía bɔsɔ́ɔ́kɔ́ bekime ŋa bɔ́ ɔ bɛ́yuátaka, yaŋɔ́ ɛ tɛ ká mɛ ɔ bɛ́yuáta. »

³⁰Mbá Yésus ɔsɛ nááyá : « Ɛ ŋa mɛ́ ɔ laana aá taaká isíʼo : Hɛ́nánɔ, hí e buutú eebu, ɔkɛla anyía yaaka yɛ́ ɛkɔkɛ́ é síke á bɛ́lɛ́ta bikúlú bífendí, ɛ́cɛ kuɔŋɔ́ o no moó mi bínéŋítíkínyi bikúlú bɛ́tátɔ́. »

³¹Mbá Bíel ŋaá hɛ́nyɛ́na ɔkɔɔna ɔsɛ : « I ti ké mi o bínéŋítínyi ta buɔ́sɛ́, ta yɛ́ cáŋa á bá anyía túésú wéényi. » Híáná baákɔ́nɛ́na bekime ŋa bɔ́ kɔɔ́náka bɔkɔ búmɔtɛ́.

³²Bá ŋgá bɔ́ hámá aá haála a hɔ́mɔtɛ́ ahá bá ŋaá bá bɔ́ lɔ́ŋɔ́kɔ anyía Kɛtɛsɛmanɛ́. Mbá Yésus ɔsɛ ná bááyɛ́ *baákɔ́nɛ́na : « Énu limíne aaha ; míɔ cɔba ɔ ɔkɔbɛ́cɔ́kɔ́lɛ́na Bandɔ́mɛsɛ́. »

³³U ŋɔ́ lɔ́ŋɛ́ta ne Bíel, na Sáak, na Sáaŋ ; bé ŋé súéte. Bulíkílíki ŋé túme o wuúci tímbie, maayɛ́ manɔ́ŋɔ́ kátákáta,

³⁴mbá ɔsɛ náábɔ́ : « Uumi ɔtɛ́má ŋaá mɛ́ nua e nyiwééné. Énu limíne aaha bɔɔ́sɔ. »

³⁵Ɛ́makɛ́la wé beébe laána aáná, u ŋá cɔbɛ́ta ne buúse, u ŋé bísúbúlíéne ɔ ɔmɛsɛ́, u ŋé túme ɔbɛ́cɔ́kɔ́lɛ́na Bandɔ́mɛsɛ́ anyía, mbɔ́kɔ búáŋa bú ɔbɛ́kɛ́láka aáná, wé wuúci ááŋɛ́na ekúlú yí muuyé eeye.

³⁶U kɔɔ́naka ɔsɛ : « Ééʼ, Ába, Taatá, ɔ ɔ́ŋa wu ɔkɛlaka bɔkɔ bukime. Cɔ́kɔ́lɛ mɛ ááŋɛ́na hindeŋé hí muuyé eehi eémi eé buúse.[27] Mbá ta híáná, atɛ kɛla háyɛ i ŋe mí léne, mbá háyɛ o ŋoó léne. »

³⁷U ŋgá hálɔ́mɔ́na haála ahá baákɔ́nɛ́na eébé bátátɔ́ ŋaá bá, u ŋé beébe kuána e hiiné, mbá ɔsɛ né Bíel : « Símon, ɔ ɔ́ŋa e hiiné e ? Ɛ́cɛ anyía ɔ tɛ ɔ́mɔ bá wu olimine wɔɔ́sɔ onjéŋí ɔ́mɔtɛ́ e ?

³⁸Énu limíne bɔɔ́sɔ, nu bɛ́cɔ́kɔ́lɔ́kɛ́na Bandɔ́mɛsɛ́ anyía muɔ́kɛ́tánana tɛ banɔ́ hámɛ́na. Ɔɔcɔ áŋa na ɔtɛ́má ɛ ɛcálɛ cɛ́ ɔkɛlaka bɔmbányɛ, mbá yuúhé tɛ́ka. »

³⁹U ŋe túné é beébe bɛ́álɔ́na e bikúlú bífendí, u ŋá hálɔ́mɔ́nɛ́na ɔbɛ́cɔ́kɔ́lɛ́na hú ɔ́mɔtɛ́.

⁴⁰U ŋa háná á hálɔ́mɔ́na haála ahá bááyɛ́ baákɔ́nɛ́na ŋa bɔ́ bá, u ŋá háná beébe kuána e hiiné. Yááŋa anyía hiiné ŋaá bá híé beébe yébíki buéŋí. Beébe te omenyi ta bɔkɔ bú o wuúci láana.

⁴¹Ɛ́makɛ́la wá háná ka hálɔ́mɔ́na e bikúlú bɛ́tátɔ́, mbá ɔsɛ náábɔ́ : « Híánáʼo, ánɔ hɛ́táka, nu hélúméke bɔmbányɛ ! Ɔmanɔ́ ooci, ekúlú ma nyɛ́mana ! Ɛ́ná, bá ɔcɔba o ofiimbie Ɔɔ́nɔ́ u ɔɔcɔ ná bakɛla maabɛ́.

⁴²Ánɔ hatɔ́na, túé súéte ; ɛ́ná, ɔɔcɔ ewú u ŋé mi fiimbie, ooci ú má kaáháma ! »

⁴³Ekúlú eyí Yésus ŋaá bá wa yánáŋa ɔ ɔtáŋa, Yútas, ɔmɔtɛ́ u *baákɔ́nɛ́na bɔ́ɔ́hátá ne béfendí, ŋá ká háma ɔlɔŋɔ ne etúte yɛ́ baacɔ ; bá ŋa bɔ́ bá ne meléfényí : Na tɔsala tɔ́ ɛhána na tɔŋɛndá. Yááŋa anyía ne betéŋínyi *beluli nyiínjie, ne *beékúnyi bikotí, na *baáŋá bé *Besuif ŋe bú beébe tɔ́ma.

⁴⁴Yútas, mufiimbie Yésus, ŋaá bɛ́nyɔ́ŋɛ́na etúte yɛ́ baacɔ eéyé anyána bá ŋa bɔ́ cɔ́ba o omenyi waáta ɔɔcɔ. U ŋeé beébe laána ɔsɛ : « Ɔɔcɔ ewú i ŋeé mi bíémbi íciócí, énu wuúci mɛɔ́mɛ́na, núé súéténe ɔbɛ́nɔ́fánɔ́ bɔmbányɛ. »

⁴⁵Hí ahɛ́ Yútas ŋa kaáháma, yó bíkósíti nááyá, mbá ɔsɛ : « Láábi ! » Nyi wuúci bíémbi eényí.

⁴⁶Eéyé ekúlú, baacɔ a bá ŋa bɔ́ bá na Yútas ŋa bɔ́ bɛ́lɔ́cɛ́na Yésus, bé ŋé wuúci mɛɔ́mɛ́na.

⁴⁷Mbá ɔɔcɔ ɔmɔtɛ́ a baacɔ a bá ŋa bɔ́ bá aáhá ŋɔ sɔ́mɔ nɔsala nɔ́ ɔhána, yó súbíne munyiɔnɔ mu *mutéŋínyi beluli nyiínjie a muáŋá, u ŋé wuúci cála ɔ ɔcala ootú.

⁴⁸Mbá Yésus ɔsɛ : « Anyíatɛ́ nu ma nɔ́ fáakɔna ɔ ɔkɔ́ mɛ mɛɔ́mɛ́na na tɔsala tɔ́ ɛhána na tɔŋɛndá, háyɛ anyía ya mɛ́ŋa ocónjólóŋó yɛ́ ɔɔcɔ e ?

⁴⁹Yiíyi anyía mɔɔ́sɛ́ mekime ɛ ŋáa mɛ bá na banɔ́, i yéékúnyíki baacɔ eé *Ciíbe cɛ Bandɔ́mɛsɛ́, mbá banɔ́ nu tɛ ɔ́mɔ nɔ́ mɛ mɛɔ́mɛ́na. Mbá, bú ma kaáháma aáná anyía bú á bɛ́kɛ́láka háyɛ Ciɔɔ́ŋɛ́ cɛ́ Bandɔ́mɛsɛ́ ŋó tóŋínyi. »

⁵⁰Aáná baákɔ́nɛ́na bekime ŋa bɔ́ cábákɛ́na, bé ŋé wuúci bɛ́yúata.

⁵¹Ɔnɔ́kɔ́ yɛ́ ɔɔcɔ a yɛ́mɔtɛ́ ŋaá bá aaha, yá látákɛ́na Yésus ; yɛ́ ma bɛ́bákɛ́na hú sanja aá cɛɛ́tɔ. Bá ŋa sɛ́ bé wuúci hatɛ́na,

⁵²mbá u ŋa bɛ́yuáta ciayɛ́ sanja, nyɛbɛ́hɔ eényí, u ŋá cábákɛ́na onuti etémbí.

⁵³Bá ŋa bɔ́ cɔbána Yésus né *mutéŋínyi beluli nyiínjie a muáŋá. Hɔ́á ne betéŋínyi *beluli nyiínjie bekime, ne *beékúnyi bikotí, na *baáŋá bé *Besuif ŋa bɔ́ bɛ́bándákáná.

⁵⁴Bíel ŋaá bá waá látákɛ́na Yésus e elime haaca ɔ ɔkɔɔ́háma a nɔháatɛ́ nú mutéŋínyi beluli nyiínjie a muáŋá. Aáhá u ŋe fulé é límine ne bicénji, u ŋe túmé ɔwaásába oocó.

⁵⁵Ne betéŋínyi beluli nyiínjie na baacɔ bé Hitúlé a hiáŋá bekime ŋa bɔ́ bá bábɔ́ áambaka hɛkɔma hɛ́ ɔwɔɔ́nɛ́na Yésus e hiíhi, mbá ta híáná beébe te o hiíhi bɔ́ŋɔ.

⁵⁶Yááŋa anyía baacɔ beéŋí ŋa bɔ́ bá bébú wuúci sɔ́mbákɛ́na bɛsana, mbá bɛ́ tɛ ɔ́mɔ́ bá bɔkɔ búmɔtɛ́ : Hú náányɛ́ wa kɔ́ɔnaka náányia.

⁵⁷Bɔ́mɔtɛ́ baacɔ ŋa bɔ́ hátɔna ɛndánáka, bé ŋé wuúci sɔ́mbɛ́na asana, báyɛ :

⁵⁸« Tua sɔ́ŋa balɔ́kɔ́mánɔ́ waá kɔ́ɔ́naka ɔsɛ : “Ɛ ká mɛ́ kataka *Ciíbe cɛ Bandɔ́mɛsɛ́ eeci acɛ́ baacɔ á bɔ́ŋa bafalɛ́fákánɔ́, mbá ɔ mɔɔ́sɛ́ matátɔ́ míɔ falɛfaka ci etémbí acɛ́ tɛ́ cáŋa baacɔ bá ká bɔ́ falɛfaka.” »

⁵⁹Mbá ta hú a asana eéyé, bɔ́ tɛ ɔ́mɔ́ bɔ́ bá okelú ɔ́mɔtɛ́. Hú náányɛ́ ŋaá bá wa kɔ́ɔnaka náányia.

⁶⁰Mutéŋínyi beluli nyiínjie a muáŋá ŋá hatɔ́na ɛndánáka ɛ ɛkatɛ́katɛ́ ci Hitúlé, u ŋé bícónyi Yésus ɔsɛ : « Ɔ tɛ ŋɔ́ɔ bɛ́sɔ́mɔ ta hɛkɔma a tɔkɔma eetu atɔ́ baacɔ eebe ŋé bú o túme e ? »

⁶¹Mbá Yésus ŋeé lésíkínyí hú mbuumu, ta ɔbɛ́káma ta bɔkɔ. Mutéŋínyi beluli nyiínjie a muáŋá ŋe túné é wuúci bícónyi ɔsɛ : « Ɔ ɔ́ŋa *Mesíi, Ɔɔ́nɔ́ u Bandɔ́mɛsɛ́ a wɔsáyábɛ́nánɔ́ e ? »

⁶²Mbá Yésus ɔsɛ : « Ɛ́ɛ, ya mɛ́ŋa waátákána ; híáná nu ká nɔ́ lɛcáka Ɔɔ́nɔ́ u ɔɔcɔ oliménénú a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́ Alámakɛ́nda. Nuó wuúci lɛcaka tɔ́na weé húlúkúne a bɛlɔndɔ́ ɛ ɛŋɔ́lɔ́muaná. »

⁶³Ɛ́makɛ́la mutéŋínyi beluli nyiínjie a muáŋá á lɔ́kɔ́má aáná, hilóbi ŋé wuúci tímbíé ; u ŋá laháka bíáyɛ́ bɛlaŋa, mbá ɔsɛ : « Aátɛ́ tɔ́na ! Tu tɛ ŋá háná asɔ́ aamba tɔkɔma tú etémbí.

⁶⁴Nú ma nɔ́ lɔ́kɔ́ma na cáánɔ́ eetú háyɛ ú ŋe féníne Bandɔ́mɛsɛ́ ! A nyíánɔ́ʼo ? » Baacɔ bekime nyɛbɔsɔna eényí anyía ú maá kua asana ; bá ŋá nyɛmána bé o wuúci ɔ́ɔ́nɔ.

⁶⁵Bɔ́mɔtɛ́ baacɔ a bá ŋa bɔ́ bá aaha ŋe bú túme otúéne Yésus maatá, bé ŋe wuúci súŋe bɔlaka e eése, bé wuúci túméke tɔnjɔkɔ, báyɛ nááyá : « Ɔ́ɔ basɔ́ laána, aányɛ́ u mɔ́ yɔ́ɔ kɛla aáná e ? » Bicénji ŋe bú wuúci hiíte, bé wuúci aátákɛ́na ɛbɛ́lɛ́.

⁶⁶Bíel ŋaá bá wa yánáŋa a nɔháatɛ́ bulɔɔ́lɔ ; munyiɔnɔ e muénjú a mumɔtɛ́ mu *mutéŋínyi beluli nyiínjie a muáŋá ŋe oófíne.

⁶⁷Mu ŋa lɛca Bíel wa yaásábáka oocó, yó wuúci bísíémúkúnyi bɔmbányɛ bɔmbányɛ, mbá ɔsɛ nááyá : « Ɔ́kɔ, tɛ́ka kuɔŋɔ́ tɔ́na ɔ ŋɔɔ́ bá ɔlɔŋɔ ne Yésus, ɔnɔ́kɔ́ yɛ́ *Násalɛt eeye e ? »

⁶⁸Mbá Bíel ŋeé bínéŋítínyi, ɔsɛ : « I ti ŋé mi menyi asana háyɛ eéyé, ɛ tɛ lɔ́kɔ́ma ta aátɛ́ ɔ ŋɔɔ́ waamba ɔkɔɔna. » Aáná u ŋa hatɔna ɛndánáka, u ŋá cɔba o ohónyí e nyiofine nyɛ́ hɛkáká[ ; yaaka yɛ́ ɛkɔkɛ́ nyɛbɛ́lɛ́ta eényí].

⁶⁹Mbá munyiɔnɔ e muénjú eémú ŋé wuúci lɛca, muɔ́ háná láana baacɔ a bá ŋa bɔ́ bá hɔ́á ɔsɛ : « Ɔɔcɔ ooci áŋa ɔmɔtɛ́ u ɔlɔŋɔ oócí ! »

⁷⁰Mbá Bíel ŋe túné bínéŋítínyi Yésus. Hikúlúkúlú, baacɔ a bá ŋa bɔ́ bá aáhá ŋe túné láana Bíel báyɛ : « Taatá, isuŋí tɛ a bá ɛmbányɛ, ɔ ɔ́ŋa u ɔlɔŋɔ oócí, anyía kuɔŋɔ́ tɔ́na ɔ ŋɔɔ́ nɔkɛna ɔtáŋa háyɛ ɔɔcɔ u *Kalilé. »

⁷¹Aáná Bíel ŋeé túmé ɔtáŋa, u súátákɛ́na, u bɛ́sɔ́mɔ́kɔ biinyie, ɔsɛ : « Aá taaká, i ti ŋé mi menyi ɔɔcɔ awɔ́ nu ŋa nɔ́ kɔ́ɔ́na yááyɛ́ asana. »

⁷²Hú a yaátɛ́ ekúlú yaaka yɛ́ ɛkɔkɛ́ ŋá bɛ́lɛ́ta ɔ ɔbɛ́lɛ́ta e bikúlú bífendí. Aáná Bíel ŋaá bɛ́táá ɔtáŋa ewú Yésus ŋeé wuúci laána, ɔsɛ : « Ɔkɛla anyía yaaka yɛ́ ɛkɔkɛ́ é síke a bɛ́lɛ́ta e bikúlú bífendí, ɛ́cɛ o no moó mi bínéŋítíkínyi bikúlú bɛ́tátɔ́ asɛ o ti ŋóo mi menyi. » Nyíáyɛ́ nyitúme malɛlá eényí.