Read Nomaande Mak 15 Bible Online

Mak 15 - Nomaande bible

Mak 15

¹Tútútú nɔɔ́nɔyá, betéŋínyi *beluli nyiínjie ŋa bɔ́ bɛ́bándákáná ɔlɔŋɔ na *baáŋá bé *Besuif, ne *beékúnyi bikotí, na baacɔ bé etémbí bekime bé Hitúlé a hiáŋá[28] anyía bábɔ́ lɔ́kɔ́mána. Aáná bé ŋe bú iínjie baacɔ makɛ́nda ma ɔwɔɔ́tɔ́kɔ́kɔ Yésus, bé ŋé ké wuúci fiimbie né Bílat.

²Bílat ŋé wuúci bícónyi ɔsɛ : « Mbá ɔ ɔ́ŋa otéŋí u Besuif e ? » Mbá Yésus ɔsɛ : « Kuɔŋɔ́, ɔ ŋɔɔ́ kɔɔna aáná. »

³Betéŋínyi beluli nyiínjie ŋa bɔ́ bá bébú túméke Yésus tɔkɔma tuéŋí.

⁴Aáná Bílat ŋa háná é wuúci bícónyi ɔsɛ : « Mbá ɔ tɛ ŋɔ́ɔ bɛ́káma ta bɔkɔ e ? Tɛ́ka ɔ ŋɔɔ́ lɔ́kɔ́ma anamánamá cá tɔkɔma etú bé ŋe bú o túme e ? »

⁵Mbá u tɛ ɔ́mɔɔ́ háná o wuúci bɛ́káma ta bɔkɔ. Bílat ŋé kéké asana eéyé buéŋí.

⁶Yááŋa anyía ɔ tuɔŋɔ tukime, e ekúlú yɛ́ bɔŋanda bɔ́ *Basíka, Bílat ŋaá bá waá nyɛ́anakɛnɛna baacɔ bá bunɔŋɔ ɔɔcɔ ɔmɔtɛ́ u ciíbe cɛ ɛcaná awɔ́ bá ŋaá bá bé wuúci báta anyía wá nyɛána.

⁷Híáná ɔɔcɔ a wɔmɔtɛ́ ŋaá bá eé ciíbe cɛ ɛcaná ekúlú eéyé ; nyíáyɛ́ nyiínyi ɛ́cɛ Balábas. U ŋaá bá ɔlɔŋɔ na baacɔ a bá ŋa bɔ́ kɛ́lákɛna betéŋínyi bunɔŋɔ aatɔ́ ɔnata, yɔ́ wɔɔ́nɔ́kɔ ɔɔcɔ.

⁸Aáná etúte yɛ́ baacɔ ŋa cɔba ná Bílat, yó wuúci báta anyía wé yiíyi kɛ́lɛ́na asana ayɛ́ u náŋa wé yiíyi kɛ́lakɛna.

⁹Mbá Bílat ŋa bɛ́káma ɔsɛ : « Nu ŋa nɔ́ aamba anyía yámɛ banɔ́ nyɛanɛna otéŋí u Besuif e ? »

¹⁰Yááŋa anyía u ŋaá bá weé menyukune bɔmbányɛ bɔmbányɛ anyía betéŋínyi *beluli nyiínjie ŋeé fiimbie Yésus nááyá a asana na muabɔ́ muliŋenene.

¹¹Mbá betéŋínyi beluli nyiínjie ŋe bú oosíkínyi nyɛkɔca nyɛ́ baacɔ anyía Bílat é nyiínyi nyɛanɛ́na hú Balábas.

¹²Mbá Bílat ŋa háná á báta ɔsɛ : « Aátɛ́ nu ŋa nɔ́ áamba aná anyía yámɛ kɛ́la ne ooci awɔ́ nu ŋa nɔ́ lɔ́ŋɔ anyía otéŋí u Besuif e ? »

¹³Aáná bé ŋe bú túmé ɔbɔmɔ báyɛ : « Ɔ ɔmbásá ɔ ɔmuanáʼo ! »

¹⁴Bílat ŋé beébe batá ɔsɛ : « Bɔkɔ a bɔɔbɛ́ bɔ́ yaátɛ́ wáŋa ɔkɛlákánɔ́ e ? » Bé ŋé túné bɔmɛ́ta buáŋá báyɛ : « Ɔ ɔmbásá ɔ ɔmuanáʼo ! »

¹⁵Bílat ŋaá bá wá yáambaka ɔkɛla háyɛ nyɛkɔca nyɛ́ baacɔ ŋaá bá nyíé lénéke, aáná u ŋeé nyiínyi nyɛanɛna Balábas. E elime eécí, Bílat ŋá laana baacɔ anyía bé súbéke Yésus ne mesue, nyi beébe wuúci fiimbine eényí anyía bé keé wuúci aátákɛ́na ɔ ɔmbásá.

¹⁶Bicénji ŋaá hámánáná Yésus a nɔháatɛ́ nú ciíbe cɛ kɔ́mɛ́na, bɛ́ ŋɔ́ lɔ́ŋɔ́kɔ úúbú ɔlɔŋɔ okime.

¹⁷Bí ŋé wuúci laŋá kaba e cibólótoto.[29] Bɛ́ ŋaá nuáka oboŋoli na ɛsándá, bí ŋé wuúci háya a aatɔ́ háyɛ atamba yí butéŋí.

¹⁸Aáná bí ŋeé túme o wuúci téŋi, bí wuúci cɛ́cáka, bɛ́sɛ : « Hɔɔ́ɔʼ, otéŋí u *Besuif. »

¹⁹Bí wuúci súbéke na nɔtɔŋɔtɔ́ŋɔ́ a aatɔ́, bí wuúci túékíne maatá, bí wuúci túmékine eŋéndu háyɛ anyía bí ŋeé wuúci nyemi, yiíyi anyía bí ŋeé wuúci cɛ́ca bɔ cɛ́ca.

²⁰Ɛ́makɛ́la bíé wuúci cɛ́cáka aáná, bí ŋé wuúci laŋɔ́na kaba e cibólótoto, bí ŋé wuúci helúmúnyi bíáyɛ́ bɛlaŋa ; nyi wuúci cɔbana eényí o okoó wuúci aátɛ́na ɔ ɔmbásá.

²¹Ekúlú ayɛ́ bá ŋaá bá bábɔ́ cɔ́cɔbakana Yésus o okoó wuúci aátɛ́na ɔ ɔmbásá, Símon, ɔɔcɔ a wɔmɔtɛ́ u bálɛ́ka ci Silɛ́ɛn, ŋaá bá waá hɔ́laka aáhá, u ke yéélúéke e esíéné ; u ŋaá bá síkíne cɛ na Alɛkɛsándɛlɛ ne Lúfus. Bicénji ŋe bú wuúci eékínyi ɔbɛ́túáhɛ́na ɔmbásá ú Yésus.

²²Aáná bá ŋa cɔ́bana Yésus a haála ahá bɔ́ ŋɔɔ́ lɔ́ŋɔ anyía « Kɔlɔkɔ́ta » ɛ́cɛ « haála há nuɔ́ŋɔ́lɔ́ŋɔ́lɔ ».

²³Bá ŋa sɛ́ bébú wuúci múúsi meluku a mááŋa malátákánɔ́ na bɔkanyɛ́ abɔ́ bɔ́ ŋɔ lɔ́ŋɔ anyía míile, mbá wuúci ta ɔmúá.[30]

²⁴Nyíábɔ́ nyɛátákɛ́na eényí Yésus ɔ ɔmbásá. Bá ŋá aáfákána bíáyɛ́ bɛlaŋa ɛ́cɛ bá ma bɔ́ ááhakɛna ɔndɔŋɔ o omenyi bɔlaka abɔ́ ɔɔcɔ okime eé beébe áŋa wu ohiite.

²⁵Na asanɔ́, i injéŋí ɛnámanyɛ́ nɔ́mɔ, bé ŋe bú wuúci aátákɛ́ná ɔ ɔmbásá.

²⁶Bá ŋa bɔ́ ɔɔ́ŋɔ́kɔ hɛkɔma e hí ŋo tóŋínyi anyíatɛ́ bé ŋeé wuúci ɔɔ́nɛ́ná e hiíhi, báyɛ : « Otéŋí u *Besuif ».

²⁷Bá ŋa bɔ́ aátákɛ́ná tɔ́na baŋána béfendí ɛ ɛmbásá hoóhi ne wuúci : A wɔmɔtɛ́ ɔ ɔmbásá a wɔ́mɔtɛ́ a aháŋá yɛ́ ɔɔbɔ́ ú manɔ́mɛ, ooci a wɔmɔtɛ́ ɔ ɔmbásá a wɔ́mɔtɛ́ a aháŋá yɛ́ ɔɔbɔ́ ú meényi.

²⁸[Híáná bú ŋaá bɛ́kɛ́láka háyɛ Ciɔɔ́ŋɛ́ ŋé tóŋínyi cɛ́sɛ : « Bé ŋeé wuúci fanɛ́na ɔ ɔmbana ú bɔɔ́nɔ baacɔ. »]

²⁹Baacɔ a bá ŋa bɔ́ bá bábɔ́ hɔ́laka aáhá ŋa bɔ́ bá bébú wuúci ɔɔ́mbɔ́náka, bé wuúci bíbúnúnéke, bá kɔɔ́naka báyɛ : « Ɔnɔ́kɔ́, kuɔŋɔ́ awɔ́ ɔ ɔ́ŋa wu ɔkataka *Ciíbe cɛ Bandɔ́mɛsɛ́, wɔ́ɔ falɛfɔtɔkɔna ci etémbí ɔ mɔɔ́sɛ́ matátɔ́ e ?

³⁰Bínóhi kuɔŋɔ́ bɛ́muátá aná ; sɔ́ɔ́na ɔ ɔmbásá ! »

³¹Híáná tɔ́na, ne betéŋínyi *beluli nyiínjie ne *beékúnyi bikotí ŋa bɔ́ bá bábɔ́ ɔɔ́mbɔ́náka Yésus, bá kɔɔ́naka beébe ne beébe báyɛ : « U ŋo nóhíki baacɔ bé etémbí, mbá u tɛ a bá wu obínóhi wuúci bɛ́muátá !

³²*Mesíi, Otéŋí u *Islayɛ́l, á sɔ́ɔ́na ɔ ɔmbásá aámbáya aná, anyía túásɔ́ lɛ́ca mbá túásɔ́ háya mɔŋɔlɛ́ nááyá. » Baacɔ a bá ŋa bɔ́ bá baátákɛ́nánɔ́ ɛ ɛmbásá ɔlɔŋɔ ne wuúci ŋaá bá bébú wuúci ɔɔ́mbɔ́náka tɔ́na.

³³Ɛ ɛkatɛ́katɛ́ cɛ buɔ́sɛ́, ibíne ŋaá kua i iisí ikime ɔ ɔkɔɔ́háma i injéŋí ɛ́tátɔ́.

³⁴I injéŋí ɛ́tátɔ́ eécí, Yésus ŋó bókíte buáŋá ɔsɛ : « Eli, Eli, lama sabaktani ? », ɛ́cɛ anyía « Ciamɛ Bandɔ́mɛsɛ́, ciamɛ Bandɔ́mɛsɛ́, anyíatɛ́ ɔ́ mɔɔ́ mɛ bɛ́yúata e ? »

³⁵Ɛ́makɛ́la bɔ́mɔtɛ́ a baacɔ a bá ŋa bɔ́ bá aáhá tálɛ́mákɛ́ná ábɔ́ lɔ́kɔ́ma ɔtáŋa oócí, báyɛ : « Ánɔ lɔ́kɔ́ma, u ŋɔɔ́ lɔ́ŋɔ Éli. »

³⁶Aáná ɔɔcɔ a wɔmɔtɛ́ eé beébe ŋaá cábɛ́tɛ́na, yó ko yubíne kɔ́cá a bɛányákánɔ́ bí meluku ; u ŋé ciíci fekí a nɔtɔŋɔtɔ́ŋɔ́, u ŋé ciíci kosíti né nyuúté nyí Yésus anyía wɔ́ cɔ́njɔkɔ, mbá ɔsɛ : « Ánɔ ɔ́ɔ́kɔ ! Túɔ cɔba ɔ ɔlɛca mbɔ́kɔ Éli ŋa fáaya, yó koó wuúci aatɔna ɔ ɔmbásá. »

³⁷Mbá Yésus ŋoo bókíte na makɛ́nda, nyiomboko aatɔ́ eényí.

³⁸Ekéti yɛ́ bɔlaka a yɛ́ ŋaá bá yá sɔ́mbɔ́tɔ́kɔ́na *Ciíbe cɛ Bandɔ́mɛsɛ́ ŋaá láhɛa ɛ ɛkatɛ́katɛ́ o otúme ɔ ɔmuaná ɔ ɔkɔɔ́háma ɛ ɛmbana.

³⁹Mutéŋínyi bicénji etíne atáánɔ ŋaá bá tálɛ́mɛ́na aáhá eé buúse bɔ́ ɔmbásá ú Yésus. Ɛ́makɛ́la muá lɛ́cá anyána Yésus ŋeé wé ɛ́cɛ ú moó bókíte, mbá mɔsɛ : « Yááŋa taaká anyía ɔɔcɔ ooci ŋaá bá Ɔɔ́nɔ́ u Bandɔ́mɛsɛ́. »

⁴⁰Bɔ́mɔtɛ́ beénjú tɔ́na ŋa bɔ́ tálɛ́mákɛ́na enenyíé, bé bísíémúkúnyi. Eé beénjú eébé, na Malíi, itónyi cɛ Makatala, na Salómɛ́, na Malíi, iinyí cɛ na Sáak e wutíkítíki ne Soóse, ŋa bɔ́ bá.

⁴¹Beénjú eébé ŋa bɔ́ bá bábɔ́ látákɛ́na Yésus ekúlú ayɛ́ u ŋaá bá a *Kalilé, bé wuúci kɛ́lákɛ́na masɔ́ma. A bɔ́mɔtɛ́ tɔ́na beéŋí ŋa bɔ́ bá hɔ́á e bé ŋe bú cúcúbíkínyi ne wuúci eé Yelúsalɛm.

⁴²A nyiɔ́fɔ́ eényí, bá kɔ́ɔnaka anyía *buɔ́sɛ́ bú ehélúme bú *Besuif áŋa nɔɔyá, buɔ́sɛ́ bɔ́ nyɛbɛ́tábɔ́na nyí ehélúme,

⁴³ɔɔcɔ a wɔmɔtɛ́ u bunɔŋɔ bɔ́ Alɛmatɛ́ ŋa kaáháma ; nyíáyɛ́ nyiínyi ŋaá bá ɛ́cɛ Yɔ́sɛb. U ŋaá bá ɔɔcɔ u Hitúlé a hiáŋá. Baacɔ wuúci kékéke buéŋí ; waá tátáka tɔ́na na mɔŋɔlɛ́ *Butéŋí bɔ́ Bandɔ́mɛsɛ́. U ŋe yeéhínyínyi, yɔ́ cɔba né Bílat ɔ ɔkɔbáta omime ú Yésus.

⁴⁴Bílat ŋeé kéké anyía Yésus ŋe tényí é wé. Aáná u ŋɔɔ́ lɔ́ŋɛ́ta mutéŋínyi bicénji etíne atáánɔ ; u ŋé muúmu batá ɔsɛ : « Ɔ́kɔ, Yésus ŋeé wé buáyá e ? » Mbá mɔsɛ : « Ɛ́ɛ. »

⁴⁵Ɛ́makɛ́la mutéŋínyi bicénji é wuúci bɛ́kámá aáná, nyíáyɛ́ nyiínjie Yɔ́sɛb makɛ́nda me ohiite omime eényí.

⁴⁶Yɔ́sɛb ŋɔ́ kɔ yɔ́ɔ́ndɔ́ ɔmbɔ́mɔ́. U ŋa aatɔ́na omime ɔ ɔmbásá, u ŋá bákákɛ́na ɔmbɔ́mɔ́ ; nyikeényie eényí. Eenyie ŋaá bá etímékénú a nyɛndányɛ́ noómi. E elime eécí, u ŋeé fuŋúlísíki yaandándá yɛ́ nyɛndányɛ́ e nyiofine nyí eenyie.

⁴⁷Na Malíi, itónyi cɛ Makatala, na Malíi, iinyí ci Soóse, ŋe bú bísíémúkúnyi haála ehé bé ŋeé wuúci nyie.