Read Nomaande Luk 8 Bible Online

Luk 8 - Nomaande bible

Luk 8

¹E elime eécí Yésus ŋa cɔ́ba, u húlé kándaka na a bálɛ́ka na ɔ mɔnɔŋɔ, u húlikinyi baacɔ Ambányɛ yɛ́ Ɛsɔ́ma anyía Bandɔ́mɛsɛ́ áŋa Otéŋí a Waáŋá ; u ŋaá bá ɔlɔŋɔ na bááyɛ́ *baákɔ́nɛ́na bɔ́ɔ́hátá ne béfendí.

²Beénjú a bɔ́mɔtɛ́ ŋaá bá ne wuúci tɔ́na, u ŋé hémúkúnyi *bɛɛbɛ́ bí bililé náábɔ́, u ŋeé beébe eéŋúnyísíkí ɛkɔnɔ a cɛ́mɔtɛ́ : Eé beénjú eébé Malíi, itónyi cɛ Makatala,[31] ŋaá bá hɔ́á, wuúci oócí Yésus ŋɔɔ sɔ́mɔ́kɔ bɛɛbɛ́ bí bililé bítíndétú nɔ́mɔ aáyá a cɛɛ́tɔ.

³Na Sáana na Susána na bɔ́mɔtɛ́ beénjú ŋa bɔ́ bá ɔ ɔlɔŋɔ. Sáana ŋaá bá oónyí u Kusa (Kusa ŋaá bá muafa bɔnɔ́mɛ o ooki ú Elóot). Beénjú eébé bekime ŋa bɔ́ bá bébú beébe ɔɔ́lɔ́kɔ na bíábɔ́ bɛnyɛ́ma.

⁴Nyɛkɔca nyɛ́ baacɔ ŋaá bɛ́bándákáná a maabána me Yésus, baacɔ eébé húlúkúne a bálɛ́ka ikime. U ŋé beébe túmíne ɛnjaba eeci ɔsɛ :

⁵« Ɔɔcɔ a wɔmɔtɛ́ ŋaá cɔ́bá o okomíene maayɛ́ moohó. Ahɛ́ u ŋaá bá weé meéme miekine, a mɔmɔtɛ́ ŋá kuákɔ́na o ohónyí ɔ ɔmuaná ; baacɔ ŋé meéme ééndéke, tunonyí tɔ́ ɔmuaná ŋé meéme cɔ́bɔ́kɛ́na.

⁶A mɔmɔtɛ́ tɔ́na ŋá kuakɔ́na a akɔnja ɔ ɔmuaná ; hí ahɛ́ mú ŋe túme ɔlɔa, mú ŋe yeembúnúéke anyía ɔmɛsɛ́ tɛ ɔ́mɔ bá ne mosioŋono.

⁷A mɔmɔtɛ́ tɔ́na ŋa kuákɔ́na aá haála ahá tɔlandɔna naŋa túá lɔ́áka. Ekúlú ayɛ́ ma ŋaá lɔ́áka ɔlɔŋɔ ne tuútu, tú ŋá bɛ́ɔ́tɔ́kɔ́kɛ́na bɛmbányɛ bɛ́ bɛnyɛ́ma a bɛ́ ŋaá lɔ́áka.

⁸Mbá a mɔmɔtɛ́ tɔ́na ŋa kuakɔ́na a ambányɛ yɛ́ ɔmɛsɛ́, ma ŋá lɔ́áka bɔmbányɛ, ma ŋá hááka bɛtámá : Indíné ɛ́mɔtɛ́ bɛtámá etíne atáánɔ. » Mbá Yésus ɔsɛ : « Ɔɔcɔ a wáŋa ne eetú cá ɔlɔ́kɔ́máka bɛsana, á lɔ́kɔ́máka ! »

⁹Baákɔ́nɛ́na ŋa bɔ́ bata Yésus anyía wé beébe hembúlékíne ɛnjaba eécí.

¹⁰Mbá ɔsɛ : « Bandɔ́mɛsɛ́ ŋaá banɔ́ íínjíé makɛ́nda me omenyukune bɛsana bɛ́ búáyɛ́ Butéŋí a bɛnambákánɔ́ ; mbá a baacɔ bé etémbí, bé ŋeé beébe túmíne ɛnjaba anyía bábɔ́ lɛ́cákána, mbá bá tɛ́ hɔ́la ɔlɛcana ; bábɔ́ lɔ́kɔ́ma mbá bá tɛ́ hɔ́la ɔlɔ́kɔ́ma.

¹¹Aana ɛnjaba eécí ŋé bíhémbúle : Moohó e memiekínénú áŋa háyɛ Bɛsana bɛ́ Bandɔ́mɛsɛ́ abɛ́ baacɔ ŋa bɔ́ lɔ́kɔ́ma.

¹²Eeme a má ŋa kuákɔ́na o ohónyí ɔ ɔmuaná áŋa háyɛ baacɔ eebe a bá ŋa bɔ́ lɔ́kɔ́máka Bɛsana bɛ́ Bandɔ́mɛsɛ́, mbá Musɔ́mɛ́na ŋá faáya, múó biíbi ááŋíáka e cííbú ɛtɛ́má anyía bé ti ébú lumitinine ɔbɔ́ŋɔ olíhe.

¹³Eeme a má ŋa kuákɔ́na a akɔnja ɔ ɔmuaná áŋa háyɛ baacɔ eebe a bá ŋa bɔ́ lɔ́kɔ́máká Bɛsana bɛ́ Bandɔ́mɛsɛ́, bó biíbi káha ne obíléne, mbá biíbi ta ɔwɔɔ́nɛ́na náábɔ́ anyía bɛkaŋá tɛ ɔ́mɔɔ́ bá. Bé ŋe bú lúmítíníne e ekéti yí ekúlú ; mbá ekúlú ayɛ́ mɔkɔkɔnana é beébe hámɛ́na, bɔ́ hálɔ́mɔ́kɔ́na né elime.

¹⁴Eeme a má ŋa kuákɔ́na aá haála ahá tɔlandɔna naŋa túá lɔaka áŋa háyɛ baacɔ eebe a bá ŋa bɔ́ lɔ́kɔ́máká Bɛsana bɛ́ Bandɔ́mɛsɛ́, ɔ ɔcɔba ne buúse, ibíkéti ciéŋí ŋeé nyíóyo a bíábɔ́ bɛɛtɔ́, bɔnɔ́mɛ bɔ́ ɔmɛsɛ́ ŋe beébe hatɛ́ákɛ́na, bɔmbányɛ bú olíhe ŋé beébe nɔnjɛ́na ; buátɛ́ bɔkɔ bé ti ómo bú héyísi bɛtámá a bíɔ́nɛ́nánɔ́.

¹⁵Eeme tɔ́na a má ŋa kuakɔ́na a ambányɛ yɛ́ ɔmɛsɛ́ áŋa háyɛ baacɔ a bá ŋa bɔ́ lɔ́kɔ́máka Bɛsana bɛ́ Bandɔ́mɛsɛ́ na atálɛ́mánánɔ́ yɛ́ ɔtɛ́má, bé biíbi tétényíki bɔmbányɛ e cííbú ɛtɛ́má, bé ti biíbi bɛ́hɔ́ya, bá hááka ne oweéhínyínyi bɛtámá háyɛ bɛnyɛ́ma a bɛ́ ŋaá háá. »

¹⁶« Ɔɔcɔ naŋa u tɛ á cíá *lámba anyía wé ciíci húé a alɔŋgá noómi, ta anyía wé ciíci háya e bukúndúlumú bú buaná, mbá ɔɔcɔ ŋaá cia lámba anyía wé ciíci tála a búáyɛ́ butálɛ́ná, anyía baacɔ e bé ŋé bú óófine eé ciíbe bá bɛ́lɛ́cákɛ́na.

¹⁷Yááŋa anyíaʼo, bɛsana bikime abɛ́ baacɔ tɛ ŋá bɔ lɛca aámbáya bé ké bú biíbi lɛcaka ; bɛsana bikime ebí bé ti ŋe bu ményi aámbáya bé ké bu ményukune ɛ́cɛ bé me bu biíbi lɔ́kɔ́máka.

¹⁸Énu bíkékényíki aná na nyɛnamá nyɛ́ nyɛlɔ́kɔ́ma anyɛ́ nú ŋa nɔ lɔ́kɔ́ma bɛsana ; yááŋa anyía, bé ké túné é yiínjie bɛnyɛ́ma ná ɔɔcɔ awɔ́ á yáaŋa ne biíbi. Mbá né oócí awɔ́ u tɛ á bá na bɔkɔ, bé kéé wuúci ááŋɛ́na ta hú bɔkɔ abɔ́ ú ŋá bɛ́táá anyía wáŋa ne buúbu. »

¹⁹Ne iinyí ne benyíinyí bé Yésus ŋá ka bɔ́ hámá, mbá bɔ́ tɛ ɔ́mɔ bɔ́ bá ne ohónyí ú o wuúci lɛca a asana na nyɛkɔca nyɛ́ baacɔ.

²⁰Bé ŋgée wuúci laána báyɛ : « Na ɔɔnyia na bɔnɔ́ɔnyia á bɔ́ŋa a nɔháatɛ́, bá ŋa bɔ́ aamba ɔ́ kuɔŋɔ́ lɛ́ca. »

²¹Mbá ɔsɛ : « Na ciamɛ iinyí na báámɛ benyíinyí á bɔ́ŋa eebe a bá ŋa bɔ́ lɔ́kɔ́ma Bɛsana bɛ́ Bandɔ́mɛsɛ́, bé biíbi látákɛ́na. »

²²Búmɔtɛ́ buɔ́sɛ́, ne Yésus na bááyɛ́ *baákɔ́nɛ́na ŋe bú oófíne ɔ ɔkɔkɔ́ a yɛ́mɔtɛ́, mbá Yésus ɔsɛ : « Túá láátɛ́na e eyinyíé asálá yɛ́ nuɔmɔ́. » Bá ŋá cɔba.

²³Bábɔ́ láátákɛ́na nuɔmɔ́ aáná, Yésus ŋá cɔbá e hiiné. Hikúlúkúlú yaandándá yí ehúne ŋeé túme ohúne aá nuɔmɔ́. Menyífé nyióyíki ɔ ɔkɔkɔ́ hoóhi anyía bébú nyíme e menyífé.

²⁴Bááyɛ́ baákɔ́nɛ́na ŋe bú bíkósíti nááyá, bé ŋé wuúci heényi báyɛ : « Taatá, Taatá, túɔ́ cɔba o onyíme ! » Yésus ŋá haanyúa, u ŋé siséke ne ehúne na bɛahɔ́ bí menyífé. Bí ŋé lésíkínyi, mbuumu nyɛfaaya eényí.

²⁵Mbá Yésus ná baákɔ́nɛ́na ɔsɛ : « Uúnú olumitinine weényí e ? » Aáná baákɔ́nɛ́na ŋa bɔ́ bá bébú líkíméke, bé ŋe bú kéké, bá kɔ́ɔnaka beébe ne beébe báyɛ : « Ɔɔcɔ u háányɛ́ ooci e ? Ú ŋe téŋínyi te ehúne te menyífé, bí wuúci lɔ́kɔ́mákɛ́na ! »

²⁶Ɛ́makɛ́la Yésus é siséke ehúne, bá ŋá láátɛ́na, bá ŋga háma i iisí cɛ Kalasa[32] e cí meé túméne meése na Kalilé, e eyinyíé asálá yɛ́ nuɔmɔ́.[33]

²⁷Ayɛ́ Yésus ŋaá hámá ɔ ɔkɔkɔ́, ebíényi yɛ́ bálɛ́ka ŋá faáya ɔ ɔfaaya nááyá, yɛ́ ŋaá bá na *bɛɛbɛ́ bí bililé. O otúme buáyá yɛ́ ŋaá bá onuti etémbí, yí tí limíne eé ciíbe, mbá e biinyie.

²⁸Ɛŋakɛlá ɔɔcɔ oócí áa lɛca Yésus, u ŋá aánjálɛ́ta, u ŋé wuúci túmíne eŋéndu, u ŋɔ́ bɔmɛ́ta ɔsɛ : « Yésus, Ɔɔ́nɔ́ u Bandɔ́mɛsɛ́ a wáŋa Waáŋá, asana ayɛ́ yaátɛ́ yááŋa na yaŋɔ́ na kuɔŋɔ́ e ? Cɔ́kɔ́lɛ, eti mi íínjíé muuyé. »

²⁹U ŋaá kɔɔ́na aáná, anyía Yésus ŋaá sɔ́mbɔ́tɔ́ná anyía *aabɛ́ yí elilé aá háma aá cɛɛ́tɔ cɛ waáta ɔɔcɔ. Bikúlú biéŋí aabɛ́ yí elilé ŋaá bá yé wuúci yébíki, yé wuúci tímbíé ; bó wuúci ɔɔ́tɔ́kɔ́kɔ aabá na macanja, bó wuúci háya a afɔkɔ o ooki anyía u ti súéte. Ta híáná, mbá ú kátáka macanja, mbá aabɛ́ yí elilé ŋá háná wuúci súéténe e eciké.

³⁰Mbá Yésus maá bata ɔɔcɔ oócí ɔsɛ : « Nyiɔ́wɔ nyiínyi ɛ́cɛ aányɛ́ e ? » Ɔsɛ : « Bɔnɔnja »[34], anyía bɔnɔnja bɔ́ bɛɛbɛ́ bí bililé ŋo yóófókíne aá ciayɛ́ cɛɛ́tɔ noómi.

³¹Eéyé ekúlú bililé eébí ŋaá bɛ́cɔ́kɔ́lɔ́kɛ́na Yésus buéŋí anyía u ti biíbi tɔ́ma a nɔɔfia nú tiímé.

³²Aáhá, yaandándá yí hikuté hɛ́ ɛŋɔnáfá ŋaá bá yɛ́á nyíákɛ́na a nɔkɔndɔ ɔ ɔmuaná. Aáná bililé eébí ŋaá bɛ́cɔ́kɔ́lɔ́kɛ́na Yésus bɛ́sɛ : « Cɔ́kɔ́lɛ, basɔ́ nyɛána túésú óófókíne ɛ ɛŋɔnáfá eécí. » Mbá ɔsɛ : « Oo, énu oófókíne. »

³³Bililé nyɛhámɔ́kɔ́na eényí aá cɛɛ́tɔ cɛ waáta ɔɔcɔ, bí ŋgo óófókíne ɛ ɛŋɔnáfá. Aáná hikuté hɛ́ ɛŋɔnáfá eéhí ŋa kaá bɛ́áhɛ́na ɔ ɔbɛ́áhɛ́na ɛ ɛmbana cɛ nɔkɔndɔ aá nuɔmɔ́. Hí ŋé nyíme e menyífé noómi.

³⁴Ɛ́makɛ́la betétényi ɛŋɔnáfá ábɔ́ lɛ́cá aáná, bá ŋá cábákɛ́na o okobíkétínyi na ná baacɔ e bé ŋe bú límine a bálɛ́ka ne né eebe e bé ŋe bú límine e bisíéné.

³⁵Baacɔ a bá ŋa bɔ́ bá hɔ́á ŋa bɔ́ cɔ́bá ɔ ɔkɔlɛ́ca asana a yɛ́ má bɛ́kɛ́láka. Ayɛ́ bá ŋga bɔ́ hámá a maabána me Yésus, bá ŋá kuána ɔɔcɔ awɔ́ bɛɛbɛ́ bí bililé ŋá hámɔ́kɔ́na oliménénú a maabána me Yésus, ú maá bɛ́háya bɛlaŋa, wuúci céŋícéŋi. Bulíkílíki ŋeé beébe tímbíéke.

³⁶Aáná baacɔ a bá ŋa bɔ́ lɛ́cáká bɛsana eébí á bɛ́kɛ́láka ŋé bú bíkétíkínyí bɔsɔ́ɔ́kɔ́ a bá ŋa bɔ́ fáakɔna anyána bɛɛbɛ́ bí bililé ŋa hámɔ́kɔ́na ná ɔɔcɔ.

³⁷Baacɔ bekime bí iisí cɛ Kalasa ŋa bɔ́ laána Yésus anyía wá hatɔ́na a ciabɔ́ iisí, wé súéte, anyía bulíkílíki ŋeé beébe tímbíéké. Yésus ŋó oofíne ɔ ɔkɔkɔ́ anyía wéé súéte.

³⁸Mbá ɔɔcɔ awɔ́ bɛɛbɛ́ bí bililé ŋa hámɔ́kɔ́ná ŋeé wuúci laána ɔsɛ : « Cɔ́kɔ́lɛ, ɛ ŋa mɛ́ áamba osúéte na kuɔŋɔ́. » Mbá Yésus ɔsɛ : « Buaka,

³⁹hálɔ́mɔ́na a ciɔwɔ ciíbe cɛ baacɔ, ké ké bíkétíkínyi baacɔ bá hɔ́á bɛsana bikime abɛ́ Bandɔ́mɛsɛ́ ɔ́ yɔ́ɔ kɛlaka. » Ɔɔcɔ ŋé súéte o o húle húlinyi baacɔ bekime bá bálɛ́ka bɛsana bikime ebí Yésus meé wuúci kɛ́laka.

⁴⁰Ɛ́makɛ́la Yésus áa hálɔ́mɔ́ná e eyinyíé asálá yɛ́ nuɔmɔ́, nyɛkɔca nyɛ́ baacɔ ŋé wuúci káha ne obíléne anyía baacɔ bekime ŋa bɔ́ bá bébú wuúci tátáka.

⁴¹Ɔɔcɔ a wɔmɔtɛ́ ŋá kaá háma, nyíáyɛ́ nyiínyi ŋaá bá anyía Salíyus. U ŋaá bá mutéŋínyi *andaŋía yɛ́ ɔbɛ́cɔ́kɔ́lɛ́na yí *Besuif. U ŋé túmíne Yésus eŋéndu, u ŋé wuúci bɛ́cɔ́kɔ́lɔ́kɛ́na ɔsɛ : « Faáya e úúmí ooki,

⁴²anyía híími hɛkɔŋɔ́ hɛ́ ɔɔ́nɔ́ e woónjú hɛ́ tuɔŋɔ túɔ́hátá ne túfendí áŋa hoóhi ne owé. » Ekúlú eyí Yésus ŋaá bá waá cɔ́cɔbaka, etúte yɛ́ baacɔ wuúci sékítíkínyi bɛháŋá bikime.

⁴³Oónjú a wɔmɔtɛ́ ŋaá bá aáhá, manɔ́ŋɔ́ ŋaá bá meé wuúci hámɔ́kɔ́ná tuɔŋɔ a yáaŋa túɔ́hátá ne túfendí. [U ŋa mána ɔbɛ́cáŋgɛna bɔnɔ́mɛ bukime ɔ ɔkɔtɛtɛna baándánána, mbá ta mumɔtɛ́ ti ómoó wuúci eéŋúnyísi.]

⁴⁴U ŋé tényí á cɔ́bá e elime ci Yésus, u ŋé bítíse hibéŋú hɛ́ búáyɛ́ bɔlaka. Hí a yaátɛ́ ekúlú manɔ́ŋɔ́ ŋá mána o wuúci háma.

⁴⁵Yésus ɔsɛ : « Aányɛ́ ú meé mi bítíse e ? » Hú náányɛ́ ɔsɛ : « Tɛ́ cáŋa yaŋɔ́ ! » Mbá Bíel ɔsɛ : « Taatá, baacɔ ŋó yóo sékítínyi, bá ɔnyɛkɛtakɛna ; beébe bé mé bú o bítíse. »

⁴⁶Mbá ɔsɛ : « Ɔɔcɔ a wɔmɔtɛ́ meé mi bítíse, anyía ɛ́ maá mɛ bɛ́lɔ́kɔ́ma makɛ́nda maá mɛ háma á cɛɛ́tɔ. »

⁴⁷Ɛ́makɛ́la oónjú áa lɛ́cá anyía bé meé wuúci menyi, u ŋé bíkósíti, u nakamaka, u ŋé túmíne Yésus eŋéndu. U ŋé wuúci bíkétíkínyi eé buúse bɔ́ baacɔ bekime na anyíatɛ́ weé wuúci bítíse na anyána weé tényí a yááŋɔ́nua.

⁴⁸Mbá Yésus ɔsɛ : « Meemé, uúwú olumitinine mó yóo nohi. Oóʼo, a cɔba bɔmbányɛʼo ! »

⁴⁹Yésus ŋaá bá wa yánaŋa ɔ ɔtáŋa aáná, ɔɔcɔ a wɔmɔtɛ́ ŋé húlé o ooki ú mutéŋínyi andaŋía na ɛsɔ́ma, mbá ɔsɛ né mutéŋínyi : « Atɛ háná yébíki Muékúnyi, ananyía uuwu ɔbɔ́la meé wé. »

⁵⁰Ɛ́makɛ́la Yésus áa lɔ́kɔ́má aáná, mbá ɔsɛ né mutéŋínyi : « Eti líkíméke ! Lumítíníne bu lumitinine, u ŋa yáaŋɔ́núáka. »

⁵¹Ekúlú ayɛ́ bá ŋga bɔ́ hámá o ooki, Yésus te olumitine anyía ɔɔcɔ u etémbí ó yóófine ne wuúci, ɛ tɛ ŋáa bá hú ne Bíel, na Sáaŋ, na Sáak, ne síkíne ne iinyí cɛ ɔbɔ́la.

⁵²Baacɔ bekime bé ciíbe noómi ŋa bɔ́ bá bábɔ́ lɛ́laka, bá bɛ́cɔ́bɔ́kɔ ɔbɔ́la oócí. Mbá Yésus ɔsɛ : « Nɔtɛ lɛláka, u tɛ á bá owéénú, wáŋa e hiiné. »

⁵³Baacɔ ŋé túmé o wuúci cɛ́ca, bébú ményukune anyía wáŋa owéénú.

⁵⁴Mbá Yésus meé wuúci tímbie ɔ ɔɔbɔ́, u ŋé wuúci lɔ́ŋɛ́ta ɔsɛ : « Meemé, háányúá ! »

⁵⁵Nyɛhaanyua eényí, u ŋá hatɔ́na ɔ ɔhatɔna. Mbá Yésus ɔsɛ : « Énu wuúci aafɛ́na. »

⁵⁶Aáná bibíényi bɛ́ ɔbɔ́la ŋe bú kéké, mbá Yésus meé beébe laana ɔsɛ bé ti bíkétínyi ɔɔcɔ asana ayɛ́ ɛ́ ma bɛ́kɛlaka.