Read Nomaande Mak 9 Bible Online

Mak 9 - Nomaande bible

Mak 9

¹Yésus ŋa háná e beébe laana ɔsɛ : « Ɛ ŋa mɛ́ banɔ́ láana aá taaká anyía a baacɔ a bá bɔ́ŋa aaha, bɔ́mɔtɛ́ ti ké bú wéékúne beébe tɛ́ka ɔ ɔlɛca anyána Bandɔ́mɛsɛ́ ŋé téŋínyi na makɛ́nda mekime. »

²E elime cɛ mɔɔ́sɛ́ metíndétú, Yésus ŋa cɔ́bána ne Bíel na Sáak na Sáaŋ, hú wáábɔ́, a yaandándá yɛ́ nɔkɔndɔ ɔ ɔmuaná haaca na baacɔ. Yésus ŋá hɛŋɛ́na nyɛlɛcana eébú eé buúse.

³Bíáyɛ́ bɛlaŋa ŋe túmé ɔnɔma buéŋí, bɛ́ mányɛmaka ; bɛ́ ŋaá bá bifúlúndúndúé a nyɛnamá anyɛ́ ta ɔɔcɔ ɔ ɔmɛsɛ́ tɛ á bá wu ɔkɛla anyía bíé fúúmékéne aáná.

⁴Hí e ekúlú eéyé, *baákɔ́nɛ́na bátátɔ́ eébé ŋa bɔ́ lɛ́ca ne Éli ne *Moyís ábɔ́ aásánáka ne wuúci.

⁵Mbá Bíel ɔsɛ né Yésus : « Láábi, yááŋa ambányɛ yɛ́ asana anyía túésú limíne aaha ; tuɔ́ cɔba ɔ ɔfalɛfaka bikule bɛ́ bɔlaka bɛ́tátɔ́ : Yɔ́ɔ́wɔ ɔ́mɔtɛ́, yí Moyís ɔ́mɔtɛ́, yí Éli ɔ́mɔtɛ́. »

⁶U ŋaá bá u ti e ményi bɔkɔ bɔ́ ɔ ɔkɔɔna, anyía asana eéyé ŋeé beébe líkímísíki, ne wuúci bɛ́muátá na baláayɛ́.

⁷Ɔlɔndɔ́ ŋé beébe bíhúéne, okelú ŋá lɔ́kɔ́mána ɔ ɔlɔndɔ́ noómi ɔ́sɛ : « Ooci áŋa uumí ɔɔ́nɔ́ u ɔtɛ́má. Énu wuúci lɔ́kɔ́mákɛ́na. »

⁸Hí a yaátɛ́ ekúlú, baákɔ́nɛ́na ŋa bɔ́ bɛ́kúáláka, mbá beébe ta ɔ háná lɛca ɔɔcɔ, ɛ́ tɛ ŋáa bá hú Yésus bímuócí ne beébe.

⁹Ekúlú ayɛ́ bá ŋa bɔ́ bá bábɔ́ lɔ́ɔkɔ nɔkɔndɔ, Yésus ŋé beébe bɛ́ɔ́sɔ́kɛ́nɛ́na, ɔsɛ : « Nɔtɛ bɛ́káná obíkétínyi ɔɔcɔ asana ayɛ́ nú ma nɔ́ lɛ́caka ɔ ɔkɔɔ́háma ekúlú ayɛ́ Ɔɔ́nɔ́ u ɔɔcɔ káá háanyua e biwéewé. »

¹⁰Bé ŋe bú tétényíki asana eéyé, bá bɛ́bátáka beébe ne beébe báyɛ : « Aátɛ́ yááŋa anyía “nyɛhaanyua nyí biwéewé” e ? »

¹¹Baákɔ́nɛ́na ŋe bú wuúci batá báyɛ : « Anyíatɛ́ *beékúnyi bikotí naŋa bábɔ́ kɔ́ɔ́naka anyía Éli u káá cáŋa ɔfaaya ne Mesíi e ? »

¹²Mbá ɔsɛ : « Yááŋa anyía Éli káá cáŋa ɔfaaya o okocíkiliekene bɛsana bikime. Mbá, anyíatɛ́ Ciɔɔ́ŋɛ́ ŋa kɔɔna tɔ́na anyía Ɔɔ́nɔ́ u ɔɔcɔ káá muáka indekese buéŋí, baacɔ bó wuúci bábákɛ́na e ?

¹³Mbá yaŋɔ́, ɛ ŋa mɛ́ banɔ́ láana anyíaʼo : Éli na maa fáaya, baacɔ ŋe bú wuúci bɛ́kɛ́lákɛ́na háyɛ bé ŋe bú lénéké.[17] Híáná Ciɔɔ́ŋɛ́ ŋá kɔ́ɔna a yááyɛ́ asana. »

¹⁴Ahá bá ŋga bɔ́ hámá hoóhi na bɔsɔ́ɔ́kɔ́ *baákɔ́nɛ́na, bé ŋé beébe lɛcá ɛ ɛkatɛ́katɛ́ cɛ nyɛkɔca nyɛ́ baacɔ ; *beékúnyi bikotí é súŋgunyinyi ne beébe.

¹⁵Hú ahɛ́ baacɔ ŋa bɔ́ lɛ́cá Yésus, bá ŋá balátákána, bé ŋé tényí keé wuúci téŋíki.

¹⁶U ŋá batá bááyɛ́ baákɔ́nɛ́na ɔsɛ : « Asana a yaátɛ́ nú ŋe nú súŋunyinyi na baacɔ eebe e ? »

¹⁷Ɔɔcɔ a wɔmɔtɛ́ u ɛkatɛ́katɛ́ cɛ nyɛkɔca ŋé wuúci bɛ́káma, ɔsɛ : « Taatá, i ŋé mi héléne uumi ɔɔ́nɔ́ nɔ́ɔ́wɔ, anyía *aabɛ́ yí elilé ŋeé wuúci yébi. Yí ti ŋée wuúci áátába anyía wá táŋáka.

¹⁸Haála hekime ehé elilé eéyé é wuúci hatɛna, yí ŋeé wuúci kuusi ɔ ɔmɛsɛ́, u hémúkúnyi ɛnɔ́ŋɛ e nyuúté, u bíkótóko eénye, mbá cíáyɛ́ cɛɛ́tɔ lɔ́nda. Ɛ ŋá mɛ bɛ́cɔ́kɔ́lɔ́kɛ́na bɔ́ɔ́wɔ baákɔ́nɛ́na anyía bé yiíyi hémúnyi, mbá yí ŋé beébe yáka. »

¹⁹Mbá Yésus ɔsɛ náábɔ́ : « Ééʼ, banɔ́ be-ti-lumítíníne eebe ! Ɔ ɔkɔɔ́háma nyíényí ɛ ká mɛ bá ɔlɔŋɔ na banɔ́ e ? Ɔ ɔkɔɔ́háma nyíényí ɛ ká mɛ banɔ́ eéhíkínyínyi e ? Énu mi héléníne ɔɔ́nɔmbɔ́ oócí aaha ! »

²⁰Aáná bá ŋa cɔ́bána ɔɔ́nɔmbɔ́ nááyá. Hú ahɛ́ elilé ŋa lɛ́ca Yésus, yí ŋé fúkíte ɔɔ́nɔmbɔ́ na makɛ́nda, u ŋá kuá ɔ ɔmɛsɛ́, u bíbúŋúléke, ɛnɔ́ŋɛ wuúci hámɔ́kɔ́na e nyuúté.

²¹Yésus ŋa batá síkíne cɛ ɔɔ́nɔmbɔ́ ɔsɛ : « O otúme nyíényí wá báka aáná e ? » Mbá síkíne ɔsɛ : « O otúme a búáyɛ́ bunɔ́sɛ́.

²²Elilé eéyé naŋa yé wuúci hatɛ́na, yó wuúci aahɛna te o oocó, te e menyífé anyía yé wuúci ɔɔ́nɔ́. Ɛ́ɛhɛ́ mbɔ́kɔ ɔ ɔ́ŋa wu ocényi, cɔ́kɔ́lɛ, basɔ́ bɛ́cáma mahana ! »

²³Mbá Yésus ɔsɛ : « Asɛ mbɔ́kɔ ya mɛ́ŋa wu ocényi e ? O ti ŋóo menyi anyía bɔkɔ bukime tɛ ŋá yákána ná ɔɔcɔ ewú u ŋe lumitinine e ? »

²⁴Hú e ekúlú eéyé, síkíne cɛ ɔɔ́nɔ́ ŋaá táŋɛ́ta okelú ɔ ɔmuaná ɔsɛ : « I ŋe mí lumitinine ; ɔ́ɔ mɛ ɔ́ɔ́lɛ́ta anyía ɛ tɛ ámɛ bá ne olumitinine weéŋí. »

²⁵Yésus ŋa lɛ́cá etúte yɛ́ baacɔ á fáakɔna na ɔtɛ́tá náábɔ́, aáná u ŋaá sásɛ́tɛ́na elilé ɔsɛ : « Kuɔŋɔ́, elilé a yɛ́ tɛ ŋáá yáátába anyía ɔɔ́nɔmbɔ́ ooci á táŋáka, ta anyía wá lɔ́kɔ́mákána ! Ɛ ŋa mɛ́ ɔ laana ɛsɛ́ háma ná ɔɔ́nɔmbɔ́ ooci ; eti túné ka hálɔ́mɔ́na nááyá ! »

²⁶Aabɛ́ yí elilé ŋe nyietínyi ɔɔ́nɔmbɔ́ oócí na makɛ́nda, yí ŋe wuúci kuúsi ɔ ɔmɛsɛ́, nyɛháma eényí, yɛ́ aánjáláka ; ɔɔ́nɔmbɔ́ ŋá sakɔ́núá a nyɛnamá anyɛ́ baacɔ beéŋí ŋaá bá bábɔ́ kɔ́ɔnaka báyɛ : « Ú meé wé ! »

²⁷Mbá Yésus ŋeé tímbíé ɔɔbɔ́ ú ɔɔ́nɔmbɔ́, u ŋé wuúci hetúnyi, ɔɔ́nɔmbɔ́ ŋá tálɛ́mɛ́na.

²⁸Ahá Yésus ŋo yóófíne eé ciíbe na bááyɛ́ baákɔ́nɛ́na, beébe hú wáábɔ́, bé ŋé wuúci báta, báyɛ : « Anyíatɛ́ aabɛ́ yí elilé eéyé á basɔ́ yáka ohémúnyi e ? »

²⁹Yó beébe bɛ́káma ɔsɛ : « Bé ŋe hémúnyi nyɛnamá nyɛ́ aabɛ́ yí elilé eényí hú na ɔbɛ́cɔ́kɔ́lɛ́na bímuócí. »

³⁰Bá ŋa bɔ́ hátɔ́na aáhá, bá ŋa hɔláka a *Kalilé. Yésus ŋaá bá u ti é léne anyía baacɔ é menyi haála ahá wáŋa,

³¹anyía u ŋaá bá we yéékúnyíki bááyɛ́ *baákɔ́nɛ́na ɔsɛ : « Baacɔ ké bú mi fiimbie, yaŋɔ́ Ɔɔ́nɔ́ u ɔɔcɔ, bɔ́ mɛ ɔ́ɔ́nɔ, mbá e elime cɛ mɔɔ́sɛ́ matátɔ́, ɛ ká mɛ́ haanyua e biwéewé. »

³²Mbá, baákɔ́nɛ́na ŋaá bá bá tɛ́ abɔ́ lɔ́kɔ́ma nyihembule nyɛ́ ɔtáŋa oócí ; bé líkíméke ɔbata Yésus ɛmbataka a asana eéyé.

³³Bá ŋga bɔ́ háma a Kabɛlnawum. Ahɛ́ Yésus ŋaá bá wa yáaŋa eé ciíbe noómi, u ŋá batá bááyɛ́ *baákɔ́nɛ́na, ɔsɛ : « Asana a yaátɛ́ nuánɔ́ bá nu húle enú súŋgunyinyi o ohónyí e ? »

³⁴Mbá bé ŋe bú lésíkínyi hú yeébu, anyía o ohónyí bé ŋe bú súŋgunyinyi anyía bébú menyi aányɛ́ eé beébe wáŋa waáŋá.

³⁵Aáná Yésus ŋe límíne ɔ ɔmɛsɛ́, u ŋé beébe bísúétíne beébe bekime bɔ́ɔ́hátá ne béfendí, mbá ɔsɛ náábɔ́ : « Mbɔ́kɔ ɔɔcɔ ŋa yáamba ɔbámɛ́na e nyilimíné nyí buúse, wá bá e elime cɛ bɔsɔ́ɔ́kɔ́ bekime ; wá bá tɔ́na munyiɔnɔ mɔ bɔsɔ́ɔ́kɔ́ bekime. »

³⁶U ŋé télímínyi ɔɔ́nɔmbɔ́ aabɔ́ ɛ ɛkatɛ́katɛ́, yó wuúci bɛ́túáhɛ́na a aabá, mbá ɔsɛ náábɔ́ :

³⁷« Ɔɔcɔ okime awɔ́ á káha bɔmbányɛ ɔɔ́nɔmbɔ́ ɔmɔtɛ́ háyɛ ooci eémí eé nyiínyi, ɛ́cɛ yaŋɔ́ bɛ́muátá ú maá mɛ káha bɔmbányɛ. Híáná ɔɔcɔ okime awɔ́ á mɛ káha bɔmbányɛ tɛ ŋá káha bɔmbányɛ hú yaŋɔ́ bímuócí, mbá u ŋaá káha bɔmbányɛ tɔ́na Ooci awɔ́ u ŋaá mɛ tɔ́má. »

³⁸Sáaŋ ŋaá laána Yésus ɔsɛ : « Taatá, tú ŋa sɔ lɛ́cá ɔɔcɔ a wɔmɔtɛ́ é hémúkúnyi *bɛɛbɛ́ bí bililé oówo eé nyiínyi ; tú ŋe su wuúci saŋɔnɛna ɔkɛla aáná, anyía u tɛ á bá ɔɔcɔ u úúsú ɔlɔŋɔ. »

³⁹Mbá Yésus ɔsɛ : « Nuti wuúci sáŋɔ́nɛ́na ɔkɛla aáná, anyía ɔɔcɔ tɛ á bá wu ɔkɛlaka *ekéki yɛ́ asana eémí eé nyiínyi, yɔ́ háná túme ɔ mɛ kɔ́ndɛ́na.

⁴⁰Yááŋa anyía ɔɔcɔ awɔ́ u tɛ ŋáa basɔ́ núúsi áŋa na basɔ́.

⁴¹Ɛ́náʼo, ɔɔcɔ okime awɔ́ u káá banɔ́ múúsi menyífé eémi e nyiínyi anyía nua nɔ́ŋa baacɔ bá ɔlɔŋɔ ú *Mesíi, ɛ ŋa mɛ́ banɔ́ láana aá taaká anyía u tɛ káá yááŋa bíáyɛ́ bɛnamá. »

⁴²« Asana ɔ́mɔtɛ́, ɔɔcɔ é kúfítínyi ɔɔ́nɔmbɔ́ ɔmɔtɛ́ a banásɛ́ eebe e bé ŋe bú lumitinine, yááŋa ambányɛ nááyá anyía bé wuúci ɔɔ́tɔ́kɔ́kɛ́na nɔsɔ́lɔ́ a amɛna, bé wuúci aahɛ́na aá nuɔmɔ́ noómi.

⁴³Mbɔ́kɔ a asana ne úúwu ɔɔbɔ́ ɔ naŋa oó kúfétékéne o olumitinine, wuúci sɔ́mba ! Yááŋa ambányɛ nɔ́ɔ́wɔ anyía óo woofíne aá taaká ci olíhe ɔɔbɔ́ ɔmɔtɛ́ na anyía ɔ́ɔ bá aabá éfendí ekime, mbá bá ɔ waahɛna a nɔɔfia nú oocó ewú ú ti ŋée nyíme.

⁴⁴[Haála ehé tufike ti ŋée wé, oocó ti nyíme ta buɔ́sɛ́.]

⁴⁵Mbɔ́kɔ a asana ne úúwu ɔkɔlɔ́ ɔ náŋa oó kúfétékéne o olumitinine, wuúci sɔ́mba ! Yááŋa ambányɛ nɔ́ɔ́wɔ anyía óo woofíne aá taaká ci olíhe ɔkɔlɔ́ ɔmɔtɛ́ na anyía ɔ́ɔ bá akɔlɔ́ ekime éfendí, mbá bá ɔ waahɛna a nɔɔfia nú oocó ewú ú ti ŋée nyíme.

⁴⁶[Haála ehé tufike ti ŋée wé, oocó ti nyíme ta buɔ́sɛ́.]

⁴⁷Híáná tɔ́na, mbɔ́kɔ a asana na nyiɔ́wɔ nyiíse ɔ naŋa oó kúfétékéne o olumitinine, nyiínyi tasá. Yááŋa ambányɛ nɔ́ɔ́wɔ anyía óo woofíne e *Butéŋí bɔ́ Bandɔ́mɛsɛ́ nyiíse nyɛ́mɔtɛ́ ɔ ɔhɔla anyía ɔ́ɔ bá na cɔ́ɔ́wɔ eése ekime, mbá bá ɔ waahɛna a nɔɔfia nú oocó,

⁴⁸haála ehé tufike ti ŋée wé, oocó tí nyíme ta buɔ́sɛ́.

⁴⁹Oocó káá tábɔ́náka ɔɔcɔ okime háyɛ makɛ́lɛ́ ŋaa tábɔ́na bɛnyɛ́ma bɛ́ ɔnyíá.

⁵⁰Makɛ́lɛ́ áŋa ambányɛ yɛ́ bɔkɔ, mbá mbɔ́kɔ makɛ́lɛ́ ŋá sɔ́la, me ti soómo, anyána bááŋa bá ɔkɛla o o túné meéme soomisiki e ? Ánɔ bámɔ́kɔ́na na makɛ́lɛ́ aá banɔ́ bɛ́muátá, nu líhéke e mbuumu aá banɔ́ na banɔ́, nɔ lɔ́kɔ́mákána. »