Read Nomaande Luk 4 Bible Online

Luk 4 - Nomaande bible

Luk 4

¹Ekúlú ayɛ́ u ŋa ka hálɔ́mɔ́ná aá nuɔmɔ́ nú Sulutɛ́ŋ, Yésus ŋaá bá onyíóyónó ne *Efúúménénú yí Elilé. Elilé ŋeé wuúci cɔbána i iisí cɛ ɔsɛ́bɛ́á.

²U ŋe límékíne hɔ́á mɔɔ́sɛ́ etíne éfendí ; Musɔ́mɛ́na ŋeé wuúci kɔkɔ́náka. U tɛ ɔ́mɔɔ́ nyíá ta bɔkɔ ɔ mɔɔ́sɛ́ etéemé ; ɛ́makɛ́la má máa hɔ́la, ɛcaná ŋeé wuúci nuakɛna.

³Aáná Musɔ́mɛ́na ŋeé wuúci laána ɔsɛ : « Mbɔ́kɔ asɛ ɔ ɔ́ŋa Ɔɔ́nɔ́ u Bandɔ́mɛsɛ́, laána nyɛndányɛ́ eenyi nyɛ́ á bɛ́cáŋa eléti. »

⁴Mbá Yésus ɔsɛ nááyá : « Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Ɔɔcɔ ti ŋée líhe hú na bɛnyɛ́ma bɛ́ ɔnyíá biíbi ne biíbi.” »

⁵E elime eécí, Musɔ́mɛ́na ŋé wuúci súéténe a nɔkɔndɔ ɔ ɔmuaná. E hikúlúkúlú u ŋé wuúci tóŋgínyi mɔnɔŋɔ mekime mɔ ɔmɛsɛ́,

⁶mbá mɔsɛ nááyá : « I ŋe mí o wiínjíékíne ne butéŋí na nɔhɛka nɔ́ mɔnɔŋɔ eeme mekime ; biíbi etéebi bé ŋeé mi iínjíékíne, ɛ́ɛhɛ́ ya mɛ́ŋa wu owiínjie ná ɔɔcɔ ewú i ŋe mí léné owiínjie.

⁷Mbɔ́kɔ o ŋóo mi túmíne eŋéndu, bikime eébí káá bá bíɔ́wɔ. »

⁸Mbá Yésus ɔsɛ : « Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Nyémíki Otéŋí a Waáŋá, ciɔwɔ Bandɔ́mɛsɛ́, mbá é wuúci nyiɔkɛna hú wááyá bímuócí.” »

⁹Ekúlú eéyé, Musɔ́mɛ́na ŋeé wuúci súéténe eé Yelúsalɛm, mu ŋé wuúci bééti ɔ ɔkaka ú *Ciíbe cɛ Bandɔ́mɛsɛ́, mbá mɔsɛ nááyá : « Mbɔ́kɔ ɔ ɔ́ŋa Ɔɔ́nɔ́ u Bandɔ́mɛsɛ́, cimé ɔ ɔmɛsɛ́,

¹⁰anyía Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Bandɔ́mɛsɛ́ kéé yíínjíékíne bíáyɛ́ *bililé bɛ́ masɔ́ma makɛ́nda anyía bíó yóo tétényíki.”

¹¹Cí túné kɔ́ɔnaka cɛ́sɛ : “Bililé bɛ́ masɔ́ma bɛ́ Bandɔ́mɛsɛ́ kɔ́ yɔ́ɔ bɛ́túáhɛ́na a cáábɔ́ aabá anyía úúwu ɔkɔlɔ́ ti kúféténe a nyɛndányɛ́.” »

¹²Mbá Yésus ɔsɛ : « Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : “Atɛ kɔkɔ́náka Otéŋí a Waáŋá, ciɔwɔ Bandɔ́mɛsɛ́.” »

¹³Ɛ́makɛ́la Musɔ́mɛ́na á kɔ́kɔ́náká Yésus nyɛnamá nyikime, nyisúéte eényí haaca ne wuúci ɔ ɔkɔɔ́háma a yɛ́mɔtɛ́ ekúlú.

¹⁴Yésus ŋá hálɔ́mɔ́na a *Kalilé, onyíóyónó hú mbiɔ́kɛ na makɛ́nda me *Efúúménénú yí Elilé. Aáná núáyɛ́ nulumí ŋa lɔ́kɔ́mána bɛhaála bikime bí aháŋá etéeyé.

¹⁵U ŋaá bá we yéékúnyíki a *bɛndaŋía bɛ́ ɔbɛ́cɔ́kɔ́lɛ́na bí *Besuif, baacɔ bekime wuúci nyemiki.

¹⁶Yésus ŋa cɔ́bá a *Násalɛt, haála ahá ú ŋa kɔ́máka. U ŋa cɔ́bá háyɛ u ŋaá bá waá kɛ́laka a *andaŋía yɛ́ ɔbɛ́cɔ́kɔ́lɛ́na yí *Besuif buɔ́sɛ́ bɔ́ yáábɔ́ ehélúme. U ŋá tálɛ́mɛ́na anyía wáá fanáka Ciɔɔ́ŋɛ́ cɛ́ Bandɔ́mɛsɛ́.[16]

¹⁷Bé ŋeé wuúci iínjíe nufule enú *muhémúnyi bɛsana *Ɛsayí ŋɔ yɔ́ɔ́ŋɔ́kɔ. U ŋé nuúnu húúne, u ŋɔ́ bɔ́ŋɔ haála a hɔɔ́ŋɔ́kɔ́nɔ́ anyía :

¹⁸« Elilé yí Otéŋí a Waáŋá áŋa náámɛ, anyía u ŋá mɛ lɔtɔ́ anyía yémí hulíkinyi basɔ́kásɔ́ka Ambányɛ yɛ́ Ɛsɔ́ma, yémi sobíki anyía bɛɔ́lɛ́ káá bá bɛháŋɔ́nákánɔ́. Bendíméndíme ká bɔ́ lɛ́cakana tɔ́na. Yémi kétúnyíki baacɔ abá bɔsɔ́ɔ́kɔ́ ŋe bú beébe tekese.

¹⁹Yémi sobíki ekúlú eyí Otéŋí a Waáŋá kóó tóŋínyi baacɔ yááyɛ́ yaála yí nuubo. »

²⁰Ɛ́makɛ́la wáá fánáka, u ŋé kuéye nufule, u ŋé nuúnu hélúmúnyi ná munyiɔnɔ mɔ andaŋía yɛ́ ɔbɛ́cɔ́kɔ́lɛ́na, u ŋé limíne anyía wé beébe éékúnyíki. Baacɔ bekime a bá ŋa bɔ́ bá a andaŋía eéyé noómi ŋe bú wuúci tálá eése.

²¹Aáná u ŋeé túmé o beébe laána ɔsɛ : « Hɛ́nánɔ eeci Ciɔɔ́ŋɛ́ cɛ́ Bandɔ́mɛsɛ́ eécí ma bɛ́kɛ́láka náánɔ́, banɔ́ balɔ́kɔ́ma. »

²²Ɛ́ɛhɛ́ baacɔ bekime ŋaá bá bé lémbíki Yésus. Bé kékéke bíáyɛ́ bɛmbányɛ bí mehúnyi abɛ́ u ŋaá bá weé hémúkúnyi. Baacɔ bɛ́bátáka báyɛ : « Tɛ́ cáŋa ɔɔ́nɔ́ u Yɔ́sɛb ooci wáŋa e ? »

²³Yésus ɔsɛ náábɔ́ : « Nu ŋa nɔ́ cɔ́ba bɔmbányɛ bɔmbányɛ o o mi túmíne ɛnjaba eeci a cɛ́ ŋa kɔɔ́na cɛ́sɛ : “Kuɔŋɔ́ muándánána, bíéŋúnyísi kuɔŋɔ́ bɛ́muátá.” Nu ŋa nɔ́ kɔ́ɔ́naka tɔ́na nɔsɛ : “Tú ŋa sɔ́ lɔ́kɔ́máká bɛsana bikime abɛ́ ɔ́ ŋɔɔ kɛláka a Kabɛlnawum ; biíbi kɛláka tɔ́na aaha a buɔ́wɔ́ aná.” »

²⁴Ekúlú eéyé, mbá ɔsɛ náábɔ́ : « Aá taaká ɛ ŋa mɛ́ banɔ́ laána anyía ta buɔ́sɛ́, bá tɛ ŋá káha bɔmbányɛ muhémúnyi bɛsana mɔ Bandɔ́mɛsɛ́ aá buayá.

²⁵Ɛ ŋa mɛ́ banɔ́ láana aá taaká anyía bisíké bí beénjú ŋaá bá biéŋí a bunɔŋɔ bú *Islayɛ́l a mɔɔ́sɛ́ emé Éli ŋaá bá. Ekúlú eéyé, ɛŋɔ́lɔ́muaná ŋeé bíkúéye, nɔbɔ́lá tɛ háná naa tuɔŋɔ tɔ́tátɔ́ ne ekélékéti ɔ ɔkɔɔ́háma ayɛ́ ɔmbɔ́ta wɔ́ ɛcaná ŋaá faáya haála hekime.

²⁶Ta híáná, Bandɔ́mɛsɛ́ tɛ ɔ́mɔɔ́ tɔ́ma Éli ɔ ɔwɔɔ́lɔ bisíké etéebi, mbá u ŋá tɔ́ma hú né esíké a yɛ́ ŋaá bá a bunɔŋɔ bɔ́ Salɛ́bta, i iisí ci Síton.[17]

²⁷Beénuúnu ŋaá bá tɔ́na beéŋí e Islayɛ́l a mɔɔ́sɛ́ emé Elisé ŋaá bá muhémúnyi bɛsana mɔ Bandɔ́mɛsɛ́ ; ta híáná, ta ɔmɔtɛ́ é beébe tɛ ɔ́mɔ́ wáaŋɔnua, mbá hú Náman, ɔnɔ́mɔcɔ́ u Silíi. »[18]

²⁸Ɛŋakɛlá baacɔ bekime a bá ŋa bɔ́ bá a andaŋía yɛ́ ɔbɛ́cɔ́kɔ́lɛ́na ábɔ́ lɔ́kɔ́má mehúnyi eémé, bá ŋá famɔ́núáka ne hilóbi.

²⁹Bá ŋá hátɔ́kɔ́na ɛndánáka, bé ŋe túme ó wuúci ɔɔ́ŋɛ́na anyía waá háma a búábɔ́ bunɔŋɔ. Bunɔŋɔ eébú ŋaá bá bɔfalɛ́fákánɔ́ a nɔkɔndɔ ɔ ɔmuaná. Bé ŋe wuúci súéténe anyía bé wuúci aahɛ́na ɛ ɛmányɛ́.

³⁰Ta híáná, u ŋa hɔ́la aabɔ́ ɛ ɛkatɛ́katɛ́, nyisúéte eényí.

³¹Yésus ŋeé súété a bálɛ́ka cɛ Kabɛlnawum i iisí cɛ *Kalilé, u ŋaá bá we yéékúnyíki baacɔ *buɔ́sɛ́ bú ehélúme bú *Besuif.

³²Baacɔ ŋaá bá bébú kékéke buéŋí nyíáyɛ́ nyɛnamá nyí oweékúnyi bɛsana, anyía u ŋaá bá waá táŋáka na bɔɔcɔ bukime.

³³A *andaŋía yɛ́ ɔbɛ́cɔ́kɔ́lɛ́na yí Besuif noómi, ɔmɔtɛ́ ɔɔcɔ ŋaá bá hɔ́á na *aabɛ́ yí elilé. U ŋé túme obóko buáŋá ɔsɛ :

³⁴« Wɛɛ́ɛ ! Yésus, ɔɔcɔ u *Násalɛt, aátɛ́ yááŋa na basɔ́ na kuɔŋɔ́ e ? Ɔ ŋɔɔ́ faáya aaha ɔ ɔ basɔ́ súlisi e ? I ŋe mí menyi bɔmbányɛ anyía ɔ ɔ́ŋa Ofúúménénú u Bandɔ́mɛsɛ́. »

³⁵Yésus ŋaá laána elilé ne esise ɔsɛ : « Lésíkínyi mbuumu, háma aá cɛɛ́tɔ cɛ ɔɔcɔ ooci ! » Aáná aabɛ́ yí elilé ŋeé kuusi ɔɔcɔ ɔ ɔmɛsɛ́ eé buúse bɔ́ baacɔ bekime, nyɛháma eényí te o wuúci óómísi.

³⁶Baacɔ bekime ŋá bɔ aálɛ́áka eété ; bé súŋgunyinyi beébe ne beébe báyɛ : « Háá ! Ooci ɔtáŋaʼo ! Ɔɔcɔ ooci ŋe téŋínyi *bɛɛbɛ́ bí bililé na bɔɔcɔ na makɛ́nda, mbá bɛ́ hámɔ́kɔ́na. »

³⁷Aáná nulumí nú Yésus ŋaá lɔ́kɔ́máná bɛhaála bikime bɛ́ aháŋá etéeyé.

³⁸Eéyé ekúlú Yésus ŋá hatɔ́na a *andaŋía yɛ́ ɔbɛ́cɔ́kɔ́lɛ́na yí *Besuif, u ŋá cɔbá eé ciíbe ci Símon. Aáhá, iinyíkíné ci Símon ŋaá bá cɛ́ɔ kɔ́nɔkɔ ɔmbɔ́ta ú nyiike, bá ŋa bɔ́ bɛ́cɔ́kɔ́lɔ́kɛ́na Yésus anyía wé wuúci eéŋúnyísi.

³⁹U ŋé bíkósíti nááyá, u ŋá laána nyiike ne esise anyía nyɛ́ á hatɔ́na, nyiike ŋá mana ɔ ɔmana. Hí a yaátɛ́ ekúlú, u ŋá hatɔ́na, u ŋé túme o beébe sókóbi.

⁴⁰A nyɛfianɛna nyɛ́ ɔɔ́cɔ́, baacɔ bekime a bá ŋa bɔ́ bá na bɔkɔnɔ anamánamá cá ɛkɔnɔ ŋe bú beébe hélékénéné né Yésus.[19] U ŋé beébe bítíséke ɔmɔtɛ́ ɔmɔtɛ́, u ŋé beébe eéŋúnyísíki.

⁴¹Bɛɛbɛ́ bí bililé ŋaá hámɔ́kɔ́ná tɔ́na ná bɔkɔnɔ́kɔ́nɔ beéŋí, bɛ́ aánjáláka bɛ́sɛ : « Ɔ ɔ́ŋa Ɔɔ́nɔ́ u Bandɔ́mɛsɛ́. » Yésus ŋé biíbi laána ne esise, u ŋaá bá u tɛ á yaátába anyía bɛ́ á táŋáka anyía bɛ́ ŋaá bá bíé ményukune anyía wáŋa *Mesíi.[20]

⁴²Hí ahɛ́ ɔyá ŋaá yá, Yésus ŋá hatɔ́na a bunɔŋɔ eébú anyía waá cɔba a mafákálɛ́ana. Etúte yɛ́ baacɔ ŋeé túme ó wuúci aamba, yí ŋgée wuúci kuána, yɛ́ ŋa sɛ́ yí wuúci yéényísi anyía u ti tényí súéte.

⁴³Mbá Yésus ŋé beébe laána ɔsɛ : « Ɛ ŋá mɛ́ nyɛmána wu ohulikinyi mɔnɔŋɔ me etémbí tɔ́na Ambányɛ yɛ́ Ɛsɔ́ma yí *Butéŋí bɔ́ Bandɔ́mɛsɛ́ ; yaátɛ́ asana Bandɔ́mɛsɛ́ ŋaá mɛ tɔ́ma. »

⁴⁴U ŋaá bá we húlikinyi baacɔ Ambányɛ yɛ́ Ɛsɔ́ma a *bɛndaŋía bɛ́ ɔbɛ́cɔ́kɔ́lɛ́na bí *Besuif bí Yuté[21].