Read Nomaande Luk 7 Bible Online

Luk 7 - Nomaande bible

Luk 7

¹Ɛ́makɛ́la Yésus á máná ɔlaana baacɔ bɛsana bikime abɛ́ u ŋaá bá weé lénéke o beébe laana, u ŋá cɔba a Kabɛlnawum.

²Aáhá, mutéŋínyi bicénji a mumɔtɛ́ mu butéŋí bú *Lóom ŋaá bá na múáyɛ́ munyiɔnɔ, mu kɔnɔkɔ buéŋí, hoóhi ne owé. Mutéŋínyi bicénji ŋaá bá weé muúmu lénéke buéŋí.

³Ekúlú eyí mutéŋínyi bicénji ŋaá lɔ́kɔ́ma bé yoómísíki nyiínyi nyí Yésus, mu ŋá tɔ́ma *baáŋá bé *Besuif o okoó wuúci batá, anyía wé ke eéŋúnyísi múáyɛ́ munyiɔnɔ.

⁴Bá ŋa bɔ́ hátɔna, bɔ́ɔ cɔba ; bá ŋga háma né Yésus ; bé ŋé wuúci bɛ́cɔ́kɔ́lɔ́kɛ́na buéŋí báyɛ : « Cɔ́kɔ́lɛ, ɔ ŋɔɔ́ nyɛmána wu ɔwɔɔ́lɔ ecénji eéyé,

⁵anyía yɛ́ naŋa yaá basɔ́ lénéke, basɔ́ Besuif ; yiíyi tɔ́na yɛ́ ŋa kɛlaka anyía bá falɛ́fáka yaasɔ́ *andaŋía yɛ́ ɔbɛ́cɔ́kɔ́lɛ́na. »

⁶Yésus ŋa cɔ́bá ɔlɔŋɔ ne beébe. U ŋaá bá wa yáaŋa hoóhi ne ooki ekúlú eyí mutéŋínyi bicénji ŋaá tɔ́má baláayɛ́ anyía bé wuúci láana anyía : « Otéŋí a Waáŋá, eti bíyébíki, ɛ tɛ ŋá mɛ háma te butíkítíki e ehélé ayɛ́ ɔ ɔ́ŋa wú owoofine eémi eé ciíbe.

⁷Ɛ́ɛhɛ́ yamɛ lɛcá anyía ɛ tɛ ámɛ bá ooci awɔ́ waá nyɛ́mána wu ɔtálɛ́mɛ́na oówo eé buúse. Mbá ɔ́ɔ táŋɛ́ta bɔ táŋɛ́ta, muamɛ munyiɔnɔ ŋa cɔ́ba ɔ ɔwaáŋɔ́nua.

⁸Ɛ ŋa mɛ́ kɔɔna aáná anyía yaŋɔ́ bɛ́muátá tɔ́na ya mɛ́ŋa e butéŋí bɔ́ báámɛ baáŋá ; i ŋeé mi téŋínyi bicénji tɔ́na. Ɛ ŋa mɛ́ laana a yɛ́mɔtɛ́ anyía : “Cɔbá ehenyíé”, yɛ́ ŋa cɔ́ba ; ná a yɛ́mɔtɛ́ tɔ́na anyía : “Faáya aaha”, yɛ́ ŋa fáaya. Ɛ ŋa mɛ́ laana muamɛ munyiɔnɔ anyía : “Kɛlá eebu”, mu ŋa kɛ́la. »

⁹Ekúlú eyí Yésus ŋa lɔ́kɔ́má aáná, u ŋé kéké uuyé ɔtáŋa. U ŋá bɛ́kɔ́ŋɔ́na né etúte yɛ́ baacɔ a yɛ́ ŋaá bá yé wuúci látáka, mbá ɔsɛ : « Ɛ ŋa mɛ́ banɔ́ láana anyía ɛ́ tɛ́ ŋá mɛ lɛca nyɛnamá nyɛ́ yaandándá yí olumitinine eényí ná ɔɔcɔ, ta a bunɔŋɔ bú *Islayɛ́l. »

¹⁰Aáná baacɔ abá ú ŋaá tɔ́má ŋa bɔ́ hálɔ́mɔ́ná o ooki, bá ŋá kuána anyía munyiɔnɔ ma aáŋɔ́nua.

¹¹E elime eécí,[26] Yésus ŋa cɔ́bá a bunɔŋɔ abɔ́ bɔ́ ŋɔ lɔ́ŋɔ anyía Nayin.[27] Bá ŋa bɔ́ bá bébú kéndikinyi na bááyɛ́ baákɔ́nɛ́na ne etúte yɛ́ baacɔ.

¹²Ekúlú ayɛ́ u ŋaá bá wa yáaŋa hoóhi ne nyiofine nyɛ́ bunɔŋɔ, bá ŋaá bá bá cɔ́cɔbakana o okoónyie ewéewé á yɛ́mɔtɛ́. Yɛ́ ŋaá bá hɛkɔŋɔ́ hɛ́ ɔɔ́nɔ́ hí esíké yí oónjú. Etúte yɛ́ baacɔ bá bunɔŋɔ ŋaá bá ɔlɔŋɔ ne esíké.

¹³Ekúlú eyí Otéŋí a Waáŋá Yésus ŋeé yiíyi lɛca yá lɛ́laka, u ŋé yiíyi bɛ́cáma mahana ; u ŋé yiíyi laána ɔsɛ : « Atɛ lɛláka ! »

¹⁴U ŋé bíkósíti, u ŋé bítíse hikóló hí ewéewé ; baacɔ a bá ŋa bɔ́ bá bé hiíhi bɛ́túáhákɛ́na ŋa bɔ́ tálɛ́mɛ́ná. Mbá Yésus ɔsɛ : « Aláamɛ, ɛ ŋɔ mɛ́ ɔ laana anyía háányúá ! »

¹⁵Ewéewé ŋa hátɔ́na, yí ŋé limíne, yí ŋé túme ɔtáŋa. Nyíáyɛ́ nyi wuúci síke eényí ne iinyí anyía weé wuúci sókóbíki.

¹⁶Aáná baacɔ bekime ŋe bú líkíméké ; bé íínjíékíne Bandɔ́mɛsɛ́ nuúmi, bá kɔ́ɔnaka báyɛ : « Yaandándá yí *muhémúnyi bɛsana mɔ Bandɔ́mɛsɛ́ maá kaá háma náásɔ́. Bandɔ́mɛsɛ́ maá fáaya ɔ ɔkɔháŋɔ́na bááyɛ́ baacɔ. »

¹⁷Aáná asana eéyé ŋaá lɔ́kɔ́máná na a mɔnɔŋɔ mekime me Yuté na á bɛháŋá etéebí.

¹⁸Sáaŋ Batis ŋa lɔ́kɔ́máka bɛsana eébí bikime háyɛ bááyɛ́ *baákɔ́nɛ́na ŋe bú wuúci laákɛ́na. U ŋɔ́ lɔ́ŋɛ́ta baákɔ́nɛ́na béfendí,

¹⁹u ŋé beébe tɔ́ma né Otéŋí a Waáŋá Yésus o okoó wuúci batá anyía : « Mbá ɔ ɔ́ŋa Ooci awɔ́ á nyɛ́mana wu ɔfaaya ayɛ́ʼ tu ŋá sɔ́ nyɛ́mána tu ɔtátáka u etémbí e ? »

²⁰Ekúlú ayɛ́ bá ŋa ka bɔ́ hámá né Yésus, bé ŋé wuúci laána báyɛ : « Sáaŋ Batis ma basɔ́ tɔ́ma nɔ́ɔ́wɔ ɔ ɔkɔ kuɔŋɔ́ batá anyía ɔ ɔ́ŋa Oócí awɔ́ á nyɛ́mana wu ɔfaaya ayɛ́ʼ tu ŋá sɔ́ nyɛ́mána tu ɔtátáka u etémbí e ? »

²¹Hí a yaátɛ́ ekúlú, Yésus ŋé ééŋúnyísíki na bɔkɔnɔ́kɔ́nɔ beéŋí na baacɔ bá bɛfɛ́kɛ́ ; u ŋe hémúkúnyí *bɛɛbɛ́ bí bililé a baacɔ, u ŋa kɛ́lá anyía bendíméndíme á lɛcákána.

²²Mbá ɔsɛ : « Ánɔ ka láákɛ́na Sáaŋ bɛsana abɛ́ nú ma nɔ́ lɛ́caka, núɔ́ lɔ́kɔ́máka : Bendíméndíme ŋa bɔ́ lɛ́cana, baacɔ e bé ŋe bú síndólo kandaka bɔmbányɛ, beénuúnu aáŋɔ́núaka, bɔndɔ́kɔ́ndɔ́kɔ lɔ́kɔ́mákána, biwéewé haanyuaka, basɔ́kásɔ́ka lɔ́kɔ́máka Ambányɛ yɛ́ Ɛsɔ́ma.

²³Bɔmbányɛ né ooci ewú u ti kéé kúféténe aámɛ a asana. »

²⁴Ɛ́makɛ́la baákɔ́nɛ́na bá Sáaŋ ébú súéte, mbá Yésus a asana yɛ́ Sáaŋ ɔsɛ ná baacɔ bá nyɛkɔca : « Aátɛ́ nú ŋa nɔ́ bá nuanɔ́ áambaka ɔkɔlɛ́ca, ekúlú ayɛ́ nú ŋa nɔ́ cɔ́ba i iisí cɛ ɔsɛ́bɛ́á e ? Nɔtɔŋɔtɔ́ŋɔ́ enú ehúne ŋé fúke ayɛ́ʼ ?

²⁵Aátɛ́ nú ŋa nɔ́ bá nuanɔ́ áambaka ɔkɔlɛ́ca aná e ? Ɔɔcɔ awɔ́ ú maá láŋabaka bɔmbányɛ e ? Eéʼeé, anyía baacɔ a bá ŋa bɔ́ láŋaba bɔmbányɛ ŋe bú líhe bɔmbányɛ eé meébe me betéŋí.

²⁶Mbá aátɛ́ aná nú ŋa nɔ́ bá nuanɔ́ áambaka ɔkɔlɛ́ca e ? Muhémúnyi bɛsana e ? Ɛ́ɛ, ɛ ŋa mɛ́ banɔ́ láana anyía u ŋa hɔ́la *muhémúnyi bɛsana.

²⁷Yááŋa anyía Sáaŋ áŋa ooci awɔ́ Bandɔ́mɛsɛ́ ŋaá kɔ́ɔ́na a Ciɔɔ́ŋɛ́ ɔsɛ : “Ɛ́ná ! Ɛ́ maá mɛ tɔ́ma uumi ɔɔcɔ u bɔsɔ́ma oówo eé buúse ɔ ɔ kuɔŋɔ́ tábɔ́nɛ́na ohónyí.”

²⁸Ɛ ŋa mɛ́ banɔ́ láana anyía a bɔnyɛ baacɔ bekime bá ɔmɛsɛ́, ta ɔɔcɔ tɛ ŋáá bá waáŋá ɔ ɔháma háyɛ Sáaŋ Batis buúse bukime ; ta híáná, hɛcɔɔ́cɔ́ e *Butéŋí bɔ́ Bandɔ́mɛsɛ́ áŋa waáŋá ne wuúci. »

²⁹Na baacɔ bekime ne *betúé etéési áyá ŋa bɔ́ bá bé wuúci lɔ́kɔ́máka, bé ŋe bú lúmitinine anyía Bandɔ́mɛsɛ́ áŋa ɔtálɛ́mánánɔ́, ɛ́ɛhɛ́ bé ŋe bú bíótókíne ná Sáaŋ.

³⁰Mbá na *Bafalisiɛ́ŋ ne *beékúnyi bikotí ŋe bú kíne bɛsana bɛ́ Bandɔ́mɛsɛ́ ; beébe te *obíótíne ná Sáaŋ.

³¹Yésus ŋá kɔɔ́na tɔ́na ɔsɛ : « Na aányɛ́ ya mɛ́ŋa wu oketi baacɔ bá hɛɛya eehi e ? Aányɛ́ bá ŋa bɔ́ hɔ́á e ?

³²Bá ŋa bɔ́ hɔ́á banásɛ́ a bɔ́mɔtɛ́ a bá bɔ́ŋa límekine a nɔháatɛ́, bá láakanana báyɛ : “Tu ŋa sɔ́ banɔ́ súbékíné bikembí, mbá banɔ́ te obíne ! Túɔ́ banɔ́ hákɛ́nɛ́na maŋana me buwé, mbá banɔ́ ta ɔlɛla.”

³³Yááŋa anyíaʼo, Sáaŋ Batis ŋaá fááya, u kineke na ɔnyíá na ɔmúána, nɔsɛ : “Wáŋa na *aabɛ́ yí elilé !”

³⁴Ɔɔ́nɔ́ u ɔɔcɔ ŋaá faáya ; u nyíáka, u múákɛ́na, nɔsɛ : “Huúúʼ ! Munyíá bɛnyɛ́ma eemu muáŋa, wuúci tɔ́na mumúána meluku ; wáŋa ekendinyi yí ne betúé etéési na bakɛla maabɛ́ bé etémbí !”

³⁵Mbá baacɔ a bá ŋa bɔ́ látɛ́na taaká cí ihényí cɛ́ Bandɔ́mɛsɛ́ ŋe bú tóŋínyi anyía cɛ́áŋa ɛtálɛ́mánánɔ́. »

³⁶Ɔɔcɔ u *Bafalisiɛ́ŋ ŋɔɔ́ lɔ́ŋɔ́kɔ́ Yésus ɔ ɔkɔɔ́nyíá nááyá. Yésus ŋá hatɔ́na, u ŋá cɔba, u ŋó oofíne e úúyé ooki, bé ŋe túmé onyíényi.

³⁷Mɔkɛla maabɛ́ e muénjú ŋaá bá hɔ́á a bunɔŋɔ eébú. Yɛ́ ŋaá lɔ́kɔ́má anyía Yésus áŋa ɔ ɔnyíá o ooki ú ɔɔcɔ u Bafalisiɛ́ŋ. Yɔ́ cɔ́bana hindeŋé ahɛ́ bá ŋaá tábɔ́náká na nyɛndányɛ́ nyɛ́ alabatɛ́l.[28] Hɛ́ ŋaá bá hinyíóyónú na ɔsɔŋɔ yí enumbé.

³⁸U ŋgá háma, u ŋé bíkósíti ná akɔlɔ́ cé Yésus.[29] U ŋé túme ɔlɛla, bɛlɛlá hámɔ́kɔ́na, bí yúbíki akɔlɔ́ cé Yésus. Mbá aabɛ́ yí oónjú eéyé biíbi hónóko na túáyɛ́ tuhúnyi, yí bobikinyi akɔlɔ́, yí ceéce feefiki ɔsɔŋɔ yí enumbé.

³⁹Ɛ́makɛ́la ɔɔcɔ u Bafalisiɛ́ŋ awɔ́ u ŋɔ lɔ́ŋɔ́kɔ́ Yésus á lɛ́cá aáná, u ŋé bíketi e uúye ɔtɛ́má ɔsɛ : « Hmm, mbɔ́kɔ ɔɔcɔ ooci á bá taaká *muhémúnyi bɛsana mɔ Bandɔ́mɛsɛ́, keyé ú me menyi aányɛ́ wáŋa nyɛnamá nyí oónjú e nyí me wuúci bítíse ; yó ményi anyía mɔkɛla maabɛ́ e muénjú muáŋa. »

⁴⁰Yésus ma kɛ́la waá lɛ́cá aáná, u ŋá laána ɔɔcɔ u Bafalisiɛ́ŋ ɔsɛ : « Isíʼo, Símon. » Símon ɔsɛ : « Oo. » « Ya mɛ́ŋa na asana yɛ́ ɔ́ kuɔŋɔ́ láana. » « Muékúnyi, ɔɔ́ mɛ laána aná. »

⁴¹Mbá Yésus ɔsɛ : « Yɛ́ ŋaá bá anyía ɔɔcɔ a wɔmɔtɛ́ ŋaá bá wáá bátaka baacɔ béfendí buhíné ; u bátaka ooci hɛɛcɔ ne etíne atáánɔ, ooci a wɔmɔtɛ́ etíne éfendí ne imbuke cíɔ́hátá.

⁴²Ta ɔmɔtɛ́ e bífendí eébí tɛ ɔ́mɔ bá ne ohónyí wú ɔtua búáyɛ́ buhíné. Nyíáyɛ́ nyi beébe nyɛanɛnɛna eényí beébe bekime ; a baacɔ eébé béfendí sɔ́ɔ́kɔ́ awɔ háányɛ́ u kéé wuúci lénéke buéŋí e ? »

⁴³Símon ɔsɛ : « I ŋeé mi bíkéti ɛsɛ́ sɔ́ɔ́kɔ́ ewú bé ŋeé wuúci nyɛanɛ́nɛ́na buhíné á buáŋá. » Yésus ɔsɛ : « Ɛ́ɛ, ɔ́ mɔɔ́ kɔɔna taaká. »

⁴⁴U ŋá bɛ́kɔ́ŋɔ́na né oónjú, u ŋá laana Símon ɔsɛ : « Ɔ ŋɔɔ́ lɛca oónjú ooci, Símon ! I ŋé mi oofíne oówo o ooki, kuɔŋɔ́ te o mi iínjíe menyífé ma ɔbɛ́suaka akɔlɔ́,[30] mbá wuúci ú maá mɛ suaka akɔlɔ́ na bíáyɛ́ bɛlɛlá, u ceéce hónóko na túáyɛ́ tuhúnyi.

⁴⁵O ti ómoó mi bíémbi ɔ ɔ mɛ káha oówo o ooki, mbá wuúci wáŋa hú oboobinyi cáámɛ akɔlɔ́ ɔ ɔtɔkɔ otúme ayɛ́ yémi oofine aáhá.

⁴⁶O ti ómoó mí feefi ɔsɔŋɔ a yáámɛ aatɔ́, mbá wuúci ú meé mi feefiki ɔsɔŋɔ yí enumbé a akɔlɔ́.

⁴⁷Ɛ́ɛhɛ́ ɛ́ ŋɔ mɛ́ ɔ laana anyía nyɛnamá nyí oléne enyí ú ŋeé mi léne ŋo tóŋínyi anyía Bandɔ́mɛsɛ́ meé wuúci nyɛanɛna mááyɛ́ maabɛ́ mekime meéŋí. Menyí asɛ́, ɔɔcɔ okime awɔ́ bá ŋa nyɛanɛnɛna butíkítíki ŋeé léne butíkítíki tɔ́na. »

⁴⁸Mbá Yésus ɔsɛ né oónjú : « Ɛ́ mɔ mɛ́ ɔ nyɛanɛnɛna mɔɔwɔ maabɛ́. »

⁴⁹Baacɔ a bá ŋa bɔ́ bá bébú nyiékínyi ŋe bú túme obílúmínyi báyɛ : « Háá ! Ɔɔcɔ u háányɛ́ ooci, u ŋa nyɛ́anɛnɛna baacɔ maabɛ́ e ? »

⁵⁰Aáná Yésus ŋaá láana oónjú ɔsɛ : « Bandɔ́mɛsɛ́ mo yóo nohi ananyía ó moó lúmitinine. Oóʼo, a cɔba bɔmbányɛʼo ! »