Read Nomaande Luk 17 Bible Online

Luk 17 - Nomaande bible

Luk 17

¹Yésus ŋaá laana bááyɛ́ *baákɔ́nɛ́na ɔsɛ : « Bɛsana bí okúfítínyi ɔɔcɔ tɛ á bá bɛ́ ɔwaáŋa ; mbá mahana ná ɔɔcɔ awɔ́ bɛsana eébí ŋée hule !

²Yááŋa ambányɛ nááyá anyía bé wuúci ɔɔ́tɔ́kɔ́kɛ́na nɔsɔ́lɔ́ a amɛna, bé wuúci aahɛ́na aá nuɔmɔ́ ɔ ɔhɔla anyía wé kúfítínyi ɔɔ́nɔmbɔ́ ɔmɔtɛ́ a banásɛ́ eebe.

³Énu bíkékényíki ! Mbɔ́kɔ sɔ́ɔ́kɔ́ ŋɔ́ yɔ́ɔ kɛla bɔkɔ a bɔɔbɛ́, wuúci laána bɔmbányɛ anyía ú ma nána. Mbɔ́kɔ u ŋáá lɔ́kɔ́ma, yɔ́ bɛ́kákálákɛ́na búáyɛ́ bɔɔbɛ́,[57] mbá u sɔ́mba ɔkɔlɔ́ eé buúbu, wuúci nyɛánɛ́nɛ́na.

⁴Mbɔ́kɔ u ŋɔ́ yɔ́ɔ kɛla bɔkɔ a bɔɔbɛ́ bikúlú bítíndétú nɔ́mɔ a buɔ́sɛ́ búmɔtɛ́, mbá u faaya e bikúlú eébí bikime ɔ ɔ kuɔŋɔ́ laána anyía : “Ɛ́ ma mɛ́ bɛ́kákálákɛ́na búámɛ bɔɔbɛ́”, o kóó wuúci nyɛanakɛnɛna. »

⁵Baacɔ bá ɛndɔ́ma ŋa bɔ́ laána Otéŋí a Waáŋá báyɛ : « Basɔ́ sólínyínyi úúsú olumitinine. »

⁶Mbá Otéŋí ɔsɛ : « Mbɔ́kɔ nua nɔ́ŋa nu ɔbá te ne olumitinine otíkítíki, ú hɔ́áka hɛsámásámá hɛ́ bɔkɔ, nua nɔ́ŋa nu ɔlaana bɔɔtɛ́ bú sikɔmɔɔl ebunyíé anyía búá bɛ́lɔ́ba, bú kaá lɔa aá nuɔmɔ́, búɔ banɔ́ lɔ́kɔ́mɛ́na.

⁷Túá kɔɔna anyía ɔɔcɔ ɔmɔtɛ́ náánɔ́ áŋa na munyiɔnɔ, mu ŋɔɔ́ nyiɔ e esíéné ta anyía mu ŋeé tétényi bitúké. Weé muúmu lɛcá mu ke yeélúéke e buólí, wáŋa wu o muúmu laana anyía : “Ké ké limíne ɔ ɔmɛsɛ́, hélúméke, nyíáka” e ?

⁸Eéʼeé, mbá u kéé muúmu laana hú anyía : “Mɛ námbákɛ́na bɛnyɛ́ma, bɛ́laŋaba bɛlaŋa bí etémbí, mɛ aafɛ́na, yámɛ nyíáka, yámɛ múákɛ́na ; e elime eécí ɔ ɔ́ŋa wu ɔnyíáka, mbá a múákɛ́na.”

⁹Mbá u ti kéé yiínjíé muayɛ́ munyiɔnɔ bitéŋíti anyía mú maá kɛ́laka hú háyɛ wé muúmu laana.

¹⁰Híáná ta banɔ́ tɔ́na ekúlú ayɛ́ núánɔ́ kɛ́laka bɔkɔ bukime abɔ́ bá banɔ́ láana anyía núánɔ́ kɛ́laka, ánɔ kɔɔ́na anyía : “Tua sɔ́ŋa hú bɔnyiɔnɔ ; tú ma sɔ́ nyíɔkɔ hú buólí a bɔ́ á nyɛ́maná na basɔ́.” »

¹¹Ekúlú eyí Yésus ŋaá bá wa cɔ́cɔbaka eé Yelúsalɛm, u ŋa hɔ́lákɛ́na i iisí na cɛ Samalí na cɛ *Kalilé.

¹²U ŋaá bá wé yóofine a bunɔŋɔ a bɔ́mɔtɛ́ ekúlú eyí beénuúnu bɔ́ɔ́hátá ŋa bɔ́ fááya o o wuúci ɔɔ́ndɛ́mana. Bá ŋa bɔ́ tálɛ́mɛ́ná enenyíé haaca[58],

¹³bé ŋé túme ɔwaánjála, bá kɔ́ɔnaka báyɛ : « Taatá Yésus, cɔ́kɔ́lɛ ! Basɔ́ bɛ́cáma mahana ! »

¹⁴Ekúlú eyí ú ŋeé beébe lɛca, u ŋé beébe laána ɔsɛ : « Énu ke bítóŋínyi ná *beluli nyiínjie. » Ekúlú ayɛ́ bá ŋa bɔ́ bá bébú súétéke, bá ŋá aáŋɔ́núaka.

¹⁵Ɛ́makɛ́la ɔmɔtɛ́ eé beébe á lɛca anyía ú ma yááŋɔ́nua, nyɛkahálɔ́mɔ́na eényí ne elime, u iínjíékíne Bandɔ́mɛsɛ́ nuúmi okelú ɔ ɔmuaná.

¹⁶U ŋé túmíne Yésus eŋéndu, búáyɛ́ buúse bítíséke ɔmɛsɛ́, u ŋé wuúci iínjíé bitéŋíti. U ŋaá bá ɔɔcɔ u iisí cɛ Samalí.

¹⁷Mbá Yésus ɔsɛ : « Yaŋɔ́ ɛsɛ́ bíɔ́hátá bikime ŋá bɔ́ aáŋɔ́núaka e ? Mbá bá bánámányɛ́ nɔ́mɔ beényíe aná e ?

¹⁸Ta ɔɔcɔ tɛ ɔ́mɔɔ́ kɔ hálɔ́mɔ́na ne elime o owiínjie Bandɔ́mɛsɛ́ nuúmi, ɛ tɛ ŋáa bá hú ɔɔcɔ ooci a wáŋa okenyí e ? »

¹⁹Yésus ŋé wuúci laana ɔsɛ : « Hatɔ́na, cɔbá ; úúwu olumitinine mé yóo nohi. »

²⁰Ekúlú ayɛ́ *Bafalisiɛ́ŋ ŋa bátá Yésus anyía : « Nyíényí Bandɔ́mɛsɛ́ kéé téŋgínyi baacɔ e », u ŋé beébe bɛ́káma ɔsɛ : « *Butéŋí bɔ́ Bandɔ́mɛsɛ́ tɛ káá fáaya baacɔ buúbu lɛcaka.

²¹Bá tɛ káá kɔ́ɔna anyía búáŋa aaha, ta anyía búáŋa ehenyíé. Énu menyi bɔmbányɛ anyía Bandɔ́mɛsɛ́ a yáaŋa otéŋínyi aanɔ́ ɛ ɛkatɛ́katɛ́[59]. »

²²Yésus ŋaá laána bááyɛ́ *baákɔ́nɛ́na ɔsɛ : « Ekúlú káá fáaya ayɛ́ nu ká nɔ́ aambaka ɔlɛca ta hú buɔ́sɛ́ búmɔtɛ́ ɔ mɔɔ́sɛ́ ma Ɔɔ́nɔ́ u ɔɔcɔ ; mbá nu ti ké nu buúbu lɛca.

²³Baacɔ ká bɔ́ banɔ́ láakɛna anyía “Wáŋa ehenyíé”, ta anyía “Wáŋa aaha” ; nuti beébe látɛ́na.

²⁴Yááŋa anyía buɔ́sɛ́ bɔ́ nyɛkahálɔ́mɔ́na nyɛ́ Ɔɔ́nɔ́ u ɔɔcɔ káá bá háyɛ ɔmanyɛma ú ɛŋɔ́lɔ́muaná : Wá mányɛ́mɛ́ta a aháŋá yɛ́ nyɛháma nyɛ́ ɔɔ́cɔ́, eese ŋa kaáháma a nyɛfiana nyɛ́ ɔɔ́cɔ́.

²⁵Mbá ekúlú ayɛ́ Ɔɔ́nɔ́ u ɔɔcɔ tɛ ŋa kaá hálɔ́mɔ́na, u ŋá nyɛmána wu ɔ cáŋa lɔ́kɔ́máka ɔkála weéŋí, baacɔ bá hɛɛya eehi bó wuúci kíne.

²⁶Ánɔ bɛ́tááka anyía bɛsana a bɛ́ ŋaá bɛ́kɛ́láka ɔ mɔɔ́sɛ́ amá Nɔ́a ŋaá bá weé líhéke, káá bɛ́kɛ́láka híáná ɔ mɔɔ́sɛ́ ma nyɛkahálɔ́mɔ́na nyɛ́ Ɔɔ́nɔ́ u ɔɔcɔ.

²⁷Yááŋa anyía e ekúlú eéyé, baacɔ ŋa bɔ́ bá bábɔ́ nyíáka, bá muákɛ́na, bá bátɛ́ákɛ́na beénjú, bé tónyíki itónyi ɔ ɔkɔɔ́háma ɔ buɔ́sɛ́ abɔ́ Nɔ́a ŋo yóofine a yaandándá yí hikóló. Olondí ŋé túme ɔnaa, ú ŋé beébe ɔɔ́nɔ́kɔ bekime.

²⁸Bɛsana a bɛ́ ŋaá bɛ́kɛ́láka ɔ mɔɔ́sɛ́ amá Lɔt ŋaá bá weé líhéke ká háná a bɛ́kɛ́láka ɔ buɔ́sɛ́ abɔ́ Ɔɔ́nɔ́ u ɔɔcɔ ká ka hálɔ́mɔ́na. Yááŋa anyía ɔ mɔɔ́sɛ́ eémé, baacɔ ŋa bɔ́ bá bábɔ́ nyíáka bá múákɛ́na, bá ɔɔ́ndɔ́kɔ, bé túéke bɛnyɛ́ma, bɔ́ ɔɔ́nɔ́kɔ bɛyɔyɛ́, bá fálɛfaka meébe ;

²⁹mbá buɔ́sɛ́ abɔ́ Lɔt ŋaá hátɔ́na a bunɔŋɔ bɔ́ *Sɔ́tɔm, ne oocó na andányɛ́ a cabálákánɔ́ ŋeé húlúkúne ɔ ɔmuaná, bí ŋé beébe ɔɔ́nɔ́kɔ bekime.

³⁰Híáná bɔ́ káá bá ɔ buɔ́sɛ́ abɔ́ Ɔɔ́nɔ́ u ɔɔcɔ kéé bítóŋíé.

³¹Buátɛ́ buɔ́sɛ́, ɔɔcɔ awɔ́ u káá bá a ciayɛ́ cuunyi, búáyɛ́ bɔnɔ́mɛ eé ciíbe, tɛ sɔ́ɔ́na anyía wó yóófíne o okohíite bɛnyɛ́ma bí osúéténe. Híáná tɔ́na, ɔɔcɔ awɔ́ u káá bá e esíéné tɛ káá nyɛ́mana wu ɔhálɔ́mɔ́na o ooki.

³²Ánɔ bɛ́tááka asana a yɛ́ ŋaa hámɛ́na oónyí u Lɔt.

³³Ɔɔcɔ okime awɔ́ u káá yaambaka otétényi uúye olíhe kéé wuúci nyímísi ; mbá ɔɔcɔ okime ewú u kéé nyímísi uúye olíhe kéé wuúci bɔ́ŋɔ́tɔ́na.

³⁴Ɛ ŋaá mɛ banɔ́ laána ɛsɛ́, e buutú etéebú, a baacɔ béfendí a bá ká bɔ́ bá bafiánɛ́nánɔ́ aá buaná bɔ́mɔtɛ́, bé kéé súéténe ɔmɔtɛ́, bó síke ooci a wɔmɔtɛ́.

³⁵E beénjú béfendí a bá ká bɔ́ bá bábɔ́ ɔɔ́lɔkɔ bɛnyɛ́ma a nɔsɔ́lɔ́ nɔ́mɔtɛ́, bé kéé súéténe ɔmɔtɛ́, bó síke ooci a wɔmɔtɛ́.

³⁶[Mbɔ́kɔ banɔ́mɔcɔ́ béfendí ká bɔ́ bá bábɔ́ nyíɔkɔ e esíéné, bé ké súéténe a wɔmɔtɛ́, bó síke ooci a wɔmɔtɛ́.] »

³⁷Baákɔ́nɛ́na ŋe bú wuúci batá báyɛ : « Otéŋí a Waáŋá, háányɛ́ bɛsana eébí káá bɛ́kɛ́láka e ? » Mbá ɔsɛ : « Haála ahá hɛsamba é wé, hɔ́á tɔfɔmbɔ naŋa túá bɛ́bándákána. »[60]