Read Nomaande Luk 14 Bible Online

Luk 14 - Nomaande bible

Luk 14

¹Búmɔtɛ́ *buɔ́sɛ́ bú ehélúme bú *Besuif, Yésus ŋa cɔ́bá ɔ ɔkɔɔ́nyíá o ooki u mutéŋínyi *Bafalisiɛ́ŋ a mɔmɔtɛ́ e mú ŋeé wuúci lɔ́ŋɔ́kɔ́. Baacɔ a bá ŋa bɔ́ bá hɔ́á ŋaá bá bé wuúci tékitéki.

²Ɔɔcɔ ŋaá bá aáhá u kɔnɔkɔ nyiheŋú.

³Yésus ŋa bátá ne né *beékúnyi bikotí na ná Bafalisiɛ́ŋ ɔsɛ : « Yáásɔ́ okotí ŋe yíinjie makɛ́nda me oweéŋúnyísi ɔɔcɔ buɔ́sɛ́ bú ehélúme ayɛ́ʼ yí ti ŋée yiínjíe e ? »

⁴Mbá bé ŋe bú lésíkínyi mbuumu. Yésus ŋá bɛ́kɔ́ŋɔ́na ná ɔkɔnɔ́kɔ́nɔ ; u ŋé wuúci eéŋúnyísi, u ŋé wuúci oólísi.

⁵Mbá ɔsɛ náábɔ́ : « Isíʼo, tɛ́ka ɔɔcɔ okime náánɔ́, mbɔ́kɔ uuyé ɔɔ́nɔ́ ta anyía ciayɛ́ káwɔ ŋá kuána e ekenú buɔ́sɛ́ bú ehélúme, u ŋeé wuúci sɔmɔ ta anyía u ŋeé ciíci sɔmɔ fiaŋɔ e ? »

⁶Beébe te océényi ɔbɛ́káma ɛmbataka eécí.

⁷Ekúlú eyí Yésus ŋa lɛ́cá baacɔ a bɔ́ ŋɔɔ́ lɔ́ŋɔ́kɔ́ ɔ ɔkɔɔ́nyíá ébú límekine eé buúse, u ŋeé beébe túmíne ɛnjaba ɔsɛ :

⁸« Ekúlú ayɛ́ ɔɔcɔ ɔ yɔ́ɔ lɔ́ŋɔ́kɔ a bɔŋanda, eti ke límíne eé buúse. Yááŋa yɛ́ ɔbá anyía wáŋa ɔlɔ́ŋɔ́kɔ́nɔ́ ɔɔcɔ awɔ́ yɔ́ɔ hɔla,

⁹wá ka háma, ɔɔcɔ awɔ́ á banɔ́ lɔ́ŋɔ́kɔ banɔ́ bekime yɔ́ kuɔŋɔ́ laána ɔsɛ : “Wuúci iínjíé nyilimíné eényí.” Ɔ kɔ́ɔ́ lɔ́kɔ́ma aatɔ́ ɔlama anyía o kóó límíne e elime.

¹⁰Mbá ekúlú ayɛ́ ɔɔcɔ ɔ yɔ́ɔ lɔ́ŋɔ́kɔ a bɔŋanda, ké ke límíne e elime. Aáná ekúlú ayɛ́ ɔɔcɔ awɔ́ yɔ́ɔ lɔ́ŋɔ́kɔ á fááya, yɔ́ kuɔŋɔ́ láana ɔsɛ : “Aláamɛ, faáya ké limíne eé buúse.” Ɔ kɔ́ɔ́ bá ne nuúmi eé buúse bɔ́ baacɔ bekime abá nu ká nɔ́ bá o onyíényi.

¹¹Yááŋa anyía, ɔɔcɔ okime ewú u ŋe bíbééti, Bandɔ́mɛsɛ́ kéé wuúci loosi, ɔɔcɔ okime ewú u ŋe bíloósi, Bandɔ́mɛsɛ́ kéé wuúci bééti. »

¹²Mbá ɔsɛ ná ɔɔcɔ ewú u ŋeé wuúci lɔ́ŋɔ́kɔ : « Ekúlú ayɛ́ ɔ ŋɔɔ́ kɛ́la bɔŋanda ta nabuɔ́sɛ́, te nebutúé, atɛ lɔ́ŋɔ́kɔ bɔlɔ́ɔwɔ, ta bɔnɔ́ɔnyia, ta yɔ́ɔ́wɔ yiíbe, ta bɔ́ɔ́wɔ benúséyé a bá bɔ́ŋa baŋaŋa ; ananyía keyé bá ká bɔ́ ɔ lɔ́ŋɔ́kɔ tɔ́na, bɔ́ kuɔŋɔ́ kɛ́láka háyɛ o ŋoó beébe kɛláka.

¹³Mbá énu menyi anyía ekúlú ayɛ́ ɔ ŋɔɔ́ kɛ́la bɔŋanda, lɔ́ŋɔ́kɔ na basɔ́kásɔ́ka, na baacɔ bá bɛfɛ́kɛ́, ne eebe e bé ŋe síndólo, ne bendíméndíme.

¹⁴Mbɔ́kɔ ɔ ŋɔɔ́ kɛláka aáná, Bandɔ́mɛsɛ́ kɔ́ɔ́ yɔ́ɔ sáyábɛ́na, anyía bá tɛ ká bɔ́ bá na bɔkɔ bɔ́ ɔ kuɔŋɔ́ hélúmúnyínyi. Wuúci, u kó yóo hélúmúkunyinyi ekúlú ayɛ́ bɛtálɛ́mánánɔ́ bɛ́ baacɔ ká bɔ́ háanyuaka e biwéewé. »

¹⁵Ɛ́makɛ́la ɔɔcɔ a wɔmɔtɛ́ awɔ́ bá ŋa bɔ́ bá bébú nyíékínyi áa lɔ́kɔ́máka bɛsana eébí, mbá ɔsɛ né Yésus : « Bɔmbányɛ ná ɔɔcɔ ewú u kéé hiíte nuafa a bɔnáka bú *Butéŋí bɔ́ Bandɔ́mɛsɛ́. »

¹⁶Yésus ŋeé wuúci túmíne ɛnjaba eeci ɔsɛ : « Ɔɔcɔ a wɔmɔtɛ́ ŋaá tánáka bɔnáka ; yɔ́ lɔ́ŋɔ́kɔ baacɔ beéŋí.

¹⁷E ekúlú yɛ́ ɔnyíá, u ŋá tɔ́ma muayɛ́ munyiɔnɔ ɔ ɔkɔláana baacɔ abá ú ŋɔɔ́ lɔ́ŋɔ́kɔ́ anyía bá faakɔ́na, bɛnyɛ́ma bikime a yáaŋa hɔ́á.

¹⁸Mbá beébe bekime, ɔmɔtɛ́ na ɔmɔtɛ́, ŋe bú túme ɔkɔɔna anyía wé beébe eéhíkínyínyi. U buúse ŋá laána munyiɔnɔ ɔsɛ : “Ɛ ŋaá mɛ ɔ́ɔ́ndɔ́ esíéné, ɛ ŋá mɛ́ nyɛmána wu okoó yiíyi lɛca. Cɔ́kɔ́lɛ, mi eéhínyínyi.”

¹⁹U ɔláta ŋeé muúmu laána ɔsɛ : “Ɛ ŋá mɛ ɔ́ɔ́ndɔ́ káwɔ cíɔ́hátá cɛ́ ɔnyiɔkɛna e buólí, míɔ cɔba o okoó ciíci bɛ́kánáka ; cɔ́kɔ́lɛ, mi eéhínyínyi.”

²⁰U ɔkɔɔ́láta tɔ́na ɔsɛ : “Ɛ́ maá mɛ bátɛ́na oónjú ; yaátɛ́ asana ɛ tɛ ámɛ bá wu ɔfaaya.”

²¹A nyíáyɛ́ nyɛkahálɔ́mɔ́na, munyiɔnɔ ŋá laakɛna muútí ooki bɛsana bikime. Aáná hilóbi ŋeé muúmu tímbíé. Mu ŋá laana muayɛ́ munyiɔnɔ mɔsɛ : “Tényí cɔ́ba i ihényí cɛ́ bunɔŋɔ, haála ahá baacɔ áŋa ; hélékénéne na basɔ́kásɔ́ka, na baacɔ bá bɛnamɛ́tɛ́, ne bendíméndíme, na baacɔ e bé ŋe bú síndólo.”

²²Ekúlú ayɛ́ munyiɔnɔ ŋa kaá hálɔ́mɔ́na, mu ŋé wuúci laána mɔsɛ : “Taatá, háyɛ ɔ́ɔ kɔɔna, bú ma bɛ́kɛ́láka. Ta híáná, bilimíníne a bɛ́mɔtɛ́ yánáŋa etémbí.”

²³Aáná muútí ooki ŋaá laána muayɛ́ munyiɔnɔ mɔsɛ : “Cɔbá aámbáya i ihényí ne cí biciké na cɛ́ bɛtúalɔ́ ; baacɔ abá ɔ́ ŋɔɔ́ kuánaka, aambáka ohónyí okime anyía bé lumítíne owoofine anyía cíámɛ́ ciíbe ó nyíoyo.”

²⁴Ɛ ŋa mɛ́ banɔ́ láana anyía baacɔ abá ɛ́ ŋa mɛ́ cáŋa ɔlɔ́ŋɔ́kɔ, ta ɔmɔtɛ́ eé beébe tɛ kɔ́ɔ́ yɔɔ́kɛ́tɛ́na bíámɛ bɛnyɛ́ma bɛ́ ɔnyíá. »

²⁵Búmɔtɛ́ buɔ́sɛ́, Yésus ŋaá bá weé kéndíkínyi ɔ ɔlɔŋɔ ne bitúte bɛ́ baacɔ ; u ŋá bɛ́kɔ́ŋɔ́na náábɔ́ mbá ɔsɛ :

²⁶« Mbɔ́kɔ ɔɔcɔ ŋá faáya náámɛ anyía wá bámɔ́kɔ́na muamɛ́ *muákɔ́nɛ́na, u ŋá nyɛmána wu o mi lénéke ɔ ɔhɔla na ciayɛ́ síkíne na ciayɛ́ iinyí, ne uuyé oónyí na bááyɛ́ baáná, na bááyɛ́ benyíinyí na a banɔ́mɔcɔ́ ne e beénjú, u mi lénéke ɔ ɔhɔla te úúyé olíhe ú bɛ́muátá. Mbɔ́kɔ u tɛ ŋáa kɛla aáná, u tɛ á bá wu ɔbámɔ́kɔ́nɛ́na muamɛ́ muákɔ́nɛ́na.

²⁷Ɔɔcɔ okime ewú é kíne ɔháya úúyé owé a ambalá, mbá u mɛ látáka, u tɛ á bá wu ɔbámɔ́kɔ́nɛ́na muamɛ́ muákɔ́nɛ́na.

²⁸Ɔɔcɔ u háányɛ́ mbɔ́kɔ u ŋa yáamba otúméke ciíbe cɛ andányɛ́, áŋa wu otúme ɔfalɛfa tɛ́ka na ɔfanakɛna bɔmbányɛ, yó ményi anyía wáŋa na mɔɔnyɛ́ amá nyɛmána me o ciíci kuenyinyi ɔfalɛfa e ?

²⁹Yááŋa yɛ́ ɔbá anyía wáŋa wu otúme ɔfalɛfa mbá wuúci tɛ́ka na makɛ́nda me okuenyinyi, baacɔ bekime e bé ké búle ebú wuúci lɛca, ké búle ebú wuúci cɛ́ca,

³⁰bá kɔ́ɔnaka báyɛ : “Ɔɔcɔ ooci ŋeé túme ɔfalɛfa, wuúci tɛ́ka na makɛ́nda me okuenyinyi !”

³¹Ta anyía otéŋí awɔ háányɛ́ mbɔ́kɔ u ŋa yáamba ɔnua biité na sɔ́ɔ́kɔ́ otéŋí, áŋa wu ɔcɔba e biité wuúci tɛ́ka na ɔfanakɛna bɔmbányɛ, yó ményi mbɔ́kɔ na tɔ́sɛ́na cí bicénji cíɔ́hátá wáŋa wu onuusiki sɔ́ɔ́kɔ́ a wáŋa na tɔ́sɛ́na cí bicénji nyitíne e ?

³²Mbá mbɔ́kɔ u tɛ á bá wu o biíbi nuaka, u ŋa yáambaka ohónyí wú ɔtɔ́mɛ́na sɔ́ɔ́kɔ́ otéŋí ɔɔcɔ, ɛ́cɛ otéŋí oócí a yánaŋa haaca, anyía bábɔ́ sɔ́mbáná bumbénú. »

³³Yésus ŋó solínyi ɔsɛ : « Híáná banɔ́ tɔ́na, ɔɔcɔ okime awɔ́ u ŋa yáamba ɔbá muamɛ́ muákɔ́nɛ́na ŋá nyɛmána wu obíómóko bíáyɛ́ bɛnyɛ́ma bikime.

³⁴Makɛ́lɛ́ áŋa mambányɛ ; mbá mbɔ́kɔ makɛ́lɛ́ ŋá sɔ́lá, me ti soómo, anyána bááŋa bá ɔ háná meéme soomisiki e ?

³⁵Ma tɛ ŋá háná ɔ yɔɔ́lɔ ta ɔfɔnɛna ɔmɛsɛ́, ta ɔtábɔ́na afɔnɛ́na ; maáŋa hú anyía bé meéme oombóko haaca. Ɔɔcɔ a wáŋa ne eetú cá ɔlɔ́kɔ́máka bɛsana, wá lɔ́kɔ́máka ! »