Read Nomaande Luk 5 Bible Online

Luk 5 - Nomaande bible

Luk 5

¹Búmɔtɛ́ buɔ́sɛ́, Yésus ŋaá bá a asálá yɛ́ nuɔmɔ́ nɔ́ Kɛnɛsalɛt[22], aáhá nyɛkɔca nyɛ́ baacɔ ŋeé wuúci sékítínyi anyía nyɛ́ á lɔ́kɔ́máka Bɛsana bɛ́ Bandɔ́mɛsɛ́.

²U ŋa lɛ́ca bɛkɔkɔ́ bífendí a asálá yɛ́ nuɔmɔ́. Belumbelumbe ŋa bɔ́ bá hɔ́á, bábɔ́ súáka máábɔ́ mɔhɔ́tɔ́, ɛ́cɛ bá ma bɔ́ hámɔ́kɔ́na eé biíbi.

³U ŋo yóofíne ɔ ɔkɔkɔ́ yí Símon, u ŋé wuúci laána ɔsɛ : « Cɔ́kɔ́lɛ, nyɛ́kɛ́tɛ́tɛ́na ɔkɔkɔ́ e menyífé. » Yésus ŋé limíne ɔ ɔkɔkɔ́, nyɛcɔba eényí ne buúse oweékúnyi nyɛkɔca nyɛ́ baacɔ.

⁴Ɛ́makɛ́la wá máná ɔtáŋa, u ŋá laána Símon ɔsɛ : « Cɔbána ɔkɔkɔ́ e munyife na kuɔŋɔ́ na bɔlɔ́ɔwɔ, ánɔ aahákɛ́na mɔhɔ́tɔ́ ɔ ɔhatɛna tuɔfɔ́. »

⁵Símon ŋé wuúci bɛ́káma ɔsɛ : « Taatá, tú me su lúmbeke buutú bukime, tú ɔ́ tɔ́mbɔ, tu tɛ ɔ́mɔ sɔ́ ɔ́ɔ́nɔ ta bɔkɔ. Mbá ɔɔ́wɔ a nyɛkɔɔna, míɔ cɔba ɔ ɔkɛla anyía bá háná ááhakɛna mɔhɔ́tɔ́ e menyífé. »

⁶Bé ŋé meéme aahákɛ́na, bá ŋá hátɛ́ákɛ́na tuɔfɔ́ tuéŋí ɔ ɔkɔɔ́háma ayɛ́ maabɔ́ mɔhɔ́tɔ́ ŋaá bá hoóhi na ɔlahɛa.

⁷Bé ŋé késítínyi baláayɛ́ a bá ŋa bɔ́ bá a yɛ́mɔtɛ́ ɔkɔkɔ́ anyía bé keé beébe ɔ́ɔ́lɛ́ta. Bá ŋá bɔ faáya, bé ŋé nyíóyísi bɛkɔkɔ́ bífendí na tuɔfɔ́ hú mbiɔ́kɛ hoóhi anyía bíé nyíme e menyífé noómi.

⁸Ɛ́makɛ́la Símon Bíel á lɛ́cá aáná, u ŋé túmíne Yésus eŋéndu, mbá ɔsɛ : « Otéŋí a Waáŋá, cɔ́kɔ́lɛ, ɛ tɛ ámɛ bá ooci a wáŋa wu ɔtálɛ́mɛ́na oówo eé buúse, ya mɛ́ŋa mɔkɛla maabɛ́. »

⁹Símon ŋeé kéké, ta baacɔ bekime a bá ŋa bɔ́ bá ne wuúci, a nyɛnamá nyɛ́ tuɔfɔ́ atɔ́ bá ŋa bɔ́ hátɛ́ákɛ́na.

¹⁰Híáná baláayɛ́ bé Símon, na Sáak na Sáaŋ, baáná bé Sebeté, ŋe bú kéké tɔ́na. Mbá Yésus ŋá laána Símon ɔsɛ : « Eti líkíméke ! O otúme aámbáya, o kó búle o o mi súéne baacɔ. »

¹¹Ahɛ́ bá ŋga bɔ́ hálámánáná bɛkɔkɔ́ a asálá, bá ŋá bɛ́yuátáka bɛnyɛ́ma bikime, bé ŋé wuúci látákɛ́na.

¹²Búmɔtɛ́ buɔ́sɛ́, Yésus ŋaá bá a búmɔtɛ́ bunɔŋɔ bɔ́ *Kalilé. Ɔɔcɔ ɔmɔtɛ́ ŋaá bá hɔ́á, u kɔnɔkɔ ciínú cɛɛ́tɔ ikime ; ahɛ́ ú ŋa lɛ́ca Yésus, u ŋé túme nɔbɔlɔ ɔ ɔmɛsɛ́ o o wuúci bɛ́cɔ́kɔ́lɛ́na ɔsɛ : « Otéŋí a Waáŋá, cɔ́kɔ́lɛ, mbɔ́kɔ o ŋoó léne, ɔ ɔ́ŋa wu o mi eéŋúnyísi. »

¹³Yésus ŋá nandɔ́na ɔɔbɔ́, u ŋé wuúci bítíse, mbá ɔsɛ : « Ɛ́ɛ, i ŋeé mi léne, aáŋɔ́núá ! » Hí a yaátɛ́ ekúlú ciínú ŋá maná aá cɛɛ́tɔ.

¹⁴Yésus ɔsɛ nááyá : « Atɛ laána ta ɔɔcɔ anyía ɔ́ mɔɔ́ waáŋɔ́nua ; mbá ké ke bítóŋínyi né *mululi nyiínjie, mbá e iínjie *abɛ́sámbá eyí *Moyís ŋaá kɔɔ́na o otóŋínyi baacɔ bekime anyía ɔ́ mɔɔ́ waáŋɔ́nua. »

¹⁵Ta híáná, nulumí nú Yésus ŋaá cɔbá ne buúse ɔ ɔlɔ́kɔ́mána. Akɔca cá baacɔ ceéŋí ŋaá bá cá bɛ́bándákána hoóhi ne wuúci na ɔ ɔlɔ́kɔ́ma bɛsana na ɔ ɔbɛ́ándɛ́na ɛkɔnɔ.

¹⁶Mbá Yésus ŋaá bá waá cɔ́cɔbaka bímuócí a mafákálɛ́ana ɔ ɔkɔbɛ́cɔ́kɔ́lɛ́na.

¹⁷Búmɔtɛ́ buɔ́sɛ́, Yésus ŋaá bá we yeékúnyíki. Na *Bafalisiɛ́ŋ ne *beékúnyi bikotí ŋa bɔ́ bá límekine aáhá, bé húlúkúne a mɔnɔŋɔ mekime na ma *Kalilé, ne me Yuté ne Yelúsalɛm tɔ́na. Makɛ́nda me Otéŋí a Waáŋá ŋaá bá nááyá, ma kɛ́laka anyía weé yeéŋúnyísíki bɔkɔnɔ́kɔ́nɔ.

¹⁸Aáná baacɔ ŋe bú héléne asákála abɛ́túáhɛ́nánɔ́ e nyibúyé, bá aambaka anyía bé yiíyi súúnyí eé buúse bú Yésus.

¹⁹Mbá bɔ́ tɛ ɔ́mɔ́ bɔ́ bɔ́ŋɔ ohónyí wú o yiíyi oofinyi eé ciíbe a asana na nyɛkɔca nyɛ́ baacɔ. Aáná bé ŋe bú yiíyi báátána e cuunyi. Bɔ́ ŋɔ́ bɔlɔ́ haála hɔ́mɔtɛ́ e cuunyi, bé ŋé suúnyíki asákála á nyíáyɛ́ nyibúyé ne tukolí ɛ ɛkatɛ́katɛ́ cɛ nyɛkɔca eé buúse bú Yésus.

²⁰Ɛ́makɛ́la Yésus á lɛ́ca nyɛnamá enyí bá ŋa bɔ́ háya mɔŋɔlɛ́ nááyá, mbá ɔsɛ ná ɔkɔnɔ́kɔ́nɔ : « Aláamɛ, ɛ́ mɔ mɛ́ ɔ nyɛanɛnɛna mɔɔwɔ maabɛ́. »

²¹Ne beékúnyi bikotí na Bafalisiɛ́ŋ ŋe bú túme obílúmínyi, bá kɔ́ɔ́naka báyɛ : « Aányɛ́ ooci ú ŋé féníne Bandɔ́mɛsɛ́ aáná e ? Aányɛ́ ú ŋá nyɛ́ánɛnɛna baacɔ maabɛ́, ɛ tɛ ŋáa bá hú Bandɔ́mɛsɛ́ bímuócí e ? »

²²Yésus ŋe ményi cííbú ibíkéti, mbá ɔsɛ náábɔ́ : « Anyíatɛ́ nua nɔ́ŋa na anamá cé ibíkéti eécé e ?

²³Aátɛ́ yɛ́ ŋa hɔ́la ɔnata e ? Ɔkɔɔna anyía : “Ɛ́ mɔ mɛ́ ɔ nyɛanɛna mɔɔwɔ maabɛ́”, ayɛ́ʼ ɔkɔɔna anyía : “Hatɔ́na ɛndánáka, kandáka” e ?

²⁴Ɛ́náʼo, ɛ ŋa mɛ́ aamba núénú ményi anyía *Ɔɔ́nɔ́ u ɔɔcɔ áŋa na makɛ́nda ɔ ɔmɛsɛ́ ma ɔnyɛanakɛnɛna baacɔ maabɛ́. » Mbá ɔsɛ ná asákála : « Hatɔ́na ɛndánáka, hiíte nyíɔ́wɔ nyibúyé, eélúé oówo o ooki. »

²⁵Ɔɔcɔ ŋa hátɔ́na ɔ ɔhatɔna ɛndánáka, baacɔ bekime wuúci lɛcaka, u ŋé hiite nyíáyɛ́ nyibúyé anyɛ́ u ŋaá bá fiánɛnɛna, u ŋé súéte e uúyé ooki, u iínjíékíne Bandɔ́mɛsɛ́ nuúmi.

²⁶Aáná baacɔ bekime ŋe bú kékéke, bé iínjíékine Bandɔ́mɛsɛ́ nuúmi ne bulíkílíki buéŋí ɛ ɛtɛ́má hú mbiɔ́kɛ, báyɛ : « Hɛ́nánɔ tú ma sɔ́ lɛ́caka bikéki bí bɛsana. »

²⁷E elime eécí, Yésus ŋeé súété, u ŋá lɛcá *mutúé etéési mulíménénú a nyíáyɛ́ nyinyiɔ buólí. Nyíáyɛ́ nyiínyi ŋaá bá ɛ́cɛ Léfi. Mbá Yésus ɔsɛ nááyá : « Mɛ látáka ! »

²⁸Hí a yaátɛ́ ekúlú Léfi ŋa hátɔ́na, u ŋé kine búáyɛ́ buólí buúse bukime, u ŋé wuúci látáka.

²⁹Ekúlú eéyé, Léfi ŋeé wuúci kɛ́lákɛ́na bɔnáka e úúyé ooki ; ne *betúé etéési beéŋí na baacɔ bé etémbí ŋe bú nyíékínyí ne beébe.

³⁰Aáná na *Bafalisiɛ́ŋ na bíábɔ́ bikendinyi *beékúnyi bikotí ŋe bú túme obícúcúle, bá bátaka *baákɔ́nɛ́na bé Yésus báyɛ : « Anyíatɛ́ nu ŋe nú nyíényi, nu muékínyi ne betúé etéési na bakɛla maabɛ́ e ? »

³¹Ɛ́makɛ́la Yésus á lɔ́kɔ́má aáná, mbá ɔsɛ náábɔ́ : « Tɛ́ cáŋa ba-tɛ-kɔnɔ́ bá ŋa bɔ́ áamba muándánána, mbá bɔkɔnɔ́kɔ́nɔ.

³²Ɛ tɛ ɔ́mɔɔ́ fáaya ɔ ɔmɛsɛ́ ooci ɔ ɔkɔláana bɛtálɛ́mánánɔ́ bɛ́ baacɔ anyía “Ánɔ bɛ́kákálákɛ́na maanɔ́ maabɛ́, mbá nɔ sɔ́mba ɔkɔlɔ́ eé meéme”, mbá bakɛla maabɛ́. »

³³Baacɔ a bɔ́mɔtɛ́ ŋa bɔ́ laána Yésus báyɛ : « Baákɔ́nɛ́na bá Sáaŋ Batis naŋa bébú bíkíilieke ɔnyíá bɛ́mɔtɛ́ bikúlú, bá bɛ́cɔ́kɔ́lɔ́kɛ́na, ta *baákɔ́nɛ́na bá *Bafalisiɛ́ŋ áyá, ekúlú ayɛ́ bɔ́ɔ́wɔ ŋá bɔ́ nyíá, bá múákɛ́na. »

³⁴Mbá Yésus ɔsɛ náábɔ́ : « Mbá nua nɔ́ŋa nú okóti baacɔ abá bɔ́ lɔ́ŋɔ́kɔ e nusíke ɔnyíá e, ekúlú ekime ayɛ́ ɔnɔ́mɛ áŋa ɔlɔŋɔ ne beébe e ?

³⁵Mbá ekúlú káá fáaya ayɛ́ baacɔ ká bɔ sɔ́mɔ ɔnɔ́mɛ ɛ ɛkatɛ́katɛ́ ci nusíke, etéeyé ekúlú bé ké bú bíkíilie ɔnyíá. »

³⁶Yésus ŋeé beébe túmíne tɔ́na ɛnjaba eeci : « Ta ɔɔcɔ tɛ ŋá láha bɔlaka a buɔ́sɔ anyía wá látáka e elunénú yɛ́ bɔlaka ; mbɔ́kɔ ɔɔcɔ ŋá kɛ́láka aáná, ú maá láhaka bɔlaka a buɔ́sɔ ; ekéti ayɛ́ waá láha hɔ́á tɛ káá bá bɔkɔ búmɔtɛ́ ne elunénú yɛ́ bɔlaka.

³⁷Aáná tɔ́na ta ɔɔcɔ ti ŋéé cébínyi mecekí e bilunénú bɛ́ bɛsɔ́mɔ ; mbɔ́kɔ ɔɔcɔ ŋá kɛ́láka aáná, mecekí káá yaátáka bɛsɔ́mɔ, mɔ́ hámɔ́kɔ́na, bɛsɔ́mɔ bíɔ́ cáŋiaka.

³⁸Mbá ɔɔcɔ ŋá nyɛmána wu ɔhákɛ́na mecekí a bɛsɔ́mɔ a bɛɔ́sɔ !

³⁹Ɔɔcɔ ewú ú me bíhélínyi ɔmúána meluku a mɔɔ́nɛ́nánɔ́ ti ŋéé léne ɔmúána mecekí. Bá ŋa kɔ́ɔna anyía “Meluku a mɔɔ́nɛ́nánɔ́ áŋa mambányɛ.” »