Read Nomaande Luk 20 Bible Online

Luk 20 - Nomaande bible

Luk 20

¹Búmɔtɛ́ buɔ́sɛ́ Yésus ŋaá bá we yeékúnyíki baacɔ eé *Ciíbe cɛ Bandɔ́mɛsɛ́ ; u beébe hulikinyi Ambányɛ yɛ́ Ɛsɔ́ma. Ne betéŋínyi *beluli nyiínjie, ne *beékúnyi bikotí na *baáŋá bé *Besuif ŋa bɔ́ fáaya nááyá,

²mbá báyɛ : « Na makɛ́nda ma háányɛ́ ɔ ŋɔɔ́ kɛ́la bɛsana eebi e ? Aányɛ́ ú ŋo yóo cuméke makɛ́nda me o biíbi kɛlaka e ? »

³Yésus ɔsɛ náábɔ́ : « Yaŋɔ́ tɔ́na, míɔ cɔba ɔ ɔ banɔ́ bata ɛmbataka ɛ́mɔtɛ́,

⁴ánɔ mɛ laána : Bandɔ́mɛsɛ́ u ŋaá tɔ́ma Sáaŋ o okowóotine baacɔ ayɛ́ʼ baacɔ e ? »

⁵Bé ŋé túme osuŋunyinyi beébe ne beébe, báyɛ : « Mbɔ́kɔ túásɔ́ bɛ́káma anyía Bandɔ́mɛsɛ́ ŋaá tɔ́ma Sáaŋ o owootine baacɔ, keyé u ŋaá basɔ́ bata ɔsɛ : “Anyíatɛ́ nú ti ómo nú wuúci lumitinine aná e ?”

⁶Mbá mbɔ́kɔ túásɔ́ bɛ́káma anyía ná baacɔ bá ɔmɛsɛ́, keyé baacɔ bekime káá basɔ́ ɔɔ́nɔ́kɔ na andányɛ́, anyía bé ŋe bú ményi e cííbú ɛtɛ́má anyía Sáaŋ ŋaá bá *muhémúnyi bɛsana mɔ Bandɔ́mɛsɛ́. »

⁷Aáná bá ŋa bɔ́ bɛ́káma anyía bé ti ŋé bú menyi aányɛ́ u ŋá tɔ́ma Sáaŋ o okowóotine baacɔ.

⁸Mbá Yésus ɔsɛ náábɔ́ : « Aáná e, oo ! Ta yaŋɔ́ tɔ́na, ɛ tɛ ŋá mɛ banɔ́ laána aányɛ́ u ŋé mi cúméke makɛ́nda ma ɔkɛlaka bɛsana. »

⁹Aáná Yésus ŋeé túmíne baacɔ eébé ɛnjaba eeci ɔsɛ : « Ɔɔcɔ a wɔmɔtɛ́ ŋɔɔ́ nyiɔkɔ yááyɛ́ esíéné, yɔ́ wɔ́ɔ́nɔkɔ bɛnyɛ́ma ; yó wiínjie esíéné ɔ cɔ́ɔ́kɛ né betétényi, u ŋá cɔ́ba ɔ ɔkanda ú mɔɔ́sɛ́ meéŋí a bunɔŋɔ bú etémbí.

¹⁰Ahá ekúlú yɛ́ ɔbándáka bɛyɔyɛ́ ŋa kaá háma, u ŋá tɔ́ma munyiɔnɔ a mumɔtɛ́ né betétényi esíéné, anyía mú keé beébe bata núáyɛ́ nuafa. Mbá betétényi esíéné ŋé bú wuúci súbéke, bé ŋé muúmu óólísi aabá éfendí.

¹¹Muútí esíéné ŋe túné tɔ́ma munyiɔnɔ mu etémbí, mbá betétényi esíéné ŋe bú muúmu súbéke tɔ́na, bé ŋé muúmu ɔɔ́mbɔ́náka, bé ŋé muúmu ɔɔ́ŋɔ́kɛ́na, bé ŋé muúmu oólísi tɔ́na aabá éfendí.

¹²U ŋe túné tɔ́ma munyiɔnɔ mu bátátɔ́, eémú bé ŋe bú súbéke tɔ́na, bé ŋé muúmu óómísíki, bé ŋé muúmu hémúnyi e esíéné.

¹³Mbá muútí esíéné ŋa bɛ́báta mɔsɛ anyána mɔ́ɔ cɔba ɔ ɔkɛla e ? Mbá mɔsɛ mɔ́ɔ cɔba ɔ ɔtɔ́ma uuyé ɔɔ́nɔ́ u ɔtɛ́má, anyía yáakɛlá bá ŋa bɔ́ cɔ́ba o o wuúci lɔ́kɔ́mɛ́na.

¹⁴Mbá ekúlú eyí betétényi esíéné ŋe bú wuúci lɛcá, bé ŋé túme ɔkɔɔna beébe ne beébe báyɛ : “Ɔɔcɔ ooci u kéé híiteke bisíkénéne bí síkíne. Túé wuúci ɔɔ́nɔ́kɔ, mbá esíéné káá basɔ́ bɛ́lɔ́kɔ́mɛ́na.”

¹⁵Bé ŋé bu wuúci hámánána e esíéné, nyi wuúci ɔɔ́nɔ́kɔ eényí. » Mbá Yésus ɔsɛ : « A nyíánɔ́ nyɛlɛca, aátɛ́ muútí esíéné káá kɛlaka e ?

¹⁶Tɛ́ka mu kɔ́ kɔ yɔɔ́nɔ́kɔ betétényi esíéné eébé, muó wiínjie esíéné né betétényi bé etémbí. » Ɛ́makɛ́la baacɔ eébé ábɔ́ lɔ́kɔ́má aáná, mbá báyɛ : « Etémbí eécí, bɔkɔ tɛ á bá bú ɔbɛ́kɛ́láka aáná ! »

¹⁷Yésus ŋé beébe lɛcáka, mbá ɔsɛ : « Aátɛ́ buhúnyi bɔ́ Ciɔɔ́ŋɛ́ eebu ŋé hémbule e : “Nyɛndányɛ́ anyɛ́ bafalɛfa ciíbe ŋe bú óómbóko, nyiínyi nyɛ́ ma bɛ́cáŋa nyɛndányɛ́ a nyɛ́ má bɛ́túáhɛ́na ciíbe” ?

¹⁸Ɔɔcɔ okime awɔ́ u káá kúákɔna a nyɛndányɛ́ eényí ɔ ɔmuaná káá bɛ́nɔ́kɔ́tɔ́kɔ́nɔ ; mbá mbɔ́kɔ nyɛndányɛ́ eényí ŋá kuakɔnakɛna ɔɔcɔ a wɔmɔtɛ́, nyí kéé wuúci ɔɔ́kɔ́sɔ́kɔ. »

¹⁹Ne *beékúnyi bikotí ne betéŋínyi *beluli nyiínjie ŋe bú túmé ɔwaamba ohónyí wú ɔhatɛna Yésus ekúlú eéyé, anyía a yáábɔ́ asana u ŋeé túmé ɛnjaba eeci ; mbá bá ŋa bɔ́ bá bébú líkíméke baacɔ.

²⁰Ɛ́ɛhɛ́ bé ŋe bú túmé o wuúci tékítéki ; bá ŋá tɔ́mɔ́kɔ́na tuféfí a tɔ́ ŋaá bá túé bíhíiteke háyɛ bɛtálɛ́mánánɔ́ bɛ́ baacɔ ɔ ɔbɛ́tɔ́ɔ́lɛ́na Yésus, bó wuúci kúfítínyi na ɛmbataka a cɛ́mɔtɛ́. Bá ŋa bɔ́ bá bábɔ́ áambaka ohónyí wú o wuúci iínjie ná kɔ́mɛ́na, wé wuúci hatɛ́na, bé wuúci kélísíki.

²¹Aáná bé ŋe bú wuúci batá báyɛ : « Muékúnyi, tu ŋe sú ményi anyía ɔ ŋɔɔ́ kɔɔna bɛsana a bɛtálɛ́mánánɔ́, e eékúnyíki baacɔ anyána bábɔ́ nyɛ́mana bé olíhéke eé buúse bɔ́ Bandɔ́mɛsɛ́, kuɔŋɔ́ tɛ́ka ne mebeé.

²²Ɔ́ɔ basɔ́ laána, yááŋa ambányɛ yɛ́ asana a bíásɔ́ *bikotí anyía tu ŋá sɔ́ nyɛ́mána tú ɔwɔɔ́ndɔ́kɔ etéési ná Sɛsáal ayɛ́ʼ yɛ́ tɛ á bá ambányɛ e ? »

²³Ɛ́makɛ́la Yésus eé ményí búábɔ́ buála, mbá ɔsɛ náábɔ́ :

²⁴« Énu mi tóŋínyi eléŋú yɛ́ mɔɔnyɛ́. Hibílícínyínyí hɛ́ aányɛ́ eéhí hɛ́áŋa ne nyiínyi eényí e ? » Mbá báyɛ : « Ne hibílícínyínyí ne nyiínyi nyɛ́ Sɛsáal bɛ́áŋa. »

²⁵Yésus ɔsɛ náábɔ́ : « Mbɔ́kɔ aáná yááŋa, énu íínjíékíne bɛnyɛ́ma bɛ́ Sɛsáal ná Sɛsáal, nu iínjíékíne bɛ́ Bandɔ́mɛsɛ́ ná Bandɔ́mɛsɛ́. »

²⁶Beébe ta ɔbɔ́ŋɔ ohónyí wú o wuúci iínjie nyɛkua a bɛsana abɛ́ u ŋaá bá weé bíkétíki eé buúse bɔ́ baacɔ ; mbá bé ŋe bú kéké nyíáyɛ́ nyɛbɛ́káma, nyiínyi nyí ŋeé beébe mómísiki.

²⁷*Basatusiɛ́ŋ ɔ bɔ́mɔtɛ́ ŋa bɔ́ faáya né Yésus. Bá náŋa bé ti ebú lúmítíne anyía biwéewé ŋa háanyua. Bé ŋe bú wuúci bícónyi báyɛ :

²⁸« Muékúnyi, *Moyís ŋaá basɔ́ ɔɔ́ŋɔ́kɛ́ná okotí eeye ɔsɛ : “Mbɔ́kɔ ɔnɔ́mɔcɔ́ ŋá bátɛ́na oónjú, mbá wé wé tɛ́ka ne obíéne baáná, onyíinyí ké síke bísúétíne esíké, yó wuúci bíénékíne baáná.”

²⁹Ɔ́ɔ lɛca aná : Benyíinyí a banɔ́mɔcɔ́ bétíndétú nɔ́mɔ ŋe bú líhéke ; u buúse ŋaá bátɛ́ná oónjú, yó wé tɛ́ka ne obíéne ɔɔ́nɔ́,

³⁰ne u béfendí na u bátátɔ́ ŋa bɔ́ bátɛ́ákɛ́ná esíké eéyé ;

³¹híáná bú ŋaá bɛ́kɛ́láka ne bekime bétíndétú nɔ́mɔ, bé ŋe bú weékúne beébe tɛ́ka ne obíéne ɔɔ́nɔ́.

³²E elime eécí, oónjú ŋé wé tɔ́na.

³³Yaátɛ́ asana tu ŋa sɔ́ ɔ bata anyía e ekúlú eyí biwéewé káá háanyuaka, sɔ́ɔ́kɔ́ awɔ́ háányɛ́ u káá bá ɔnɔ́mɛ u oónjú oócí aná e ? Yááŋa anyía bekime bétíndétú nɔ́mɔ ŋe bú wuúci bátɛ́ákɛ́na. »

³⁴Yésus ɔsɛ náábɔ́ : « Na banɔ́mɔcɔ́ ne beénjú bá hɛɛya eehi ŋa bɔ́ bátɛ́na, bɔ́ tɔ́nɔ́kɔ ;

³⁵mbá na banɔ́mɔcɔ́ ne beénjú abá Bandɔ́mɛsɛ́ káá lɛ́caka anyía bá ŋá bɔ́ nyɛmána bá ɔbá na nuafa na a hɛɛya a hɛ́ ŋa fáakɔna na a nyɛhaanyua nyí biwéewé, bó ko límekine a búáyɛ́ Bunɔŋɔ, bá tɛ ká bɔ́ bátɛ́na, bá tɛ́ tɔnɔ.

³⁶Yááŋa anyía, bá tɛ ábɔ́ bá bá ɔ háná weékúne, anyía ne beébe ne *bililé bɛ́ masɔ́ma bɛ́ Bandɔ́mɛsɛ́ bá búáŋa bɔkɔ búmɔtɛ́. Bá búáŋa baáná bá Bandɔ́mɛsɛ́, beébe baáná bá nyɛhaanyua nyí biwéewé.

³⁷Moyís ŋoó tóŋgínyi bɔmbányɛ bɔmbányɛ anyía biwéewé káá háányuaka. Aá haála ahá ú ŋɔ yɔ́ɔ́ŋɔ́kɔ a asana yí hikitékíté hɛ́ ɛsándá, u ŋɔɔ́ lɔ́ŋɔ Otéŋí a Waáŋá ɔsɛ : “Bandɔ́mɛsɛ́ cɛ́ *Abɛ́laham, Bandɔ́mɛsɛ́ cí *Isak, Bandɔ́mɛsɛ́ cɛ́ Yákɔb.” »

³⁸Yésus ŋoó solinyi ɔsɛ : « Énu menyi anyía Bandɔ́mɛsɛ́ áŋa Bandɔ́mɛsɛ́ cɛ baacɔ ɔ bɔɔ́sɔ, tɛ́ cáŋa Bandɔ́mɛsɛ́ cɛ bɛlɔ́ŋɔ́, anyía eéyé eé buúse baacɔ bekime ŋe bú líhe. »

³⁹Ɛ́ɛhɛ́ *beékúnyi bikotí a bɔ́mɔtɛ́ ŋa bɔ́ kɔɔna báyɛ : « Híánáʼo, Muékúnyi ! Ɔ́ mɔɔ́ táŋɛ́ta bɔmbányɛ. »

⁴⁰Bá tɛ háná bɛ́kána o wuúci bata ta ɛmbataka ɛ́mɔtɛ́.

⁴¹Yésus ɔsɛ náábɔ́ : « Anyána baacɔ a bɔ́ŋa bɔ́ kɔ́ɔnaka anyía *Mesíi áŋa u bɔnyɛ Táfit e ?

⁴²Yááŋa anyía Táfit wuúci bɛ́muátá ŋá kɔɔna e nufule nɔ́ Maŋana ɔsɛ : “Otéŋí Bandɔ́mɛsɛ́ ŋaá laána uumi Otéŋí a Waáŋá ɔsɛ : Faáya ké limíne aámɛ a maabána a aháŋá yí uumi ɔ ɔɔbɔ́ ú manɔ́mɛ,

⁴³ekúlú ekime ayɛ́ ɛ ká mɛ́ kɛ́la anyía bɔ́ɔ́wɔ beliŋine á bámɔ́kɔ́na búɔ́wɔ bɔtálɛ́ná bɔ́ akɔlɔ́.”

⁴⁴Mbɔ́kɔ Táfit ŋeé wuúci lɔ́ŋɔ anyía uuyé Otéŋí a Waáŋá, anyána wáŋa wu ɔbá tɔ́na u bɔnyɛ Táfit e ? »

⁴⁵Yésus ŋaá laáná *baákɔ́nɛ́na ekúlú ayɛ́ baacɔ bekime bá hɔ́á ŋa bɔ́ bá bébú wuúci bɛ́lɔ́kɔ́máka, ɔsɛ :

⁴⁶« Énu bíkékényíki na nyɛbɛ́kɛ́lɛ́na nyí *beékúnyi bikotí, bé ŋe bú léne ɔbɛ́náŋála na bɛlaŋa a bɛcaha o obítóŋgínyi, bé lénéke anyía bé beébe téŋíki na bɔɔcɔ haála ahá baacɔ á bɔ́ŋa. Bé ŋe bú léne olimine eé buúse na a *bɛndaŋía bɛ́ ɔbɛ́cɔ́kɔ́lɛ́na na a bɛandándá bɛ́ manáka.

⁴⁷Bá ŋa bɔ́ hɔ́ɔnɔ bisíké bí beénjú bíábɔ́ bɛnyɛ́ma, bé céhisiki ɔbɛ́cɔ́kɔ́lɛ́na anyía baacɔ ébú beébe kékéke. Bandɔ́mɛsɛ́ kéé beébe kélísíki na nyɛŋána ɔ ɔhɔla nyɛnamá enyí u kéé kélísíki bɔsɔ́ɔ́kɔ́ bé etémbí. »