Read Nomaande Saŋ 7 Bible Online

Saŋ 7 - Nomaande bible

Saŋ 7

¹E elime eécí, Yésus ŋaá bá waá bɛ́náŋáláka a *Kalilé ; u ŋaá bá u ti é léne ɔbɛ́náŋála i iisí ci Yuté anyía betéŋínyi *Besuif ŋa bɔ́ bá bábɔ́ áambaka o wuúci ɔ́ɔ́nɔ.

²Bɔŋanda bú Besuif, bɔŋanda bú Bikule[28] ŋaá bá búa yáaŋa hoóhi,

³mbá benyíinyí bé Yésus báyɛ nááyá : « Hatɔ́na aaha, cɔba eé Yuté, ananyía bɔ́ɔ́wɔ *baákɔ́nɛ́na ábɔ́ lɛ́cáka tɔ́na bɛsana abɛ́ ɔ ŋɔ́ɔ kɛla.

⁴Mbɔ́kɔ ɔɔcɔ ŋa yáámba anyía bé wuúci menyi, u tɛ ɔ́mɔ nyɛ́mana wu ɔkɛlaka bɛsana i indiitie. Háyɛ ɔ ŋɔɔ́ kɛla eébí bɛsana aáná, biíbi kɛláka a miányɛ́, baacɔ bekime ɔ lɛcaka. »

⁵Yááŋa anyía ta bááyɛ́ benyíinyí tɔ́na ŋa bɔ́ bá bá tɛ ábɔ́ háyá mɔŋɔlɛ́ nááyá.

⁶Mbá Yésus ɔsɛ náábɔ́ : « Yáámɛ ekúlú tɛ́ ŋa nyɛ́mána, mbá náánɔ́, ekúlú ekime áŋa hú ambányɛ na ambányɛ.

⁷Baacɔ tɛ ábɔ́ bá bá ɔ banɔ́ aákákɛ́na. Yáábɔ́ yaáká áŋa náámɛ, anyía ɛ ŋa mɛ́ háya ɛmbasɔ́ a yáábɔ́ aháŋá ɛsɛ́ maabɔ́ monyiókínyí áŋa maabɛ́.

⁸Banɔ́, ánɔ cɔbá a bɔŋanda. Aá yaŋɔ́, ɛ tɛ ŋaá mɛ bá ɔ ɔcɔba hɔ́á[29] anyía yáámɛ ekúlú tɛ ŋá nyɛ́mána. »

⁹Ɛ́makɛ́la wé beébe laána aáná, u ŋɔ́ lɔbɔ a Kalilé.

¹⁰Ayɛ́ benyíinyí bé Yésus ŋe bú súéte a bɔŋanda, wuúci bɛ́muátá ŋe síké súéte tɔ́na hɔ́á ; u ŋaá bá u ti húle é bítóŋínyi baacɔ o ohónyí, u ŋeé súété indiitie.

¹¹Betéŋínyi *Besuif ŋaá bá bé húle é bú wuúci aambaka a bɔŋanda, bá bátaka báyɛ : « Wuúci weényí e ? »

¹²Baacɔ ŋa bɔ́ bá bébú lúlélúle buéŋí a yááyɛ́ asana. Bɔ́mɔtɛ́ kɔ́ɔnaka báyɛ : « Ɔɔcɔ oócí áŋa ambányɛ yɛ́ ɔɔcɔ. » Bɔ́mɔtɛ́ tɔ́na báyɛ : « Eéʼeé, wáŋa o onenisi bunɔŋɔ. »

¹³Mbá ta ɔɔcɔ ŋaá bá u tɛ á táŋa a miányɛ́ anyía bekime ŋaá bá bébú líkíméke betéŋínyi Besuif.

¹⁴Bɔŋanda ŋaá bá búá yáaŋa ɛ ɛkatɛ́katɛ́ ekúlú eyí Yésus ŋa cɔ́ba eé *Ciíbe cɛ Bandɔ́mɛsɛ́ o oweékúnyi baacɔ.

¹⁵Besuif ŋe bú túme okéke, bá kɔ́ɔnaka báyɛ : « Anyána ɔɔcɔ ooci áŋa ne omenyi ooci aana, wuúci tɛ́ka waákɔ́nákɛ́nánɔ́ e ? »

¹⁶Mbá ɔsɛ náábɔ́ : « Ɛ tɛ ámɛ bá indíné cɛ bɛsana ebí i ŋeé mi éékúnyi baacɔ. Bí ŋeé húle ná Mu-mɛ-tɔ́ma.

¹⁷Ɔɔcɔ ewú u ŋeé léne ɔkɛla háyɛ Bandɔ́mɛsɛ́ ŋeé léne ŋee ményi mbɔ́kɔ nyiámɛ nyiékúnyi ŋeé húle ná Bandɔ́mɛsɛ́ ta anyía ɛ ŋaá mɛ táŋa a ciamɛciamɛ.

¹⁸Ɔɔcɔ awɔ́ u ŋaá táŋa aá ciayɛ́ciayɛ́ ŋa yáamba núáyɛ́ nuúmi nɔ́ bɛ́muátá ; mbá ooci awɔ́ u ŋaá yáamba nuúmi nɔ́ Mu-wuúci-tɔ́ma ŋaá táŋa taaká. U tɛ a bá na mafala.

¹⁹Ɔ́kɔ, tɛ́ka *Moyís ŋaá banɔ́ íínjíékíne bikotí e ? Mbá ta ɔɔcɔ aá banɔ́ tí ŋé biíbi látɛ́na. Anyíatɛ́ nú ŋa nɔ́ áamba ɔ mɛ ɔ́ɔ́nɔ e ? »

²⁰Mbá báyɛ nááyá : « Ɔ ɔ́ŋa na *aabɛ́ yí elilé ! Aányɛ́ ɔ́ mɔ́ lɛca wa yáámbaka ɔ kuɔŋɔ́ ɔ́ɔ́nɔ e ? »

²¹Mbá u ŋé beébe laána ɔsɛ : « Ɛ́ ma mɛ́ kɛla asana hú ɔ́mɔtɛ́, nua núáŋa o okéke !

²²Moyís ŋaá banɔ́ íínjíé okotí yí buecí a báánɔ́ baáná a banɔ́mɔcɔ́ ; tɛ́ cáŋa wuúci u ŋaá bá na yaátɛ́ okotí mbá cíínú sɔ́kɔ́nɔ́. Banɔ́ eebe nu ŋa nɔ́ áácana ta *buɔ́sɛ́ bú ehélúme.

²³Ɔ́kɔ, bá ŋa yááca ɔɔ́nɔ́ a wɔnɔ́mɔcɔ́ ta hú buɔ́sɛ́ bú ehélúme, bá tɛ nɔ́kɔ okotí yí Moyís, anyána nú ŋe nú mí liŋine ekúlú ayɛ́ yaŋɔ́, í meé mi eéŋúnyísi cɛɛ́tɔ ikimekime cɛ ɔɔcɔ buɔ́sɛ́ bú ehélúme e ?

²⁴Nuti túné lɛ́caka bɛsana ɔmuaná na ɔmuaná, mbá énu biíbi lɛcáka a nyɛlɛca a nyɛtálɛ́mánánɔ́. »

²⁵Bɔ́mɔtɛ́ baacɔ bé Yelúsalɛm ŋa bɔ́ kɔɔna báyɛ : « Tɛ́ cáŋa ɔɔcɔ ooci bá ŋá yáamba ɔwɔɔ́nɔ e ?

²⁶U ŋaá táŋa ɛ ɛkatɛ́katɛ́ cɛ baacɔ, ɔɔcɔ wu o wuúci kɛla bɔkɔ tɛ́ka ! Báásɔ́ betéŋí má bɔ́ lɛca anyía wáŋa *Mesíi, ayɛ́ʼ ?

²⁷Yiíye anyía ɔɔcɔ ooci, tu ŋe sú ményi ciayɛ́ indíné ; mbá Mesíi, ta ɔɔcɔ tí kéé menyi ciayɛ́ indíné ekúlú ayɛ́ u káá fáaya. »

²⁸Aáná Yésus ŋaá táŋɛ́ta okelú ɔ ɔmuaná, we yéékúnyíki eé *Ciíbe cɛ Bandɔ́mɛsɛ́, ɔsɛ : « Ɔ́kɔ, tɛ́ka nu ŋe nú keti anyía nu ŋe nú menyi aányɛ́ ya mɛ́ŋa, nu menyukune tɔ́na ciamɛ indíné e ? Yiíye anyía ɛ tɛ ɔ́mɔ́ fáaya a ciamɛciamɛ ; Mu-mɛ-tɔ́ma áŋa taaká, mbá nu ti ŋé nú muúmu menyi.

²⁹Yaŋɔ́, i ŋe mí muúmu menyi anyía i ŋeé mi húle nááyá, i menyukune tɔ́na anyía muúmu mu ŋaá mɛ tɔ́má. »

³⁰Ɔ ɔtáŋa oócí bé ŋé túme ɔwaamba o wuúci hatɛna, mbá ta ɔɔcɔ tí ómoó wuúci tála ɔɔbɔ́ aá cɛɛ́tɔ, anyía yááyɛ́ ekúlú ŋaá bá ɛ́ tɛ́ ŋa nyɛ́mána.

³¹Ta híáná, baacɔ beéŋí ŋa bɔ́ hákɛ́na mɔŋɔlɛ́ nááyá, bá kɔ́ɔnaka báyɛ : « Ekúlú eyí Mesíi káá fáaya, u káá kɛ́laka bikéki bí tubílícínyínyí biéŋí, bɛ́ hɔ́laka eebi abɛ́ ɔɔcɔ ooci áŋa ɔkɛlákánɔ́ e ? »

³²*Bafalisiɛ́ŋ ŋa bɔ́ lɔ́kɔ́máká háyɛ baacɔ ŋa bɔ́ bá bébú lúlélúle a asana yí Yésus. Ɛ́ɛhɛ́ ne betéŋínyi *beluli nyiínjie na Bafalisiɛ́ŋ ŋa bɔ́ tɔ́má bibulúsu ɔ ɔkɔhátɛna Yésus.

³³Aáná Yésus ŋeé beébe laána ɔsɛ : « Ya mɛ́ánáŋa na banɔ́ hú hikúlúkúlú ; e elime eécí, ɛ ká mɛ́ hálɔ́mɔ́na ná Mu-mɛ-tɔ́ma.

³⁴Nu ŋa nɔ́ cɔ́cɔbaka ɔ ɔ mɛ aambaka, nu tɛ mɛ bɔ́ŋɔ ; haála ehé i ké mi súéte, nu tɛ anɔ́ bá nú ɔkɔɔ́háma hɔ́á. »

³⁵*Besuif ŋe bú túme ɔbatana beébe ne beébe, báyɛ : « Háányɛ́ u kéé súéte mbá tu ti ké sú wuúci bɔ́ŋɔ e ? U kéé súéte né Besuif a bá na ma bɔ́ bɛ́látáka na *Bakɛlɛ́k, yó búle éékúnyi Bakɛlɛ́k ayɛ́ʼ ?

³⁶U ŋa kɔ́ɔna anyía tu ké sú wuúci aambaka, tu ti wuúci bɔ́ŋɔ, anyía tu tɛ asɔ́ bá tú ɔkɔɔ́háma haála ahá u káá bá. Aáná ɛ́cɛ aátɛ́ e ? »

³⁷Buɔ́sɛ́ bɔ́ nyɛmana nyɛ́ bɔŋanda ŋaá bá yaandándá yɛ́ buɔ́sɛ́ ɔ ɔhɔla. Buúbu Yésus ŋaá tálɛ́mɛ́ná, yɔ́ táŋɛ́ta okelú ɔ ɔmuaná ɔsɛ : « Ɔɔcɔ a wáŋa ne nyimóti á faáya náámɛ, wá ka múá menyífé.

³⁸Háyɛ yááŋa yɔɔ́ŋɔ́kɔ́nɔ́ anyía : “Tucéme tú menyífé e mé ŋe yíinjiéne olíhe ké búle á háma ɔ ɔtɛ́má ú ɔɔcɔ awɔ́ á háya mɔŋɔlɛ́ náámɛ.” »

³⁹(Yésus ŋaá bá waá táŋáka aáná a asana yí *Efúúménénú yí Elilé ayɛ́ baháya mɔŋɔlɛ́ nááyá ŋá bɔ́ nyɛ́mána bá ɔbɔ́ŋɔ. Yááŋa anyía Bandɔ́mɛsɛ́ ŋaá bá u tɛ ŋáá tɔ́má Elilé anyía u ŋaá bá ɛ́cɛ u ti ŋéé béétísi Yésus eé nuúmi a nuáŋá.)

⁴⁰Ɛ́makɛ́la nyɛkɔca nyɛ́ baacɔ á lɔ́kɔ́máka ɔtáŋa oócí, a bɔ́mɔtɛ́ báyɛ : « Aá taaká, ɔɔcɔ ooci áŋa Muhémúnyi bɛsana mɔ Bandɔ́mɛsɛ́ amɔ́ tu báka tuasɔ́ tátáka ! »

⁴¹A bɔ́mɔtɛ́ tɔ́na báyɛ : « *Mesíi ooci wáŋa ! » Mbá bé etémbí báyɛ : « Mesíi awɔ́ háányɛ́ wáŋa wu obíbíéne a Kalilé e ?

⁴²Tɛ́ka Ciɔɔ́ŋɛ́ cɛ́ Bandɔ́mɛsɛ́ ŋaá kɔ́ɔna tɔ́na cɛ́sɛ Mesíi kéé bíbíéne a hɛnyɛ́nɔ́ hɛ́ *Táfit, cɛ́ kɔ́ɔnaka tɔ́na anyía u kéé bíbíéne a Bɛ́tɛlɛhɛm,[30] bunɔŋɔ bɔ́ Táfit e ? »

⁴³Aáná baacɔ ŋa bɔ́ aálɔ́nákáná a asana yí Yésus.

⁴⁴Bɔ́mɔtɛ́ aabɔ́ ɛ ɛkatɛ́katɛ́ ŋé búle áamba o wuúci hatɛna, mbá ta ɔɔcɔ te o wuúci tála ɔɔbɔ́.

⁴⁵Bibulúsu ŋa bɔ́ hálɔ́mɔ́ná, bɔ́ kɔ kúána ne betéŋínyi *beluli nyiínjie na *Bafalisiɛ́ŋ. Betéŋínyi beluli nyiínjie ŋé beébe batá báyɛ : « Háá ! Anyána nú má ka nɔ́ hálɔ́mɔ́na hú wáánɔ́, nu tɛ basɔ́ héléníne Yésus e ? »

⁴⁶Mbá bibulúsu bɛ́sɛ : « Ta ɔɔcɔ ú ti ŋe ményi ɔtáŋa ta buɔ́sɛ́ háyɛ ɔɔcɔ oócí. »

⁴⁷Bafalisiɛ́ŋ báyɛ : « Ɔɔcɔ oócí ma ká banɔ́ tɔ́bɔ́lɔ́kɔ, ta banɔ́ tɔ́na e ?

⁴⁸Aányɛ́ te e betéŋínyi *Besuif ta a Bafalisiɛ́ŋ na ma cáŋa á háya mɔŋɔlɛ́ nááyá e ?

⁴⁹Nyɛkɔca nyɛ́ baacɔ eényí nyikime ti ŋé menyi *bikotí bí *Moyís ; nyɛ́áŋa na nyɛlɔmɔ nyí ohúle ná Bandɔ́mɛsɛ́. »

⁵⁰Nikotɛ́mɛ, ooci awɔ́ u ŋa caŋá ka kúána Yésus e yoólóko ŋaá bá ɔ ɔlɔŋɔ ú Bafalisiɛ́ŋ. U ŋeé beébe laána ɔsɛ :

⁵¹« Ɔ́kɔ, tɛ́ka bíásɔ́ bikotí tɛ ŋá hátɛna ɔɔcɔ tɛ́ka ne o wuúci kélísi, tɛ́ka ne omenyi tɔ́na asana ayɛ́ wáŋa ɔkuánɔ́ e ? »

⁵²Bó wuúci bɛ́káma báyɛ : « Kuɔŋɔ́ ɔwaákɔ́nákɛ́nánɔ́ bɔmbányɛ Ciɔɔ́ŋɛ́ cɛ́ Bandɔ́mɛsɛ́, keyé ɔ ŋɔɔ́ lɛca anyía *muhémúnyi bɛsana mɔ Bandɔ́mɛsɛ́ ta mumɔtɛ́ tí ŋéé bíbíéne a *Kalilé. » [

⁵³E elime cɛ bɛsana eébí, baacɔ ŋé bú sémbényíkínyi, hú naányɛ́ weé súéte e úúye ooki.