Read Nomaande Saŋ 15 Bible Online

Saŋ 15 - Nomaande bible

Saŋ 15

¹Yésus ŋaá laána bááyɛ́ *baákɔ́nɛ́na ɔsɛ : « Ya mɛ́ŋa taaká cɛ atɔ́kɔ́ ; ciamɛ Síkíne áŋa háyɛ munyiɔ bɛtɔ́kɔ́.

²U ŋaá sɔ́mba ɔndáfɛ okime a wáŋa náámɛ ú tɛ́ háá bɛtámá, yɔ́ sáŋɔnaka,[54] yɔ́ waándákɛ́na ɛndáfɛ a cɛ́áŋa na bɛtámá anyía cié túné hááka ɔ ɔhɔla.

³Ɔtáŋa awɔ́ ɛ ŋa mɛ́ banɔ́ láákɛ́na maá banɔ́ fúúmínyi.

⁴Ánɔ latána e nyimónjóló na yaŋɔ́ háyɛ ya mɛ́ŋa e nyimónjóló na banɔ́. Ɔndáfɛ ú bɔɔtɛ́ tɛ á bá wú ɔhááka bɛtámá aá ciayɛ́ciayɛ́, mbɔ́kɔ u tɛ ŋáa látána e nyimónjóló ne indíné. Híáná banɔ́ tɔ́na nu tɛ anɔ́ bá nú ɔhááka mbɔ́kɔ nu tɛ ŋá nɔ́ látána e nyimónjóló na yaŋɔ́.

⁵Ya mɛ́ŋa taaká cɛ atɔ́kɔ́ ayɛ́ bá ŋa bɛ́kɛ́lɛ́na bɛtámá, nua nɔ́ŋa ɛndáfɛ. Ɔɔcɔ awɔ́ u káá látana e nyimónjóló na yaŋɔ́, yaŋɔ́ tɔ́na e nyimónjóló ne wuúci, káá hááka bɛtámá biéŋí, anyía hú na yaŋɔ́ nua nɔ́ŋa na makɛ́nda ma ɔkɛla bɔkɔ.

⁶Ɔɔcɔ awɔ́ u tɛ káá látana e nyimónjóló na yaŋɔ́, bé kéé wuúci oomboko háyɛ ɔndáfɛ, yɔ́ kɔ́tákɛ́na. Bá náŋa bá bándáka ɛndáfɛ a cɛkɔ́tákɛ́nánɔ́, bó ciíci luliki.

⁷Mbɔ́kɔ nu ŋa nɔ́ látána e nyimónjóló na yaŋɔ́, úúmi ɔtáŋa wó limine e cíínú ɛtɛ́má, bɔkɔ bukime abɔ́ nu ká nɔ́ báta, nu ké nú buúbu bɔ́ŋɔ.

⁸Ánɔ lɛca, ciamɛ Síkíne ŋo yoómo a nyíánɔ́ nyɛháá nyɛ́ bɛtámá, nu tóŋgínyi baacɔ anyía nua nɔ́ŋa báámɛ baákɔ́nɛ́na.

⁹Ɛ ŋa mɛ́ banɔ́ léne bɔkɔ búmɔtɛ́ háyɛ Síkíne ŋeé mi léne. Énu limíne hú a núámɛ nulénéne noómi.

¹⁰Mbɔ́kɔ nu ŋá nɔ́ látákɛ́na úúmi ɔtáŋa, nu ké nú límine a núámɛ nulénéne noómi, háyɛ yaŋɔ́ tɔ́na ɛ́ ŋaá mɛ látákɛ́na ɔtáŋa ú ciamɛ Síkíne, mío limekine eeyé e nulénéne noómi.

¹¹Ɛ́ ma mɛ́ banɔ́ láakɛna bɛsana eebi anyía mbá úúmi obíléne á bá e cíínú ɛtɛ́má háyɛ wáŋa e úúmi ɔtɛ́má, úúnú obíléne ááŋánáka ɔ ɔhɔla.

¹²Ɛ ŋa mɛ́ banɔ́ láana ɛsɛ́ : Énu lénékéne banɔ́ na banɔ́ háyɛ ɛ ŋa mɛ́ banɔ́ léne.

¹³Nyɛnamá nyí etémbí nyí olénéke bɔsɔ́ɔ́kɔ́ tɛ á bá a nyɛ́ á hɔ́la nyí owééne a asana yɛ́ bíɔ́wɔ bikendinyi.

¹⁴Nua nɔ́ŋa bíámɛ bikendinyi mbɔ́kɔ nu ŋa nɔ́ kɛ́la háyɛ ɛ ŋa mɛ́ banɔ́ láana.

¹⁵I ti ŋé túné ámɛ banɔ́ lɔ́ŋɔ anyía bɔnyiɔnɔ, anyía munyiɔnɔ ti ŋé ményi bɔkɔ ebú síkíne ci buólí ŋa kɛ́la. Ɛ ŋa mɛ́ banɔ́ lɔ́ŋɔ anyía bíámɛ bikendinyi, anyía ɛ́ ma mɛ́ banɔ́ láakɛna bɛsana bikime abɛ́ ɛ ŋaá mɛ áákɔ́nákɛ́ná ná ciamɛ Síkíne anyía nuénú biíbi menyi.

¹⁶Tɛ́ cáŋa banɔ́ nú ŋa nɔ́ mɛ táfá ; mbá yaŋɔ́ ɛ ŋaá mɛ banɔ́ táfáká, míɔ banɔ́ tɔ́mɔ́kɔ́na a masɔ́ma, anyía núá cɔbáka, úúnú olíhe á hááka bɛtámá e bí kéé líhéke. Aáná Síkíne káá banɔ́ íínjie bɔkɔ bukime abɔ́ nu ká nɔ́ kándɛna náámɛ o o wuúci bata.

¹⁷Ɛ ŋa mɛ́ banɔ́ láana ɛsɛ́ : Énu lénékéne banɔ́ na banɔ́. »

¹⁸Yésus ɔsɛ : « Ta baacɔ bá ɔmɛsɛ́ ooci síké ábɔ́ banɔ́ líŋekine, énu menyí anyía wáámɛ bá ŋa bɔ́ cáŋacáŋa otúme oliŋine.

¹⁹Mbɔ́kɔ nu ŋa nɔ́ bɛ́lɔ́kɔ́mɛ́na ɔmɛsɛ́ ooci, keyé baacɔ bá ɔmɛsɛ́ ooci ŋa bɔ́ banɔ́ léne anyía nua nɔ́ŋa baacɔ bé úúbú ɔlɔŋɔ. Mbá ɛ ŋaá mɛ banɔ́ táfáká, míɔ banɔ́ sɔ́mɔkɔ aabɔ́ ɛ ɛkatɛ́katɛ́ ; aámbáya nu tɛ anɔ́ bá tɔ́na báábɔ́. A asana eéyé baacɔ bá ɔmɛsɛ́ ooci ŋa bɔ́ banɔ́ líŋine.

²⁰Ánɔ bɛ́tááka, ɛ́ ŋaá mɛ banɔ́ láana ɛsɛ́ : Munyiɔnɔ ta mumɔtɛ́ tɛ ŋáa hɔ́la ciayɛ́ síkíne ci buólí. Hú yaŋɔ́ bébú mi tekeseke, mbá anyána aná na banɔ́ e ? Mbɔ́kɔ bá ŋá bɔ́ látákɛ́na úúmi ɔtáŋa, bá ká bɔ́ látákɛ́na tɔ́na úúnú.

²¹Bɛsana eebi bikime, bá ká bɔ́ banɔ́ kɛ́laka a yáámɛ asana anyía bé ti ŋé bú ményi Mu-mɛ-tɔ́ma.

²²Mbɔ́kɔ yaŋɔ́ tɛ́ka ɔ ɔfaaya, ta anyía yaŋɔ́ tɛ́ka ɔ ɔtáŋáka ne beébe, keyé tɔkɔma tɛ a bá tú o beébe túméke a asana na búábɔ́ bɔɔbɛ́. Mbá íyéeyé, bá tɛ abɔ́ bá na nyɛtáŋɛ́tɛ́na.

²³Mu-mi-liŋine ŋe líŋine tɔ́na ciamɛ Síkíne.

²⁴Mbɔ́kɔ ɛ tɛ ɔ́mɔ́ kɛ́la bɛsana aabɔ́ ɛ ɛkatɛ́katɛ́ abɛ́ ɔɔcɔ u etémbí tɛ́ ŋa kɛ́la ta buɔ́sɛ́, keyé tɔkɔma tɛ a bá tú o beébe túméke a búábɔ́ bɔɔbɛ́. Mbá íyéeyé, bé mé bú biíbi lɛcaka ; mbá bá búánáŋa hú ɔ ɔ basɔ́ líŋine na yaŋɔ́ na ciamɛ Síkíne áyá.

²⁵Mbá eebi bɛsana ŋa bɛ́kɛ́la aáná o onyíóyísínyi ɔtáŋa a wɔ́áŋa a núábɔ́ nufule nú *bikotí, ɔ́sɛ : “Bé ŋe bú mí liŋékíne etémbí ne etémbí.”[55] »

²⁶Yésus yó túné beébe laana ɔsɛ : « Mu-banɔ́-ɔ́ɔ́lɔ káá fáaya. Muáŋa Elilé e yí ŋo tóŋínyi taaká ná baacɔ. Yí kéé húle né Síkíne, míɔ banɔ́ yiíyi húlinyi. Yɛ́ káá kɔ́ɔnaka yáámɛ asana.

²⁷Ta banɔ́ tɔ́na nu ká nɔ́ kɔ́ɔnaka yáámɛ asana anyía hí e nyitúméke nuanɔ́ báka na yaŋɔ́. »