Read Nomaande Saŋ 18 Bible Online

Saŋ 18 - Nomaande bible

Saŋ 18

¹Ɛ́makɛ́la Yésus á táŋáka aáná, u ŋá látɛ́na eléŋú yɛ́ Sételone. Esíéné ŋaá bá e eyinyíé aháŋá. U ŋo yóófíne na bááyɛ́ *baákɔ́nɛ́na e esíéné eéyé.

²Yútas, mufiimbie Yésus, ŋaá bá we ményukune tɔ́na haála eéhé, anyía ne Yésus na bááyɛ́ baákɔ́nɛ́na ŋa bɔ́ bá bábɔ́ ɔ́ɔ́ndɛ́mákána hɔ́á.

³Aáná Yútas ŋeé súéténé na ɔlɔŋɔ ú bicénji bí *Lóom e esíéné eéyé, ne bibulúsu ebí ne betéŋínyi *beluli nyiínjie na *Bafalisiɛ́ŋ ŋa bɔ́ tɔ́mɔkɔna. Bá ŋa bɔ́ bá ne meléfényí ; beébe tɔ́na na *lámba na tɔmɔnyɛ́ tɔciákánɔ́.

⁴Yésus ŋaá bá weé ményukune bɛsana bikime a bɛ́ ŋaá bá bíé wuúci tátáka, ɛ́ɛhɛ́ u ŋaá hámá, yɔ́ tálɛ́mɛ́na eé buúse bɔ́ baacɔ eébé, mbá ɔsɛ náábɔ́ : « Aányɛ́ nú ŋa nɔ́ áamba e ? »

⁵Báyɛ : « Yésus, ɔɔcɔ u *Násalɛt. » Mbá ɔsɛ náábɔ́ : « Yaŋɔ́ waáta ooci. » Yútas, mu-wuúci-fiimbie, ŋaá bá ɔlɔŋɔ ne beébe.

⁶Ɛŋakɛlá Yésus e beébe bɛ́káma ɔsɛ : « Yaŋɔ́ waáta ooci », bá ŋá hálɔ́mɔ́tɔ́na ne elime, bá ŋá kuakɔ́na ɔ ɔmɛsɛ́ ne bulíkílíki.

⁷Yésus ŋé túné beébe batá ɔsɛ : « Nɔsɛ aányɛ́ nu ŋa nɔ́ áamba e ? » Báyɛ : « Yésus, ɔɔcɔ u Násalɛt. »

⁸Mbá Yésus ɔsɛ : « Ɛ́ ma mɛ́ banɔ́ láana ɛsɛ́ : Yaŋɔ́ waáta ooci. Mbɔ́kɔ yaŋɔ́, nú ŋá nɔ́ áamba, ánɔ nyɛánáka bɔsɔ́ɔ́kɔ́ eebe, bé súétéke. »

⁹Aáná úúyé ɔtáŋa ŋeé bínyíóyísínyi, anyía u ŋaá kɔɔ́na ɔsɛ : « I ti ómó nyímísi ta ɔɔcɔ ɔmɔtɛ́ a baacɔ abá kuɔŋɔ́, Síkíne ó ŋo mí cuméke. »

¹⁰Símon Bíel ŋaá bá na nɔsala nɔ́ ɔhána, u ŋeé nuúnu sɔmɔ́ a abákála, hú fuab ! Yó súbíne munyiɔnɔ mu *mutéŋínyi beluli nyiínjie a muáŋá, u ŋé muúmu cála ɔ ɔcala ootú ú aháŋá yɛ́ ɔɔbɔ́ ú manɔ́mɛ. Muátá munyiɔnɔ ŋaá bá nyiínyi anyía Mélíkus.

¹¹Yésus yɔ́ láana Bíel ɔsɛ : « Hélúmúnyi núɔ́wɔ nɔsala nɔ́ ɔhána a abákála. O ŋoó keti anyía i ŋe mí kine ɔmúá indekese[60] acɛ́ ciamɛ Síkíne ŋeé mi iínjíé e ? »

¹²Na ɔlɔŋɔ ú bicénji na muabɔ́ mutéŋínyi ne bibulúsu bí *Besuif nyɛhatɛna Yésus eényí, bé ŋé wuúci ɔ́ɔ́tɔ́kɔ́kɔ.

¹³Bá ŋa bɔ́ caŋa o wuúci cɔbana eé buúse bɔ́ Ane.[61] U ŋaá bá síkíne ci oónyí u Kayífe. Waáta Kayífe u ŋaá bá mutéŋínyi beluli nyiínjie a muáŋá a hiátɛ́ hiɔŋɔ.

¹⁴Buáyá, Kayífe ŋe yiínjíe betéŋínyi Besuif injiŋé ahá u ŋaá kɔɔ́na ɔsɛ : « Yááŋa ambányɛ a yáánɔ́ aháŋá anyía ɔɔcɔ ɔmɔtɛ́ é wééne a asana yɛ́ bunɔŋɔ bukime. »

¹⁵Ne Símon Bíel na *muákɔ́nɛ́na mu etémbí ŋa bɔ́ látákɛ́ná Yésus. Mutéŋínyi *beluli nyiínjie a muáŋá ŋaá bá mué ményukune muákɔ́nɛ́na eémú. Yaátɛ́ asana muátá muákɔ́nɛ́na ŋo yóófíne ɔlɔŋɔ ɔ́mɔtɛ́ ne Yésus ɛ ɛkatɛ́katɛ́ cɛ nɔháatɛ́ nú *mutéŋínyi beluli nyiínjie a muáŋá,

¹⁶mbá Bíel ti ómo wóofine. U ŋɔ lɔ́bɔ́ e buúse bú ehenyi. Muákɔ́nɛ́na eémú emú mutéŋínyi beluli nyiínjie a muáŋá ŋaá bá mué ményukune ŋaá hámá, mu ŋá táŋáka ne oónjú awɔ́ u ŋaá bá weé tétényíki ehenyi. Ɛ́ɛhɛ́ bó ŋo yóofínyi Bíel.

¹⁷Eéyé ekúlú munyiɔnɔ e muénjú, mutétényi ehenyi eémú, ŋaá láána Bíel mɔsɛ : « Tɛ́ka kuɔŋɔ́ tɔ́na ɔ ɔ́ŋa muákɔ́nɛ́na mu ɔɔcɔ ooci e ? » Bíel ɔsɛ : « Eéʼeé ! Ɛ tɛ ámɛ bá muayɛ́ muákɔ́nɛ́na. »

¹⁸Nyiike ŋaá bá, ɛ́ɛhɛ́ na bɔnyiɔnɔ ne bibulúsu ŋa bɔ́ aábánáká oocó, bó wuúci bɔ́ŋɔ́lɛ́na ɔ ɔwaásába. Bíel ŋaá bá ɔlɔŋɔ ne beébe, u aásábáka tɔ́na.

¹⁹Mutéŋínyi *beluli nyiínjie a muáŋá ŋeé túme obícónyi Yésus na a asana na bááyɛ́ *baákɔ́nɛ́na na a bɛsana abɛ́ u ŋaá bá we yeékúnyíki.

²⁰Mbá Yésus ɔsɛ : « Ɛ ŋaá mɛ táŋáka a miányɛ́ ná ɔɔcɔ okime. Ɛ ŋaá mɛ bá yémi eékúnyíki ekúlú ekime na a *bɛndaŋía bɛ́ ɔbɛ́cɔ́kɔ́lɛ́na ne eé *Ciíbe cɛ Bandɔ́mɛsɛ́, bɛhaála ebí *Besuif bekime ŋa bɔ́ bɛ́bándána. Ɛ tɛ ɔ́mɔ́ táŋa ta asana a nyɛnamba.

²¹Anyíatɛ́ ɔ ŋɔ́ mɛ bata e ? Ɔ ŋɔ́ɔ bá wu obícónyíki baacɔ eebe a bá ŋa bɔ́ lɔ́kɔ́máká úúmi ɔtáŋa. Beébe, bé ŋe bú ményi bɔmbányɛ bɛsana ebí i ŋe mí beébe laakɛ́ná. »

²²Ɔ ɔtáŋa oócí, ebulúsu a yɛ́mɔtɛ́ a yɛ́ ŋaá bá hoóhi ne Yésus ŋé wuúci ááta ɔbɛ́lɛ́, ɔsɛ : « Háá ! Aáná bá ŋá bɛ́káma *mutéŋínyi beluli nyiínjie a muáŋá e ? »

²³Mbá Yésus ɔsɛ : « Mbɔ́kɔ ɛ ŋá mɛ táŋɛ́ta bɔɔbɛ́, mi túme hɛkɔma. Mbá, mbɔ́kɔ ɛ ŋá mɛ táŋɛ́ta bɔmbányɛ, anyíatɛ́ ó moó mi súbe aná e ? »

²⁴Ane nyɛtɔ́ma Yésus eényí ná Kayífe, mutéŋínyi beluli nyiínjie a muáŋá, aabá hú cɔɔ́tɔ́kɔ́kɔ́nɔ́.

²⁵Bɛsana eébí ŋaá bá bɛ́ á bɛ́kɛ́láka, Símon Bíel hɔ́á u aásábáka oocó. Bé ŋe túné wuúci bata báyɛ : « Ɔ́kɔ, tɛ́ka kuɔŋɔ́ tɔ́na ɔ ɔ́ŋa u ɔlɔŋɔ ú *baákɔ́nɛ́na ú ɔɔcɔ ooci e ? » Bíel ɔsɛ : « Eéʼeé ! Ɛ tɛ́ ámɛ bá muayɛ́ *muákɔ́nɛ́na. »

²⁶Munyiɔnɔ a mumɔtɛ́ mu *mutéŋínyi beluli nyiínjie a muáŋá ŋaá bá hɔ́á ; mu ŋaá bá mu ciíbe cɛ baacɔ ɛ́mɔtɛ́ na ɔɔcɔ ewú Bíel ŋaá cála ootú. Mbá mɔsɛ : « Ɔ́kɔ, tɛ́ka ɛ ŋá mɛ́ ɔ lɛcáka na ɔɔcɔ oócí e esíéné e ? »

²⁷Bíel ŋé túné kɔɔna anyía u ti ŋée ményi Yésus. Hú a yaátɛ́ ekúlú, yaaka yɛ́ ɛkɔkɛ́ ɔ́mɔtɛ́ nyɛbɛ́lɛ́ta eényí : « Kokólókoo ».

²⁸Tútútú nɔɔ́nɔyá bá ŋa bɔ́ hatɔ́nána Yésus ná Kayífe, bé ŋé wuúci cɔbána eé ciíbe cɛ Kɔ́mɛ́na Bílat. Betéŋínyi *Besuif ŋe bú bíkíilie owoofine eé ciíbe ci otéŋí anyía bé ti éélúéke ne bihíŋe eé buúse bɔ́ Bandɔ́mɛsɛ́,[62] ɔ ɔkɛla anyía bábɔ́ nyíáka bɔŋanda bɔ́ Basíka.

²⁹A yaátɛ́ asana Kɔ́mɛ́na Bílat ŋé keé beébe kuána a nɔháatɛ́, u ŋé beébe batá ɔsɛ : « A hɛkɔma hɛ́ yaátɛ́ nú ma nɔ́ hátɛna ɔɔcɔ ooci e ? »

³⁰Mbá báyɛ : « Wuúci tɛ́ka ɔŋána, keyé tu ti ómó sú wuúci héléne aaha nɔ́ɔ́wɔ. »

³¹Bílat ɔsɛ : « Énu wuúci hiíte banɔ́ bɛ́muátá, nú ké wuúci kélísíki na bíánɔ́ *bikotí. » Mbá beébe báyɛ : « Butéŋí bú *Lóom tɛ ŋaá basɔ́ iínjíé makɛ́nda ma ɔwɔɔ́nɔ ɔɔcɔ. »

³²Aáná asana ŋaá bɛ́kɛ́láka, yí ŋé nyíóyísínyi ɔtáŋa ewú Yésus ŋaá táŋáká ɔ ɔkɔɔna nyɛnamá nyí owé enyí u kéé wé.

³³Aáná Bílat ŋo yoófíne eeyé e ciíbe, u ŋɔ́ lɔ́ŋɛ́ta Yésus, u ŋé wuúci batá ɔsɛ : « Mbá ɔ ɔ́ŋa otéŋí u Besuif e ? »

³⁴Yésus ɔsɛ : « Kuɔŋɔ́, ɔ́ mɔɔ́ bɛ́háŋɛ́na ɔ mɛ bata ayɛ́ʼ bɔ́ mɔ yɔ́ɔ bɛ́nyɔ́ŋɛ́na bu bɛ́nyɔ́ŋɛ́na e ? »

³⁵Mbá Bílat ɔsɛ : « Háá ! Mbá ya mɛ́ŋa u Besuif e ? Na buɔwɔ ne betéŋínyi *beluli nyiínjie mé ke bú o télímínyi aaha eémi eé buúse. Asana a yaátɛ́ ɔ ɔ́ŋa ɔkɛlánɔ́ e ? »

³⁶Yésus ɔsɛ : « Búámɛ butéŋí tɛ á bá bɔ́ ɔmɛsɛ́ ooci. Mbɔ́kɔ búá bámɔ́kɔ́na bɔ́ ɔmɛsɛ́ ooci, keyé báámɛ bɔnyiɔnɔ ŋa bɔ́ bɛ́kɛ́ŋɛ́lɛ́ána anyía bá tɛ́ mɛ cɔbána eé buúse bú betéŋínyi Besuif. Mbá búámɛ butéŋí tɛ a bá butéŋí bɔ́ ɔmɛsɛ́ ooci. »

³⁷Mbá Bílat ɔsɛ : « Ɛ́cɛ anyía ɔ ɔ́ŋa aná otéŋí u Besuif e ? » Mbá Yésus ɔsɛ : « Kuɔŋɔ́, ɔ ŋɔɔ́ kɔɔna aáná. Ɛ ŋa mɛ́ faáya ɔ ɔmɛsɛ́ ooci anyía yé ké mi tóŋínyi baacɔ taaká. A asana eéyé i ŋé mi bíbíéne. Ɔɔcɔ okime awɔ́ u ŋa kánda aá taaká ŋaá tákɛ́na eetú e úúmi ɔtáŋa. »

³⁸Mbá Bílat ɔsɛ : « Aátɛ́ yááŋa taaká e ? » E elime cɛ ɔtáŋa oócí, Bílat ŋe túné á háma, u ŋá cɔba eé buúse bú Besuif, mbá ɔsɛ : « Ɛ tɛ ɔ́mɔ lɛ́ca hɛkɔma, ta hɛ́mɔtɛ́, hí otúme ɔɔcɔ ooci.

³⁹Mbá, háyɛ bá náŋa bá kɛ́laka náánɔ́, yɛ́ ŋá nyɛmána anyía yámɛ́ banɔ́ nyɛ́ánɛ́nɛ́na ɔɔcɔ u ciíbe cɛ ɛcaná e ekúlú yɛ́ bɔŋanda bɔ́ *Basíka, ɛ́ɛhɛ́ isíʼo : Nu ŋa nɔ́ áamba anyía yámɛ́ banɔ́ nyɛ́ánɛ́na otéŋí u Besuif e ? »

⁴⁰Baacɔ bekime ŋa háná ébú túme ɔbɔmɔ báyɛ : « Buaka, tɛ́ cáŋa wuúci ; tu ŋe sú léne anyía ɔ́ɔ basɔ́ nyɛánɛnɛna Balábasʼo ! » Yiíyi anyía Balábas ŋaá bá ocónjólóŋó.