Read Nomaande Saŋ 4 Bible Online

Saŋ 4 - Nomaande bible

Saŋ 4

¹*Bafalisiɛ́ŋ ŋa bɔ́ lɔ́kɔ́má anyía Yésus ŋɔɔ́ bɔ́ŋɔ *baákɔ́nɛ́na beéŋí, u ootokine tɔ́na baacɔ beéŋí ɔ ɔhɔla Sáaŋ.

²Mbá, á taaká, tɛ́ cáŋa Yésus bɛ́muátá u ŋaá bá we yóotokine baacɔ, mbá bááyɛ́ baákɔ́nɛ́na.

³Ahɛ́ u ŋaá lɔ́kɔ́ma anyía bá ŋaá bá bábɔ́ táŋáka yááyɛ́ asana ná Bafalisiɛ́ŋ, u ŋá hatɔ́na eé Yuté, u ŋá hálɔ́mɔ́na a *Kalilé.

⁴Ɔ ɔcɔcɔbaka hɔ́á, u ŋa nyɛ́mana wu ɔhɔlɛna i iisí cɛ *Samalí.

⁵Aáná Yésus ŋa kaá hámá a bálɛ́ka a cɛmɔtɛ́ cɛ Samalí, hoóhi ne ehuéhúé ayɛ́ *Yákɔb ŋe yiínjíé ná ɔɔ́nɔ́ Yɔ́sɛb ; bálɛ́ka eécí ŋaá bá nyiínyi ɛ́cɛ Sikáal.

⁶Ekenú yɛ́ Yákɔb ŋaá bá hɔ́á. Yésus ŋaá bá ɔtɔmbɔ́nɔ́ na ɔkanda ; aáná u ŋe hulé é límine a maabána me ekenú eéyé. Yɛ́ ŋaá bá bɛsana bí túefi.[16]

⁷Oónjú a wɔmɔtɛ́ u Samalí ŋaá faáya anyía wá ka tɔ́ká menyífé e ekenú, u ŋá kuána Yésus. Mbá Yésus me wuúci bata ɔsɛ : « Mɛ tɔ́kɛ́na menyífé, yámɛ múá. »

⁸Yésus ŋaá bá hú ne wuúci ne oónjú, ɛ́cɛ anyía bááyɛ́ baákɔ́nɛ́na tɛ ɔ́mɔ bɔ́ bá hɔ́á aá yaátɛ́ ekúlú, bé ŋe bú súéte ɔ ɔkɔɔ́wɔɔ́ndɔ́kɔ bɛnyɛ́ma bɛ́ ɔnyíá a bálɛ́ka.

⁹Oónjú oócí ɔsɛ nááyá : « Háá ! Kuɔŋɔ́, ɔɔcɔ u *Besuif, ɔ ŋɔ mɛ́ kɔŋɛna menyífé ma ɔmúá, yaŋɔ́ itónyi cɛ Samalí e ? » Bé ŋeé ményi anyía ne Besuif na baacɔ bá Samalí naŋa bé ti ŋé bú límínyínyi.

¹⁰Yésus ɔsɛ nááyá : « Oó menyukune yaála yí nuubo yɛ́ Bandɔ́mɛsɛ́, e menyukune tɔ́na ooci awɔ́ u ŋɔ́ yɔ́ɔ kɔŋɛna menyífé ma ɔmúá, kuɔŋɔ́ ɔ ɔ́ŋa wu o wuúci kɔŋɛna menyífé, mbá wo wiínjie me hicéme. »[17]

¹¹Mbá oónjú ɔsɛ : « Taatá, kuɔŋɔ́ ooci, ɔ tɛ ɔ́ bá na bɔtɔ́kɛ́ná ; ekenú áŋa tiímé noómi tɔ́na. Anyána ɔ ŋɔɔ́ kɛlaka anyía ɔ́ɔ bɔ́ŋɔ menyífé me hicéme e ?

¹²Ciasɔ́ sɔ́kɔ́nɔ́ Yákɔb ŋaá basɔ́ iínjíé ekenú eeye. Wuúci bɛ́muátá u ŋaá múáká menyífé ma hɔ́á, ta bááyɛ́ baáná, ta bíáyɛ́ bitúké. Ɛ́ɛhɛ́ kuɔŋɔ́, o ŋoó bíkéti anyía o ŋó wuúci hɔla e ? »

¹³Yésus ɔsɛ : « Nyimóti ká háná á núákɛ́na ɔɔcɔ awɔ́ á múá menyífé eeme ;

¹⁴mbá ta buɔ́sɛ́ nyimóti tɛ ká háná á nuána ɔɔcɔ okime awɔ́ á múá menyífé emé i ké mí wuúci íínjíe. Ɛ́cɛ anyía menyífé emé i ké mí wuúci íínjie kaá bɛ́cáŋa nááyá hicéme hɛ́ yɔɔ́sɔɔ́sɔ yí olíhe yí ekúlú ekime e yí ké búle á háma nááyá na makɛ́nda. »

¹⁵Oónjú ɔsɛ né Yésus : « Taatá, oó mi íínjíé maátɛ́ menyífé anyía mbá nyimóti ti ké túné á mɛ nuana, ɛ tɛ háná faaya aaha ɔ ɔkɔɔ́tɔ́ka menyífé. »

¹⁶Yésus ɔsɛ : « Cɔbá, kɔ́ kɔ lɔ́ŋɔ́kɔ uuwu ɔnɔ́mɛ. »

¹⁷Mbá oónjú ɔsɛ nááyá : « Ɛ tɛ ámɛ bá na ɔnɔ́mɛ. » Mbá Yésus ɔsɛ nááyá : « Ɛ́ɛ, ɔ ŋɔɔ́ táŋa taaká ekúlú ayɛ́ ɔ ŋɔɔ́ kɔɔna anyía ɔ tɛ ɔ́ bá na ɔnɔ́mɛ ;

¹⁸banɔ́mɔcɔ́ a yáaŋa bátáánɔ abá ɔ́ mɔɔ́ tɔ́nɔ́kɛ́na. Te oócí tɔ́na awɔ́ ɔ ɔ́ŋa nááyá aámbáya tɛ á bá uuwu ɔnɔ́mɛ. Úúwu ɔtáŋa oócí áŋa taaká. »[18]

¹⁹Ɛ́makɛ́la Yésus á táŋáka aáná, mbá oónjú u Samalí ɔsɛ nááyá : « Taatá, ɛ́ maá mɛ lɛca anyía ɔ ɔ́ŋa a mumɔtɛ́ *muhémúnyi bɛsana mɔ Bandɔ́mɛsɛ́.

²⁰Cíísú sɔ́kɔ́nɔ́ cɛ́ Samalí ŋaá bá cíé nyemiki Bandɔ́mɛsɛ́ a nɔkɔndɔ eenu;[19] mbá banɔ́, nu ŋa nɔ́ kɔ́ɔna anyía haála ahá ɔɔcɔ okime á nyɛmána wu o búle nyemi Bandɔ́mɛsɛ́ áŋa eé Yelúsalɛm. »

²¹Yésus ŋeé wuúci bɛ́káma ɔsɛ : « Meemé, menyí anyíaʼo : Ekúlú á yáaŋa hoóhi eyí nu ké nú nyemíki Bandɔ́mɛsɛ́, tɛ́ cáŋa ta a nɔkɔndɔ eenu, ta anyía eé Yelúsalɛm.

²²Banɔ́, baacɔ bá Samalí, nu ŋe nú nyémi ewú nu ti ŋé nú menyi ; mbá basɔ́ Besuif, tu ŋe sú nyémi ewú tu ŋe sú ményi, anyía Bandɔ́mɛsɛ́ ŋaá hɔ́lɛ́na náásɔ́ o onohi baacɔ.

²³Mbá ekúlú á yáaŋa ɔ ɔnyɛmana ; tua sɔ́ŋa tu ɔkɔɔna anyía yɛ́ ma nyɛ́mana, ayɛ́ ne *Efúúménénú yí Elilé na taaká cɛ́ bɛsana ké búle e kéndi taaká cí benyemi Síkíne ; nyɛnamá nyí be-wuúci-nyemi eényí aáná Síkíne ŋá yáámba.

²⁴Bandɔ́mɛsɛ́ áŋa Elilé ; aáná, baacɔ e bé ŋe bú wuúci nyemi ábɔ́ nyɛ́mana bé o wuúci nyemíki ne ne Efúúménénú yí Elilé na na taaká. »

²⁵Oónjú ɔsɛ nááyá : « I ŋeé mi menyi anyía *Mesíi, ɛ́cɛ *Kilís, káá fáaya ; wuúci u káá basɔ́ hémbúlékíne bɛsana bikime ekúlú ayɛ́ u káá fáaya. »

²⁶Mbá Yésus ɔsɛ nááyá : « Yaŋɔ́ ooci awɔ́ ɛ ŋa mɛ́ táŋa na kuɔŋɔ́, ya mɛ́ŋa waátákána. »

²⁷Aá yaátɛ́ ekúlú, baákɔ́nɛ́na bé Yésus ŋga bɔ́ hálɔ́mɔ́ná ; bɔ́ lɛ́ca waá táŋáka ne oónjú, bé ŋé kéké buéŋí. Mbá ta ɔɔcɔ ti ómó wuúci báta ɔsɛ : « Aátɛ́ ɔ ŋɔɔ́ waamba e ? » ta anyía : « Anyíatɛ́ ɔ ŋɔɔ́ táŋa ne oónjú oócí e ? »

²⁸Oónjú ŋa kakána é síke búáyɛ́ bɔtɔ́kɛ́ná bú menyífé, yɔ́ hálɔ́mɔ́na a bálɛ́ka. U ŋé túme ɔlaana baacɔ ɔsɛ :

²⁹« Ánɔ ka lɛ́cá ɔɔcɔ awɔ́ ú maá mɛ laakɛna bɛsana bikime abɛ́ ya mɛ́ŋa ɔkɛlákánɔ́. Te wuúci wáŋa Mesíi, ayɛ́ʼ ? »

³⁰Baacɔ ŋa bɔ́ hámɔ́kɔ́ná a bálɛ́ka, nyɛcɔbaka eényí né Yésus.

³¹Hú a yaátɛ́ ekúlú, bááyɛ́ baákɔ́nɛ́na ŋaá bá bébú wuúci éékíkínyi anyía wá nyíáka, báyɛ : « Láábi, mbá ɔ tɛ ɔ́ɔ nyíáta bɔkɔ aná e ? »

³²Mbá wuúci ɔsɛ náábɔ́ : « Ya mɛ́ŋa na ɔnyíá ewú nu ti ŋé nú ményi. »

³³Baákɔ́nɛ́na ŋe bú túme ɔbɛ́báta beébe ne beébe báyɛ : « Mbá bé mé síké keé wuúci aafɛ́na, ayɛ́ʼ ? »

³⁴Mbá Yésus ɔsɛ náábɔ́ : « Ekúlú ayɛ́ yámɛ kɛlaka bɔkɔ abɔ́ Mu-mɛ-tɔ́ma ŋá yáamba anyía yámɛ kɛláka, mío nyíoyísínyi búáyɛ́ buólí tɔ́na, yááŋa háyɛ anyía ɛ́ maá mɛ nyíáka.

³⁵Tɛ́ka bá naŋa bá kɔ́ɔ́naka anyía : “Hɛ́nánɔ iílí ínyíse, bé kéé túme ɔbánda bɛyɔyɛ́” e ? Mbá yaŋɔ́, ɛ ŋa mɛ́ banɔ́ láána anyía ánɔ lɛcáka bisíéné : Bɛnyɛ́ma mɔ́ yɔ́ɔ́nɔ́kɛ́na, bɛ́ mɔ lɔ́bɔ hú anyía bé biíbi sáŋáka ! [20]

³⁶Musáŋa naŋa muɔ́ bɔ́ŋɔ bɛnamá a yááyɛ́ elué ; wáŋa tɔ́na ɔ ɔsáŋa bɛnyɛ́ma bɛ́ yɔɔ́sɔɔ́sɔ yí olíhe yí ekúlú ekime. Aáná, ne mumiene na musáŋa á bɔ́ŋa bé obílénéke ɔlɔŋɔ.

³⁷Háyɛ ɛnjaba ŋa kɔɔna taaká anyía : “Mumiene é miekíne, musáŋa á sáŋáka.”

³⁸Ɛ́ ma mɛ́ banɔ́ tɔ́ma anyía núá ka sáŋáka e esíéné ayɛ́ banɔ́, nu tɛ ɔ́mɔ́ nɔ́ nyiɔ. Baacɔ bé etémbí ŋa bɔ́ nyiɔ́kɔ, banɔ́, nu ŋa nɔ́ bɔ́ŋɔ bɛnamá a búábɔ́ buólí. »

³⁹Baacɔ beéŋí bá bálɛ́ka cɛ Samalí eécí ŋe bú túme ɔháya mɔŋɔlɛ́ né Yésus a asana na ɔtáŋa ewú oónjú ŋeé beébe laána, ɔsɛ : « U ŋá mɛ laakɛ́na maamɛ mekilíkínyí mekime. »

⁴⁰Aáná, ɛŋakɛlá bá ka bɔ́ kuána Yésus, bé ŋé wuúci éékínyi anyía wé limíne ne beébe. U ŋe limíne hɔ́á mɔɔ́sɛ́ méfendí.

⁴¹Baacɔ beéŋí a bɔ́mɔtɛ́ tɔ́na ŋa bɔ́ hákɛ́na mɔŋɔlɛ́ nááyá a asana ne úúyé ɔtáŋa ;

⁴²ɛ́ɛhɛ́ bá ŋa bɔ́ bá bábɔ́ láakɛna oónjú u Samalí báyɛ : « Aámbáya, tɛ́ cáŋa hú ɔ ɔtáŋa awɔ́ ɔ́ɔ basɔ́ láakɛna tu ŋa sɔ́ háya mɔŋɔlɛ́ nááyá, mbá a asana ayɛ́ basɔ́ bɛ́muátá, tú ma sɔ́ lɔ́kɔ́máka úúyé ɔtáŋa na cáásɔ́ eetú, tu ŋe sú menyi tɔ́na anyía wáŋa Munohi mɔ baacɔ bá ɔmɛsɛ́. »

⁴³E elime cɛ mɔɔ́sɛ́ eémé méfendí emé Yésus ŋa kɛlá aáhá, u ŋa hátɔ́na yó súéte i iisí cɛ *Kalilé.

⁴⁴Aáná Yésus bɛ́muátá ŋaá kɔɔna ɔsɛ : « Bé ti ŋé kéke *muhémúnyi bɛsana mɔ Bandɔ́mɛsɛ́ aá buayá bɔ́ bɛ́muátá. »

⁴⁵Ahɛ́ u ŋgaá háma a Kalilé, bé ŋé wuúci káha aabá ekime anyía beébe bɛ́muátá ŋa caŋá abɔ́ bá a bɔŋanda bɔ́ *Basíka eé Yelúsalɛm, bá ŋa bɔ́ lɛ́cáka bɛsana bikime ebí u ŋaá kɛ́láka hɔ́á aá yaátɛ́ ekúlú.

⁴⁶U ŋgaá hálɔ́mɔ́na a Kána cɛ Kalilé, haála ehé u ŋeé céŋísi menyífé e meluku. Munyiɔnɔ kɔ́mɛ́na a muáŋá[21] ŋaá bá a Kabɛlnawum, uuyé ɔɔ́nɔ́ kɔ́nɔkɔ.

⁴⁷Yésus ŋa hátɔ́na eé Yuté, u ŋa faáya a Kalilé. Ɛ́makɛ́la munyiɔnɔ kɔ́mɛ́na eémú á lɔ́kɔ́ma aáná, mu ŋá faáya hɔ́á anyía mué wuúci bɛ́cɔ́kɔ́lɛ́na, wɔ́ lɔɔ́ a Kabɛlnawum o okoweéŋúnyísi uuyé ɔɔ́nɔ́ awɔ́ ú ŋaá bá hoóhi ne owé.

⁴⁸Yésus ɔsɛ : « Mbɔ́kɔ banɔ́, nu tɛ ŋá nɔ́ lɛ́ca na cáánɔ́ eése ne bikéki bí tubílícínyínyí ne bikémése bɛ́ bɛsana, ta buɔ́sɛ́ nu ti ké nú lúmitinine. »

⁴⁹Munyiɔnɔ kɔ́mɛ́na eémú yó wuúci laana ɔsɛ : « Taatá, cɔ́kɔ́lɛ, lɔɔ́ e uumi ooki, ekúlú eyí híími hɛɔ́nɔ́ɔ́nɔ́ á yánáŋa o ohélúmítéke. »

⁵⁰Mbá Yésus ɔsɛ nááyá : « Cɔbá o ooki, uuwe ɔɔ́nɔ́ má yááŋɔ́nua. » Ɔɔcɔ oócí ŋeé lumitinine ɔtáŋa ú Yésus, yɔ́ cɔ́ba o ooki.

⁵¹Ayɛ́ u ŋaá bá wɔɔ́ lɔ́ɔkɔ ɔ ɔhálɔ́mɔ́na e úúye ooki, u ŋɔ́ ɔɔ́ndɛ́mánána bááyɛ́ bɔnyiɔnɔ ábɔ́ fáakɔna o okoó wuúci laana anyía uuyé ɔɔ́nɔ́ ma yááŋɔ́nua.

⁵²U ŋeé beébe batá e ekúlú yɛ́ háányɛ́ ɔɔ́nɔ́ ŋá yaáŋɔ́núá. Mbá báyɛ : « Búocí nabuɔ́sɛ́, o onjéŋí ɔ́mɔtɛ́[22] nyiike ŋeé wuúci nyɛána. »

⁵³Aáná u ŋaá bɛ́táá anyía e ekúlú etéeyé Yésus ŋeé wuúci laána ɔsɛ : « Cɔbá o ooki, uuwe ɔɔ́nɔ́ ma yááŋɔ́nua. » Ɛ́ɛhɛ́ ne wuúci bɛ́muátá na ciayɛ́ ciíbe cɛ baacɔ ikime ŋa bɔ́ hákɛ́na mɔŋɔlɛ́ né Yésus.

⁵⁴Yésus ŋaá kɛ́láka *ekéki yí hibílícínyínyí yí éfendí eéyé ekúlú ayɛ́ u ŋaá bá a Kalilé, u húlúkúne eé Yuté.