Read Nomaande Saŋ 13 Bible Online

Saŋ 13 - Nomaande bible

Saŋ 13

¹E nyifienyinyi nyɛ́ bɔŋanda bɔ́ *Basíka, Yésus ŋaá bá weé ményukune anyía yááyɛ́ ekúlú yí osíke ɔmɛsɛ́ ooci ɔ ɔhálɔ́mɔ́na a maabána ma ciayɛ́ Síkíne. U ŋaá bá weé lénéke bááyɛ́ baacɔ bá ɔmɛsɛ́. Aáná u ŋaá cɔ́ba ne buúse o o beébe léne ɔ ɔkɔɔ́háma eé nyióndi.

²Yésus ŋaá bá ɔ ɔnyíá ú nanyiɔ́fɔ́ na bááyɛ́ *baákɔ́nɛ́na, ɛ́cɛ Musɔ́mɛ́na ne meé yoósíkínyi Yútas Iskaliót, ɔɔ́nɔ́ u Símon, o ofiimbie Yésus.

³Yésus ŋaá bá we menyukune anyía Bandɔ́mɛsɛ́ ŋeé wuúci cuméke bɛsana bikime ; u menyukune tɔ́na anyía u ŋeé húle ná Bandɔ́mɛsɛ́, ɛ́ɛhɛ́ yɔ́ hálɔ́mɔ́na nááyá.

⁴U ŋa hátɔ́na ɔ ɔnyíá, yɔ́ bɛ́áŋia bɔlaka bɔ́ ɔmuaná, u ŋé hiite ekélékéti yɛ́ nyɛbata, u ŋé yiíyi bísúŋe a nɔsɛ́ŋá.

⁵E elime eécí, u ŋé hiíte menyífé, yó meéme súkune a atáásɛ, u ŋé túme o húle sua bááyɛ́ baákɔ́nɛ́na akɔlɔ́, u ceéce hónóko na nyɛbata a nyɛ́ ŋaá bá aáyá a nɔsɛ́ŋá.

⁶Ahɛ́ u ŋgaá hámá né Símon Bíel, Símon Bíel ɔsɛ : « Aá taaká anyía kuɔŋɔ́ wɔ́ɔ cɔba ɔ ɔ mɛ suaka akɔlɔ́ e ? »

⁷Mbá Yésus ɔsɛ : « O ti ŋó menyi asana ayɛ́ ɛ ŋa mɛ́ kɛla aámbáya, mbá o kóó síke o yiíyi lɔ́kɔ́ma bɔmbányɛ e elime. »

⁸Bíel ɔsɛ : « Eéʼeé ! Ɔ tɛ kɔ́ɔ́ mɛ sua akɔlɔ́ ta buɔ́sɛ́ ! » Yésus ɔsɛ : « Mbɔ́kɔ ɛ tɛ ŋɔ́ mɛ́ ɔ suá akɔlɔ́, o ti kó túné ɔ bá na nuafa e nú ŋé húle náámɛ. »

⁹Mbá Símon Bíel ɔsɛ : « Mbɔ́kɔ aáná yááŋa, Otéŋí a Waáŋá, atɛ mɛ suáka hú akɔlɔ́ ceéce ne ceéce, mbá mɛ súáka tɔ́na na aabá na aatɔ́ áyá. »

¹⁰Mbá Yésus ɔsɛ nááyá : « Ɔɔcɔ awɔ́ á bɛ́ákábáka ti ŋe túné á yáamba ɔbɛ́ákába anyía wáŋa ofúúménénú wuúci okimekime, [ɛ tɛ ŋáa bá hú akɔlɔ́]. Nua nɔ́ŋa befúúménénú, mbá tɛ́ cáŋa banɔ́ bekime. »

¹¹Yésus ŋaá bá waá kɔ́ɔnaka aáná anyía u ŋaá bá weé menyukune ɔɔcɔ ewú ú kéé wuúci fiimbie. Ɛ́ɛhɛ́ u ŋaá kɔ́ɔna ɔsɛ : « Nua nɔ́ŋa befúúménénú, mbá tɛ́ cáŋa banɔ́ bekime. »

¹²Ɛŋakɛlá Yésus á mána ɔsua bááyɛ́ baákɔ́nɛ́na akɔlɔ́, u ŋá háná bɛ́láŋa búáyɛ́ bɔlaka, u ŋá háná límine ɔ ɔnyíá, mbá ɔsɛ náábɔ́ : « Nu ŋe nú ményi asana ayɛ́ ɛ ma mɛ́ banɔ́ kɛ́laka e ?

¹³Nu ŋa nɔ́ mɛ lɔŋɔ nɔsɛ : “Muékúnyi”, nu mɛ lɔ́ŋɔ́kɔ tɔ́na nɔsɛ : “Otéŋí a Waáŋá”. Ɛ́ɛ, nu ŋa nɔ́ kɔ́ɔna bɔmbányɛ, anyía ya mɛ́ŋa híáná.

¹⁴Ɛ́ ma mɛ́ banɔ́ súáka akɔlɔ́, yaŋɔ́ awɔ́ nu ŋa nɔ́ mɛ lɔ́ŋɔ anyía uunú Otéŋí, muanɔ́ Muékúnyi. Énu búle súánana akɔlɔ́.

¹⁵Ɛ́ ma mɛ́ banɔ́ tóŋínyi hibílícínyínyí anyía núé búle bɛ́kɛ́lɛ́na háyɛ ɛ́ maá mɛ́ bɛ́kɛ́lákɛ́na náánɔ́.

¹⁶Ɛ ŋa mɛ́ banɔ́ láana aá taaká : Munyiɔnɔ ta mumɔtɛ́ tɛ ŋáá hɔ́la ciayɛ́ síkíne ci buólí, ta anyía *ɔɔcɔ u ɛndɔ́ma tɛ ŋáá hɔ́la mu-wuúci-tɔ́ma.

¹⁷Nú me nú ményi aáná aámbáya ; nua nɔ́ŋa bambányɛ mbɔ́kɔ nu ŋá nɔ́ bɛ́kɛ́lákɛ́na híáná.

¹⁸Tɛ́ cáŋa asana yɛ́ banɔ́ bekime ɛ ŋaá mɛ táŋa. I ŋe mí menyi baacɔ abá ɛ ŋaá mɛ táfáká. Mbá yɛ́ ŋá nyɛ́mána anyía ɔtáŋa ooci ú Ciɔɔ́ŋɛ́ cɛ́ Bandɔ́mɛsɛ́ é bínyióyísínyi : “Ɔɔcɔ awɔ́ tu ŋa sɔ́ bá tuesú nyiékínyi ŋa mɛ nyíá elime cɛ akɔlɔ́.”

¹⁹Ɛ́ ma mɛ́ caŋacaŋa ɔ banɔ́ láana anyía ahɛ́ bɛsana eebi ké síké á bɛ́kɛlaka, núó lumitinine anyía “Ya mɛ́ŋa Ooci awɔ́ ya mɛ́ŋa.”[48]

²⁰Ɛ ŋa mɛ́ banɔ́ láana aá taaká : Ekúlú ekime ayɛ́ yámɛ tɔ́ma ɔɔcɔ, okime ewú é wuúci káha bɔmbányɛ ŋaá mɛ káha bɔmbányɛ tɔ́na ; okime awɔ́ á mɛ káha bɔmbányɛ ŋaá káha bɔmbányɛ Mu-mɛ-tɔ́ma. »

²¹Ɛ́makɛ́la Yésus á táŋáka ɔtáŋa oócí, u ŋá lɔ́kɔ́ma ɔtɛ́má ɔnua, mbá ɔsɛ : « Aá taaká ɛ ŋa mɛ́ banɔ́ láana isíʼo : Ɔɔcɔ ɔmɔtɛ́ aá banɔ́ eebe ŋa cɔ́ba o o mi fiimbie. »

²²Baákɔ́nɛ́na ŋe bú túme ɔlɛcana beébe ne beébe, ta ɔɔcɔ ti menyi asana yɛ́ aányɛ́ u ŋaá táŋá.

²³Muákɔ́nɛ́na a mumɔtɛ́, eemu emú Yésus ŋaá bá wé lénéke buéŋí, ŋaá bá limine aáyá a maabána.

²⁴Símon Bíel ŋe muúmu késítínyi anyía mu á batá Yésus, asana yɛ́ aányɛ́ u ŋá táŋa e ?

²⁵Muákɔ́nɛ́na ŋá bɛ́kɔ́ŋɔ́na né Yésus, mu ŋé wuúci batá ɛmbásɛmbásɛ, mɔsɛ : « Otéŋí a Waáŋá, ɔ ŋɔɔ́ táŋa asana yɛ́ aányɛ́ e ? »

²⁶Mbá ɔsɛ : « Míɔ cɔba o oyubé abákɛ yí eléti a masɔla, mbá yémi cókítínyi muútíkínyi. » Ahɛ́ Yésus ŋaá táŋáká aáná, u ŋá báka eléti, u ŋé yube a masɔla, u ŋé iínjíé né Yútas, ɔɔ́nɔ́ u Símon Iskaliót.

²⁷Hú e nyihiite enyí Yútas ŋeé hiíte abákɛ yí eléti eéyé, *Sátan nyiofine o owoofine eényí e úúyé ɔtɛ́má. Mbá Yésus ɔsɛ nááyá : « Bɔsɔ́ma abɔ́ ɔ nyɛmana wu ɔkɛlaka, buúbu kɛláka fiaŋɔ ! »

²⁸A baacɔ a bá ŋa bɔ́ bá o onyíényi, ta ɔɔcɔ ti ómó ményi hɛkɔma ehí Yésus ŋa láánɛ́na Yútas aáná.

²⁹Yútas ŋaá bá muabɔ́ mutétényi hikóló hɛ́ mɔɔnyɛ́. A asana eéyé, baacɔ a bɔ́mɔtɛ́ ŋe bú kéti anyía Yésus ŋaá bá wa yáámbaka ɔlaana Yútas anyía wɔ́ kɔ ɔɔ́ndɔ́kɔ bɛnyɛ́ma bɛ́ ɔnyíá a bɔŋanda, ta anyía wé iínjíe basɔ́kásɔ́ka bɔkɔ.

³⁰Ahɛ́ Yútas ŋeé hííte abákɛ yí eléti, nyɛháma ɔ ɔháma eényí. Ibíne ŋaá bá cɛ́ maá kua.

³¹Ɛŋakɛlá Yútas á háma, mbá Yésus ɔsɛ : « Aámbáya búámɛ buáŋá, yaŋɔ́ Ɔɔ́nɔ́ u ɔɔcɔ, á yáaŋa bú bítóŋínyínyi a miányɛ́. Híáná ya mɛ́áŋa o otóŋínyínyi baacɔ buáŋá bɔ́ Bandɔ́mɛsɛ́.

³²[Ahɛ́ ya mɛ́áŋa o otóŋínyi buáŋá bɔ́ Bandɔ́mɛsɛ́,] Bandɔ́mɛsɛ́ tɔ́na ŋa cɔ́ba o otóŋínyi náámɛ bɛ́muátá búámɛ buáŋá, yaŋɔ́ Ɔɔ́nɔ́ u ɔɔcɔ. Hí aámbáya yɔ́ cɔba wé buúbu tóŋínyi.

³³Banɔ́ báámɛ baáná, ɛ tɛ ámɛ bá tɔ́na ekúlú acaha na banɔ́. Nu ká nɔ́ mɛ aambaka mbá, bɔkɔ búmɔtɛ́ háyɛ ɛ ŋa mɛ́ laákɛ́na *Besuif bé etémbí, ɛ ŋa mɛ́ banɔ́ láana tɔ́na aámbáya ɛsɛ́ : Nu tɛ anɔ́ bá nú ɔfaaya haála ahá míɔ cɔba.

³⁴Yɔɔ́sɔɔ́sɔ yí okotí eeye míɔ cɔba ɔ ɔ banɔ́ íínjíe : Énu lénékéne banɔ́ na banɔ́. Nu ŋá nɔ́ nyɛmána nú olénékéne banɔ́ na banɔ́ háyɛ ɛ ŋa mɛ́ banɔ́ lénéké.

³⁵Mbɔ́kɔ nu ŋe nú lénéne banɔ́ na banɔ́, e nulénéne eénú baacɔ bekime ké bú ményi anyía nua nɔ́ŋa báámɛ *baákɔ́nɛ́na. »

³⁶Símon Bíel ŋaá batá Yésus ɔsɛ : « Otéŋí a Waáŋá, háányɛ́ wɔ́ɔ cɔba e ? » Yésus ɔsɛ : « Haála ahá míɔ cɔba, ɔ tɛ ɔ́ bá wu ɔ mɛ láta hɔ́á aámbáya, mbá o kó síke ɔ mɛ láta e elime. »

³⁷Bíel ɔsɛ nááyá : « Otéŋí a Waáŋá, anyíatɛ́ ɛ tɛ ámɛ bá wu ɔ kuɔŋɔ́ láta aámbáya e ? I ŋe mí lumítíne owé ɔ yɔ́ɔ́wɔ asana ! »

³⁸Mbá Yésus ɔsɛ : « Yááŋa taaká anyía o ŋóo lumítíne owé a yáámɛ́ asana e ? Aá taaká taaká, ɛ ŋa mɛ́ ɔ laana isíʼo : Yaaka yɛ́ ɛkɔkɛ́ ŋe síké á bɛ́lɛ́ta nyí buúse, ɛ́cɛ o no moó mi bínéŋítíkínyi bikúlú bɛ́tátɔ́. »