Read Nomaande Mak 2 Bible Online

Mak 2 - Nomaande bible

Mak 2

¹Ɛ́makɛ́la mɔɔ́sɛ́ a hɔ́lá, Yésus ŋga hálɔ́mɔ́ná a Kabɛlnawum ; baacɔ ŋa bɔ́ lɔ́kɔ́má anyía wáŋa e úúyé ooki;[2]

²ɔmbana weéŋí ŋá bɛ́bándákána ɔ ɔkɔɔ́háma ayɛ́ nyɛtákɛ́na nyɛ́ ɔkɔlɔ́ tɛ ɔ́mɔɔ́ bá, te e buúse bú ehenyi. Yésus ŋaá bá weé beébe eékúnyíki Bɛsana bɛ́ Bandɔ́mɛsɛ́.

³Aáná baacɔ a bɔ́mɔtɛ́ ŋe bú wuúci héléníne asákála ; baacɔ bényíse bé yiíyi bɛ́túáhɛ́nánɔ́.

⁴Mbá bɔ́ tɛ ɔ́mɔ́ bɔ́ bɔ́ŋɔ ohónyí wú o yiíyi cɔbana eé buúse bú Yésus a asana na nyɛkɔca nyɛ́ baacɔ. Aáná bé ŋe bú yiíyi báátána e cuunyi ɔ ɔmuaná, bɔ́ ŋɔ́ bɔlɔ́ haála ehé Yésus ŋaá bá tálɛ́mɛ́na. Bé ŋé súúnyíki ne tukolí asákála asámbálɛ́ánánɔ́ e nyibúyé.

⁵Yésus ŋa kɛlá wáa lɛ́ca nyɛnamá anyɛ́ baacɔ eébé ŋa bɔ́ háya mɔŋɔlɛ́ nááyá, mbá ɔsɛ ná asákála : « Ɔɔ́nɔ́, ɛ́ mɔ mɛ́ ɔ nyɛanɛnɛna mɔ́ɔ́wɔ maabɛ́. »

⁶Beékúnyi *bikotí a bɔ́mɔtɛ́ a bá ŋaá bá hɔ́á limekine ŋe bú túmé obílúmínyi, báyɛ :

⁷« Aányɛ́ ooci ú ŋé féníne Bandɔ́mɛsɛ́ aáná e ? Aányɛ́ ú ŋá nyɛ́ánɛnɛna baacɔ maabɛ́, ɛ tɛ ŋáa bá hú Bandɔ́mɛsɛ́ bímuócí e ? »

⁸Yésus ŋe ményi o omenyi e uúyé ɔtɛ́má aátɛ́ bé ŋe bú bílúmínyi, mbá ɔsɛ náábɔ́ : « Anyíatɛ́ nua nɔ́ŋa na anamá cé ibíkéti eécé e ?

⁹Aátɛ́ yɛ́ ŋa hɔ́la ɔnata e ? Ɔlaana asákála anyía : “Ɛ́ mɔ mɛ́ ɔ nyɛanɛna mɔ́ɔ́wɔ maabɛ́”, ayɛ́ʼ ɔkɔɔna anyía : “Hatɔ́na ɛndánáka, hiíte nyiɔ́wɔ nyibúyé, kándáka” e ?

¹⁰Ɛ́náʼo, ɛ ŋa mɛ́ aamba núénú ményi anyía *Ɔɔ́nɔ́ u ɔɔcɔ áŋa na makɛ́nda ɔ ɔmɛsɛ́ ma ɔnyɛanakɛnɛna baacɔ maabɛ́. » Mbá ɔsɛ ná asákála :

¹¹« Hatɔ́na ɛndánáka, hiíte nyiɔ́wɔ nyibúyé, eélúé oówo o ookiʼo. »

¹²Ɔɔcɔ ŋa hátɔ́na ɔ ɔhatɔna ɛndánáka, baacɔ bekime wuúci lɛcaka ; u ŋé hiite nyíáyɛ́ nyibúyé, u ŋé súéte. Aáná baacɔ bekime ŋe bú kékéke ; bé iínjíékíne Bandɔ́mɛsɛ́ nuúmi, báyɛ : « Tú tɛ ŋá sɔ́ lɛ́ca, ta buɔ́sɛ́, nyɛnamá nyɛ́ asana háyɛ eéyé ! »

¹³Yésus ŋa háná a hálɔ́mɔ́na a asálá yɛ́ nuɔmɔ́ nɔ́ *Kalilé. Baacɔ beéŋí faákɔ́na nááyá, u beébe eékúnyíki bɛsana.

¹⁴Ekúlú ayɛ́ u ŋaá bá wá hɔ́láka, u ŋa lɛca Léfi ɔɔ́nɔ́ u Alɛfɛ oliménénú a nyíáyɛ́ nyinyiɔ buólí nyí *betúé etéési. Mbá ɔsɛ nááyá : « Mɛ látáka ! » U ŋá hátɔ́na, u ŋé wuúci látaka.

¹⁵Aáná Yésus ŋá cɔba o ooki ú Léfi ɔ ɔkɔɔ́nyíá bɛnyɛ́ma bɛ́ ɔnyíá. Ne betúé etéési beéŋí na bakɛla maabɛ́ ŋe bú nyiékínyi ne wuúci na bááyɛ́ *baákɔ́nɛ́na, anyía baacɔ eébé ŋa bɔ́ bá bébú wuúci látákɛ́na e bitúte e bitúte.

¹⁶Ɛŋakɛlá *beékúnyi bikotí bá ɔlɔŋɔ ú *Bafalisiɛ́ŋ abɔ́ lɛ́ca Yésus e nyíékínyi ne betúé etéési na bakɛla maabɛ́, bá ŋá báta bááyɛ́ baákɔ́nɛ́na báyɛ : « Anyíatɛ́ u ŋeé nyíényi ne betúé etéési na bakɛla maabɛ́ e ? »

¹⁷Ɛ́makɛ́la Yésus aá lɔ́kɔ́má aáná, mbá ɔsɛ náábɔ́ : « Tɛ́ cáŋa ba-tɛ-kɔnɔ́ bá ŋa bɔ́ áamba muándánána, mbá bɔkɔnɔ́kɔ́nɔ. Ɛ tɛ ɔ́mɔ fáaya ɔ ɔmɛsɛ́ ooci ɔ ɔkɔɔ́lɔ́ŋɔ bɛtálɛ́mánánɔ́ bɛ́ baacɔ, mbá bakɛla maabɛ́. »

¹⁸Búmɔtɛ́ buɔ́sɛ́ na *baákɔ́nɛ́na bá Sáaŋ Batis na bá *Bafalisiɛ́ŋ ŋe bú bíkíilieke ɔnyíá. Aáná baacɔ a bɔ́mɔtɛ́ ŋa bɔ́ faáya ɔ ɔkɔbáta Yésus báyɛ : « Anyíatɛ́ baákɔ́nɛ́na bá Sáaŋ Batis na bá Bafalisiɛ́ŋ naŋa bébú bíkíilieke ɔnyíá, mbá bɔ́ɔ́wɔ baákɔ́nɛ́na tɛ ŋa bɔ́ kɛla aáná e ? »

¹⁹Mbá Yésus ɔsɛ náábɔ́ : « Mbá nua nɔ́ŋa nú okóti baacɔ abá bɔ́ lɔ́ŋɔ́kɔ e nusíke ɔnyíá e, ekúlú ekime ayɛ́ ɔnɔ́mɛ áŋa ne beébe e ? Yááŋa anyía, ekúlú ekime ayɛ́ ɔnɔ́mɛ áŋa ne beébe, bá tɛ abɔ́ bá bé *obíkíilie ɔnyíá.

²⁰Mbá ekúlú káá fáaya ayɛ́ baacɔ ká bɔ́ sɔ́mɔ ɔnɔ́mɛ ɛ ɛkatɛ́katɛ́ cí nusíke ; etéeyé ekúlú bé ké bú bíkíilie ɔnyíá.

²¹Ta ɔɔcɔ ti ŋé hiite ekéti yɛ́ bɔlaka a buɔ́sɔ anyía wáá látákɛ́na e elunénú yɛ́ bɔlaka. Mbɔ́kɔ ɔɔcɔ ŋaá kɛ́láka aáná, keyé ekéti a yɔɔ́sɔ káá láhɔ́na ebulunénú, yó wééŋényísíki nyɛlahɛa.

²²Híáná tɔ́na, ta ɔɔcɔ ti ŋe cébínyi mecekí e bilunénú bɛ́ bɛsɔ́mɔ ; mbɔ́kɔ ɔɔcɔ ŋaá kɛ́láka aáná, keyé meluku káá yáátáka bɛsɔ́mɔ, ne meluku na bɛsɔ́mɔ bɛ́ɔ cáŋiaka bikime. Mbá, ɔɔcɔ ŋá nyɛmána wu ɔháya mecekí a bɛsɔ́mɔ a bɛɔ́sɔ. »

²³Búmɔtɛ́ *buɔ́sɛ́ bú ehélúme bú *Besuif, ne Yésus na bááyɛ́ *baákɔ́nɛ́na ŋa bɔ́ bá bábɔ́ hɔ́laka e bisíéné a bɛɔ́nɔ́kɔ́nɔ́ na bɛnyɛ́ma, baákɔ́nɛ́na húlé sɔ́lɔ́náka bɛnyɛ́ma eébí.

²⁴*Bafalisiɛ́ŋ a bá ŋaá bá hɔ́á ɔlɔŋɔ ŋa bɔ́ bata Yésus báyɛ : « Ɔ́ɔ lɛcá bɔ́ɔ́wɔ baákɔ́nɛ́na ! Anyíatɛ́ bá ŋa bɔ́ kɛ́la bɔkɔ abɔ́ yáásɔ́ okotí ti ŋé yiínjie ɔɔcɔ makɛ́nda ma ɔkɛlaka buɔ́sɛ́ bú ehélúme e ? »

²⁵Mbá ɔsɛ : « Nu tɛ ɔ́mɔ nɔ́ fána asana eyí Otéŋí *Táfit ŋaá kɛ́láka búmɔtɛ́ buɔ́sɛ́, ne wuúci na bááyɛ́ baacɔ, ekúlú ayɛ́ bɛnyɛ́ma bɛ́ ɔnyíá ŋaá bá bí e beébe bɛ́ámbákɛ́na, ɛcaná beébe nuakɛna e ?

²⁶U ŋo yóófine eé *Ciíbe cɛ Bandɔ́mɛsɛ́ ekúlú ayɛ́ Abiyataal ŋaá bá *mutéŋínyi beluli nyiínjie a muáŋá. U ŋeé hiíte bɛnyɛ́ma bɛ́ ɔnyíá ebí bé ŋe nyeminyi Bandɔ́mɛsɛ́, u ŋá nyíáka, yó wiínjíé tɔ́na a bááyɛ́ baacɔ, ta yɛ́ cáŋa á bá anyía yáásɔ́ okotí ti ŋé yiínjie ɔɔcɔ u etémbí makɛ́nda me o biíbi nyíáka, ɛ́ tɛ ŋáa bá hú *beluli nyiínjie. »

²⁷Yésus ŋeé beébe laana tɔ́na ɔsɛ : « Bandɔ́mɛsɛ́ ŋeé télímínyi buɔ́sɛ́ bú ehélúme a asana na bɔmbányɛ bɔ́ ɔɔcɔ, mbá u tɛ ɔ́mɔ́ kɔ́ɔna anyía ɔɔcɔ áŋa yɔɔ́lɛ́ yɛ́ buɔ́sɛ́ bú ehélúme.

²⁸Buátɛ́ bɔkɔ Ɔɔ́nɔ́ u ɔɔcɔ u ŋee téŋínyi ta hú buɔ́sɛ́ bú ehélúme. »