Read Nomaande Saŋ 2 Bible Online

Saŋ 2 - Nomaande bible

Saŋ 2

¹E elime cɛ mɔɔ́sɛ́ méfendí, nusíke ŋaá bá a Kána, i iisí cɛ *Kalilé. Iinyí ci Yésus ŋaá bá hɔ́á.

²E nusíke eénú, bɔ́ ŋɔɔ́ lɔ́ŋɔ́kɔ tɔ́na ne Yésus na bááyɛ́ *baákɔ́nɛ́na, bá ŋa bɔ́ fáaya.

³Ahɛ́ meluku me nusíke ŋa mána, iinyí ci Yésus ŋá laana ɔɔ́nɔ́ ɔsɛ : « Meluku ma mána. »

⁴Mbá Yésus ɔsɛ : « Meemé, tɛ́ cáŋa kuɔŋɔ́ ɔ́ɔ nyɛmána wu o mi tóŋínyi bɔkɔ abɔ́ yámɛ nyɛmana wu ɔkɛla. Yáámɛ ekúlú tɛ́ ŋa nyɛ́mána. »

⁵Ɛ́makɛ́la iinyí á lɔ́kɔ́ma aáná, mbá ɔsɛ ná baafa meluku : « Ánɔ kɛláka bɔkɔ abɔ́ ú ŋá cɔ́ba ɔ ɔ banɔ́ laana. »

⁶Tumbokí tɔ́ andányɛ́ ŋaá bá aáhá tútíndétú. *Besuif ŋaá bá bábɔ́ bɛ́kɛ́lákɛ́na tumbokí eétú ɔ ɔbɛ́sua háyɛ *bikotí bí uúbú olumitinine ŋaá bá bíé yéékúnyíki. Tú ŋaá bá tuáŋá, tú hííteke lɛ́ta o otúme etíne ényíse ɔ ɔkɔɔ́háma etíne étíndétú.

⁷Mbá Yésus ɔsɛ ná baafa meluku : « Ánɔ ka tɔ́káka menyífé, núé nyíóyísíkí tumbokí eetu. » Aáná bé ŋe bú nyíoyísíkí tumbokí ne menyífé hoóhi anyía mé óótíéke.

⁸Mbá Yésus ɔsɛ náábɔ́ : « Aámbáya, ánɔ tɔ́kɛ́tɛ́ta maandá mé menyífé me himbokí, énu ke meéme óókítínyi mukendisi bɔŋanda. » Bé ŋge bú wuúci íínjíe maátɛ́ menyífé,

⁹u ŋé meéme ɔ́ɔ́kɛ́tɛ́na. Ma ŋaá bá ɛ́cɛ má ma bɛ́cáŋa meluku. U ŋaá bá u ti é ményi haála ehé bé ŋgeé hiíte maátɛ́ meluku, mbá baafa meluku ŋaá bá bébú heéhe ményukune anyía beébe, bé ŋge bú meéme tɔ́káká. Aáná u ŋɔɔ́ lɔ́ŋɛ́tá ɔɔcɔ awɔ́ bá ŋaá bá a nyíáyɛ́ nyɛtɔ́nɔ́,

¹⁰mbá ɔsɛ nááyá : « Bɔsɔ́ɔ́kɔ́ náŋa bábɔ́ kɛlaka anyía wɔ́ɔ caŋa aafakɛna baacɔ bɛmbányɛ bí meluku. Ɛ́makɛ́la bé me bú híólóko, wó síke hémúkúnyi aná bɛnjámákánɔ́ bí meluku. Kuɔŋɔ́, nyiɔ́wɔ nyɛkɛla áŋa náányia : Ɔ́ mɔɔ́ bátɛ́ákɛ́na bɛmbányɛ bí meluku ɔ ɔkɔɔ́háma aámbáya. »

¹¹Aáná Yésus ŋaá kɛ́la yááyɛ́ *ekéki yí hibílícínyínyí yí buúse a bunɔŋɔ bɔ́ Kána, i iisí cɛ Kalilé. Yó tóŋínyi baacɔ búáyɛ́ buáŋá ; bááyɛ́ baákɔ́nɛ́na bɔ́ hákɛ́na mɔŋɔlɛ́ nááyá.

¹²E elime eécí, Yésus ŋeé súéte ɔlɔŋɔ ne iinyí ne benyíinyí na bááyɛ́ baákɔ́nɛ́na a bálɛ́ka cɛ Kabɛlnawum. Bó límekine hɔ́á ɔmbana ú mɔɔ́sɛ́ otíkítíki.

¹³Yésus ŋaá hátɔ́na, yó súéte eé Yelúsalɛm ekúlú ayɛ́ *Basíka, bɔŋanda bú *Besuif, ŋaá bá cɛ a yáaŋa hoóhi.

¹⁴U ŋe yóófíne eé *Ciíbe cɛ Bandɔ́mɛsɛ́, u ŋá kuána baacɔ bé túéke na káwɔ, na ɛtɔ́mbá ne tubúbé. Betúé mɔɔnyɛ́ me Ciíbe cɛ Bandɔ́mɛsɛ́ ŋa bɔ́ bá belimékínénú hoóhi ne cííbú tébíli.

¹⁵Yésus ŋeé hííte tukolí, yɔ́ tábɔ́náka busue, u ŋá ɔɔ́ŋɔ́kɛ́na haaca ne Ciíbe cɛ Bandɔ́mɛsɛ́ baacɔ eébé ne cííbú ɛtɔ́mbá ne cííbú káwɔ. U ŋé kúbúlíékéne tébíli cí betúé mɔɔnyɛ́, maabɔ́ mɔɔnyɛ́ mekime a má ŋaá bá hɔ́á ŋá sasíáka ɔ ɔmɛsɛ́.

¹⁶Eéyé ekúlú u ŋɔ́ bɔ́mɛ́tɛ́na betúé tubúbé ɔsɛ : « Ánɔ aáŋíáka bɛnyɛ́ma eébí aaha. Nɔtɛ háná kɛla anyía Ciíbe cɛ ciamɛ Taatá á bá ciíbe ci onduné. »

¹⁷Bááyɛ́ *baákɔ́nɛ́na ŋe síke ábɔ́ bɛ́tááka mehúnyi ma Ciɔɔ́ŋɛ́ cɛ́ Bandɔ́mɛsɛ́ a cɛ́ ŋaá kɔɔna cɛ́sɛ : « I ŋe mí léne ciɔwɔ Ciíbe e nyiwééné. »

¹⁸Ɛ́makɛ́la Yésus ɔ́ yɔ́ɔ́ŋɔ́kɛ́na betúé bitúké aáná, betéŋínyi Besuif ŋé bú wuúci batá báyɛ : « Kɛlá aná *ekéki yí hibílícínyínyí ɔ ɔ basɔ́ tóŋínyi anyía ɔ ɔ́ŋa na bɔɔcɔ ɔ ɔbɛ́kɛ́lákɛ́na a nyɛnamá eényí. »

¹⁹Mbá ɔsɛ náábɔ́ : « Ánɔ bɛáka Ciíbe cɛ Bandɔ́mɛsɛ́ eeci, i ŋeé mi ciíci falɛfɔtɔkɔna ɔ mɔɔ́sɛ́ matátɔ́. »

²⁰Báyɛ : « Baacɔ ŋa bɔ́ nyiɔ́kɔ buólí bú Ciíbe eeci tuɔŋɔ etíne éfendí ne imbuke ítíndétú.[10] Ɛ́ɛhɛ́ kuɔŋɔ́, ɔ ŋɔɔ́ kɔ́ɔna anyía bé é ciíci bɛáka, o ŋoó ciíci falɛfɔtɔkɔna a mɔɔ́sɛ́ matátɔ́ e ? »

²¹Mbá u ŋaá bá waá kɔ́ɔ́naka asana yɛ́ ciayɛ́ cɛɛ́tɔ cɛ bɛ́muátá, ɛ́ɛhɛ́ u ŋɔɔ́ lɔ́ŋɛ́ta anyía Ciíbe cɛ Bandɔ́mɛsɛ́.

²²Ɛŋakɛlá ú ma háányua e biwéewé, bááyɛ́ baákɔ́nɛ́na ŋá bɛ́táá anyía u ŋaá táŋáká aáná ; nyíábɔ́ nyilumitinine eényí ne úúye ɔtáŋa na Ciɔɔ́ŋɛ́ cɛ́ Bandɔ́mɛsɛ́.

²³Yésus ŋaá kɛ́laka bikéki bí tubílícínyínyí eé Yelúsalɛm a bɔŋanda bɔ́ *Basíka. Baacɔ beéŋí e bé ŋe bú biíbi lɛ́cáká ŋa bɔ́ hákɛ́ná mɔŋɔlɛ́ nááyá.

²⁴Mbá Yésus ŋaá bá u ti é bíínjíé náábɔ́ anyía u ŋaá bá weé beébe menyukune bekime bɔmbányɛ bɔmbányɛ.

²⁵U ŋaá bá u tɛ caŋa á yáámba anyía bé wuúci laakɛ́na olíhe ú baacɔ, anyía u ŋaá bá weé ményukune bɔkɔ bukime a búáŋa e cííbú ɛtɛ́má noómi.