Read Nomaande Mak 5 Bible Online

Mak 5 - Nomaande bible

Mak 5

¹Aáná bá ŋga bɔ́ hámá é eyinyíé asálá yɛ́ nuɔmɔ́ i iisí cɛ Kalasa.[5]

²Yésus ŋaá hámá ɔ ɔkɔkɔ́. Ɔɔcɔ a wɔmɔtɛ́ ŋa faáya ɔ ɔfaaya nááyá, u húlúkúne e biinyie ; u ŋaá bá na *bɛɛbɛ́ bí bililé,

³u líhéke e biinyie. Aáná ta ɔɔcɔ tɛ ɔ́mɔɔ́ bá wu o wuúci fɔkɛna, te bé wuúci ɔɔ́tɔ́kɔ́kɔ na macanja.

⁴Yááŋa anyía bikúlú a bɛ́mɔtɛ́, bé wuúci ɔ́ɔ́tɔ́kɔ́kɔ akɔlɔ́ ne tukolí tú biléŋú, aabá na macanja, mbá u kátáka macanja, yɔ́ sɔ́mbáka tukolí tú biléŋú. Ta ɔɔcɔ tɛ ɔ́mɔɔ́ bá na makɛ́nda me o wuúci fɔkɛna.

⁵Bikúlú bikime, na nabuɔ́sɛ́ ne nebutúé u ŋaá bá waá bɛ́náŋáláka ne e biinyie na a tɔkɔndɔ ɔ ɔmuaná, u húlé aánjáláka ; u bɛ́tɔ́sɔ́kɔ cɛɛ́tɔ a andányɛ́.

⁶Ahá ú ŋa lɛ́ca Yésus a fáakɔna haaca, u ŋá cabákɛ́na nááyá, u ŋé wuúci túmíne eŋéndu.

⁷U ŋá bɔmɛ́ta ɔsɛ : « Yésus, Ɔɔ́nɔ́ u Bandɔ́mɛsɛ́ a wáŋa waáŋá, asana ayɛ́ yaátɛ́ yááŋa na yaŋɔ́ na kuɔŋɔ́ e ? Cɔ́kɔ́lɛ eé nyiínyi nyɛ́ Bandɔ́mɛsɛ́, eti mi iínjíé muuyé. »

⁸U ŋaá kɔɔ́na aáná anyía Yésus ŋaá laána elilé ne esise ɔsɛ : « Háma á cɛɛ́tɔ cɛ ɔɔcɔ ooci. »

⁹Mbá Yésus maá báta ɔɔcɔ oócí ɔsɛ : « Nyiɔ́wɔ nyiínyi ɛ́cɛ aányɛ́ e ? » Ɔsɛ : « Bɔnɔnja, anyía tua sɔ́ŋa beéŋí. »

¹⁰Eéyé ekúlú bililé eébí ŋaá bɛ́cɔ́kɔ́lɔ́kɛ́ná Yésus anyía u ti biíbi tɔ́ma haaca i iisí ci etémbí.

¹¹Aáhá, yaandándá yí hikuté hɛ́ ɛŋɔnáfá ŋaá bá yɛ́á nyíákɛ́na a macaba ma nɔkɔndɔ.[6]

¹²Bililé eébí ŋaá bɛ́cɔ́kɔ́lɔ́kɛ́ná Yésus bɛ́sɛ : « Cɔ́kɔ́lɛ, basɔ́ nyɛána tú ke sú oófókíne ɛ ɛŋɔnáfá eeci noómi. »

¹³Mbá ɔsɛ : « Oo, énu oofokine. » Bililé eébí nyɛhámɔ́kɔ́na eényí aá cɛɛ́tɔ cɛ waáta ɔɔcɔ, bí ŋgo oófókíne ɛ ɛŋɔnáfá. Aáná hikuté hɛ́ ɛŋɔnáfá eéhí ŋa kaá bɛ́áhɛ́na ɔ ɔbɛ́áhɛ́na ɛ ɛmbana cɛ nɔkɔndɔ aá nuɔmɔ́. Hí ŋé nyíme e menyífé noómi. Ɛŋɔnáfá ŋaá bá hoóhi tɔ́sɛ́na ífendí.

¹⁴Ɛ́makɛ́la betétényi ɛŋɔnáfá ábɔ́ lɛca aáná, bá ŋá cabákɛ́na ; bé ŋge bíkétíkínyi asana eéyé na ná baacɔ e bé ŋé bú límine a bálɛ́ka ne né eebe e bé ŋe bú límine e bisíéné. Baacɔ eébé ŋá bɔ faakɔna ɔ ɔkɔlɛ́ca háyɛ asana ŋa bɛ́kɛ́láka.

¹⁵Ahá bá ŋga bɔ́ háma a maabána me Yésus, bá ŋá lɛcá ɔɔcɔ awɔ́ u ŋaá bá na bɔnɔnja bɔ́ bɛɛbɛ́ bí bililé ; ú me límine ɔlaŋabákánɔ́, wuúci céŋícéŋi. Ɛ́makɛ́la bábɔ́ lɛca aáná, bulíkílíki ŋé beébe tímbíéke.

¹⁶Aáná baacɔ a bá ŋa bɔ́ lɛ́cáka bɛsana eébí á bɛ́kɛ́láka ŋe bú bíkétíkínyi bɔsɔ́ɔ́kɔ́ a bá ŋa bɔ́ fáákɔ́na na asana a yɛ́ á hámɛ́na ɔɔcɔ awɔ́ u ŋaá bá na bɛɛbɛ́ bí bililé na asana yí hikuté hɛ́ ɛŋɔnáfá.

¹⁷Bé ŋé túme ɔbɛ́cɔ́kɔ́lɛ́na Yésus anyía wá hatɔ́na aá ciabɔ́ iisí, wé súéte.

¹⁸Ekúlú eyí Yésus ŋaá bá we yóofokine ɔ ɔkɔkɔ́ anyía wé súéte, ɔɔcɔ awɔ́ bɛɛbɛ́ bí bililé ŋaá hámɔ́kɔ́ná nááyá ŋeé wuúci bata ɔsɛ : « Cɔ́kɔ́lɛ, ɛ ŋa mɛ́ aamba osúéte na kuɔŋɔ́. »

¹⁹Yésus ɔsɛ : « Buaka, hálɔ́mɔ́na a ciɔwɔ ciíbe cɛ baacɔ, a buɔwɔ ; ké ké bíkétíkínyi baacɔ bá hɔ́á bɛsana bikime abɛ́ Bandɔ́mɛsɛ́ ɔ́ yɔ́ɔ bɛ́cámɛ́na mahana, yɔ́ kuɔŋɔ́ kɛ́laka bɔmbányɛ. »

²⁰Aáná ɔɔcɔ ŋeé súété o o húle húlinyi baacɔ bá bálɛ́ka acɛ́ bɔ́ ŋɔɔ́ lɔ́ŋɔ anyía Tɛkabólo bɛsana bikime ebí Yésus meé wuúci kɛ́laka. Baacɔ bekime a bá ŋa bɔ́ bá bábɔ́ lɔ́kɔ́máka úúyé ɔtáŋa ŋáá bá bébú kékéke buéŋí.

²¹Yésus ŋa kaá hálɔ́mɔ́ná, wuúci ɔ ɔkɔkɔ́ noómi, u húlúkúne e eyinyíé asálá yɛ́ nuɔmɔ́. Yaandándá yɛ́ nyɛkɔca nyɛ́ baacɔ ŋa háná ke bítúlíne nááyá ɛ́cɛ wa yáaŋa e eyinyíé asálá yɛ́ nuɔmɔ́.

²²Mutéŋínyi *andaŋía yɛ́ ɔbɛ́cɔ́kɔ́lɛ́na yí *Besuif a mɔmɔtɛ́ ŋgaá hámá ; nyíáyɛ́ nyiínyi ɛ́cɛ Salíyus. U ŋaá lɛ́cá Yésus, u ŋé wuúci túmíne eŋéndu,

²³u ŋé túme o wuúci hɛ́nyɛ́na na ɔbɛ́cɔ́kɔ́lɛ́na ɔsɛ : « Híími hɛɔ́nɔ́ɔ́nɔ́ e hiénjú mɔ lɔ́bɔ hú ɛsɛsɛ. Cɔ́kɔ́lɛ, faáya é ké hiíhi tála aabá a cɛɛ́tɔ, hɛ́ aáŋɔ́nua, mbá híé líhétúne. »

²⁴Aáná Yésus ŋá cɔba ne wuúci ; yaandándá yí etúte yɛ́ baacɔ ŋeé wuúci látákɛ́na, yí wuúci sékítíkínyi bɛháŋá bikime.

²⁵Oónjú a wɔmɔtɛ́ ŋaá bá aáhá ; manɔ́ŋɔ́ ŋaá bá meé wuúci hámɔ́kɔ́na, tuɔŋɔ a yáaŋa túɔ́hátá ne túfendí.

²⁶U ŋaá lɛ́cáká muuyé buéŋí o o húle ndéŋele a baándánána beéŋí, yɔ́ mána ɔbɛ́cáŋgɛna bɔnɔ́mɛ bukime, mbá ta ɔmɔtɛ́ ti ómoó wuúci eéŋúnyísi ; úúye ɔkála bíbéyíki bu bíbéyíki.

²⁷Aáná u ŋaá lɔ́kɔ́má bá cámbaka Yésus, u ŋá faáya, u ŋá bɛ́láta etúte yɛ́ baacɔ. U ŋá cɔ́ba e elime ci Yésus, u ŋé bítíse búáyɛ́ bɔlaka,

²⁸anyía u ŋaá bá weé bílúmíkínyi ɔsɛ : « Mbɔ́kɔ ya mɛ́ŋa wu obítíse te obítíse búáyɛ́ bɔlaka, ɛ ŋaá mɛ aáŋɔ́núaka. »

²⁹Hí eyí u ŋeé bítíse bɔlaka bú Yésus, manɔ́ŋɔ́ ŋá sɔ́ɔ́mbia ɔ ɔsɔ́ɔ́mbia, me ti túné wuúci háma ; nyɛbɛ́lɔ́kɔ́ma eényí anyía úúyé ɔkɔnɔ maa maná.

³⁰Hí á yaátɛ́ ekúlú, Yésus ŋaá bɛ́lɔ́kɔ́má anyía makɛ́nda a mɔmɔtɛ́ me wuúci háma ; aáná u ŋá bɛ́kúalɛta ɛ ɛkatɛ́katɛ́ cɛ baacɔ, mbá ɔsɛ : « Aányɛ́ ú meé bítíse búámɛ bɔlaka e ? »

³¹Aáná *baákɔ́nɛ́na ŋa bɔ́ bɛ́kámá báyɛ : « Ɔ ŋɔɔ́ lɛca anyía baacɔ beéŋí ŋo yóo sékítínyi bɛháŋá bikime, mbá anyána o ŋo túné ɔ bata anyía aányɛ́ ú mo yóo bítíse e ? »

³²Mbá Yésus ŋaá bá weé bísíémúkúnyi baacɔ a bá ŋa bɔ́ bá aáyá a maabána anyía wáa lɛca oónjú ewú é wuúci bítíse.

³³Oónjú oócí ŋaá bá waá nákamaka ne bulíkílíki buéŋí, anyía u ŋaá bá weé ményukune asana a yɛ́ maá bɛ́kɛ́láka nááyá. U ŋé túmíne Yésus eŋéndu, u ŋé wuúci bɛ́lɛ́áŋɔ́nákɛ́na taaká ikime.

³⁴Mbá Yésus ɔsɛ : « Meemé, uúwú olumitinine mó yóo nohi. Oóʼo, a cɔba bɔmbányɛ, ɔ́ mɔɔ́ waáŋɔ́nuaʼo. »

³⁵Yésus ŋaá bá wa yánaŋa ɔ ɔtáŋa aáná, baacɔ ŋe bú húlé o ooki ú mutéŋínyi andaŋía na ɛsɔ́ma, mbá báyɛ né mutéŋínyi : « Atɛ háná yébíki Muékúnyi, ananyía uuwu ɔbɔ́la meé wé. »

³⁶Mbá Yésus ti ómo hiíte ɔtáŋa oócí háyɛ asana eéyé eé buúse ; mbá ɔsɛ né mutéŋínyi : « Eti líkíméke, lumítíníne bu lumitinine, ɔmanɔ́ ! »

³⁷U ti ómo woókóto baacɔ anyía bé keé wuúci síke, ɛ tɛ ŋáa bá hú ne Bíel na Sáak na Sáaŋ, onyíinyí u Sáak.

³⁸Bá ŋgá bɔ́ hámá o ooki ú mutéŋínyi andaŋía yɛ́ ɔbɛ́cɔ́kɔ́lɛ́na ; Yésus ŋa lɛ́ca baacɔ ebú bíyébíki buéŋí, bé bísúbéke, bá bɛ́cɔ́bɔ́cɔ́bɔ, bá lɛ́laka.

³⁹U ŋo óófíne eé ciíbe, mbá ɔsɛ : « Anyíatɛ́ nú ŋe nú bíyébi aáná e ? Aátɛ́ nu ŋa nɔ́ lɛ́la e ? U tɛ á bá owéénú, wáŋa e hiiné. »

⁴⁰Ahɛ́ Yésus ŋaá táŋáká aáná, baacɔ ŋe bú túmé o wuúci cɛ́ca. Aáná u ŋé beébe hémúkúnyi beébe bekime a nɔháatɛ́ ; u ŋɔ́ lɔbɔ́ hú na bááyɛ́ baákɔ́nɛ́na bátátɔ́, ne síkíne ne iinyí cɛ ɔbɔ́la ; bé ŋé oofine haála ahá ɔbɔ́la ŋaá bá.

⁴¹Yésus ŋé tímbíé hɛbɔ́lábɔla ɔ ɔɔbɔ́, mbá ɔsɛ nááyá : « Talíta kumi »[7], ɛ́cɛ anyía « Hɛbɔ́lábɔla, ɛ ŋɔ mɛ́ ɔ laana ɛsɛ́ háányúá ! »

⁴²Hɛbɔ́lábɔla eéhí nyɛhatɔna ɔ ɔhatɔna eényí ɛndánáka, hí ŋé túme ɔkanda. Hɛ́ ŋaá bá na tuɔŋɔ túɔ́hátá ne túfendí. Ahɛ́ baacɔ ŋa bɔ́ lɛca aáná, bé ŋé kékéke buéŋí.

⁴³Mbá Yésus ŋeé beébe koti ne esise anyía bá tɛ laána ta ɔɔcɔ asana eéyé ; mbá ɔsɛ tɔ́na : « Énu wuúci aafɛ́na. »