Read Nomaande Luk 21 Bible Online

Luk 21 - Nomaande bible

Luk 21

¹Yésus ŋe hétúnyi buúse, u ŋé bísíémúkúnyi, u lɛcaka ɛnɔ́mɛ cɛ́ baacɔ ábɔ́ hákɛ́na nyíábɔ́ nyiínjie e hikóló hí nyiínjie hí *Ciíbe cɛ Bandɔ́mɛsɛ́.

²U ŋá lɛca tɔ́na hɛsɔ́kásɔ́ka hí esíké yí oónjú á hákɛ́na tɔ́la ífendí.

³Mbá ɔsɛ : « Aá taaká ɛ ŋa mɛ́ banɔ́ láana isíʼo : Hɛsɔ́kásɔ́ka hí esíké yí oónjú eéhí meé yiínjie buéŋí ɔ ɔhɔla baacɔ bé etémbí bekime.

⁴Yááŋa anyía beébe bé me bú iínjiekine anyía bá bɔ́ŋa na bɔnɔ́mɛ buéŋí e bú ti ŋé beébe ɔɔ́lɔ. Mbá wuúci, e úúyé ɔsɔ́ka, ú me yiínjie bɔkɔ bukime abɔ́ wáá bá ne buúbu anyía wé líhékíne. »

⁵Ekúlú ayɛ́ baacɔ a bɔ́mɔtɛ́ ŋa bɔ́ bá bábɔ́ táŋáka a asana ne *Ciíbe cɛ Bandɔ́mɛsɛ́ eé Yelúsalɛm, bá kɔ́ɔnaka báyɛ cíáŋa ɛtábɔ́nákánɔ́ na bɛmbányɛ bɛ́ andányɛ́ na bɛnyɛ́ma bɛ́ nyɛnɔ́kɔ́ abɛ́ baacɔ ŋe bú iínjíékíne. Mbá Yésus ɔsɛ :

⁶« Bɛnyɛ́ma eébí bikime abɛ́ nú ŋa nɔ́ lɛ́ca, ekúlú káá faáya ayɛ́ nyɛndányɛ́ nyɛ́mɔtɛ́ tɛ́ kɔ́ɔ́ lɔ́bɔ nyɛtálánɔ́ na sɔ́ɔ́kɔ́ ɔ ɔmuaná, ekime kéé fúŋulueke. »

⁷Bé ŋe bú wuúci bata báyɛ : « Muékúnyi, nyíényí bɛsana eébí káá bɛ́kɛ́láka e ? Hibílícínyínyí hɛ́ yaátɛ́ hí kóó tóŋínyi ekúlú ayɛ́ bɛsana eébí káá bɛ́kɛ́láka e ? »

⁸Mbá ɔsɛ náábɔ́ : « Énu bíkékényíki, ta ɔɔcɔ tɛ banɔ́ néŋé ! Yááŋa anyía baacɔ beéŋí ká bɔ́ fáakɔna eémi eé nyiínyi, hú naányɛ́ u kɔɔnaka ɔsɛ : “Yaŋɔ́ ya mɛ́ŋa Mesíi”, na anyía “Ekúlú yɛ́ nyɛfaaya nyí *Mesíi maá kaáháma.” Mbá nuti beébe látákɛ́na !

⁹Ekúlú ayɛ́ nu ká nɔ́ lɔ́kɔ́máka bá kɔ́ɔnaka anyía mɔnɔŋɔ ŋaá nua biité meéme ne meéme, baacɔ nuusiki báábɔ́ betéŋí, nuti líkíméke, ananyía bɛsana eébí ŋá nyɛmána bɛ́ ɔ cáŋa bɛ́kɛ́láka. Mbá tɛ́ cáŋa hí e ekúlú eéyé ɔmɛsɛ́ káá mána. »

¹⁰Yésus ŋe solinyi ɔsɛ : « Baacɔ bá bunɔŋɔ a búmɔtɛ́ ká bɔ́ támbána biité na baacɔ bá bunɔŋɔ bú etémbí ; butéŋí a búmɔtɛ́ kɔ́ɔ́ tɔ́kɔ butéŋí bú etémbí ;

¹¹ɛmɛsɛ́ bínyíekinyi na makɛ́nda, mecíli káá bá na bɛndamaka bɛ́ ɛkɔnɔ bɛhaála bɛhaála ; ne bikeyékeye bɛ́ bɛsana na bɛandándá bí tubílícínyínyí húlúkúne ɔ ɔmuaná káá bá tɔ́na. »

¹²« Ekúlú ayɛ́ bɛsana eébí bikime tɛ ŋáa bɛ́kɛ́la, baacɔ ká cáŋa a banɔ́ hátɛakɛna, bɔ́ banɔ́ tékeseke, bá káá banɔ́ fíímbieke a *bɛndaŋía bɛ́ ɔbɛ́cɔ́kɔ́lɛ́na bí *Besuif. Bá káá banɔ́ hákɛ́na eé meébe ma ɛcaná ; bɔ́ banɔ́ télímíkínyi a nyɛkála eé buúse bú betéŋí bá baacɔ na a *baáŋá ne e betíkítíki aámɛ a asana.

¹³Bɛsana eébí káá kɛ́la anyía nuanɔ́ hakɛ́na ɛmbasɔ́ eé buúse bɔ́ baacɔ.

¹⁴Ɛ́ɛhɛ́ ánɔ sɔ́mbɔ́tɔ́na e cíínú ɛtɛ́má anyía nu tɛ ká nɔ́ cáŋa ɔbɛ́ákɛ́na a nyɛnamá nyɛ́ nyɛbɛ́kála anyɛ́ nu ká nɔ́ bɛ́káláka.

¹⁵Yááŋa anyía yaŋɔ́ bɛ́muátá ɛ ká mɛ́ banɔ́ iínjíékíne ne mehúnyi ne injiŋé a nyɛnamá anyɛ́ baacɔ bekime a bá ŋa bɔ́ banɔ́ líŋine tɛ ká bɔ́ bá na makɛ́nda ta ma ɔbɛ́káma ta ma ɔsáŋɔ́na.

¹⁶Ta hú bíánɔ́ bibíényi, na báánɔ́ benyíinyí, na máánɔ́ mahɛ́ná, na bíánɔ́ bikendinyi káá banɔ́ cɔ́cɔbakana a bɛndaŋía ; baacɔ ká bɔ́ ɔɔ́nɔ́kɔ baacɔ a bɔ́mɔtɛ́ aanɔ́ ɛ ɛkatɛ́katɛ́.

¹⁷Baacɔ bekime ká bɔ́ banɔ́ líŋekine a asana na nyiámɛ nyiínyi.

¹⁸Ta híáná, te nuhúnyi númɔtɛ́ nɔ́ yáánɔ́ aatɔ́ ti kéé nyime ;

¹⁹énu eéhínyínyi mbá nu nohiki cíínú ilíhe. »

²⁰« Ekúlú ayɛ́ nu ká nɔ́ lɛ́ca ɛ́cɛ tɔbɛkɛ́ tú biité mɔ bɔ́ŋɛ́na bálɛ́ka ci Yelúsalɛm, ekúlú eéyé nu ké nú ményi anyía baacɔ bá ɔcɔba o o buúbu katakɛna.

²¹Yaátɛ́ asana, baacɔ a bá ká bɔ́ bá i iisí ci Yuté ká bɔ́ nyɛ́mana bá ɔcabakɛna ɔ ɔkɔbɛ́námbaka a tɔkɔndɔ ; a bá ká bɔ bá eé Yelúsalɛm ká bɔ́ hámɔ́kɔ́na o osúéte haaca ; eebe a bá ká bɔ́ bá e bisíéné ti ké bu óofine a bunɔŋɔ noómi.

²²Yááŋa anyía mɔɔ́sɛ́ eémé káá bá mɔɔ́sɛ́ me muuyé ; bɛsana bikime ebí *behémúnyi bɛsana bá Bandɔ́mɛsɛ́ ŋa bɔ́ kɔ́ɔ́náka, bíɔ́ bɛ́kɛ́láka.

²³Mahana ne né beénjú bé efume ne né eebe a bá ká bɔ́ bámɔ́kɔ́na e meele ɔ mɔɔ́sɛ́ etéemé, anyía ɔsɔ́ka káá kɛlaka baacɔ bá bunɔŋɔ eébú buéŋí, hilóbi hɛ́ Bandɔ́mɛsɛ́ yó bítóŋínyi náábɔ́.

²⁴Bé ké beébe ɔɔ́nɔ́kɔ na tusala tɔ́ ɛhána, bó beébe tíŋeke bɛɔ́lɛ́ ɔ mɔnɔŋɔ ma baacɔ mekime ma ɔmɛsɛ́. Baacɔ bá mɔnɔŋɔ mé etémbí ká bɔ́ nɔ́sɔ́kɛ́na Yelúsalɛm ɔ ɔkɔɔ́háma ekúlú ayɛ́ búábɔ́ butéŋí káá mana. »

²⁵« Tubílícínyínyí káá hámɔ́kɔ́na na ɔ ɔɔ́cɔ́, ne o oólí ne e tunjoti. Bulíkílíki kéé tímbíéke mɔnɔŋɔ ma baacɔ ma ɔmɛsɛ́, má aákákɛ́na na ɔfɛna ú nuɔmɔ́ na bɛahɔ́.

²⁶Bulíkílíki kéé késiki baacɔ na ɔbɛ́táá ú bɛsana a bɛ́ a nyɛmana bɛ́ ɔbɛ́kɛ́láka ɔ ɔmɛsɛ́, anyía bɛnyɛ́ma bɛ́ makɛ́nda bɛ́ ɛŋɔ́lɔ́muaná kéé bínyíékinyi.

²⁷E ekúlú eéyé, bá káá lɛca Ɔɔ́nɔ́ u ɔɔcɔ á fáakɔna ɔ ɔlɔndɔ́ noómi na na makɛ́nda meéŋí ne nuúmi nuéŋí.

²⁸Ekúlú ayɛ́ bɛsana eébí kéé túme ɔbɛ́kɛ́la, énu hetúkúnyi bɛɛtɔ́, núá lɛcáka ɔ ɔmuaná anyía nyíánɔ́ nyɛkɔmba a yáaŋa hoóhi. »

²⁹Yésus ŋé beébe túmíne ɛnjaba eeci, ɔsɛ : « Ánɔ lɛcáka ne bufikié na maatɛ́ me etémbí mekime.

³⁰Ekúlú ayɛ́ ma yáaŋa ɔ ɔtɔsɔ, banɔ́ bɛ́muátá nu ŋa nɔ́ lɛ́ca, nu menyukune anyía tɔbɔ́lá á yáaŋa hoóhi.

³¹Híáná tɔ́na, ekúlú ayɛ́ nu ká nɔ́ lɛ́caka bɛsana eébí á bɛ́kɛ́láka, énu menyi anyía *Butéŋí bɔ́ Bandɔ́mɛsɛ́ kokóokó !

³²Aá taaká ɛ ŋa mɛ́ banɔ́ láana ɛsɛ́, baacɔ bá hɛɛya eehi ti ké bú wéékúne bekime ɛ́cɛ bɛsana eébí bikime tɛ ŋáa bɛ́kɛ́la.[64]

³³Na ɔmɛsɛ́ na ɔmuaná káá mána, mbá taaká cɛ́ bíámɛ bɛsana tɛ káá mána ta buɔ́sɛ́. »

³⁴« Énu bíkékényíki anyía cíínú ɛtɛ́má tɛ kasá, cíó bíínjie na a maŋanda ne o ohíólo meluku, cɛ́ bɛ́ákákɛ́na bɛsana bɛ́ ɔmɛsɛ́ ; keyé buɔ́sɛ́ etéebú káá banɔ́ béletenyi.

³⁵Yááŋa anyía buɔ́sɛ́ eébú kéé bíhúéne biliminyi bikime bɛ́ ɔmɛsɛ́ okime háyɛ mɔhɔ́tɔ́.

³⁶Nɔtɛ hɛ́táka hiiné, ánɔ bɛ́cɔ́kɔ́lɔ́kɛ́na Bandɔ́mɛsɛ́ bikúlú bikime, aáná nu ká nɔ́ bá na makɛ́nda me oweéhínyínyi bɛsana eébí bikime a bɛ́ á nyɛmána bɛ́ ɔbɛ́kɛ́láka, mbá nu bá bɛtálɛ́mánánɔ́ bɛ́ baacɔ eé buúse bɔ́ Ɔɔ́nɔ́ u ɔɔcɔ. »

³⁷Mɔɔ́sɛ́ mekime Yésus ŋaá bá we yeékúnyíki baacɔ eé *Ciíbe cɛ Bandɔ́mɛsɛ́, mbá ɔɔ́fɔ́ ekime u cɔ́cɔbaka ɔ ɔkɔɔfíanɛna a nɔkɔndɔ nú Molifié.

³⁸Baacɔ bekime ŋa bɔ́ bá bábɔ́ cɔ́cɔbaka eé Ciíbe cɛ Bandɔ́mɛsɛ́ na alalɛ yɛ́ ɔyá ɔ ɔkɔlɔ́kɔ́ma bɛsana abɛ́ u ŋaá bá waá kɔ́ɔnaka.