Read Nomaande Mak 4 Bible Online

Mak 4 - Nomaande bible

Mak 4

¹Yésus ŋa háná é túme oweékúnyi baacɔ bɛsana bɛ́ Bandɔ́mɛsɛ́ a asálá yɛ́ nuɔmɔ́ nú *Kalilé. Yaandándá yɛ́ nyɛkɔca nyɛ́ baacɔ ŋaá bɛ́bándákáná aáyá a maabána a nyɛnamá enyí u ŋo yóófíne ɔ ɔkɔkɔ́ a yɛ́ ŋaá bá e menyífé, u ŋé limíne hɔ́á. Baacɔ ŋa bɔ́ bá límekine a asálá yɛ́ nuɔmɔ́.

²Yésus ŋaá bá weé beébe eékúnyíki bɛsana biéŋí ɛ ɛnjaba. U ŋeé beébe laána weé beébe éékúnyíki ɔsɛ :

³« Ánɔ lɔ́kɔ́ma ! Ɔɔcɔ a wɔmɔtɛ́ ŋaa cɔ́ba o okomíene moohó.

⁴Ahá u ŋaá bá weé meéme miekine, a mɔmɔtɛ́ ŋá kuakɔ́na o ohónyí ɔ ɔmuaná ; tunonyí ŋá faákɔna, tú ŋé meéme cɔ́bɔ́kɛ́na.

⁵A mɔmɔtɛ́ tɔ́na ŋaa kuákɔ́na a akɔnja ɔ ɔmuaná, ɔmɛsɛ́ tɛ́ka weéŋí hɔ́á ; me ŋé tényí lɔ́áka anyía ɔmɛsɛ́ tɛ ɔ́mɔɔ́ bá weéŋí.

⁶Mbá, ekúlú ayɛ́ ɔɔ́cɔ́ ŋaá háma, ú ŋé meéme lulíki ; tundínéndíné ŋá kɔ́táka anyía tú tɛ ɔ́mɔɔ́ bá na bɛkaŋá.

⁷A mɔmɔtɛ́ tɔ́na ŋaa kuákɔ́na aá haála ahá tɔlandɔna naŋa túá lɔ́áka. Ekúlú ayɛ́ ma ŋaá lɔ́áka ɔlɔŋɔ ne tuútu, tú ŋá bɛ́ɔ́tɔ́kɔ́kɛ́na bɛmbányɛ bɛ́ bɛnyɛ́ma a bɛ́ ŋaá lɔ́áka, biíbi ta ɔháá.

⁸Mbá, a mɔmɔtɛ́ tɔ́na ŋaa kuákɔ́na a ambányɛ yɛ́ ɔmɛsɛ́ ; ma ŋá lɔ́áka bɔmbányɛ, ma ŋá hááka bɛtámá : Indíné ɛ́mɔtɛ́ nyitíne na bíɔ́hátá, a cɛ́mɔtɛ́ etíne átátɔ́, a cɛ́mɔtɛ́ tɔ́na etíne atáánɔ. »

⁹Mbá Yésus ɔsɛ : « Ɔɔcɔ a wáŋa ne eetú cá ɔlɔ́kɔ́máka bɛsana, á lɔ́kɔ́máka ! »

¹⁰Ɛ́makɛ́la Yésus aá bɛ́álɔ́ná nyɛkɔca nyɛ́ baacɔ, na baacɔ a bɔ́mɔtɛ́ a bá ŋa bɔ́ bá hoóhi ne wuúci na *baákɔ́nɛ́na bɔ́ɔ́hátá ne béfendí áyá, ŋe bú wuúci bata asana yɛ́ ɛnjaba ecí ú ŋeé túmíne baacɔ.

¹¹Mbá ɔsɛ : « Bandɔ́mɛsɛ́ ŋaá banɔ́ iínjíé makɛ́nda me omenyukune bɛsana bɛ́ búáyɛ́ Butéŋí a bɛ́áŋa bɛnambákánɔ́ ; mbá a baacɔ bá nɔháatɛ́ bé ŋeé beébe túmíne ɛnjaba a bɛsana bikime.

¹²Búáŋa aáná anyía : “Bábɔ́ lɛ́cakana, mbá bá tɛ hɔlá ɔlɛcana ; bábɔ́ lɔ́kɔ́ma, mbá bá tɛ hɔlá ɔlɔ́kɔ́ma, anyía keyé bá ká bɔ́ bɛ́kɔ́ŋɔ́nákɛ́na ɛtɛ́má, Bandɔ́mɛsɛ́ yó beébe nyɛanakɛnɛna máábɔ́ maabɛ́.” »

¹³Yésus ŋé beébe batá ɔsɛ : « Mbɔ́kɔ nu ti ŋé nú menyi nyihembule nyɛ́ ɛnjaba ci mumiene moohó, anyána nua nɔ́ŋa nú omenyi nyihembule nyɛ́ ɛnjaba cí etémbí ikime e ?

¹⁴Mumiene moohó áŋa háyɛ ɔɔcɔ ewú u ŋe húlinyi baacɔ Ambányɛ yɛ́ Ɛsɔ́ma.

¹⁵Moohó eeme a má ŋa kuákɔ́na o ohónyí ɔ ɔmuaná áŋa háyɛ baacɔ eebe a bá ŋa bɔ́ lɔ́kɔ́ma Bɛsana bɛ́ Bandɔ́mɛsɛ́ ; hí ahɛ́ bábɔ́ lɔ́kɔ́máka, Sátan ŋá fáaya, yó biíbi ááŋíaka e cííbú ɛtɛ́má.

¹⁶Híáná tɔ́na, eeme a má ŋa kuákɔ́na a akɔnja ɔ ɔmuaná áŋa háyɛ baacɔ a bá ŋa bɔ́ lɔ́kɔ́ma Bɛsana bɛ́ Bandɔ́mɛsɛ́, bó biíbi káha ɔkáha ne obíléne.

¹⁷Asana ɔ́mɔtɛ́, bé ti biíbi nyɛána anyía bɛ́ á lɔ́áka bɛkaŋá náábɔ́. Bé ŋe bú lúmitinine e ekéti yí ekúlú, mbá hí e ekúlú eyí muuyé é beébe hámɛ́na, ta anyía muyébínyi a mɔmɔtɛ́ a asana na Bɛsana bɛ́ Bandɔ́mɛsɛ́, bá ŋa bɔ́ bɛ́yúata ɔ ɔbɛ́yúata olumitinine.

¹⁸Eeme tɔ́na a má ŋa kuákɔ́na aá haála ahá tɔlandɔna naŋa túá lɔ́aka áŋa háyɛ baacɔ a bá ŋa bɔ́ lɔ́kɔ́ma Bɛsana bɛ́ Bandɔ́mɛsɛ́.

¹⁹Mbá asana ɔ́mɔtɛ́, ne ibíkéti ciéŋí, na bɔnɔ́mɛ bɔ́ ɔmɛsɛ́, na bɛsana bí etémbí bí olíhe e bí ŋeé beébe bíléníne ŋaá bɛ́ɔ́tɔ́kɔ́kɛ́ná Bɛsana bɛ́ Bandɔ́mɛsɛ́ eébí ɔ ɔkɔɔ́háma ayɛ́ bɛ́ tɛ ŋáa háá ta bɔkɔ.

²⁰Mbá eeme a mɔmɔtɛ́ tɔ́na a má ŋaá kuákɔ́na a ambányɛ yɛ́ ɔmɛsɛ́ áŋa háyɛ baacɔ a bá ŋa bɔ́ lɔ́kɔ́ma Bɛsana bɛ́ Bandɔ́mɛsɛ́, bó biíbi lúmítíníne, bá hááka bɛtámá háyɛ bɛnyɛ́ma a bɛ́ ŋaá háá bɛtámá : Indíné ɛmɔtɛ́ bɛtámá nyitíne na bíɔ́hátá, a cɛ́mɔtɛ́ etíne átátɔ́, a cɛ́mɔtɛ́ tɔ́na etíne atáánɔ. »

²¹E elime eécí, mbá Yésus ɔsɛ : « Ɔ́kɔ, bá náŋa bé húéke *lámba a alɔŋgá noómi ayɛ́ʼ, bé ŋeé ciíci háya e bukúndúlumú bú buaná e ? Yaŋɔ́ ɛsɛ bá náŋa bé ciíci háya a búáyɛ́ bɔtálɛ́ná e ?

²²Yááŋa anyíaʼo, bɛsana bikime a bɛ́áŋa bɛnambákánɔ́, baacɔ ké bú biíbi lɛcaka ; bikime a bɛ́áŋa indiitie kéé bítóŋínyi a miányɛ́.

²³Mbɔ́kɔ ɔɔcɔ áŋa ne eetú cá ɔlɔ́kɔ́máka bɛsana, wá lɔ́kɔ́máka ! »

²⁴Yésus ŋe túné beébe laana ɔsɛ : « Énu bíkékényíki na bɛsana abɛ́ nú ŋa nɔ́ lɔ́kɔ́ma, anyía a nyɛnamá anyɛ́ nu náŋa nuanɔ́ kɛ́laka bɔsɔ́ɔ́kɔ́, nyiínyi Bandɔ́mɛsɛ́ káá banɔ́ kɛ́laka tɔ́na, yɔ́ banɔ́ tálákɛ́na.

²⁵Yááŋa anyía, bé ké túné e yiínjie bɛnyɛ́ma ná ɔɔcɔ awɔ́ á yáaŋa ne biíbi. Mbá né ooci awɔ́ u tɛ á bá na bɔkɔ, bá káá yaáŋíá ta hú bɔkɔ abɔ́ wáŋa ne buúbu. »

²⁶Yésus ŋa háná á kɔ́ɔna ɔsɛ : « *Butéŋí bɔ́ Bandɔ́mɛsɛ́ ŋaá hɔ́á mumiene moohó e mú ŋee míékíne moohó a yááyɛ́ esíéné.

²⁷Ta muá hɛ́táka hiiné, te mué límekine mɔɔ́sɔ, ne nebutúé na nabuɔ́sɛ́ bɛnyɛ́ma eébí ŋaá lɔ́aka, bɛ́ɔ́ kɔ́máka, mumiene eémú ti menyi anyána bú ŋa bɛ́kɛ́la.

²⁸Ɔmɛsɛ́ bɛ́muátá u ŋe héyísi bɛnyɛ́ma ; bɛ́ ŋá caŋa á lɔ́aka, bɛ́ɔ́ kɔ́máka, mbá bɛ́ aámbáka.

²⁹Ekúlú yɛ́ masáŋá, mumiene nyitúme o otúme ɔsɔ́mba indíné eényí, anyía bɛnyɛ́ma mɔ́ yɔ́ɔ́nɔ́kɛ́na. »

³⁰Yésus ŋa háná á kɔ́ɔna ɔsɛ : « Na aátɛ́ tua sɔ́ŋa tú oketi *Butéŋí bɔ́ Bandɔ́mɛsɛ́ aná e ? Ta anyía ɛnjaba cɛ yaátɛ́ tua sɔ́ŋa tu ɔ banɔ́ túmíne ɔ ɔ banɔ́ tóŋínyi bɔkɔ ebú Butéŋí bɔ́ Bandɔ́mɛsɛ́ ŋaá hɔ́á e ?

³¹Bú ŋaá hɔ́á hɛsámásámá hɛ́ yɔɔ́nɔ́kɔ a hɛ́mɔtɛ́ ; hiíhi, ekúlú ayɛ́ bɔ́ kɔ yɔ́ɔ́nɔ́, híáŋa hɛsámásámá hitíkítíki ɔ ɔhɔla ɛsámá ikime cɛ́ ɔmɛsɛ́.

³²Mbá asana ɔ́mɔtɛ́, e elime cɛ nyiɔ́nɔ, hɛ́ ŋaá lɔa, hɛ́ɔ kɔ́máka, hɛ́ɔ wááyá yɔɔ́nɔ́kɔ a yɛ́ á hɔ́laka bɛɔ́nɔ́kɔ bikime. Yɛ́ ŋaá háya bɛandándá bɛ́ ɛndáfɛ anyía tunonyí tɔ́ ɔmuaná áŋa tu ɔfalɛfaka cáábɔ́ aana hɔ́á. »

³³Híáná Yésus ŋaá bá we yeékúnyíki baacɔ Bɛsana bɛ́ Bandɔ́mɛsɛ́ na ɛnjaba ciéŋí háyɛ eeci, a nyɛnamá nyikime enyí be-wuúci-lɔ́kɔ́ma áŋa bé o wuúci lɔ́kɔ́máka bɔmbányɛ.

³⁴U ŋaá bá u ti é beébe laána bɛsana tɛ́ka ne o beébe túmíne ɛnjaba ; mbá ekúlú ayɛ́ wɔɔ́ lɔ́bɔ bímuócí na bááyɛ́ *baákɔ́nɛ́na, u beébe hembulekine bɛsana bikime bɛ́ ɛnjaba eécí.

³⁵Nanyiɔ́fɔ́ nyɛ́ buátɛ́ buɔ́sɛ́ eébú, Yésus ná bááyɛ́ *baákɔ́nɛ́na ɔsɛ : « Túá láátɛ́na e eyinyíé asálá yɛ́ nuɔmɔ́. »

³⁶Bá ŋa bɔ́ nyɛána baacɔ anyía bé éélúéke, nyíábɔ́ nyisúéténe Yésus eényí ɔ ɔkɔkɔ́ ayɛ́ u ŋaá bá wa yáaŋa noómi. Bɛkɔkɔ́ a bɛ́mɔtɛ́ tɔ́na ŋaá bá hoóhi ne wuúci.

³⁷Aáná yaandándá yí ehúne ŋeé túmé ohúne, bɛahɔ́ bí menyífé má nuɔmɔ́ oofokine ɔ ɔkɔkɔ́ noómi, a nyɛnamá anyɛ́ yɛ́ ŋaá bá ne menyífé hoóhi ne onyíóyo.

³⁸Ekúlú eéyé, Yésus ŋaá bá waá hɛ́táka hiiné o onuti ú ɔkɔkɔ́, u maá tála aatɔ́ aá nyɛáta. Bááyɛ́ baákɔ́nɛ́na ŋé bu wuúci heényi, mbá báyɛ : « Taatá, bú ti ŋó yo yébi aana háyɛ túɔ́ cɔba o onyíme e ? »

³⁹Yésus ŋá haanyúá, u ŋé eénde ehúne, u ŋá laána nuɔmɔ́ ne esise ɔsɛ : « Lésíkínyi mbuumu ! » Ehúne ŋeé lésíkínyi, mbuumu a ciáŋá nyɛfaaya eényí.

⁴⁰Mbá Yésus ɔsɛ : « Anyíatɛ́ nu ŋe nú líkíme e ? Ɛ́cɛ anyía nú ti ŋé nú lúmitinine e ? »

⁴¹Mbá ta híáná, baákɔ́nɛ́na ŋa bɔ́ bá bébú líkíméke buéŋí ; bá kɔ́ɔnaka beébe ne beébe báyɛ : « Ɔɔcɔ u háányɛ́ ooci ewú te ne ehúne na nuɔmɔ́ ŋa lɔ́kɔ́mɛ́na e ? »