Read Nomaande Saŋ 19 Bible Online

Saŋ 19 - Nomaande bible

Saŋ 19

¹Aáná Bílat ŋeé hííte Yésus, u ŋé íínjíé makɛ́nda anyía bé wuúci súbéke ne mesue.

²Bicénji ŋaá nuáka atamba yí butéŋí ne bikolíkolí bɛ́ ɛsándá, nyɛháya Yésus eényí. Bí ŋeé wuúci laŋa bɔlaka e bubólótoto,[63]

³bí bíkósíki nááyá, bɛ́ kɔ́ɔnaka bɛ́sɛ : « Hɔɔ́ɔʼ, Otéŋí u *Besuif » ; bí wuúci áátáka ɛbɛ́lɛ́.

⁴Bílat ŋe túné háma, mbá ɔsɛ né Besuif : « Ɛ́ná, ícíoci, míɔ cɔba, yámɛ banɔ́ héléníne a nɔháatɛ́ anyía mbá núé menyí anyía ɛ tɛ ámɛ bá ɔbɔ́ŋɔ́nɔ hɛkɔma hɛ́ nyɛŋána nááyá. »

⁵Yésus ŋá háma, ɔbɛ́háyánɔ́ atamba yí butéŋí yɛ́ ɛsándá, na bɔlaka e bubólótoto, mbá Bílat ɔsɛ né Besuif : « Ícíociʼo ! »

⁶Mbá hú ayɛ́ ne betéŋínyi *beluli nyiínjie ne bibulúsu ŋa bɔ́ lɛ́cá Yésus, bó túme ɔbɔmɔ, báyɛ : « Wuúci áátákɛ́na ɔ ɔmbásá ! Wuúci áátákɛ́na ɔ ɔmbásá ! » Bílat ɔsɛ : « Énu wuúci hiíte, nú keé wuúci aátákɛ́na banɔ́ bɛ́muátá ɔ ɔmbásá. Aá yaŋɔ́, ɛ tɛ ɔ́mɔ bɔ́ŋɔ hɛkɔma a hɛ́áŋa hí wuúci hatɛ́nánɔ́. »

⁷Besuif báyɛ nááyá : « Tua sɔ́ŋa ne okotí ; a nyɛkɔɔna nyɛ́ yáásɔ́ okotí eéyé, u ŋá nyɛmána owé anyía u ŋaá kɔ́ɔna anyía wáŋa Ɔɔ́nɔ́ u Bandɔ́mɛsɛ́. »

⁸Ɛŋakɛlá Bílat á lɔ́kɔ́ma aáná, bulíkílíki ŋé wuúci tímbíé ɔ ɔhɔla.

⁹U ŋá hálɔ́mɔ́na eé ciíbe, u ŋá batá Yésus ɔsɛ : « Ɔ ɔ́ŋa u háányɛ́ e ? » Mbá, u ti ómoó wuúci bɛ́káma.

¹⁰Bílat ŋé wuúci batá ɔsɛ : « Yaŋɔ́, ɔ́ mɔɔ́ wɔ́ɔ́nɔ́ indímé e ? O ti ŋó ményi anyía ya mɛ́ŋa na makɛ́nda ma ɔ kuɔŋɔ́ nyɛ́ana ɔ́ɔ hɔlá, ta ma ɔkɔɔna anyía bá ɔ waátákɛ́na ɔ ɔmbásá e ? »

¹¹Yésus ŋé wuúci bɛ́káma ɔsɛ : « Ɔ tɛ́ ɔ bá na makɛ́nda náámɛ, ɛ́ tɛ ŋáa bá amá Bandɔ́mɛsɛ́ áŋa ɔ kuɔŋɔ́ iínjíénú. A asana eéyé, ɔɔcɔ ewú u keé mi télímínyi oówo eé buúse áŋa ɔkɛlákánɔ́ bɔɔbɛ́ a bú á hɔ́la búɔ́wɔ. »

¹²O otúme ekúlú eéyé Bílat ŋaá bá wá yáambaka ohónyí wú ɔnyɛana Yésus, mbá Besuif ŋe bú túme ɔbɔmɔ báyɛ : « Mbɔ́kɔ ɔ ŋɔ́ɔ nyɛ́ána Yésus, ɔ tɛ ɔ́ bá elime ɛmɔtɛ́ na *Sɛsáal. Ɔɔcɔ ewú ú ŋe bíhíite otéŋí ŋe núusi Sɛsáal. »

¹³Ɛ́makɛ́la Bílat á lɔ́kɔ́ma aáná, u ŋé hémúnyi Yésus a nɔháatɛ́, nyíáyɛ́ nyilimíné eényí a nyɛŋafá nyí mukélísi bɛsana, aá haála ahá bá ŋaá bá bɔ́ lɔ́ŋɔ́kɔ báyɛ : « Asaátɛ́tɛ yɛ́ Andányɛ́ » ; ne *nuebélé ɛ́cɛ « Kabáta. »

¹⁴Asana ŋaá bá yá bɛ́kɛ́láka hoóhi ne túefi;[64] bá kɔɔnaka anyía bɔŋanda bɔ́ Basíka áŋa nɔɔyá. Mbá Bílat ɔsɛ né Besuif : « Uunú otéŋí oociʼo ! »

¹⁵Mbá bá ŋa bɔ́ bɔ́mɔ́kɔ báyɛ : « Wé wé ! Wé wéʼo ! Ɔ ɔmbásá ɔ ɔmuanáʼo, ɔ ɔmbásá ɔ ɔmuanáʼo ! » Bílat ɔsɛ : « Mbá yámɛ ɔ́ɔ́nɔ uunú otéŋí ɔ ɔmbásá e ? » Betéŋínyi beluli nyiínjie ŋé bu wuúci bɛ́káma báyɛ : « Sɛsáal bímuócí wáŋa uusú otéŋí. Tu tɛ asɔ́ bá ne u etémbí ! »

¹⁶Bílat nyi beébe wuúci fiimbine eényí anyía bé keé wuúci aátákɛ́na ɔ ɔmbásá. Aáná Besuif ŋe bú hiite Yésus, bé ŋé wuúci súéténe.

¹⁷U ŋá háma bálɛ́ka, ɔbɛ́túáhɛ́nánɔ́ úúyé ɔmbásá ɔ ɔcɔbana aá haála a há ŋaá bá ne nyiínyi anyía « Nuɔ́ŋɔ́lɔ́ŋɔ́lɔ » ; ne *nuebélé báyɛ « Kɔlɔkɔ́ta ».

¹⁸Hɔ́á, bicénji ŋeé wuúci aátákɛ́ná ɔ ɔmbásá. Bɛ́ ŋaá aátákɛ́ná tɔ́na banɔ́mɔcɔ́ béfendí ɛ ɛmbásá : A wɔmɔtɛ́ ɔ ɔmbásá a wɔ́mɔtɛ́ a aháŋá yɛ́ ɔɔbɔ́ ú manɔ́mɛ, ooci a wɔmɔtɛ́ ɔ ɔmbásá a wɔ́mɔtɛ́ a aháŋá yɛ́ ɔɔbɔ́ ú meényi, Yésus ɛ ɛkatɛ́katɛ́.

¹⁹Bílat ŋaá kɛ́lá anyía bá háya ciɔɔ́ŋɛ́ ɔ ɔmuaná ú ɔmbásá ú Yésus ; cɛ́ ŋaá bá cɛ́ á kɔ́ɔnaka cɛ́sɛ : « Yésus, ɔɔcɔ u *Násalɛt, otéŋí u *Besuif. »

²⁰Besuif beéŋí ŋa bɔ́ fanáka ciɔɔ́ŋɛ́ eécí anyía haála ahá bá ŋa yaátákɛ́ná Yésus ɔ ɔmbásá ŋaá bá hoóhi na bálɛ́ka. Tɔ́na, bɔ́ ŋɔ yɔ́ɔ́ŋɔ́kɔ́ ciátɛ́ ciɔɔ́ŋɛ́ na ɛtáŋa ɛ́tátɔ́ : Ne nuebélé, na nɔlatɛ́ŋa, na *nɔkɛlɛ́k.

²¹Betéŋínyi *beluli nyiínjie bé Besuif ŋa bɔ́ láána Bílat báyɛ : « Ɔ tɛ ɔmɔ́ nyɛmána wu ɔwɔɔ́ŋɔ́kɔ anyía : “Otéŋí u Besuif” mbá, háya anyía “Ɔɔcɔ ooci ŋa kɔ́ɔna anyía wáŋa otéŋí u Besuif.” »

²²Bílat ŋá bɛ́káma ɔsɛ : « Háyɛ yámɛ ɔ́ɔ́ŋɔ́kɔ, búɔ́ lɔbɔ́ híáná. »

²³Ɛŋakɛlá bicénji maá aátákɛ́na Yésus ɔ ɔmbásá, bí ŋé hiitéke bíáyɛ́ bɛlaŋa, bí ŋe biíbi aafáka a tuafa túnyíse, hú ne ecénji na nuafa. Bí ŋeé hiite tɔ́na ciayɛ́ káŋa a cɛ́ ŋaá bá mímíli cɛ bɔlaka, tɛ́ka na nyɛlata.

²⁴Bicénji ŋaá táŋáka biíbi ne biíbi bɛ́sɛ : « Tu tɛ́ lahɔ́tɔ́na káŋa eeci mbá túé ciíci cakɔ́nákɛ́na ɔ ɔndɔŋɔ. »[65] Asana eéyé ŋaá bɛ́kɛ́láka aáná anyía Ciɔɔ́ŋɛ́ cɛ́ Bandɔ́mɛsɛ́ é bínyíóyísínyi ; cɛ́ ŋa kɔ́ɔna cɛ́sɛ : « Bá ŋa yááfákána bíámɛ bɛlaŋa, bá ŋá cakɔ́nákɛ́na ciamɛ káŋa ɔ ɔndɔŋɔ. »

²⁵Hoóhi na ɔmbásá ú Yésus, iinyí ŋaá bá tálɛ́mɛ́na ; ne wuúci ne uuyé onyíinyí o woónjú, na Malíi, oónyí u Kɔlɔbas, na Malíi, itónyi cɛ Makatala.

²⁶Yésus ŋa lɛ́cá iinyí, yɔ́ lɛ́ca tɔ́na a maabána me iinyí *muákɔ́nɛ́na amɔ́ u ŋaá bá wé lénéke, mbá ɔsɛ : « Meemé, uuwu ɔɔ́nɔ́ oócíʼo ! »

²⁷Ná muákɔ́nɛ́na ɔsɛ : « Ɔɔnyia oócíʼo. » O otúme ekúlú eéyé muákɔ́nɛ́na ŋa bɛ́kɔ́kɛ́tɛ́na iinyí cí Yésus e úúyé ooki anyía wé limékíne hɔ́á.

²⁸E elime eécí, Yésus é ményukune anyía ú meé kuényinyi bɔsɔ́ma abɔ́ u ŋa faáyɛ́na, mbá ɔsɛ : « Nyimóti ŋa mɛ́ nuana. » U ŋaá kɔ́ɔ́na aáná ɔ ɔkɛla anyía asana ayɛ́ bɔ́ ŋɔ yɔ́ɔ́ŋɔ́kɔ́ feeké a Ciɔɔ́ŋɛ́ cɛ́ Bandɔ́mɛsɛ́ é bínyíóyísínyi.

²⁹Ɔsɔ́mɔ ŋaá bá hɔ́á, onyíóyónú na bɛanjámákánɔ́ bí meluku. Bicénji ŋé yube kɔ́cá a bɛanjámákánɔ́ bí meluku eébí, bé ŋé hiíte ɔndáfɛ ɔ́ hɛɛtɛ́tɛ́ a hɛ́ ŋaá bá nyiínyi anyía isóbe, bɔ́ fácɛna kɔcá eécí, nyi ciíci kositi eényí ne nyuúté nyí Yésus.

³⁰Ahɛ́ u ŋɔ cɔ́njɛ́tá bɛnjámákánɔ́ bí meluku eébí, mbá ɔsɛ : « Aámbáya asana ma mána ! » Nyiomboko aatɔ́ eényí.

³¹Yɛ́ ŋaá bá buɔ́sɛ́ bú nyifienyi nyí ehélúme yí *Besuif. Bá ŋaá bá bé tí ébú léne anyía imime ɔ́ lɔbɔ́kɔ ɛ ɛmbásá buɔ́sɛ́ bɔ́ yáábɔ́ ehélúme anyía buɔ́sɛ́ bɔ́ ɔláta ŋaá bá buɔ́sɛ́ a buáŋá. Aáná betéŋínyi Besuif ŋa ka bɔ́ báta Bílat anyía wé iínjie makɛ́nda bɔ́ kɔ nɔkɔ́kɔ akɔlɔ́ cá baacɔ[66] a bá ŋa yaátákɛ́ná ɛ ɛmbásá, mbá bá aátɔ́náka tɔ́na imime.

³²Bicénji ŋaá cɔ́bá, bɔ́ nɔ́kɔkɔ akɔlɔ́ cá ɔɔcɔ u buúse e bífendí eébí a bá ŋa yaátákɛ́ná ɛ ɛmbásá ɔlɔŋɔ ne Yésus ; bɔ́ ŋɔ́ nɔ́kɔ́kɔ cá sɔ́ɔ́kɔ́ ɔ wɔmɔtɛ́.

³³Ɔ ɔháma né Yésus bɛ́ ŋá lɛ́cá anyía wa yáaŋa owéénú, ɛ́ɛhɛ́ bí ti ómo wuúci nɔkɔ akɔlɔ́.

³⁴Mbá, ecénji a yɛ́mɔtɛ́ ŋeé wuúci bɔlɔ́ aháŋá a yɛ́mɔtɛ́ yɛ́ tɔkɛndá na nyíáyɛ́ nyɛkɔŋɔ́ ; na manɔ́ŋɔ́ ne menyífé ŋá njɛ́láka.

³⁵Mulɛca asana eeye mu ŋé yiíyi bíkéti. Ciayɛ́ ɛmbasɔ́ áŋa taaká. Muúmu bɛ́muátá, mu ŋé ményi anyía mu ŋa kɔɔna taaká, mu ŋe bíkéti asana eeye ɔ ɔkɛla anyía núénú lúmítíníne tɔ́na.

³⁶Yɛ́ ŋaá bɛ́kɛ́láka aáná anyía asana eeye ayɛ́ bɔ́ ŋɔ́ yɔɔ́ŋɔ́kɔ feeké a Ciɔɔ́ŋɛ́ cɛ́ Bandɔ́mɛsɛ́ é bínyíóyísínyi ; yɛ́ ŋa kɔ́ɔna yɛ́sɛ : « Bé ti kéé wuúci nɔkɔ yuúhé ta ɔmɔtɛ́. »[67]

³⁷Na yɛ́mɔtɛ́ eeye a yɛ́ ŋá kɔɔna yɛ́sɛ : « Bá ká bɔ́ lɛ́caka ooci awɔ́ bá ŋa bɔ́ bɔ́lɔ́kɔ. »

³⁸E elime eécí, Yɔ́sɛb, ɔɔcɔ u Alɛmatɛ́, ŋaá bátá Bílat makɛ́nda me okohíite omime ú Yésus. Yɔ́sɛb ŋaá bá *muákɔ́nɛ́na a mumɔtɛ́ mu Yésus, mbá a nyɛnamba anyía u ŋaá bá wé líkíméke betéŋínyi *Besuif. Bílat yó wuúci iínjíe makɛ́nda. Aáná Yɔ́sɛb ŋa ká fááya, ú ŋga bɛ́túáhɛ́na omime.

³⁹Nikotɛ́mɛ, ooci awɔ́ u ŋgaá kúána Yésus buutú a búmɔtɛ́ e yoólóko, ŋá faáya tɔ́na. U ŋeé héléné ne míile, lataka na alɔɛs.[68] Bɛnyɛ́ma eébí ŋaá bá bɛ́ ɔlamaka hoóhi kílo nyitíne na cíɔ́hátá.

⁴⁰Bé ŋe bú hííte omime ú Yésus, bɔ́ bákákɛ́na ne bikéti bɛ́ ɔmbɔ́mɔ́, bó fééfíki bɛsɔŋɔ bí enumbé háyɛ Besuif ŋaá bá bábɔ́ kɛlaka ɔ ɔbɛ́tábɔ́nákɛna munyienene.

⁴¹Esíéné ŋaá bá haála ahá bá ŋa yaátákɛ́na Yésus ɔ ɔmbásá. E esíéné eéyé, eenyie a yɔɔ́sɔ ŋaá bá. Bá ŋaá bá bé ti ŋeé nyíéne ɔɔcɔ hɔ́á.

⁴²A yaátɛ́ eenyie bá ŋga bɔ́ háya Yésus, anyía buɔ́sɛ́ eébú ŋaá bá buɔ́sɛ́ bú nyifienyi nyí ehélúme yí Besuif ; tɔ́na anyía eenyie eéyé ŋaá bá hoóhi.