Read Nomaande Mak 8 Bible Online

Mak 8 - Nomaande bible

Mak 8

¹Buɔ́sɛ́ eébú, yaandándá yɛ́ nyɛkɔca nyɛ́ baacɔ ŋa háná é bítúlíne. Baacɔ eébé tɛ ɔ́mɔ bá na bɔkɔ bɔ́ ɔnyíá. Aáná Yésus ŋɔɔ́ lɔ́ŋɔ́kɔ bááyɛ́ *baákɔ́nɛ́na, mbá ɔsɛ náábɔ́ :

²« Mahana ŋa mɛ́ kɛla a baacɔ eebe, anyía mɔɔ́sɛ́ á yáaŋa matátɔ́ amá tua sɔ́ŋa ɔlɔŋɔ ne beébe. Bá tɛ abɔ́ bá tɔ́na na bɔkɔ bɔ́ ɔnyíá.

³Yémi beébe oólísíki aaha na ɛcaná eeci, keyé bá ŋa bɔ́ kúákɔna o ohónyí anyía baacɔ a bɔ́mɔtɛ́ eé beébe ŋe bú húlúkúné haaca. »

⁴Bááyɛ́ baákɔ́nɛ́na báyɛ : « Háányɛ́ tua sɔ́ŋa tu ɔbɔ́ŋgɔ́na biléti bí otúkékíne baacɔ eebe bekime, bɔ́ nyíáka, bó weécéke aaha a atúalɔ́ etémbí e ? »

⁵Yésus ŋé beébe batá ɔsɛ : « Biléti bínyie nua nɔ́ŋa ne biíbi e ? » Mbá báyɛ : « Bítíndétú nɔ́mɔ. »

⁶Aáná u ŋeé límísíkínyi baacɔ ɔ ɔmɛsɛ́, u ŋé hiíte biléti eébí bítíndétú nɔ́mɔ, u ŋé iínjíé Bandɔ́mɛsɛ́ bitéŋíti, yó biíbi bákáka, u ŋé iínjíékíne baákɔ́nɛ́na anyía bá aafákɛ́na baacɔ ; nyíábɔ́ nyi beébe aafakɛna eényí.

⁷Bá ŋa bɔ́ bá na nyɛkátá nyɛ́ tuɔfɔ́ɔ́fɔ́ tɔ́na ; Yésus ŋá sáyábɛ́na tuɔfɔ́ eétú, u ŋá laana tɔ́na baákɔ́nɛ́na anyía bá áafakɛna baacɔ.

⁸Baacɔ eébé ŋa bɔ́ nyíáká, bé ŋé eécéke. Baákɔ́nɛ́na ŋa bándáká bikélékéti a bɛ́ ŋɔ lɔ́bɔ́kɔ ; bó nyióyísíki tɔnjatɛ́ tútíndétú nɔ́mɔ hú mbiɔ́kɛ.

⁹Baacɔ a bá ŋaá bá aáhá ŋa bɔ́ bá hoóhi tɔ́sɛ́na ínyíse. E elime eécí, Yésus ŋeé beébe oólísíki.

¹⁰U ŋé óófine o owoofine ɔ ɔkɔkɔ́ noómi ɔlɔŋɔ na bááyɛ́ baákɔ́nɛ́na ; u ŋé súéte i iisí cɛ Tálámanuta.[15]

¹¹Aáná *Bafalisiɛ́ŋ ŋa ka bɔ́ háma, bé ŋe túmé osuŋunyinyi ne Yésus ; bé ŋé wuúci batá anyía wá kɛla *ekéki yí hibílícínyínyí e yí ŋo tóŋínyi anyía mááyɛ́ makɛ́nda ŋeé húle ná Bandɔ́mɛsɛ́. Bá ŋa bɔ́ bátá aáná o o wuúci kɔkɔna.

¹²U ŋeé hílíméténe na makɛ́nda, mbá ɔsɛ : « Anyíatɛ́ baacɔ bá hɛɛya eehi ŋa bɔ́ báta ekéki yí hibílícínyínyí e ? Aá taaká, ɛ ŋa mɛ́ banɔ́ láana anyía baacɔ bá hɛɛya eehi tɛ ká bɔ́ lɛca ekéki yí hibílícínyínyí, ta ɔ́mɔtɛ́. »

¹³Aáná u ŋeé beébe síké aáhá, u ŋa háná oofine ɔ ɔkɔkɔ́, u ŋé súéte e eyinyíé asálá.

¹⁴Baákɔ́nɛ́na ŋa bɔ́ bɛ́hɔ́ya ohiite biléti, hú ɔ́mɔtɛ́ bá ŋa bɔ́ bá ne yiíyi ɔ ɔkɔkɔ́ noómi.

¹⁵Yésus ŋeé beébe óónyísínyí, ɔsɛ : « Énu bíkékényíki bɔmbányɛ ne enutisi oŋuŋe yɛ́ na *Bafalisiɛ́ŋ ne yí *Elóot. »

¹⁶Baákɔ́nɛ́na ŋe bú túmé ɔkɔɔna beébe ne beébe báyɛ : « U ŋa táŋa aáná anyía tu tɛ asɔ́ bá ne biléti. »

¹⁷Ɛ́makɛ́la Yésus é menyi aáná, mbá ɔsɛ : « Anyíatɛ́ nu ŋa nɔ́ kɔɔna anyía u ŋa táŋa aáná anyía tu tɛ asɔ́ bá ne biléti e ? Ɛ́cɛ anyía nu tɛ ŋá nɔ́ lɔ́kɔ́ma bɔmbányɛ, nu ti menyi ; cíínú ɛtɛ́má áŋa iwéékúnénú.

¹⁸Nua nɔ́ŋa ne eése mbá nu tɛ lɛ́cana, banɔ́ ne eetú mbá nu tɛ lɔ́kɔ́ma. Nú ma nɔ́ bɛ́hɔ́yáka ayɛ́ʼ ?

¹⁹Biléti bɛ́táánɔ abɛ́ ɛ ŋaá mɛ bákáka eé buúse bɔ́ baacɔ tɔ́sɛ́na ɛ́táánɔ, tɔnjatɛ́ túnyie nu ŋa nɔ́ bándáka tunyíóyókónú ne bikélékéti a bɛ́ ŋɔ lɔ́bɔ́kɔ e ? » Mbá báyɛ : « Túɔ́hátá ne túfendí. »

²⁰Mbá ɔsɛ : « Ekúlú ayɛ́ ɛ ŋaá mɛ bákáka biléti bítíndétú nɔ́mɔ eé buúse bɔ́ baacɔ tɔ́sɛ́na ínyíse, tɔnjatɛ́ túnyie nu ŋa nɔ́ bándáka tunyíóyókónú ne bikélékéti a bɛ́ ŋɔ lɔ́bɔ́kɔ e ? » Mbá báyɛ : « Tútíndétu nɔ́mɔ. »

²¹Mbá ɔsɛ : « Nu tɛ ŋá nɔ lɔ́kɔ́ma aná e ? »

²²Ne Yésus na bááyɛ́ *baákɔ́nɛ́na ŋa bɔ́ cɔ́bá a Bɛtɛsɛ́ta. Baacɔ ŋe bú héléné ondíméndíme a wɔmɔtɛ́ nááyá ; bé ŋé wuúci bɛ́cɔ́kɔ́lɔ́kɛ́na anyía wé bítíse te bu bítíse waáta ɔɔcɔ.

²³Aáná u ŋeé tímbíé ondíméndíme oócí ɔ ɔɔbɔ́, u ŋé wuúci súéténe haaca na bunɔŋɔ, u ŋé wuúci túéne maatá e eése, u ŋé wuúci sɔ́lɔ́na eése na aabá, mbá ɔsɛ nááyá : « Ɔ wáŋa wu ɔlɛcakana nyɛnamá e ? »

²⁴Ondíméndíme ŋá cíáta eése, mbá ɔsɛ : « Ɛ ŋa mɛ́ lɛca baacɔ bineŋébineŋé háyɛ maatɛ́ maáŋa ; ta híáná bá kándáka. »

²⁵U ŋa háná é wuúci sɔ́lɔ́na eése na aabá, ekúlú eyí ondíméndíme ŋa lɛ́ca eéyé eé buúse, u ŋá lɛcá anyía u ma yááŋɔ́nua ; u lɛcaka bɛnyɛ́ma bikime bɔmbányɛ bɔmbányɛ.

²⁶Aáná Yésus ŋeé wuúci óólísí, u wuúci laana ɔsɛ : « Atɛ hálɔ́mɔ́na aámbáya a bunɔŋɔ eébú. »

²⁷Yésus ŋeé súété ɔlɔŋɔ na bááyɛ́ *baákɔ́nɛ́na ɔ mɔnɔŋɔ a má ŋaá bá hoóhi na Sɛsalɛ́ɛ ci Fílib.[16] O ohónyí, yó beébe báta ɔsɛ : « Baacɔ ŋe bú bíkéti báyɛ ya mɛ́ŋa aányɛ́ e ? »

²⁸Báyɛ : « Baacɔ a bɔ́mɔtɛ́ ŋa bɔ́ kɔ́ɔna anyía ɔ ɔ́ŋa Sáaŋ Batis, a bɔ́mɔtɛ́ báyɛ ɔ ɔ́ŋa Éli, a bɔ́mɔtɛ́ tɔ́na báyɛ ɔ ɔ́ŋa *muhémúnyi bɛsana mɔ Bandɔ́mɛsɛ́ mu etémbí. »

²⁹Mbá Yésus meé beébe batá ɔsɛ : « Mbá banɔ́ʼo, nɔsɛ ya mɛ́ŋa aányɛ́ e ? » Bíel ɔsɛ : « Ɔ ɔ́ŋa *Mesíi. »

³⁰Aáná u ŋeé beébe bɛ́ɔ́sɔ́kɛ́nɛ́na ɔsɛ bé ti bíkétínyi ɔɔcɔ asana eéyé.

³¹E elime eécí, Yésus ŋeé túme o beébe eékúnyi, ɔsɛ : « Yɛ́ ŋá nyɛmána anyía Ɔɔ́nɔ́ u ɔɔcɔ á lɔ́kɔ́máka ɔkála buéŋí ; na *baáŋá bé *Besuif, ne betéŋínyi *beluli nyiínjie, ne *beékúnyi bikotí bó wuúci kíne, báyɛ u tɛ ɔ́mɔ nyɛmána wu olíhéke, bó wuúci ɔ́ɔ́nɔ, mbá a matátɔ́, yɔ́ háányua e biwéewé. »

³²U ŋaá bá weé beébe laakɛna bɛsana eébí a miányɛ́. Bíel ŋé wuúci súéténe a maabána, u ŋé wuúci kákálákɛ́na ɔ ɔtáŋa oócí.

³³Aáná Yésus ŋaá bɛ́kɔ́ŋɔ́ná, yɔ́ lɛ́ca bááyɛ́ baákɔ́nɛ́na ; u ŋá kákálákɛ́na Bíel, ɔsɛ : « Hatɔ́na eémi eé buúse, Sátan ! Cííwu ibíkéti tɛ a bá cɛ́ Bandɔ́mɛsɛ́, mbá cɛ́ baacɔ. »

³⁴U ŋɔ́ lɔ́ŋɔ́kɔ ne etúte yɛ́ baacɔ na bááyɛ́ baákɔ́nɛ́na, mbá ɔsɛ náábɔ́ : « Mbɔ́kɔ ɔɔcɔ ŋa yáamba ɔ mɛ látáka, wé bíkíne wuúci bɛ́muátá, wá háya owé a ambalá, wá mɛ látáka.

³⁵Yááŋa anyía, mbɔ́kɔ ɔɔcɔ ŋeé léne otétényi úúyé olíhe, u kéé wuúci nyimisi ; mbá ɔɔcɔ okime ewú u kéé nyimisi uúyé olíhe na aámɛ a asana na a asana yɛ́ Ambányɛ yɛ́ Ɛsɔ́ma kéé líhéke taaká ci olíhe.

³⁶Bɔmbányɛ bɔ́ yaátɛ́ ɔɔcɔ ŋa lɛ́ca ekúlú ayɛ́ wá yáámbáka yɔ́ bɔ́ŋɔ buŋaŋa bɔ́ ɔmɛsɛ́ bukime, mbɔ́kɔ u ŋé nyímísi úúyé olíhe e ?

³⁷Na aátɛ́ aná wáŋa wu ɔháŋɔ́náka úúyé olíhe e ?

³⁸Yááŋa anyía, ɔɔcɔ okime a wáŋa na aatɔ́ ɔlama na ɔ ɔkɔɔna anyía wáŋa uumi, ne o olumitinine tɔ́na bíámɛ bɛsana eé buúse bɔ́ baacɔ bá hɛɛya eehi a bá ŋa bɔ́ kɛla bɔɔbɛ́, bá kandáka tusɔmɔ, Ɔɔ́nɔ́ u ɔɔcɔ tɔ́na káá bá na aatɔ́ ɔlama ne wuúci ekúlú ayɛ́ u káá fáaya eé nuúmi nɔ́ ciayɛ́ Síkíne ɔlɔŋɔ na bíáyɛ́ *bililé bɛ́ masɔ́ma e bifúúménénú. »