Read Nomaande Luk 19 Bible Online

Luk 19 - Nomaande bible

Luk 19

¹Yésus ŋa kaáhámá e Yéliko, waá hɔ́laka bɔ hɔlaka.

²Ɔŋáŋa u ɔɔcɔ ŋaá bá aáhá, nyíáyɛ́ nyiínyi ŋaá bá ɛ́cɛ Sásɛ́. U ŋaá bá mutéŋínyi mu *betúé etéési.

³U ŋaá bá wa yáambaka ɔlɛca anyána Yésus áŋa. Mbá u tɛ ɔ́mɔ bá ne ohónyí a asana na etúte yɛ́ baacɔ, anyía u ŋaá bá okúti.

⁴U ŋá cábákɛ́na eé buúse, u ŋá bááta a bɔɔtɛ́ bú sikɔmɔɔl anyía mbá wá lɛca Yésus awɔ́ ŋa nyɛ́mana wu ɔhɔlɛna o ohónyí oócí.

⁵Ɛ́makɛ́la Yésus á kaáhámá a haála eéhé, u ŋá tálɛ́mɛ́na, u ŋé bééti eése ɔ ɔmuaná, mbá ɔsɛ ná Sásɛ́ : « Tényí sɔ́ɔ́na ɔ ɔmɛsɛ́, anyía hɛ́nánɔ ɛ ŋá mɛ nyɛmána wu olimekine e uúwu ooki. »

⁶Sásɛ́ ŋe tényí sɔ́ɔ́na, u ŋé wuúci káha ne obíléne e uúyé ooki.

⁷Ekúlú ayɛ́ baacɔ ŋa bɔ́ lɛ́cá asana eéyé, bekime ŋé túme ɔtáŋa ɛmbásɛmbásɛ, báyɛ : « Ú maá cɔ́ba ɔ ɔkɔfíanɛna o ooki ú aabɛ́ yɛ́ ɔɔcɔ. »

⁸E uúye ooki, Sásɛ́ ŋeé bíkósíti né Otéŋí a Waáŋá, mbá ɔsɛ : « Ɔ́ɔ lɛcá, Otéŋí, míɔ cɔba o owiínjíékíne basɔ́kásɔ́ka asaasalɛ yɛ́ búámɛ bɔnɔ́mɛ ; mbɔ́kɔ ya mɛ́ŋa oweébénú bɔkɔ bɔ́ ɔɔcɔ a bɔ́mɔtɛ́, míɔ cɔba o o wuúci helúmúnyínyi bɛnyɛ́ma bínyíse. »

⁹Yésus ɔsɛ nááyá : « Hɛ́nánɔ baacɔ bé ciíbe eeci ma bɔ́ nɔ́hɔkɔ, anyía ɔɔcɔ ooci áŋa tɔ́na ɔ hɛnyɛ́nɔ́ hɛ́ *Abɛ́laham.

¹⁰Yááŋa anyía Ɔɔ́nɔ́ u ɔɔcɔ ŋaá faáya ɔ ɔwaamba baacɔ e benyímékénénú o o beébe nohíki. »

¹¹Ekúlú ayɛ́ baacɔ ŋaá bá bábɔ́ lɔ́kɔ́máka bɛsana eébí, Yésus ŋa háná é beébe túmíné ɛnjaba, anyía u ŋaá bá hoóhi ne Yelúsalɛm na anyía baacɔ ŋaá bá bébú kétiki anyía *Butéŋí bɔ́ Bandɔ́mɛsɛ́ búɔ cɔba ɔ ɔlɛcana hí aámbáya.

¹²U ŋé beébe laana ɔsɛ : « Ɔɔcɔ ɔmɔtɛ́ u hɛnyɛ́nɔ́ hí otéŋí ŋeé súété a bunɔŋɔ bɔ́ haaca, anyía Otéŋí u mɔnɔŋɔ meéŋí é wuúci bééti otéŋí ú búáyɛ́ bunɔŋɔ, mbá u ka hálɔ́mɔ́na.

¹³Wa yánáŋa tɛ́ka ne osúéte, u ŋɔ́ lɔ́ŋɔ́kɔ bááyɛ́ bɔnyiɔnɔ a bɔ́mɔtɛ́ bɔ́ɔ́hátá, u ŋé beébe iínjíékíne hú náányɛ́ nyɛnamá nyɛ́ ɔmbana nyɛ́ mɔɔnyɛ́, ɔsɛ náábɔ́ : “Ánɔ kɛláka onduné na mɔɔnyɛ́ eémé ɔ ɔkɔɔ́háma ekúlú ayɛ́ ɛ́ ká kaá mɛ hálɔ́mɔ́na.”

¹⁴Mbá buayá ŋaá bá búé wuúci liŋekine, bá ŋa bɔ́ tɔ́mɛ́na otéŋí u mɔnɔŋɔ meéŋí baacɔ o okoó wuúci laana báyɛ : “Tu ti ŋé sú léne anyía ɔɔcɔ ooci á bá uusú otéŋí.”

¹⁵Ta híáná, u ŋá bááta otéŋí u baacɔ eébé, u ŋá ka hálɔ́mɔ́na a búáyɛ́ bunɔŋɔ. U ŋá laána baacɔ anyía bé wuúci lɔ́ŋɔ́kɛ́na bɔnyiɔnɔ ebé ú ŋe yiínjíékíne mɔɔnyɛ́, anyía bé wuúci laákɛ́na anyána bá ŋa bɔ́ kɛlaka onduné.

¹⁶Mu buúse ŋaá faáya, mu ŋá laána otéŋí mɔsɛ : “Otéŋí, mɔɔnyɛ́ emé o ŋoó mi iínjíé ŋeé bíéné mɔɔnyɛ́ mɔɔ́hátá.”

¹⁷Mbá ɔsɛ nááyá : “Ɛ́hɛ́ɛ, bɔmbányɛ ! Ɔ ɔ́ŋa ambányɛ yɛ́ munyiɔnɔ, anyía ó moó tétényíki bɔmbányɛ tɔnyɛ́mányɛ́ma, í me mí o bééti kɔ́mɛ́na cɛ bálɛ́ka cíɔ́hátá.”

¹⁸Munyiɔnɔ mu béfendí ŋaá faáya, mɔsɛ : “Otéŋí, mɔɔnyɛ́ emé o ŋoó mi iínjíé ŋéé bíéne mɔɔnyɛ́ matáánɔ.”

¹⁹Otéŋí ɔsɛ nááyá : “Kuɔŋɔ́ tɔ́na, í me mí o bééti kɔ́mɛ́na cɛ bálɛ́ka ɛ́táánɔ.”

²⁰Munyiɔnɔ a mumɔtɛ́ ŋaá faáya, mbá mɔsɛ : “Otéŋí, mɔɔwɔ mɔɔnyɛ́ emé o ŋoó mi iínjíé, ímeémé, i ŋe mí meéme ɔɔ́tɔ́kɔ́kɔ́ e ekéti yɛ́ bɔlaka, míɔ bátɛ́na.

²¹Ɛ ŋa mɛ́ kɛlá aáná anyía ɛ ŋa mɛ́ bá yémi o líkíméke, anyía ɔ ɔ́ŋa na nyɛhatɛ́ ; o ŋoó hiíte bɛnyɛ́ma abɛ́ ɔ́ tɛ ɔ́mɔ bátɛ́na, a sáŋáka abɛ́ ɔ tɛ ɔ́mɔ wɔɔ́nɔ.”

²²Mbá ɔsɛ : “Ɔ ɔ́ŋa aabɛ́ yɛ́ munyiɔnɔ, míɔ cɔba ɔ ɔ kuɔŋɔ́ túméke tɔkɔma ɔ mɔ́ɔ́wɔ mehúnyi ma bɛ́muátá ; ɔ ŋɔɔ́ bá oó menyukune anyía ya mɛ́ŋa na nyɛhatɛ́, i ŋe mí hiíte bɛnyɛ́ma abɛ́ ɛ tɛ ɔ́mɔ bátɛ́na, ɛ sáŋáka abɛ́ ɛ tɛ ɔ́mɔɔ́ wɔɔ́nɔ́.

²³Anyíatɛ́ aná ɔ tɛ ɔ́mɔ háya máámɛ́ mɔɔnyɛ́ haála ahɛ́ baacɔ ŋɔ fɔ́lɔ mɔɔnyɛ́ anyía a nyiámɛ nyɛkahálɔ́mɔ́na mío koó meéme hiíte na bɛtálá e ?”

²⁴Mbá ɔsɛ ná baacɔ a bá ŋa bɔ́ bá hoóhi ne wuúci : “Ánɔ mɛ cáhɔ́nɛ́na mɔɔnyɛ́ amá muáŋa ne meéme, nú iínjíé né ooci a wáŋa na mɔɔnyɛ́ mɔɔ́hátá.”

²⁵[Bé ŋé wuúci laana anyía : “Otéŋí, wa yáaŋa na mɔɔnyɛ́ mɔɔ́hátá !”]

²⁶Mbá ɔsɛ : “Ɛ ŋa mɛ́ banɔ́ laana ɛsɛ́ ɔɔcɔ okime a wáŋa na bɛnyɛ́ma, bá ká háná é wuúci iínjíé ; mbá asana ɔ́mɔtɛ́, ɔɔcɔ okime awɔ́ u tɛ á bá na bɔkɔ, bé kéé wuúci cáhɔ́nɛ́na ta bɔkɔ abɔ́ wáŋa ne buúbu.

²⁷Mbá a aháŋá na baacɔ e bé ŋe bú mi liŋine, beébe bé ti ómo bú léne anyía yámɛ bááta uubú otéŋí, énu beébe héléne aaha, núé beébe ɔɔ́nɔ́kɔ, yamɛ́ lɛcaka.” »

²⁸Ɛ́makɛ́la wáa mana ɔtáŋa oócí na baacɔ eébé, Yésus ŋaá bá weé búekeke ɔ ɔcɔba eé Yelúsalɛm.

²⁹Ekúlú ayɛ́ u ŋaá bá wa yáaŋa hoóhi na Bɛ́tɛ́fasɛ na Bɛtani, a maabána ma nɔkɔndɔ nú Molifié, u ŋá tɔ́ma *baákɔ́nɛ́na béfendí,

³⁰ɔsɛ náábɔ́ : « Ánɔ cɔbá a bunɔŋɔ eebu eénú eé buúse. Ahɛ́ nú ŋga nɔ́ háma, nu ŋa nɔ́ kúana ɔɔ́nɔ́ u abaŋabɛbɛa osúŋénú. Ta ɔɔcɔ tɛ ŋá cáŋa á bááta. Énu wuúci súŋúne, núé héléne.

³¹Mbɔ́kɔ ɔɔcɔ ŋá banɔ́ báta ɔsɛ : “Anyíatɛ́ nu ŋe nú wuúci súŋúne e ?”, ánɔ bɛ́káma nɔsɛ : “Otéŋí a Waáŋá ŋeé wuúci yáamba.” »

³²Baákɔ́nɛ́na ebé Yésus ŋaá tɔ́ma ŋa bɔ́ kúána bɛsana háyɛ u ŋeé beébe laákɛ́na.

³³Ekúlú ayɛ́ bá ŋa bɔ́ bá bébú súŋúnéke ɔɔ́nɔ́ u abaŋabɛbɛa, bemuútí abaŋabɛbɛa ŋe bú beébe báta báyɛ : « Anyíatɛ́ nu ŋe nú súŋúne ɔɔ́nɔ́ u abaŋabɛbɛa ooci e ? »

³⁴Mbá báyɛ : « Otéŋí a Waáŋá ŋeé wuúci yáamba. »

³⁵Aáná bé ŋge wuúci hálámánána né Yésus ; bé ŋé wuúci táláka bíábɔ́ bɛlaŋa bí nyiike e elime. Bé ŋé bééti Yésus o olimisinyi.

³⁶Hú waá cɔ́cɔbaka ne buúse, baacɔ é húle abɔ́ aanyɛaka bíábɔ́ bɛlaŋa bí nyiike o ohónyí ɔ ɔmuaná.

³⁷Ekúlú ayɛ́ u ŋaá bá wa yáaŋa hoóhi ne Yelúsalɛm ɔ ɔcɔba a hɛlɔɔkɔ hɛ́ nɔkɔndɔ nú Molifié, etúte yɛ́ baákɔ́nɛ́na ekime ŋo nyíóyo ne obíléne, bé ŋé túme onyemi Bandɔ́mɛsɛ́ okelú ɔ ɔmuaná e *bikéki bɛ́ bɛsana abɛ́ bá ŋa bɔ́ lɛ́caka.

³⁸Bá kɔ́ɔnaka báyɛ : « Bandɔ́mɛsɛ́ á sáyábákɛ́na Otéŋí awɔ́ u ŋa fáaya eé nyiínyi nyí Otéŋí a Waáŋá. Mbuumu á bámɔ́kɔ́na ɔ Ɔmuaná, nuúmi ná Bandɔ́mɛsɛ́. »

³⁹Bɔ́mɔtɛ́ *Bafalisiɛ́ŋ bé etúte ŋa bɔ́ laána Yésus báyɛ : « Muékúnyi, kákálákɛ́na nyɛkɛla nyɛ́ bɔ́ɔ́wɔ baákɔ́nɛ́na ! »

⁴⁰Mbá u ŋá bɛ́káma ɔsɛ : « Ɛ ŋa mɛ́ banɔ́ láana anyía bébú lésíkínyi mbuumu, ta andányɛ́ kéé bíólíkínyi. »

⁴¹Ekúlú eyí Yésus ŋaá bá wa yáaŋa hoóhi na bálɛ́ka ci Yelúsalɛm, u ciíci lɛcaka, u ŋé túme ɔlɛla a asana na baacɔ bá hɔ́á.

⁴²Mbá ɔsɛ : « Ééʼ, mbɔ́kɔ banɔ́ tɔ́na nu ŋa nɔ́ bá nuenú ményukune bɛsana a bɛ́áŋa bɛ́ɔ banɔ́ kɛ́la bɔmbányɛ hɛ́nánɔ, keyé bɔmbányɛ, mbá aámbáya bɛ́áŋa bɛnambánɔ́ a cáánɔ́ eése.

⁴³Yááŋa anyía, mɔɔ́sɛ́ ŋa fáakɔna náánɔ́ amá báánɔ́ beliŋine káá banɔ́ bɔ́ŋɛna na nɔbɛkɛ nú biité, bɔ́ banɔ́ nyíá, bɔ́ banɔ́ kúeyikinyi ihényí ikime.

⁴⁴Bá ká bɔ banɔ́ ɔɔ́nɔ́kɔ, bɔ́ kátaka búánɔ́ bunɔŋɔ ; bé ti ké bú síke nyɛndányɛ́ nyɛ́mɔtɛ́ nyɛtálánɔ́ ɔ sɔ́ɔ́kɔ́ ɔ ɔmuaná, anyía nu ti ómo nú menyi ekúlú ayɛ́ Bandɔ́mɛsɛ́ ŋaá faáya ɔ ɔ banɔ́ nóhi ! »

⁴⁵E elime eécí, Yésus ŋo yóófíne eé *Ciíbe cɛ Bandɔ́mɛsɛ́, u ŋé túme ɔwɔɔ́ŋɛ́na bakɛla onduné ;

⁴⁶ɔsɛ náábɔ́ : « Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : “Ciamɛ Ciíbe káá bá Ciíbe cɛ ɔbɛ́cɔ́kɔ́lɛ́na.” Mbá banɔ́, nú me nú ciíci ceŋisi ciíbe ecí beébi ŋa bɔ́ bɛ́námba noómi. »

⁴⁷Yésus ŋaá bá we yeékúnyíki mɔɔ́sɛ́ mekime eé Ciíbe cɛ Bandɔ́mɛsɛ́. Ne betéŋínyi *beluli nyiínjie, ne *beékúnyi bikotí, na *baáŋá bé *Besuif ŋaá bá bábɔ́ áambaka ohónyí wú o wuúci ɔ́ɔ́nɔ.

⁴⁸Mbá bá ŋa bɔ́ bá bé ti ébu ményí anyána bábɔ́ kɛla, anyía baacɔ bekime ŋa bɔ́ tákákɛ́na eetú ɔ ɔlɔ́kɔ́ma bɛsana abɛ́ u ŋaá bá waá kɔ́ɔnaka.