Read Nomaande Luk 13 Bible Online

Luk 13 - Nomaande bible

Luk 13

¹Baacɔ a bɔ́mɔtɛ́ ŋa bɔ́ bá aáhá ekúlú eeye, bé ŋe bú bíkétíkínyi Yésus asana yɛ́ baacɔ bá *Kalilé ; yɛ́ ŋaá bá anyía Kɔ́mɛ́na Bílat ŋa kɛ́la anyía bé beébe ɔɔ́nɔ́kɔ. U ŋa látáka maabɔ́ manɔ́ŋɔ́ na manɔ́ŋɔ́ me bitúké abɛ́ bá ŋa bɔ́ bá ɔ ɔfɔnɛna Bandɔ́mɛsɛ́.

²Yésus ɔsɛ : « Yáakɛlá a nyíánɔ́ nyɛlɛca, baacɔ bá Kalilé eébé ŋa bɔ́ lɛ́cáka muuyé eémú anyía beébe bá ŋa bɔ́ kɛ́láka bɔɔbɛ́ ɔ ɔhɔla baacɔ bekime bá Kalilé a bɔ́mɔtɛ́ e ?

³Ɛ ŋa mɛ́ banɔ́ láana anyía eéʼeé ; mbá mbɔ́kɔ nu tɛ ŋá nɔ́ bɛ́kákálɛ́na maanɔ́ maabɛ́, nu ké nú wéékúne banɔ́ bekime tɔ́na háyɛ beébe.

⁴Ta anyía, nu ŋa nɔ́ bɛ́táá asana yɛ́ baacɔ eebe buunyi na bátátɔ́ ebé ciíbe cɛ ɔmuaná cɛ andányɛ́ a asásɛ́ yí Siloé[53] ŋeé beébe kuákɔ́nákɛ́na, cío beébe ɔɔ́kɔ́sɔ́kɔ. Yáakɛlá a nyíánɔ́ nyɛlɛca, bá ŋa bɔ́ kɛ́láka bɔɔbɛ́ ɔ ɔhɔla baacɔ bekime bé Yelúsalɛm a bɔ́mɔtɛ́ e ?

⁵Ɛ ŋa mɛ́ banɔ́ láana anyía eéʼeé ; mbá mbɔ́kɔ nu tɛ ŋá nɔ́ bɛ́kákálɛ́na maanɔ́ maabɛ́, nu ké nú wéékúne banɔ́ bekime tɔ́na háyɛ beébe. »

⁶Yésus ŋé beébe túmíne ɛnjaba eeci ɔsɛ : « Ɔɔcɔ ɔmɔtɛ́ ŋaá bá ne bufikié buɔ́nɔ́nɔ́ a yááyɛ́ esíéné, u ŋá cɔba ɔ ɔkɔwáamba bɛtámá, wuúci ta ɔbɔ́ŋɔ.

⁷Mbá ɔsɛ ná munyiɔ esíéné : “Ɔ́ɔ lɛca, tuɔŋɔ a yáaŋa tɔ́tátɔ́ atɔ́ ɛ ŋa mɛ́ faaya ɔkɔwáamba bɛtámá e bufikié eebu, mbá ɛ tɛ bɔ́ŋɔ. Buúbu kuúsi ; bú ŋaá nyíá ɔmɛsɛ́ etémbí ne etémbí.”

⁸Mbá munyiɔ esíéné ɔsɛ nááyá : “Otéŋí, caŋá táta hiɔŋɔ eehi ; i ké mi tíméke ɔmɛsɛ́ i indíné, míɔ fɔnakɛna.

⁹Yáakɛlá bú káá hááka bɛtámá a hiɔŋɔ a hɛ́ ŋa fáakɔna ; mbɔ́kɔ bú tɛ ŋáá háá, tu ké sú buúbu kuúsi !” »

¹⁰Búmɔtɛ́ *buɔ́sɛ́ bú ehélúme bú *Besuif, Yésus ŋaá bá we yeékúnyíki a *andaŋía yɛ́ ɔbɛ́cɔ́kɔ́lɛ́na yí Besuif a yɛ́mɔtɛ́.

¹¹Oónjú a wɔmɔtɛ́ ŋaá bá hɔ́á, u kɔnɔkɔ ; tuɔŋɔ a yáaŋa buunyi na tɔ́tátɔ́ ayɛ́ *aabɛ́ yí elilé ŋeé wuúci kúnyímísi elime. Ohónyí wú ɔtálɛ́mɛ́na ɛndánáka tɛ ɔ́mɔɔ́ bá.

¹²Ekúlú eyí Yésus ŋaa lɛ́cá oónjú oócí, u ŋé wuúci lɔ́ŋɛ́ta mbá ɔsɛ : « Meemé, úúwu ɔkɔnɔ ma mana. »

¹³U ŋé wuúci tála aabá, hí a yaátɛ́ ekúlú u ŋé bísúndúne, u ŋá tálɛ́mɛ́na ɛndánáka, u iínjíékíne Bandɔ́mɛsɛ́ nuúmi.

¹⁴Mbá mutéŋínyi andaŋía yɛ́ ɔbɛ́cɔ́kɔ́lɛ́na ŋeé líŋé asana eyí Yésus ŋe yeéŋúnyísi ɔɔcɔ buɔ́sɛ́ bú ehélúme. U ŋá laana nyɛkɔca nyɛ́ baacɔ ɔsɛ : « Mɔɔ́sɛ́ áŋa metíndétú amá nuanɔ́ nyɛmána nú ɔnyiɔkɔ buólí, énu búle fáaya ɔkɔwááŋɔnua ɔ mɔɔ́sɛ́ eémé ; tɛ́ cáŋa buɔ́sɛ́ bú ehélúme. »

¹⁵Otéŋí a Waáŋá ŋé wuúci bɛ́káma ɔsɛ : « Na kuɔŋɔ́ na bɔlɔ́ɔwɔ nua nɔ́ŋa na tɔbɛ́mbɛ túfendí ; ɔ́kɔ, tɛ́ka ɔɔcɔ okime náánɔ́ naŋa wé súŋúne cíáyɛ́ káwɔ ta yááyɛ́ abaŋabɛbɛa eé ciíbe, yɔ́ cɔ́bana o okoómúúsi eé nuúci buɔ́sɛ́ bú ehélúme e ?

¹⁶Mbá ne oónjú ooci awɔ́ Sátan na mɔɔ́ yɔɔ́tɔ́kɔ́kɔ ɔ ɔkɔnɔ hɛ́nánɔ tuɔŋɔ a yáaŋa buunyi na tɔ́tátɔ́, wuúci u hɛnyɛ́nɔ́ hɛ́ *Abɛ́laham tɔ́na, anyána ɛ́ tɛ ámɛ bá wu o wuúci kátáka tukolí tú uúyé ɔkɔnɔ buɔ́sɛ́ bú ehélúme e ? »

¹⁷Ekúlú ayɛ́ ú ŋaá táŋɛ́ta aáná, baacɔ bekime a bá ŋa bɔ́ bá bébú wuúci nuusiki ŋa bɔ́ lɔ́kɔ́ma aatɔ́ ɔlama ; baacɔ bá nyɛkɔca bekime ŋaá bá bébú bílénéke buéŋí e *bikéki bɛ́ bɛsana bikime abɛ́ ú ŋaá bá waá kɛ́láka.

¹⁸Mbá ɔsɛ : « Aátɛ́ *Butéŋí bɔ́ Bandɔ́mɛsɛ́ ŋaá hɔ́á e ? Na aátɛ́ ya mɛ́ŋa wu o buúbu keti e ?

¹⁹Bú ŋaá hɔ́á hɛsámásámá a hɛ́mɔtɛ́, hiíhi ɔɔcɔ ŋeé hiíte, yɔ́ kɔɔ́ wɔɔ́nɔ eeyé e esíéné ; hɛ́ ŋaá lɔa, hɛ́ɔ wááyá bɔɔtɛ́, aáná tunonyí tɔ́ ɔmuaná ŋaá fálɛfaka aana aáyá ɛ ɛndáfɛ. »

²⁰Yésus ŋá háná kɔɔna ɔsɛ : « Na aátɛ́ ya mɛ́ŋa wu oketi Butéŋí bɔ́ Bandɔ́mɛsɛ́ e ?

²¹Bú ŋaá hɔ́á enutisi oŋuŋe eyí oónjú ŋe hiíte, yɔ́ tɔ́bɔ́kɛ́na e kílo nyitíne na ɛ́táánɔ cí oŋuŋe ; aáná bikime eébí kéé núteke. »

²²Yésus ŋaá bá we húle á hɔ́láka mɔnɔŋɔ ne e metíkítíki na a maáŋá, u eékúnyíki baacɔ, u cɔ́cɔbaka eé Yelúsalɛm.

²³Ɔɔcɔ a wɔmɔtɛ́ ŋeé wuúci batá ɔsɛ : « Otéŋí a Waáŋá, ɔ́kɔ hú baacɔ betíkítíki bá ká bɔ́ bɔ́ŋgɔ́na olíhe e ? » Yésus ɔsɛ :

²⁴« Ánɔ bɛ́kɛ́ndɛ́na owoofine e ehenyi a yɛsákɛ́nánɔ́, anyía ɛ ŋa mɛ́ banɔ́ láana anyía baacɔ beéŋí ká bɔ́ aámbáka owoofine, mbá bé ti ké bú oofine.

²⁵Ekúlú ayɛ́ muútí ooki káá hatɔna ɛndánáka, muɔ́ fáca ehenyi, banɔ́ a nɔháatɛ́, nuó túme okite ehenyi, nu kɔɔnaka nɔsɛ : “Taatá, basɔ́ kuúne !” Mu káá banɔ́ bɛ́káma mɔsɛ : “Ɛ tɛ ŋá mɛ́ banɔ́ ményi buúse bukime, i ti menyi tɔ́na haála ehé nú ŋe nú húle.”

²⁶Mbá nu ké nú túme o wuúci láana anyía : “Tú ŋe sú nyíékínyi, tuó muékínyi na kuɔŋɔ́ ; kuɔŋɔ́ ɔ ŋɔɔ́ bá o oweékúnyíki a túásɔ́ tɔháatɛ́.”

²⁷Mu ká háná banɔ́ laana mɔsɛ : “I ti ŋé mí menyi haála ehé nu ŋe nú húle. Ánɔ hatɔ́na eémi eé buúse, banɔ́ bakɛla maabɛ́ eebe.”

²⁸Aáhá nu ká nɔ́ lɛ́laka, nu bíkótóko bɛkɛkɛ ekúlú ayɛ́ nu ká nɔ́ lɛca ne cíínú sɔ́kɔ́nɔ́ : Na *Abɛ́laham, ne *Isak, na Yákɔb, ne *behémúnyi bɛsana bá Bandɔ́mɛsɛ́ bekime e *Butéŋí bɔ́ Bandɔ́mɛsɛ́ noómi, mbá banɔ́ bɛ́muátá behémúkúnyínyi a nɔháatɛ́.

²⁹Baacɔ ká bɔ́ fáákɔna, bé húlúkúne na a aháŋá yɛ́ nyɛháma nyɛ́ ɔɔ́cɔ́ na a aháŋá yí nyinyíme nyɛ́ ɔɔ́cɔ́, na namuaná na bulɔɔ́lɔ, bó límekine e tébíli e Butéŋí bɔ́ Bandɔ́mɛsɛ́.

³⁰Aáná yɛ́ káá bá anyía baacɔ a bɔ́mɔtɛ́ a bá bɔ́ŋa e elime aámbáya ká bɔ́ bá eé buúse, a bɔ́mɔtɛ́ a bá bɔ́ŋa eé buúse aámbáya bɔ bá e elime. »

³¹Ekúlú eéyé, *Bafalisiɛ́ŋ a bɔ́mɔtɛ́ ŋe bú bíkósíti nááyá, báyɛ : « Hatɔ́na aaha, súéte ! Otéŋí *Elóot ŋa yáamba anyía wɔ́ yɔ́ɔ wɔɔ́nɔ́. »

³²Yésus ŋé beébe bɛ́káma ɔsɛ : « Ánɔ kaá laána ɔɔcɔ oócí a wáŋa ne menjiŋé me hiséti anyía : “I ŋeé mi hémúnyi *bɛɛbɛ́ bí bililé, yí eéŋúnyísíki baacɔ na hɛ́nánɔ na nɔɔyá ; a matátɔ́ i ké mí kúenyinyi.”

³³Mbá ɛ ŋá mɛ́ nyɛmána wu ɔcɔba ne buúse e uúmí ɔkanda na hɛ́nánɔ na nɔɔyá na ɔyá, anyía bá tɛ á bá bá ɔwɔɔ́nɔ *muhémúnyi bɛsana mɔ Bandɔ́mɛsɛ́ haála hé etémbí, ɛ tɛ ŋáa bá hú eé Yelúsalɛm.

³⁴Banɔ́ baacɔ bé Yelúsalɛm, banɔ́ Yelúsalɛm ! Banɔ́, nɔ naŋa nuanɔ́ ɔɔ́nɔ́kɔ *behémúnyi bɛsana bá Bandɔ́mɛsɛ́, nu ɔɔlɔkɔ na andányɛ́ ɛndɔ́ma cɛ́ Bandɔ́mɛsɛ́ ! Ɛ ŋa mɛ́ aambáka bikúlú biéŋí ɔ banɔ́ bánda a nyɛnamá enyí yiinyí yɛ́ ɛkɔkɛ́ náŋa yá bándáka bááyɛ́ baáná eéyé e bibéku, mbá banɔ́, nu ŋe nú kínéke !

³⁵Ánɔ lɛca aná, Bandɔ́mɛsɛ́ kéé hélúmúnyi cianɔ́ ciíbe ahátátá. Aáná ɛ ŋa mɛ́ banɔ́ láana ɛsɛ́ o otúme aámbáya nu tɛ ká háná anɔ́ mɛ lɛca ɔ ɔkɔɔ́háma ekúlú ayɛ́ nu ká nɔ́ kɔɔna nɔsɛ : “Bandɔ́mɛsɛ́ á sayábɛ́na ooci awɔ́ u ŋa fáaya eeyé eé nyiínyi !” »