Read Nomaande Luk 24 Bible Online

Luk 24 - Nomaande bible

Luk 24

¹A alalɛ yɛ́ ɔyá buɔ́sɛ́ bɔ́ sɔ́ndɛ, beénjú ŋa bɔ́ hátɔna, bɔ́ cɔ́bana e eenyie bɛsɔŋɔ bí enumbé abɛ́ bá ŋa bɔ́ tábɔ́náka.

²Bá ŋgaá kuána anyía bé me fúŋulisi nyɛndányɛ́ a nyɛ́ ŋaá bá e nyiofíníne nyí eenyie.

³Bé ŋe bú óófíne noómi, mbá beébe ta ɔlɛca omime ú Otéŋí a Waáŋá Yésus.

⁴Ekúlú ayɛ́ asana eéyé ŋaá bá yé beébe yébíki a bíábɔ́ bɛɛtɔ́, banɔ́mɔcɔ́ béfendí na bɛlaŋa e bifúlúndúndúé ŋé beébe hámɛ́na hú huasɛ.

⁵Aáná bulíkílíki ŋeé beébe tímbíé, bá ŋá cɔ́ŋɛ́máka. Baacɔ eébé ŋé beébe batá báyɛ : « Anyíatɛ́ nu ŋa nɔ́ áamba ooci a wáŋa wɔɔ́sɔ aá haála ahá bɛlɔ́ŋɔ́ áŋa e ?

⁶U tɛ á kɛla aaha, mbá ú ma háanyua e biwéewé. Ánɔ bɛ́tááka háyɛ u ŋaá banɔ́ láakɛna ekúlú ayɛ́ u ŋaá bá wá yánáŋa a *Kalilé,

⁷ɔsɛ : “Yɛ́ ŋá nyɛmána anyía bé fiimbie Ɔɔ́nɔ́ u ɔɔcɔ ná baŋána, bé wuúci ɔɔ́nɔ́ waátákɛ́nánɔ́ ɔ ɔmbásá, mbá ɔ mɔɔ́sɛ́ matátɔ́ yɔ́ háányua e biwéewé.” »

⁸Aáná bá ŋa bɔ́ bɛ́táá ɔtáŋa ú Yésus.

⁹Bá ŋa bɔ́ hátɔ́na hɔ́á, bá ŋga láákɛ́na na *baákɔ́nɛ́na bɔ́ɔ́hátá na ɔmɔtɛ́ na baákɔ́nɛ́na bé etémbí bekime bɛsana eébí bikime.

¹⁰Beénjú eébé ŋa bɔ́ bá anyía na Malíi, itónyi cɛ Makatala, na Sáana, na Malíi, iinyí cɛ Sáak ; bá ŋa bɔ́ bá ɔlɔŋɔ ne beénjú bé etémbí, beébe bé ŋe bú bíkétíkínyi baacɔ bá ɛndɔ́ma bɛsana eébí.

¹¹Mbá beébe te olumitinine bɛsana ebí beénjú ŋeé beébe bíkétíkínyi, anyía bá ŋa bɔ́ bá bábɔ́ bɛ́tááka anyía bɛ́áŋa bɛsana bɛ́ buála.

¹²Ta híáná, Bíel ŋa hátɔ́na, yɔ́ cɔba e eenyie, ú ŋga hámá, u ŋó nyoŋíminyi e eenyie, u ŋá lɛca hú bɛlahɛlahɛ bɛ́ ɔmbɔ́mɔ́ ɔ ɔmɛsɛ́. Aáná u ŋá hálɔ́mɔ́na o ooki, u ŋé kéké asana a yɛ́ ŋaá bɛ́kɛ́láka.

¹³Hú buátɛ́ buɔ́sɛ́, *baákɔ́nɛ́na bé Yésus béfendí a bɔ́mɔtɛ́ ŋa bɔ́ bá bábɔ́ cɔ́cɔbaka a bunɔŋɔ bɔ́ Ɛmáyus, bú ŋaá bá e kilomɛ́ta cíɔ́hátá na ɛ́mɔtɛ́ ne Yelúsalɛm.

¹⁴Bá ŋa bɔ́ bá bábɔ́ táŋátáŋa a bɛsana bikime a bɛ́ ŋaá bɛ́kɛ́láka.

¹⁵Ekúlú ayɛ́ bá ŋa bɔ́ bá bábɔ́ táŋáka, bé súŋgunyinyi, Yésus ŋé keé beébe cua ; bé ŋé túme okendinyi.

¹⁶Bé wuúci lɛcaka, mbá bé ti wuúci menyútúne, anyía ibíne ŋaá bá a cáábɔ́ eése.

¹⁷Yésus ŋé beébe batá ɔsɛ : « Mbá aátɛ́ yááŋa, nu kandaka, nu suŋukunyinyi e ? » Bá ŋa bɔ́ tálɛ́mɛ́na, bá ŋá lɔ́kɔ́ma ɔtɛ́má ɔnua.

¹⁸Ɔmɔtɛ́ e bífendí eébí ŋaá bá ne nyiínyi anyía Kɛlɛ́ɔ́bas ; mbá ɔsɛ nááyá : « Ɛ́cɛ anyía hú kuɔŋɔ́ bímuócí a baacɔ e bé ŋe bú límine e ekéti yí ekúlú aaha eé Yelúsalɛm, ó ti ŋóo menyi bɛsana a bɛ́ maá bɛ́kɛ́láka ɔ mɔɔ́sɛ́ eeme e ? »

¹⁹U ŋé beébe báta ɔsɛ : « Bɛsana bɛ́ yaátɛ́ e ? » Mbá báyɛ : « Asana a yɛ́ ŋaá hámɛ́na Yésus, ɔɔcɔ u *Násalɛt ; wuúci u ŋaá bá *muhémúnyi bɛsana mɔ Bandɔ́mɛsɛ́ a mɔ́ ŋaá bá na makɛ́nda a bɛsana abɛ́ mu ŋaá bá muá táŋáka, mu kɛ́laka ne eé buúse bɔ́ Bandɔ́mɛsɛ́ ne eé buúse bɔ́ baacɔ bekime bé *Islayɛ́l.

²⁰Na báásɔ́ betéŋínyi *beluli nyiínjie na báásɔ́ *baáŋá ŋa bɔ́ kɛ́la anyía bá sɔ́mbɔ́tɔ́na o muúmu ɔɔ́nɔ́ muátákɛ́nánɔ́ ɔ ɔmbásá.

²¹Tu ŋa sɔ́ bá túésú kétiki anyía muúmu muá nyɛmána mú ɔháŋɔ́náka baacɔ bé Islayɛ́l ; yɛ́mɔtɛ́ asana áŋa anyía matátɔ́ eeme hɛ́nánɔ amá bɛsana eébí ŋaá bɛ́kɛ́láka.

²²Aáná tɔ́na beénjú a bɔ́mɔtɛ́ bé uúsú ɔlɔŋɔ ŋaá basɔ́ nyímísi injiŋé, anyía bá ŋa bɔ́ cɔ́bá e eenyie a alalɛ yɛ́ ɔyá,

²³beébe ta ɔlɛca uúyé omime. Ekúlú ayɛ́ bá ŋga bɔ́ hálɔ́mɔ́na, bá ŋá bɔ́ basɔ́ bíkétíkínyi anyía bá ŋá bɔ lɛca *bililé bɛ́ masɔ́ma bɛ́ Bandɔ́mɛsɛ́ e bí ŋeé beébe laana anyía Yésus áŋa wɔɔ́sɔ.

²⁴Baacɔ a bɔ́mɔtɛ́ bé uúsú ɔlɔŋɔ ŋá bɔ cɔ́ba tɔ́na e eenyie, bɔ́ kúana bɛsana háyɛ beénjú ábɔ́ kɔ́ɔnaka. Mbá beébe tɔ́na te o wuúci lɛca. »

²⁵Ɛ́ɛhɛ́ Yésus ŋeé beébe laána ɔsɛ : « Banɔ́ baacɔ eébé, nu tɛ anɔ́ bá ne injiŋé, cíínú ɛtɛ́má ti ŋé tényí e lumitinine bɛsana bikime ebí *behémúnyi bɛsana bá Bandɔ́mɛsɛ́ ŋa bɔ́ kɔ́ɔ́náka.

²⁶Yɛ́ tɛ ɔ́mɔ nyɛ́mana anyía *Mesíi á lɔ́kɔ́máka ɔkála e, mbá u limine a núáyɛ́ nuúmi e nú ŋeé húle ná Bandɔ́mɛsɛ́ e ? »

²⁷U ŋé beébe hembúlékíne bɛsana abɛ́ Ciɔɔ́ŋɛ́ ikime cɛ́ Bandɔ́mɛsɛ́ ŋa kɔ́ɔna a yááyɛ́ asana, o otúme e tufule tú *bikotí bí *Moyís ɔ ɔkɔɔ́háma e tufule tukime tú behémúnyi bɛsana bá Bandɔ́mɛsɛ́.

²⁸Ekúlú ayɛ́ bá ŋa bɔ́ bá bá bɔ́áŋa hoóhi na bunɔŋɔ abɔ́ bá ŋa bɔ́ bá bábɔ́ cɔ́cɔbaka, Yésus ŋa kɛ́la háyɛ anyía u ŋa cɔ́baka ne buúse.

²⁹Mbá báyɛ nááyá : « Limíne aaha na basɔ́, anyía buɔ́sɛ́ meé súéte, ibíne a yáaŋa hoóhi. » U ŋó oofíne eé ciíbe anyía wé limíne ne beébe.

³⁰Ekúlú eyí bé ŋe bú túme onyíényi, u ŋé hiíte eléti, yó wíinjie Bandɔ́mɛsɛ́ bitéŋíti, yó yiíyi bákáka, u ŋé beébe iínjíékíne anyía bá nyíáka.

³¹Aáná ibíne ŋa hátɔna a cáábɔ́ eése, nyi wuúci menyutune eényí, mbá u ŋé séŋúlúé eébú eé buúse.

³²Bé ŋe túme ɔlaanana báyɛ : « Ɔ́kɔ, tɛ́ka cíísú ɛtɛ́má ŋaá bá inyíóyónó ne obíléne ekúlú ayɛ́ waá bá wá táŋáka na basɔ́ o ohónyí e, u basɔ́ hémbulekine Ciɔɔ́ŋɛ́ cɛ́ Bandɔ́mɛsɛ́ e ? »

³³Bá ŋa bɔ́ hátɔ́na hí e ekúlú etéeyé, bá ŋá hálɔ́mɔ́kɔ́na eé Yelúsalɛm. Bá ŋga bɔ́ kúana na baákɔ́nɛ́na bɔ́ɔ́hátá na ɔmɔtɛ́ na baláayɛ́, bá bɛ́bándákánɔ́ haála hɔ́mɔtɛ́,

³⁴bábɔ́ kɔ́ɔnaka báyɛ : « Otéŋí a Waáŋá áŋa taaká ɔhaanyúánɔ́ o owé, anyía Símon meé wuúci lɛcaka ! »

³⁵Beébe tɔ́na bé ŋé bíkétíkínyi baákɔ́nɛ́na eébé na bɛsana a bɛ́ á bɛ́kɛ́láka o ohónyí na anyána bébú wuúci menyutune ekúlú ayɛ́ waá bákáka eléti.

³⁶Ekúlú ayɛ́ *baákɔ́nɛ́na eébé béfendí ŋa bɔ́ bá bá búanaŋa ɔ ɔtáŋa bɛsana eebi, bé ŋé síke bítéme, Yésus má tálɛ́mɛ́na aabɔ́ ɛ ɛkatɛ́katɛ́, mbá ɔsɛ náábɔ́ : « Mbuumu á bá náánɔ́. »

³⁷Bá ŋa bɔ́ bálátána, bé ŋé túme olíkíme buéŋí, anyía bé ŋe bú kéti anyía ɛnyɔlɛ cíáŋa.

³⁸Mbá Yésus ɔsɛ náábɔ́ : « Anyíatɛ́ nu ŋe nú líkíme nyɛnamá eényí e ? Nyɛnamá nyí isuŋí nyɛ́ aátɛ́ nua nɔ́ŋa ne nyiínyi ɛ ɛtɛ́má e ?

³⁹Ánɔ lɛcáka na cáámɛ aabá na cáámɛ akɔlɔ́, mbá núé menyí anyía yaŋɔ́ bɛ́muátá ya mɛ́ŋa ; ɛnyɔlɛ tɛ á bá ne imehú ne biúhé háyɛ nu ŋa nɔ́ mɛ lɛca ne biíbi. »

⁴⁰Ekúlú ayɛ́ u ŋaá bá wá táŋáka aáná, u ŋé beébe tóŋgínyi na cááyɛ́ aabá na cááyɛ́ akɔlɔ́.

⁴¹Beébe te olumitinine aátɛ́ u ŋaá bá wé beébe laakɛna anyía bá ŋa bɔ́ bá bébú bílénéke buéŋí, beébe bekékénú tɔ́na. Aáná Yésus ŋeé beébe báta ɔsɛ : « Nua nɔ́ŋa nu ɔbá na bɔkɔ bɔ́ ɔnyíá aáhá e ? »

⁴²Báyɛ : « Ɛ́ɛ. » Bé ŋé wuúci iínjíe hiɔfɔ́ a hɛhákákánɔ́.

⁴³U ŋeé hiíhi hiíte, u ŋé hiíhi nyíáka, bé wuúci lɛcaka.

⁴⁴Mbá ɔsɛ : « Ɛ ŋaá mɛ banɔ́ láákɛ́na bɛsana eébí ekúlú ayɛ́ ɛ ŋa mɛ́ bá na banɔ́. Aáná bɛsana bikime a bɛ́áŋa bɛɔ́ŋɔ́kɔ́nɔ́ a yáámɛ́ asana ne e nufule nú *bikotí nú *Moyís, ne e tufule tú *behémúnyi bɛsana, na tɔ́ Maŋana ŋáa nyɛmána bɛ́ ɔbɛ́kɛ́láka. »

⁴⁵Ekúlú eéyé u ŋeé beébe iínjíe makɛ́nda ma ɔlɔ́kɔ́máka aátɛ́ Ciɔɔ́ŋɛ́ cɛ́ Bandɔ́mɛsɛ́ ŋá kɔɔna.

⁴⁶U ŋé beébe laána ɔsɛ : « Yááŋa yɔɔ́ŋɔ́kɔ́nɔ́ anyía *Mesíi ŋá nyɛmána we owé, yɔ́ háanyua e biwéewé ɔ mɔɔ́sɛ́ matátɔ́.

⁴⁷Aáná bé kéé húlíkínyi baacɔ bá mɔnɔŋɔ mekime a nyíáyɛ́ nyiínyi anyía bá bɛ́kákálákɛ́na maabɔ́ maabɛ́, mbá bá sɔ́mba ɔkɔlɔ́ eé meéme ; aáná Bandɔ́mɛsɛ́ kéé beébe nyɛ́anakɛnɛna maabɔ́ maabɛ́. Bé kéé húlikinyi baacɔ aáná o otúme eé Yelúsalɛm ɔ ɔcɔba ne buúse.

⁴⁸Nu ká nɔ́ hákɛ́na ɛmbasɔ́ a bɛsana eébí.

⁴⁹Yááŋa anyíaʼo, ɛ ká mɛ́ banɔ́ tɔ́mɛ́na *Efúúménénú yí Elilé eyí Síkíne ŋaá bɛ́tána ; nu ŋa nɔ́ nyɛmána nú olimine aaha a bálɛ́ka eeci ɔ ɔkɔɔ́háma ekúlú eyí nu ké nú híite makɛ́nda e mé ŋeé húle ɔ Ɔmuaná. »

⁵⁰Yésus ŋé beébe cɔbána hoóhi na Bɛtani,[70] u ŋé hetúnyi aabá ɔ ɔmuaná, u ŋé beébe sayábɛ́na.

⁵¹Ekúlú ayɛ́ u ŋaá bá weé beébe sayábákɛ́na, u ŋé beébe bɛ́álɔ́na, Bandɔ́mɛsɛ́ nyi wuúci béétísi eényí ɔ Ɔmuaná.

⁵²Mbá beébe bá ŋa bɔ́ hálɔ́mɔ́na eé Yelúsalɛm ne obíléne weéŋí ɛ́cɛ bé me bú wuúci nyemiki.

⁵³Bá ŋa bɔ́ bá eé *Ciíbe cɛ Bandɔ́mɛsɛ́ mɔɔ́sɛ́ mekime, bé nyémiki Bandɔ́mɛsɛ́.