Read Nomaande Mak 6 Bible Online

Mak 6 - Nomaande bible

Mak 6

¹Aáná Yésus ŋá hátɔ́na aáhá, u ŋá cɔ́ba a bálɛ́ka acɛ́ u ŋaá kɔ́mákɛ́na;[8] bááyɛ́ baákɔ́nɛ́na ŋe bú wuúci látáka.

²A búmɔtɛ́ *buɔ́sɛ́ bú ehélúme bú *Besuif, u ŋé túme oweékúnyi baacɔ Bɛsana bɛ́ Bandɔ́mɛsɛ́ a *andaŋía yɛ́ ɔbɛ́cɔ́kɔ́lɛ́na. Baacɔ beéŋí a bá ŋa bɔ́ bá bábɔ́ lɔ́kɔ́máka bíáyɛ́ bɛsana ŋe bú kékéké, bá kɔ́ɔnaka báyɛ : « Háányɛ́ bɛsana eébí ŋe wuúci húlíne e ? Nyɛnamá nyí omenyi nyɛ́ háányɛ́ eényí e ? Nyɛnamá nyí *bikéki bɛ́ bɛsana nyɛ́ háányɛ́ eényí u ŋa kɛla e ?

³Tɛ́ cáŋa ɔɔ́nɔ́ u Malíi, ooci a wáŋa kábɛ́nda e ? Tɛ́ cáŋa onyíinyí u na Sáak, na Soóse, ne Súute ne Símon wáŋa e ? Benyíinyí e beénjú tɛ á bá aaha na basɔ́ e ? » I isuŋí eécí bá ŋa bɔ́ bá tɛ ábɔ́ háya mɔŋɔlɛ́ nááyá.

⁴Mbá ɔsɛ náábɔ́ : « Bé ŋeé kéke *muhémúnyi bɛsana mɔ Bandɔ́mɛsɛ́ haála hekime. Hú aá buayá, ne e hííyé hɛnyɛ́nɔ́, na a ciayɛ́ ciíbe cɛ baacɔ bé ti ŋée wuúci kéke. »

⁵Aáná u tɛ ɔ́mɔ kɛla *ekéki yɛ́ asana hɔ́á ta ɔmɔtɛ́, ɛ tɛ ŋáa bá hú bɔkɔnɔ́kɔ́nɔ a bɔ́mɔtɛ́ ebé u ŋe yeéŋúnyísíki ɛ́cɛ ú meé beébe táláka aabá a cɛɛ́tɔ.

⁶Yésus ŋeé kékéké isuŋí cɛ́ baacɔ eébé. E elime eécí, Yésus ŋaá cɔ́ba ne buúse, u húlé éékúnyíki baacɔ bɛsana ɔ mɔnɔŋɔ mekime ma maabána.

⁷U ŋɔɔ́ lɔ́ŋɔ́kɔ́ *baákɔ́nɛ́na bɔ́ɔ́hátá ne béfendí, u ŋe túme o beébe tɔ́ma béfendí béfendí. U ŋeé beébe iínjíé makɛ́nda me otémbúsíki *bɛɛbɛ́ bí bililé.

⁸U ŋeé beébe oonyísínyí, ɔsɛ : « Ekúlú eyí nú ŋe nú súéte, nuti hiíte ta bɔkɔ ; énu bítímbíé hú otúmbe ; nuti hiíte biléti, ta ambalá, te tuléŋúléŋú tɔ́ mɔɔnyɛ́.

⁹Ánɔ bɛ́háya bɛkandɛ́na a akɔlɔ́ mbá, nɔtɛ bɛ́háya bɛháŋá namuaná bífendí. »

¹⁰Aáná u ŋa háná é beébe laana ɔsɛ : « Haála hekime ahá nɔ́ ká ká nɔ́ háma, énu limíne hí eé ciíbe acɛ́ bá banɔ́ iínjie ɔ ɔkɔɔ́háma ahá nu ká nɔ́ hatɔ́na hɔ́á.

¹¹Mbɔ́kɔ bé ŋe kíne ɔ banɔ́ káha bɔmbányɛ ta anyía bé ŋé kíne ɔlɔ́kɔ́ma bɛsana abɛ́ nu ŋa nɔ́ kɔ́ɔna haála a hɔ́mɔtɛ́, ánɔ hatɔ́na hɔ́á, mbá nu bíkítéke ofunú a cáánɔ́ akɔlɔ́,[9] anyía núénú beébe tóŋínyi nyíábɔ́ nyɛnana. »

¹²Aáná baákɔ́nɛ́na ŋa bɔ́ hátɔ́na, bé ŋé súétéke o okohúlinyi baacɔ anyía bá bɛ́kákálákɛ́na máábɔ́ maabɛ́, mbá bá sɔ́mba ɔkɔlɔ́ eé meéme ;

¹³bá ŋa bɔ́ bá bébú hémúkúnyi bɛɛbɛ́ bí bililé biéŋí a baacɔ, bé fééfiki bɔkɔnɔ́kɔ́nɔ beéŋí ɔsɔŋɔ, bé beébe eéŋúnyísíki.

¹⁴Aáná Otéŋí Elóot[10] ŋaá lɔ́kɔ́má baacɔ áa cámbaka nyiínyi nyí Yésus, anyía núáyɛ́ nulumí ŋaá lɔ́kɔ́máná bɛhaála bikime. Baacɔ ɔ bɔ́mɔtɛ́ ŋa bɔ́ bá bábɔ́ kɔ́ɔnaka báyɛ : « Sáaŋ Batis ma háányua e biwéewé, a asana eéyé wáŋa na makɛ́nda ma ɔkɛlaka bikéki bɛ́ bɛsana. »

¹⁵Bɔ́mɔtɛ́ báyɛ : « Éli wáŋa ! » Bɔ́mɔtɛ́ tɔ́na báyɛ : « Muhémúnyi bɛsana mɔ Bandɔ́mɛsɛ́ muáŋa ; mu ŋaá hɔ́á *muhémúnyi bɛsana mɔ Bandɔ́mɛsɛ́ a múmɔtɛ́ mɔ buáyá. »

¹⁶Ɛ́makɛ́la *Elóot aá lɔ́kɔ́máká aáná, mbá ɔsɛ : « Ɛ́cɛ Sáaŋ awɔ́ ɛ ŋa mɛ́ kɛlá anyía bá cála aatɔ́, wuúci wáŋa wu ɔhaanyua o owé ! »

¹⁷Yááŋa anyía, buáyá Elóot bɛ́muátá ŋaá sɔ́mbɔ́tɔ́na anyía bá hatɛ́na Sáaŋ, bé wuúci ɔɔ́tɔ́kɔ́kɔ ne tukolí, bé wuúci háya eé ciíbe cɛ ɛcaná a asana yí Elóotiat, oónyí u uúyé onúséyé Fílib[11], ewú Elóot ŋaá bátɛ́ná.

¹⁸Sáaŋ ŋaá bá waá láakɛna Elóot ɔsɛ : « Okotí ti ŋó yóo wiínjie makɛ́nda ma ɔbátɛ́na oónyí u uuwe onúséyé. »

¹⁹Aáná Elóotiat ŋaá bátɛ́nɛ́ná Sáaŋ abaká ɔ ɔtɛ́má a asana eéyé, wa aambaka ohónyí wú o wuúci ɔ́ɔ́nɔ ; mbá u tɛ ɔ́mɔɔ́ bɔ́ŋɔ,

²⁰anyía Elóot ŋaá bá weé kékéke Sáaŋ, u wuúci kamakɛna anyía u ŋaá bá weé menyukune anyía Sáaŋ ŋaá bá atálɛ́mánánɔ́ yɛ́ ɔɔcɔ, wuúci tɔ́na ofúúménénú eé buúse bɔ́ Bandɔ́mɛsɛ́. Aáná injiŋé ŋaá bá cié nyímúkúnine Elóot ekúlú ekime ayɛ́ u ŋaá bá waá lɔ́kɔ́máka Sáaŋ á táŋáka ; yiíyi anyía uuyé ɔtáŋa ŋaá bá weé wuúci bílénékíne.

²¹Buɔ́sɛ́ bɔ́ ɛmakɔ ŋaá hámɛ́na Elóotiat, buɔ́sɛ́ ebú Elóot ŋaá tánáká bɔŋanda bɔ́ macakɔna ma nyíáyɛ́ nyibíbíéne. U ŋɔɔ́ lɔ́ŋɔ́kɔ́ na bááyɛ́ bɔnyiɔnɔ ne betéŋínyi bicénji, na *baáŋá bá *Kalilé.

²²Ɔbɔ́la u Elóotiat ŋo yóofine a andaŋía yɛ́ bunɔ́kɔ́, yó bínéke bɔmbányɛ a nyɛnamá anyɛ́ búáyɛ́ bunɔ́kɔ́ ŋeé bílénékíne ne Elóot na baacɔ abá u ŋɔɔ́ lɔ́ŋɔ́kɔ a bɔŋanda. Aáná otéŋí ŋá laana ɔbɔ́la ɔsɛ : « Bɔkɔ bukime ebú o ŋoó léne, mɛ báta, i ŋe mí o wiínjíékíne. »

²³Aáná u ŋaá súátɛ́na ɔsɛ : « Taaká bɔkɔ bukime abɔ́ ɔ ŋɔɔ́ mɛ bataka, i ŋe mí o wiínjíékíne, ta ɔwaafana ɛ ɛkatɛ́katɛ́ iisí cɛ búámɛ butéŋí. »

²⁴Aáná ɔbɔ́la u oónjú ŋaá hatɔ́na, yɔ́ háma a nɔháatɛ́, u ŋga bátá iinyí ɔsɛ : « Aátɛ́ yamɛ batá otéŋí e ? » Iinyí ɔsɛ : « Batá otéŋí aatɔ́ yɛ́ Sáaŋ Batis. »

²⁵U ŋaá hálɔ́mɔ́na ɔ ɔhálɔ́mɔ́na né otéŋí, mbá ɔsɛ nááyá : « I ŋeé mi léne anyía óo mi iínjie aámbáya aatɔ́ yɛ́ Sáaŋ Batis atálánɔ́ e metéŋgélé ɔ ɔmuaná. »

²⁶Ɛ́makɛ́la otéŋí á lɔ́kɔ́má aáná, u ŋé cunje ; mbá a asana ayɛ́ ú maá súátɛ́na eé buúse bɔ́ baacɔ abá u ŋɔɔ́ lɔ́ŋɔ́kɔ́ a bɔŋanda, u tɛ ɔ́mɔ́ bá wu ɔhálɔ́mɔ́na ne elime a búáyɛ́ buhúnyi.

²⁷Aáná u ŋaá tɔ́má ɔ ɔtɔ́ma ecénji a yɛ́mɔtɛ́ e bicénji a bɛ́ ŋaá bá bíé wuúci tétényíki ɔsɛ : « Mi héléníne aatɔ́ yɛ́ Sáaŋ Batis. » Aáná ecénji ŋa cɔ́ba eé ciíbe cɛ ɛcaná, nyɛkaácála Sáaŋ aatɔ́ eényí.

²⁸U ŋé yiíyi héléne e metéŋgélé ɔ ɔmuaná, u ŋé iínjíé ná ɔbɔ́la ; ɔbɔ́la ŋeé hiíte, u ŋé hulínyi né iinyí.

²⁹Ɛ́makɛ́la *baákɔ́nɛ́na bá Sáaŋ abɔ́ lɔ́kɔ́ma asana eéyé, bé ŋgé hiíte yááyɛ́ ekukulukúkúlú, nyikeényie eényí.

³⁰Aáná baacɔ bá ɛndɔ́ma ŋa bɔ́ hálɔ́mɔ́na né Yésus, bé ŋé wuúci bíkétíkínyi bɛsana bikime na abɛ́ bá ŋa bɔ́ kɛ́láka ne ebí bé ŋe bú eékúnyíki baacɔ.

³¹Yésus ŋeé beébe laána ɔsɛ : « Ánɔ faáya, túá cɔ́ba a mafákálɛ́ana, túé hélúmíte. » U ŋaá kɔɔ́na aáná, anyía baacɔ ŋaá bá beéŋí : Eebe súétéke, eebe faákɔ́na a nyɛnamá anyɛ́ *baákɔ́nɛ́na tɛ ɔmɔ́ bá ne ekúlú yɛ́ ɔnyíáka bɔkɔ.

³²Ne Yésus na baákɔ́nɛ́na ŋe bú súété ɔ ɔkɔkɔ́ a mafákálɛ́ana, hú beébe bímuócí haaca na baacɔ.

³³Ta híáná, baacɔ beéŋí ŋe bú beébe lɛcáka bébú súétéke ; bé ŋe menyí anyía ne Yésus na baákɔ́nɛ́na bá bɔ́ŋa ; aáná bá ŋá bɔ hátɔ́kɔ́na a bálɛ́ka ikime na ɔtɛ́tá, bá ŋá caŋá ɔ kɔɔ́háma ne beébe a haála etéehé.

³⁴Ɛŋakɛlá Yésus á hámá ɔ ɔkɔkɔ́, yɔ́ lɛ́ca yaandándá yí etúte yɛ́ baacɔ a fáakɔna, mahana ŋé wuúci tímbie, anyía bá ŋa bɔ́ bá háyɛ ɛtɔ́mbá a cɛ́ tɛ á bá ne mutétényi. Aáná u ŋeé túme o beébe eékúnyi bɛsana biéŋí.

³⁵Ahá ekúlú ŋaá bá yá yáaŋa o osúéte, baákɔ́nɛ́na ŋe bú bíkósíti nááyá, mbá báyɛ : « Buɔ́sɛ́ meé súéte, haála eehe áŋa a mafákálɛ́ana.

³⁶Laákɛ́na baacɔ eebe é súétéke ne e bisíéné na ɔ mɔnɔŋɔ ma maabána, bá ɔkɔwáambaka bɛnyɛ́ma bɛ́ ɔnyíá. »

³⁷Yésus ɔsɛ : « Banɔ́ bɛ́muátá, énu beébe aafɛ́na ! » Aáná bé ŋe bú wuúci batá báyɛ : « Ɔ ŋɔɔ́ lɛca anyía tua sɔ́ŋa na makɛ́nda ma ɔkɔɔ́wɔɔ́ndɔ́kɔ biléti bɛ́ hɔ́ndɛ́tɛ ífendí cɛ́ mɔɔnyɛ́[12] anyía tuésú beébe íínjíékíne, bábɔ́ nyíáka e ? »

³⁸Mbá ɔsɛ : « Nua nɔ́ŋa ne biléti bínyie aaha e ? Ánɔ ka lɛca ! » Ekúlú eyí bé ŋe bú bícónyi, bó menyi, báyɛ nááyá : « Tua sɔ́ŋa ne biléti bɛ́táánɔ na tuɔfɔ́ túfendí tɔ́na. »

³⁹Yésus ŋeé beébe laána anyía bé límísíkínyi baacɔ bekime ɔ ɔmɛsɛ́ e bihuti a bɛɔ́sɔ, aá bɛasɛ́ a bɛasɛ́.

⁴⁰Aáná bé ŋe bú limekine ɔ ɔmɛsɛ́ aá bɛasɛ́ bí etíne atáánɔ cá baacɔ na aá bɛasa bí etíne éfendí cá baacɔ ne imbuke cíɔ́hátá.

⁴¹Yésus ŋé hiíte ne biléti bɛ́táánɔ na tuɔfɔ́ túfendí, u ŋé bééti eése ɔ ɔmuaná, u ŋé iínjíé Bandɔ́mɛsɛ́ bitéŋíti, u ŋá bákáka biléti eébí, nyiínjíékíne ná baákɔ́nɛ́na eényí anyía bá ka ááfákɛ́na baacɔ. U ŋé beébe aafákɛ́na tɔ́na tuɔfɔ́ túfendí eétú beébe bekime.

⁴²Baacɔ bekime ŋa bɔ́ nyíáká, bó weécéke.

⁴³Bá ŋá bándáka bikélékéti bí biléti na bɛ́ tuɔfɔ́ a bɛ́ ŋɔ́ lɔ́bɔ́kɔ ; bó nyióyísíki a tɔnjatɛ́ túɔ́hátá ne túfendí hú mbiɔ́kɛ.

⁴⁴Ɔmbana ɔ́ baacɔ awɔ́ ú ŋaá nyíáká biléti eébí ŋaá bá tɔ́sɛ́na ɛ́táánɔ cɛ́ banɔ́mɔcɔ́.

⁴⁵Hí e elime eécí, Yésus ŋo yoófíkínyi bááyɛ́ *baákɔ́nɛ́na ɔ ɔkɔkɔ́, bé buéke e eyinyíé a asálá yɛ́ nuɔmɔ́ a aháŋá yɛ́ Bɛtɛsɛ́ta ekúlú eyí wuúci bɛ́muátá ú ŋe síké oyóólísi baacɔ.

⁴⁶Ɛ́makɛ́la weé beébe óólísíkí, u ŋá báátáka a nɔkɔndɔ ɔ ɔmuaná ɔ ɔkɔbɛ́cɔ́kɔ́lɛ́na Bandɔ́mɛsɛ́.

⁴⁷Nanyiɔ́fɔ́, ɔkɔkɔ́ ŋaá bá yá yáaŋa ɛ ɛkatɛ́katɛ́ cɛ nuɔmɔ́ ; Yésus bímuócí ŋaá bá wá yánáŋa a asálá.

⁴⁸Ahɛ́ Yésus ŋaá lɛ́ca baákɔ́nɛ́na ébú bíyébíki buéŋí ɔ ɔhɔsa menyífé anyía ehúne ŋaá bá yé húnéke, yí húlúkúne a aháŋá ayɛ́ bá ŋa bɔ́ bá bábɔ́ cɔ́cɔbaka. A alalɛ yɛ́ ɔyá, u ŋé túme ɔcɔba náábɔ́, u kandaka e menyífé ma nuɔmɔ́ ɔ ɔmuaná, u ŋa sɛ́ weé beébe hɔláka.

⁴⁹Ekúlú eyí bé ŋe bú wuúci lɛca waá kándaka e menyífé ma nuɔmɔ́ ɔ ɔmuaná, bé ŋé ketí anyía ɛnyɔlɛ cɛáŋa, nyíábɔ́ nyitúme ɔháya mukéké eényí,

⁵⁰anyía bekime ŋe bú wuúci lɛcá, manɔ́ŋɔ́ ŋé beébe kátíáka. Yésus ŋá táŋɛ́ta ɔtáŋɛ́ta ɔsɛ : « Ánɔ bɛ́kɛ́ndɛ́na ! Yaŋɔ́ ya mɛ́ŋaʼo, nuti líkíméke. »

⁵¹Aáná u ŋé yóófíne ɔ ɔkɔkɔ́ ; ehúne nyilésíkínyi eényí. Baákɔ́nɛ́na ŋe bú kékéké nyɛnamá nyikime asana eéyé,

⁵²anyía bɔ́ tɛ ɔ́mɔ bɔ́ lɔ́kɔ́ma bɔmbányɛ *ekéki yɛ́ asana yí biléti ebí Yésus ŋeé céésíki, anyía cííbú ɛtɛ́má ŋaá bá ɛnatákánɔ́ ɔ ɔlɔ́kɔ́ma.

⁵³Ɛ́makɛ́la ne Yésus na bááyɛ́ *baákɔ́nɛ́na ábɔ́ látɛ́na nuɔmɔ́, bá ŋga hámá i iisí cɛ Kɛnɛsalɛt,[13] bé ŋe súŋé yáábɔ́ ɔkɔkɔ́ a asálá.

⁵⁴Hí ahɛ́ bá ŋa bɔ́ hámɔ́kɔ́ná ɔ ɔkɔkɔ́, baacɔ ŋé menyutúne Yésus.

⁵⁵Bá ŋa bɔ́ saásíáka i iisí ikime, bé húlé kɔ́ɔnaka báyɛ : « Yésus a yáaŋa aahaʼo ! » Bé ŋe túmé ohéléne bɔkɔnɔ́kɔ́nɔ nááyá, bá bɛ́túáhákɛ́nánɔ́ e ebúyé.

⁵⁶Haála hekime ehé Yésus ŋaá bá u kaáháma, ta a bálɛ́ka, ta ɔ mɔnɔŋɔ, mbá te e bikúle bí bisíéné, baacɔ hélékénéne báábɔ́ bɔkɔnɔ́kɔ́nɔ a bɛhaála bikime abɛ́ baacɔ naŋa bábɔ́ bɛ́bándákána. Bé wuúci bɛ́cɔ́kɔ́lɔ́kɛ́na anyía wá nyɛánáka baacɔ eébé é bítíséke te hú hibéŋú hɛ́ búáyɛ́ bɔlaka ; aáná bekime a bá ŋa bɔ́ bá bébú wuúci bítíséke ŋa bɔ́ aáŋɔ́núaka.