Read Nomaande Saŋ 12 Bible Online

Saŋ 12 - Nomaande bible

Saŋ 12

¹Bɔŋanda bɔ́ *Basíka ŋaá bá bú á bɛ́ámbáka mɔɔ́sɛ́ metíndétú anyía bé buúbu nyíáka, Yésus ŋa kaáhámá a Bɛtani, haála ahá Lasáal ŋaá bá weé límekine. Lasáal áŋa ɔɔcɔ ewú Yésus ŋeé héényi e biwéewé.

²Bá ŋaá námbákɛ́ná Yésus bɛnyɛ́ma bɛ́ ɔnyíá hɔ́á. Mááta ŋé wuúci aáfɛ́na. Lasáal ŋaá bá ɔɔcɔ ɔmɔtɛ́ a baacɔ a bá ŋaá bá bébú nyíékínyi ne Yésus.

³E elime cɛ ɔnyíá, Malíi ŋe hiíte ekélékéti yɛ́ lɛ́ta yɛ́ taaká cɛ ɔsɔŋɔ yɛ́ náal yí enumbé ; yɛ́ ŋaá bá onduné ɔ ɔmuaná weéŋí. [43] Malíi ŋé yiíyi hiíte, wó ootokine a akɔlɔ́ cé Yésus, u ŋé ceéce hónóko na túáyɛ́ tuhúnyi. Ciíbe ŋó nyíóyo na ambányɛ yí enumbé.

⁴Muákɔ́nɛ́na mu Yésus a mumɔtɛ́, Yútas Iskaliót, mufiimbie Yésus, ŋá kɔɔna ɔsɛ :

⁵« Háá ! Anyána bá tɛ́ ɔ́mɔɔ́ bá bé otúé ɔsɔŋɔ yí enumbé eeye e ? Yɛ́ ŋaá bá yɔ́ tɔ́nɔ ɔ ɔhɔla mɔɔnyɛ́ hɔ́ndɛ́tɛ ɛ́tátɔ́ amá bááŋa bé owiínjíékíne basɔ́kásɔ́ka. » [44]

⁶U ŋaá bá u tɛ á kɔ́ɔ́na aáná anyía u ŋaá bá waá bɛ́ákákɛ́na a asana yɛ́ basɔ́kásɔ́ka, mbá anyía u ŋaá bá weébi. Háyɛ u ŋaá bá mutétényi hikóló, u ŋaá bá waá nyíáka nyɛnamá aá mɔɔnyɛ́ amá bá ŋaá bá bá hákɛ́na noómi.

⁷Mbá Yésus ɔsɛ : « Nyɛána oónjú ooci mbuumu ; ú ma kɛ́láka aáná a asana na muamɛ munyienene.

⁸Énu menyí anyíaʼo : Nua nɔ́ŋa na basɔ́kásɔ́ka aanɔ́ ɛ ɛkatɛ́katɛ́ bikúlú bikime ; mbá yaŋɔ́, ɛ tɛ ámɛ bá aanɔ́ ɛ ɛkatɛ́katɛ́ bikúlú bikime. »

⁹*Besuif beéŋí ŋa bɔ́ lɔ́kɔ́máka anyía Yésus áŋa a Bɛtani, aáná bé ŋeé súétéke hɔ́á, tɛ́ cáŋa hú a asana ne Yésus, mbá tɔ́na anyía bá ka bɔ́ lɛ́cáka Lasáal ewú Yésus ŋeé héényi e biwéewé.

¹⁰Bɔkɔ búmɔtɛ́ háyɛ asana ne Yésus, betéŋínyi *beluli nyiínjie ŋa bɔ́ lɔ́kɔ́máná ɔ ɔwɔɔ́nɔ tɔ́na Lasáal,

¹¹ananyía Besuif beéŋí ŋe bú beébe nyɛanáka, bó búle háya mɔŋɔlɛ́ né Yésus a asana yɛ́ Lasáal.

¹²Ɔ ɔyá ɔyá, baacɔ beéŋí a bá ŋa bɔ́ fáákɔ́na ɔ ɔkɔɔ́nyíá bɔŋanda bɔ́ *Basíka ŋa bɔ́ lɔ́kɔ́máká anyía Yésus ŋa fáakɔna eé Yelúsalɛm.

¹³Aáná bá ŋá bɔ́ sɔ́mbáka bɛcala, bé ŋé wuúci káha ne obíléne o ohónyí, bá kɔ́ɔnaka okelú ɔ ɔmuaná báyɛ : « *Hɔsáána ! [45] Bandɔ́mɛsɛ́ á sayábɛ́na ooci awɔ́ u ŋa fáaya eé nyiínyi nyí Otéŋí a Waáŋá, Otéŋí u Islayɛ́l ! »

¹⁴Yésus ŋaá kuána abaŋabɛbɛa a yɛ́mɔtɛ́, u ŋá bááta, u ŋé limíne, háyɛ Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ :

¹⁵« Banɔ́, baacɔ bé *Síon, nuti líkíméke ! Ánɔ lɛcá, uunú Otéŋí ooci wa yánáŋa. Wáŋa oliménénú ɔ ɔɔ́nɔ́ u abaŋabɛbɛa ɔ ɔmuaná. »

¹⁶A yaátɛ́ ekúlú, *baákɔ́nɛ́na bé Yésus ta ɔlɔ́kɔ́ma asana a yɛ́ ŋaa bɛ́kɛ́láka, ɔ ɔkɔɔ́háma ahɛ́ Bandɔ́mɛsɛ́ ŋeé béétísi Yésus e nuúmi a nuáŋá. E ekúlú eéyé, bé ŋe síké abɔ́ bɛ́tááka anyía Ciɔɔ́ŋɛ́ cɛ́ Bandɔ́mɛsɛ́ ŋa cáŋacáŋa ɔkɔɔna aáná a asana yí Yésus. Bá ŋa bɔ́ lɛ́ca anyía baacɔ ŋa bɔ́ bɛ́kɛ́lákɛ́na híáná aáyá a aháŋá.

¹⁷Ekúlú eyí Yésus ŋeé héényi Lasáal e biwéewé, yó wuúci lɔ́ŋɛ́ta anyía wá háma e eenyie, baacɔ beéŋí ŋa bɔ́ bá hɔ́á, bɔ́ lɛ́caka. Beébe, bá ŋa bɔ́ háyɛ́na Yésus ɛmbasɔ́ a asana eéyé.

¹⁸Baacɔ beéŋí ŋa bɔ́ lɔ́kɔ́máká anyía Yésus ŋaá kɛ́láka *ekéki yí hibílícínyínyí eéyé ; ɛ́ɛhɛ́ bá ŋa bɔ́ fáakɔna o okoó wuúci káha o ohónyí.

¹⁹Bɔ́mɔtɛ́ *Bafalisiɛ́ŋ laakɛna bɔsɔ́ɔ́kɔ́ báyɛ : « Tɛ́ka nu ŋa nɔ́ lɛ́ca anyía ohónyí tɛ a bá tɔ́na náásɔ́ e ? Baacɔ bekime me bú wuúci látáka ! »

²⁰Bɔ́mɔtɛ́ Bakɛlɛ́k[46] ŋaá bá ɔ ɔlɔŋɔ ú baacɔ a bá ŋa bɔ́ fáákɔ́na eé Yelúsalɛm o okonyémi Bandɔ́mɛsɛ́ e ekúlú yɛ́ bɔŋanda.

²¹Beébe, bá ŋga bɔ́ kuána Fílib, ebíényi yɛ́ Bɛtɛsɛ́ta i iisí cɛ *Kalilé, mbá báyɛ : « Taatá, tu ŋa sɔ́ áamba ɔlɛca Yésus. »

²²Fílib tɔ́na ŋá kaá laána *Andɛlɛ́ ; bá ŋá cɔba beébe bekime béfendí, bá ŋgaá laána Yésus.

²³Mbá ɔsɛ náábɔ́ : « Aámbáya, ekúlú ma nyɛ́mana ayɛ́ Bandɔ́mɛsɛ́ yɔ́ cɔ́ba o obééti Ɔɔ́nɔ́ u ɔɔcɔ e nuúmi a nuáŋá.

²⁴Ɛ ŋa mɛ́ banɔ́ láana aá taaká anyía buohó ŋɔɔ́ lɔ́bɔ hú buúbu búmɔtɛ́, mbɔ́kɔ bé ti ŋéé buúbu ɔ́ɔ́nɔ ɔ ɔmɛsɛ́. Mbɔ́kɔ bé ŋé buúbu ɔ́ɔ́nɔ, búɔ́ lɔa, bú ŋaá hááka moohó meéŋí.

²⁵Ɔɔcɔ ewú u ŋe léne úúyé olíhe kéé wuúci nyímísi. Mbá ɔɔcɔ awɔ́ u tɛ káá yáákákɛ́na úúyé olíhe ɔ ɔmɛsɛ́ ooci kéé wuúci tétényíki ɔ ɔkɔɔ́háma ɔ yɔɔ́sɔɔ́sɔ yí olíhe yí ekúlú ekime.

²⁶Mbɔ́kɔ ɔɔcɔ ŋaá yáamba ɔ mɛ nyiɔnɔ, wá mɛ látáka ; haála ahá ya mɛ́ŋa, hɔ́á tɔ́na muamɛ munyiɔnɔ káá bá. Mbɔ́kɔ ɔɔcɔ ŋaá mɛ́ nyiɔnɔ, ciamɛ Síkíne kéé wuúci lémbíki.

²⁷Aámbáya eeci úúmi ɔtɛ́má ŋaa bɛ́nyíá. Yámɛ kɔɔ́na anyána e ? Yámɛ kɔɔ́na ɛsɛ́ : “Síkíne, mɛ hɔkɔ́nɔ́nɔ a asana ayɛ́ yɔ́ cɔ́ba ɔ ɔbɛ́kɛ́láka aámbáya”, ayɛ́ʼ ? Eéʼeé ! Ɛ tɛ amɛ́ bá wu o wuúci laana aáná, anyía ɛ ŋa mɛ́ faáya ɔ ɔkɔlɔ́kɔ́ma muuyé o onjéŋí ooci.

²⁸Síkíne, tóŋínyi baacɔ búɔ́wɔ buáŋá. » Hú e ekúlú eyí Yésus ŋaá kɔɔ́na aáná, okelú ŋé húle ɔ Ɔmuaná, ú kɔɔnaka ɔ́sɛ : « I ŋe mí buúbu tóŋínyi feeké ; ɛ ŋa mɛ́ cɔbaka ne buúse o o buúbu tóŋínyi. »

²⁹Nyɛkɔca nyɛ́ baacɔ a nyɛ́ ŋaá bá hɔ́á ŋaá lɔ́kɔ́má okelú ooci, baacɔ a bɔ́mɔtɛ́ báyɛ : « Ɛŋɔ́lɔ́muaná má bá ci é lúmeke. » Bɔ́mɔtɛ́ báyɛ : « Elilé yɛ́ bɔsɔ́ma yɛ́ Bandɔ́mɛsɛ́ a yɛ́mɔtɛ́ ma táŋáka ne wuúci. »

³⁰Mbá Yésus ɔsɛ : « Okelú ooci ewú u mé húle ɔ Ɔmuaná tɛ ŋá mɛ lɛca ; wáánɔ́ ú ŋá lɛ́ca.

³¹Aámbáya, Bandɔ́mɛsɛ́ yɔ́ cɔ́ba o okélísíki baacɔ bá ɔmɛsɛ́ ooci ; aámbáya Bandɔ́mɛsɛ́ yɔ́ cɔ́ba, wɔ́ yɔ́ɔ́ŋɔ́kɛ́na otéŋí u baacɔ bá ɔmɛsɛ́ ooci.

³²Mbá yaŋɔ́, ahɛ́ bé kéé mi bééti ɔ ɔmuaná, ɛ ká mɛ́ bɛ́kɔ́kɛ́tɛ́na baacɔ bekime. »

³³E úúyé ɔtáŋa oócí, u ŋaá bá waá láakɛna baacɔ nyɛnamá nyí owé enyí ú kéé wé.

³⁴Baacɔ ŋe bú wuúci bɛ́kámá báyɛ : « E nufule nú *bikotí bɔ́ ŋɔ yɔ́ɔ́ŋɔ́kɔ́ anyía *Mesíi kéé líhéke tɛ́ka ne nyióndi. Kuɔŋɔ́, ɔ ŋɔɔ́ kɔɔna náányia, asɛ : “Bé kéé bééti Ɔɔ́nɔ́ u ɔɔcɔ”. Ɔɔ́nɔ́ u ɔɔcɔ waátákána ɛ́cɛ aányɛ́ e ? »

³⁵Yésus ɔsɛ : « Eese á yánáŋa aanɔ́ ɛ ɛkatɛ́katɛ́, mbá hú hikúlúkúlú. Ánɔ kandáka háyɛ eese á yánáŋa náánɔ́ anyía ibíne tɛ banɔ́ cúá o ohónyí.

³⁶Ekúlú ekime eyí eese á yánáŋa ɔ ɔnɔma náánɔ́, ánɔ hákɛ́na mɔŋɔlɛ́ eé yiíyi, mbá nɔ́ ká nɔ́ bá baáná bé eese. » Ɛŋakɛlá Yésus ma táŋáka aáná, u ŋé súéte haaca, u ŋgé beébe bɛ́námbɛ́na.

³⁷Yésus ŋa kɛ́láka bikéki bí tubílícínyínyí biéŋí e eése cé *Besuif ; mbá ta híáná, bé ŋe bú kíné ɔháya mɔŋɔlɛ́ nááyá.

³⁸Aáná bɛsana ebí *muhémúnyi bɛsana mɔ Bandɔ́mɛsɛ́, Ɛsayí,[47] ŋaá táŋáka buáyá ŋeé bínyíóyísínyi ; u ŋaá kɔ́ɔ́náka ɔsɛ : « Otéŋí a Waáŋá, aányɛ́ ú ŋeé lúmitinine úúsú ɔtáŋa e ? Ná aányɛ́ Bandɔ́mɛsɛ́ ŋoó tóŋínyi maayɛ́ makɛ́nda e ? »

³⁹Bɔ́ tɛ ɔ́mɔ́ bɔ́ bá ne ohónyí wú ɔhákɛ́na mɔŋɔlɛ́ né Yésus, háyɛ *Ɛsayí ŋe túné á kɔ́ɔna ɔsɛ :

⁴⁰« Bandɔ́mɛsɛ́ ŋeé beébe ceŋísíki bendíméndíme, yɔ́ kɔ́ŋɔ́náka maabɔ́ mɔsɔŋɛ́ anyía mbá cáábɔ́ eése tɛ lɛcána, maabɔ́ mɔsɔŋɛ́ tɛ́ kanda bɔmbányɛ, aáná bá tɛ ká bɔ́ bɛ́kákálákɛ́na maabɔ́ maabɛ́ anyía wé beébe eéŋúnyísíki. »

⁴¹Ɛsayí ŋaá kɔ́ɔ́náka aáná anyía u ŋaá lɛ́cá buáŋá bú Yésus, yɔ́ táŋáka yááyɛ́ asana.

⁴²Ta háyɛ Ɛsayí ŋaá táŋáká aáná, ɛ ɛkatɛ́katɛ́ ci betéŋínyi Besuif bɛ́muátá, beéŋí ŋa bɔ́ hákɛ́ná mɔŋɔlɛ́ né Yésus, mbá a nyɛnamba noómi. Bá ŋa bɔ́ bá bébú líkíméke anyía *Bafalisiɛ́ŋ é beébe ɔ́ɔ́ŋɔ́kɛ́na a yáábɔ́ *andaŋía yɛ́ ɔbɛ́cɔ́kɔ́lɛ́na.

⁴³Bá ŋa bɔ́ táfa ohiite nuúmi ná baacɔ na anyía bébú nuúnu hííte ná Bandɔ́mɛsɛ́.

⁴⁴Yésus ŋaá táŋáka okelú ɔ ɔmuaná ɔsɛ : « Ɔɔcɔ awɔ́ u ŋaá háya mɔŋɔlɛ́ náámɛ, tɛ ŋá háya mɔŋɔlɛ́ hú náámɛ, mbá u ŋeé meéme háya tɔ́na ná Mu-mɛ-tɔ́ma.

⁴⁵Ɔɔcɔ awɔ́ u ŋa mɛ́ lɛca ŋa lɛ́ca tɔ́na Mu-mɛ-tɔ́ma.

⁴⁶Ɛ ŋa mɛ́ faáya ɔ ɔmɛsɛ́ ooci i iŋetí ci eese a yɛ́ ŋa nɔ́ma ɔ ɔkɛla anyía ɔɔcɔ awɔ́ u káá háya mɔŋɔlɛ́ náámɛ ti limékíne i ibíne noómi.

⁴⁷Mbɔ́kɔ ɔɔcɔ ŋaá lɔ́kɔ́ma úúmi ɔtáŋa, yó kíne o wuúci lɔ́kɔ́mɛ́na, tɛ́ cáŋa yaŋɔ́ i ké mí wuúci kélísíki. Yaŋɔ́, ɛ ŋa mɛ́ faáya tɛ́ cáŋa o okokélísíki baacɔ, mbá hú o okoó beébe nohíki.

⁴⁸Mbɔ́kɔ ɔɔcɔ ŋeé mi bínéŋítínyi, yó kíne ɔlɔ́kɔ́mɛ́na úúmi ɔtáŋa, bɔkɔ áŋa hɔ́á e bú kéé wuúci kuusi a nyɛkála a buɔ́sɛ́ bɔ́ nyɛmana. Buátɛ́ bɔkɔ áŋa ɔtáŋa awɔ́ ɛ ŋaá mɛ táŋáká náánɔ́.

⁴⁹Bɛsana abɛ́ ɛ ŋaá mɛ táŋa, i ti ŋé mí biíbi táŋa a ciamɛciamɛ. Ciamɛ Síkíne, Mu-mɛ-tɔ́ma, ú ŋeé mi télímíkínyínyi wuúci bɛ́muátá na bɛsana ne mehúnyi abɛ́ yámɛ nyɛmana wu ɔkɔɔnaka.

⁵⁰I ŋe mí menyi anyía úúyé ɔtáŋa ŋe yiínjíéne yɔɔ́sɔɔ́sɔ yí olíhe yí ekúlú ekime. Ɛ́ɛhɛ́ bɛsana abɛ́ ɛ ŋa mɛ́ kɔɔna, i ŋe mí biíbi kɔɔna bɔkɔ búmɔtɛ́ háyɛ ciamɛ Síkíne ŋa mɛ́ laakɛ́na. »