Read Nomaande Mak 16 Bible Online

Mak 16 - Nomaande bible

Mak 16

¹Ahá *buɔ́sɛ́ bú ehélúme bú *Besuif ŋa hɔ́la, na Malíi, itónyi cɛ Makatala, na Salómɛ́, na Malíi, iinyí cɛ Sáak, ŋa bɔ́ ɔ́ɔ́ndɔ́kɔ́ bɛsɔŋɔ bí enumbé anyía bé ke bú fééfíki omime ú Yésus.

²Tútútú nɔɔ́nɔyá, buɔ́sɛ́ bɔ́ sɔ́ndɛ ɛ́cɛ ɔɔ́cɔ́ a yáaŋa ɔ ɔháma, bá ŋa bɔ́ hátɔ́na bɔ́ cɔba e eenyie.

³Bá ŋa bɔ́ bá bábɔ́ bɛ́bátáka beébe ne beébe báyɛ : « Aányɛ́ u ŋa cɔ́ba ɔ ɔ basɔ́ fúŋulisinyinyi nyɛndányɛ́ e nyí ŋe kúeye nyiofíníne nyí eenyie e ? »

⁴Mbá, ahɛ́ bá ŋa bɔ́ tálá eése, bá ŋá lɛcá anyía bé me fúŋulisi yaandándá yɛ́ nyɛndányɛ́ a nyɛ́ ŋaá bá e nyiofíníne nyí eenyie.

⁵Bé ŋe bú óófíne noómi, bɔ́ lɛ́ca ɔnɔ́kɔ́ yɛ́ ɔɔcɔ eliménénú a yáábɔ́ aháŋá yɛ́ ɔɔbɔ́ ú manɔ́mɛ, ú ma láŋaba kaba e cifúlúndúndúé. Bulíkílíki ŋé beébe tímbíé.

⁶Mbá ɔnɔ́kɔ́ yɛ́ ɔɔcɔ eéyé ŋeé beébe laána yɛ́sɛ : « Nuti líkíméke. Nu ŋa nɔ́ áamba Yésus, ɔɔcɔ u *Násalɛt, awɔ́ bá ŋa yaátákɛ́na ɔ ɔmbásá. Ú ma háanyua o owé, u tɛ á bá aaha ! Ánɔ lɛca, aaha bé ŋeé wuúci fiényínyi.

⁷Aámbáya, ánɔ cɔbá ɔ ɔkɔláana bááyɛ́ *baákɔ́nɛ́na, ne Bíel áyá, anyía ú me búéke a *Kalilé : Hɔ́á nú ké nú wuúci lɛcaka, háyɛ u ŋaá banɔ́ láákɛ́na. »

⁸Nyíábɔ́ nyɛháma eényí e eenyie, bá ŋá cabákɛ́na, bá ndándámaka ɛ́cɛ bá ma bɔ́ taa. Ta híáná, bɔ́ tɛ ɔ́mɔ bɔ́ láana ta ɔɔcɔ ta bɔkɔ anyía bá ŋa bɔ́ bá bébú líkíméke buéŋí. [

⁹Tútútú nɔɔ́nɔyá cɛ́ buɔ́sɛ́ bɔ́ sɔ́ndɛ Yésus ŋa háanyua e biwéewé. U ŋa caŋá obítóŋínyi ná Malíi, itónyi cɛ Makatala, ecí u ŋeé hémúkúnyi *bɛɛbɛ́ bí bililé bítíndétú nɔ́mɔ.

¹⁰Aáná Malíi ŋaá cɔbá o o húle bíkétíkínyi baacɔ e bé ŋe bú líhéke ne Yésus asana eéyé. Bá ŋa bɔ́ bá na ɔtɛ́má ɔnua, bá lɛ́laka.

¹¹Mbá ahɛ́ bá ŋa bɔ́ lɔ́kɔ́máká ɔtáŋa ú Malíi, anyía Yésus áŋa wɔɔ́sɔ, ú me wuúci lɛcaka tɔ́na, beébe te olumitinine.

¹²E elime eécí, Yésus ŋé bítóŋínyi ná *baákɔ́nɛ́na béfendí a bɔ́mɔtɛ́, u lɛcakana náányia. Baákɔ́nɛ́na eébé ŋa bɔ́ bá bábɔ́ cɔ́cɔbaka a hɛnɔŋɔnɔ́ŋɔ́ a hɛ́mɔtɛ́.

¹³Bá ŋga bɔ́ halɔ́mɔ́na, bó bíkétíkínyi tɔ́na bɔsɔ́ɔ́kɔ́ baákɔ́nɛ́na asana eéyé, mbá beébe te olumitinine tɔ́na.

¹⁴E elime eécí, Yésus ŋé bíóndísínyi obítóŋínyi ná bááyɛ́ *baákɔ́nɛ́na bɔ́ɔ́hátá na ɔmɔtɛ́, beébe ɔ ɔnyíá ; yó beébe kákálákɛ́na anyía bá ŋa bɔ́ bá ne isuŋí na bɛnatákánɔ́ bɛ́ ɛtɛ́má, ananyía bé ti ómo bú lumitinine ɔtáŋa ú baacɔ e bé ŋe bú wuúci lɛcáka ɛ́cɛ ú ma háanyua o owé.

¹⁵Ɔsɛ náábɔ́ : « Énu ke húlíkínyi baacɔ bekime ɔ ɔmɛsɛ́ okime Ambányɛ yɛ́ Ɛsɔ́ma.

¹⁶Ɔɔcɔ ewú u kéé lumitinine Ambányɛ yɛ́ Ɛsɔ́ma eéyé, yó bíótíne, káá bá ne olíhe. Mbá ɔɔcɔ ewú u ti kéé yiíyi lumitinine káá bá na nyɛkua.

¹⁷Bikéki bí tubílícínyínyí eebi káá lɛ́cakana a baacɔ e bé ké bú lúmitekinine : Bé ké bú hémúkúnyi *bɛɛbɛ́ bí bililé eémí e nyiínyi, bá táŋáka bɛɔ́sɔɔ́sɔ bɛ́ ɛtáŋa.

¹⁸Bá hátɛakɛna mɔɔ́hɔ a mɔɔ́sɔ na aabá. Ta bábɔ́ muána bɔkɔ a bulɔkɔ́nɔ́, bú ti kéé beébe kɛla ta bɔkɔ ; bá ká bɔ́ tálákɛ́na bɔkɔnɔ́kɔ́nɔ aabá, bɔkɔnɔ́kɔ́nɔ eébé bɔ́ waáŋɔ́núaka. »

¹⁹Ɛ́makɛ́la Otéŋí a Waáŋá Yésus á máná ɔtáŋa aáná ná bááyɛ́ *baákɔ́nɛ́na, Bandɔ́mɛsɛ́ nyi wuúci béétísi eényí ɔ Ɔmuaná o okolímine aáyá a maabána, a yááyɛ́ aháŋá yɛ́ ɔɔbɔ́ ú manɔ́mɛ.

²⁰Aáná baákɔ́nɛ́na ŋa bɔ́ cɔ́bá o o húle húlinyi baacɔ Ambányɛ yɛ́ Ɛsɔ́ma haála hekime. Otéŋí a Waáŋá ŋaá bá ne beébe e buólí eébú, we oónyísíkínyi Ambányɛ yɛ́ Ɛsɔ́ma ne bikéki bí tubílícínyínyí abɛ́ bá ŋa bɔ́ bá bábɔ́ kɛ́laka.]