Read Nomaande Saŋ 8 Bible Online

Saŋ 8 - Nomaande bible

Saŋ 8

¹Ɛ́makɛ́la baacɔ me bú sémbényíkínyi, Yésus ŋá bááta a nɔkɔndɔ nú Molifié.

²Tútútú ɔ ɔyá ɔyá u ŋé túné cɔ́ba eé *Ciíbe cɛ Bandɔ́mɛsɛ́. Baacɔ beéŋí ŋa bɔ́ fáakɔna nááyá. Aáná u ŋee límíne ɔ ɔmɛsɛ́, u ŋé túme o beébe éékúnyi.

³Weé beébe eékúnyíki aáná, ne *beékúnyi bikotí na *Bafalisiɛ́ŋ a bɔ́mɔtɛ́ ŋé bu wuúci héléníne oónjú. Bé ŋeé wuúci cúánɛ́na wa fíanaka na ɔnɔ́mɔcɔ́ u etémbí. Bé ŋe fúle é télímínyi oónjú oócí ɛ ɛkatɛ́katɛ́ cɛ baacɔ,

⁴mbá báyɛ né Yésus : « Muékúnyi, bá má cúánɛ́na oónjú oócí waá fíanaka na ɔnɔ́mɔcɔ́ u etémbí.

⁵Bikotí bí *Moyís ŋaá basɔ́ iínjie makɛ́nda anyía i indélímínyínyi eeci, bá ŋá nyɛmána bé otúméke oónjú andányɛ́ ɔ ɔkɔɔ́háma anyía wé we. Mbá kuɔŋɔ́ʼo, nyiɔ́wɔ nyɛkɔɔna áŋa anyána e ? »

⁶Ciabɔ́ ɛmbataka eécí ŋaá bá ɔ ɔkɔkɔna Yésus ɔ ɔbɔ́ŋɔ hɛkɔma hí o wuúci túme. Mbá u ŋeé kútímíne, yó túme ɔwɔɔ́ŋɔ ɔ ɔmɛsɛ́ na hɛnɔɔ́nɔ́.

⁷Ahɛ́ bá ŋa bɔ́ bá bébú wuúci hɛ́nyákɛ́na na ɛmbataka, u ŋá bɔ́nɔ́núá, mbá ɔsɛ náábɔ́ : « Aá banɔ́ eebe bekime, ɔɔcɔ ewú u ŋé menyi anyía ta buɔ́sɛ́ ú tɛ́ ŋá kɛ́la bɔɔbɛ́, wá caŋácáŋa otúme oónjú ooci nyɛndányɛ́. »

⁸Ayɛ́ u ŋaá táŋɛ́tá aáná, u ŋá hálɔ́mɔ́na kutimine, u ŋá cɔba ne buúse ɔ ɔwɔɔ́ŋɔ ɔ ɔmɛsɛ́.

⁹Ɛ́makɛ́la baacɔ ábɔ́ lɔ́kɔ́ma ɔtáŋa ú Yésus, bé ŋé nyímúkúne ɔmɔtɛ́ na ɔmɔtɛ́, o otúme e bilunyí. Yésus ŋé síké lɔ́bɔ hú wááyá ne oónjú oócí ɔtálɛ́mɛ́nánɔ́ eeyé eé buúse.

¹⁰Yésus ŋe túné á bɔ́nɔ́nua, mbá ɔsɛ né oónjú : « Meemé, mbá ba-kuɔŋɔ́-sɔ́mɛ́na beényí e ? Ta ɔɔcɔ tɛ ɔ́mɔ́ kuɔŋɔ́ iínjie nyɛkua e ? »

¹¹Oónjú ɔsɛ : « Ta ɔɔcɔ, Taatá. » Mbá Yésus ɔsɛ nááyá : « Ta yaŋɔ́ tɔ́na i ti ŋé mi o wiínjie nyɛkua. Ɔ wáŋa wu osúéte, mbá, o otúme aámbáya, eti túné kɛ́la bɔɔbɛ́ʼo ! »]

¹²Yésus ŋe túné táŋáka a nyɛkɔca nyɛ́ baacɔ ɔsɛ : « Ya mɛ́ŋa eese yɛ́ baacɔ bá ɔmɛsɛ́. Ɔɔcɔ awɔ́ u ŋá mɛ látɛna káá bá ne eese e yí kéé wuúci iínjie olíhe. U tɛ ká háná a kánda i ibíne noómi. »

¹³*Bafalisiɛ́ŋ báyɛ nááyá : « Aámbáya, ɔ ŋɔɔ́ bɛ́háyɛ́na ɛmbasɔ́ kuɔŋɔ́ bɛ́muátá. Mbɔ́kɔ aáná, ɛ́cɛ anyía bɛsana abɛ́ ɔ ŋɔɔ́ kɔɔna tɛ a bá taaká. »

¹⁴Mbá Yésus ɔsɛ náábɔ́ : « Ta ɛ ŋá mɛ bɛ́hákɛ́nɛ́na ɛmbasɔ́ yaŋɔ́ bɛ́muátá, bɛsana abɛ́ ɛ ŋa mɛ́ kɔɔna áŋa taaká, anyía i ŋe mí ményi haála ehé i ŋeé mi húle, i menyukune tɔ́na haála ehé mío súéte. Mbá banɔ́, nu ti ŋé nú menyi haála ehé i ŋeé mi húle, nu ti menyi ta haála ehé mío súéte.

¹⁵Nu ŋa nɔ́ bɔ́sɔna asana a nyíánɔ́ nyɛlɛca nyɛ́ baacɔ bá ɔmɛsɛ́. Yaŋɔ́, ɛ tɛ ŋá mɛ bɔsɔnɛna ɔɔcɔ asana.

¹⁶Mbɔ́kɔ yááŋa anyía yámɛ bɔsɔ́na, nyiámɛ nyɛbɔsɔna áŋa taaká anyía ɛ tɛ amɛ́ bá hú wáámɛ o o yiíyi bɔsɔna. Ya mɛ́ŋa ɔlɔŋɔ ne Síkíne, Mu-mɛ-tɔ́ma.

¹⁷Yááŋa yɔɔ́ŋɔ́kɔ́nɔ́ a bíánɔ́ *bikotí anyía mbɔ́kɔ baacɔ béfendí ŋa bɔ́ háya ɛmbasɔ́ bɔkɔ búmɔtɛ́ a asana, asana eéyé áŋa taaká.

¹⁸Ɛ ŋaá mɛ bɛ́háyɛ́na ɛmbasɔ́ ; Síkíne tɔ́na, Mu-mɛ-tɔ́ma, ŋeé mi ciíci háyɛ́na. »

¹⁹Bé ŋeé wuúci batá báyɛ : « Ɔɔtɛ́ weényí e ? » Yésus ɔsɛ : « Nu ti ŋé nú menyi ta yaŋɔ́ ta ciamɛ Síkíne. Mbɔ́kɔ nuenú mí menyukune, keyé nu ŋe nú menyi tɔ́na ciamɛ Síkíne. »

²⁰Yésus ŋaá táŋáká ɔtáŋa oócí wuúci eé *Ciíbe cɛ Bandɔ́mɛsɛ́, a nyɛháya nyiínjie. Mbá ta ɔɔcɔ ti ómó wuúci hatɛna, anyía yááyɛ́ ekúlú ŋaá bá yɛ́ tɛ́ ŋa nyɛ́mána.

²¹Yésus ŋeé beébe laána tɔ́na ɔsɛ : « Ayɛ́ i ké mí súéte, nu ká nɔ́ mɛ aambaka. Mbá nu ké nú wéékúne aanɔ́ a maabɛ́ noómi. Nu tɛ anɔ́ bá nú ɔcɔba haála ehé i ké mí súéte. »

²²*Besuif ŋe bú túme ɔbɛ́báta beébe ne beébe báyɛ : « U ŋa kɔ́ɔ́na anyía tu tɛ asɔ́ bá tú osúéte haála ehé yó súéte. Aáná ɛ́cɛ anyía yó súéte ɔ ɔkɔɔ́bíɔ́nɔ ayɛ́ʼ ? »

²³Mbá ɔsɛ náábɔ́ : « Nu ŋe nú húle ɔ ɔmɛsɛ́ ooci, yaŋɔ́ i ŋe mí húle ɔ Ɔmuaná. Nua nɔ́ŋa bá ɔmɛsɛ́ ooci, ɛ tɛ á mɛ bá u ɔmɛsɛ́ ooci.

²⁴Aá yaátɛ́ asana ɛ́ ma mɛ́ banɔ́ láana anyía nu ké nú wéékúne aanɔ́ aá maabɛ́ noómi. Énu menyí anyía nu ké nú wéékúne aanɔ́ aá maabɛ́ noómi, mbɔ́kɔ nu ŋé nú kíne olumitinine anyía “Ya mɛ́ŋa Ooci awɔ́ ya mɛ́ŋa.” »[31]

²⁵Bó wuúci batá báyɛ : « Ɛ́cɛ anyía ɔ ɔ́ŋa aányɛ́ e ? » Mbá Yésus ɔsɛ : « Ya mɛ́ŋa Ooci ewú i ŋeé mi túme ɔ banɔ́ láana buáyá.

²⁶Ya mɛ́ŋa na bɛsana biéŋí bɛ́ ɔkɔɔnaka aanɔ́ a asana. Bɛsana eébí bikime banɔ́ lɛ́caka, mbá Mu-mɛ-tɔ́ma ŋa kɔɔna taaká ; bɛsana bikime abɛ́ yaŋɔ́ tɔ́na ɛ ŋa mɛ́ laána baacɔ áŋa hú eebi abɛ́ ɛ ŋaá mɛ lɔ́kɔ́máká nááyá. »

²⁷Bá tɛ́ ɔ́mɔ́ bɔ́ lɔ́kɔ́ma anyía u ŋeé bíkéti asana yí Síkíne.

²⁸Ɛ́ɛhɛ́ u ŋeé beébe laána ɔsɛ : « Nu ké nú ményi anyía “Ya mɛ́ŋa Ooci awɔ́ ya mɛ́ŋa”[32], ekúlú ayɛ́ nu ká nɔ́ caŋacaŋa o mi bééti, yaŋɔ́ Ɔɔ́nɔ́ u ɔɔcɔ. Nu ké nú ményi tɔ́na anyía ɛ tɛ ŋá mɛ kɛla bɔkɔ a ciamɛciamɛ ; ɛ ŋaá mɛ táŋa hú bɛsana ebí u ŋeé mi eékúnyíki.

²⁹Mu-mɛ-tɔ́ma áŋa na yaŋɔ́. Mu ti ómó mi síke hú wáámɛ, anyía ɛ ŋa mɛ́ kɛla ekúlú ekime hú bɔkɔ e bú ŋeé muúmu hɛkɛna. »

³⁰Ɔ ɔtáŋa oócí aáná, baacɔ beéŋí nyɛhákɛ́na mɔŋɔlɛ́ nááyá eényí.

³¹Ɛ́ɛhɛ́ Yésus ŋaá laána *Besuif a bá ŋa bɔ́ hákɛ́na mɔŋɔlɛ́ nááyá ɔsɛ : « Mbɔ́kɔ nu ŋá nɔ́ lɔ́kɔ́mákɛ́na nyiámɛ nyiékúnyi, nua nɔ́ŋa taaká báámɛ *baákɔ́nɛ́na.

³²Aáná nu ké nú menyi taaká ; taaká cíɔ banɔ́ háŋɔ́náka a buɔ́lɛ́. »

³³Mbá báyɛ nááyá : « Tua sɔ́ŋa baáná bá Abɛ́laham;[33] ta buɔ́sɛ́ ɔɔcɔ tɛ́ ŋá basɔ́ tíŋe a buɔ́lɛ́. Mbá tu ŋa sɔ́ bɛ́báta anyána ɔ́ ŋɔɔ́ kɔɔna anyía tu ká sɔ́ bá biéti. »

³⁴Mbá Yésus ɔsɛ : « Ɛ ŋa mɛ́ banɔ́ láana aá taaká : Ɔɔcɔ awɔ́ u ŋá kɛla bɔɔbɛ́ áŋa yɔɔ́lɛ́ yɛ́ bɔɔbɛ́.

³⁵Yɔɔ́lɛ́ tɛ ŋá bɛ́lɔ́kɔ́mɛ́na ekúlú ekime ciayɛ́ ciíbe cɛ baacɔ, mbá ɔɔ́nɔ́ ŋa bɛ́lɔ́kɔ́mɛ́na ciayɛ́ ciíbe cɛ baacɔ ekúlú ekime.

³⁶Yaŋɔ́ Ɔɔ́nɔ́, yámɛ banɔ́ háŋɔ́náka ɔ buɔ́lɛ́, aáhá nu ká nɔ́ bámɛ́na taaká cí biéti.

³⁷Ɛ́ɛ, i ŋe mí menyi anyía nua nɔ́ŋa baáná bá *Abɛ́laham. Mbá banɔ́ eebe nu ŋa nɔ́ áamba ɔ mɛ ɔ́ɔ́nɔ, anyía nu ti ŋé nú lumitinine úúmi ɔtáŋa.

³⁸Yaŋɔ́, ɛ ŋa mɛ́ kɔɔna bɛsana abɛ́ ciamɛ Síkíne ŋeé mi tóŋgínyi ; mbá banɔ́, nuánɔ́ kɛ́laka abɛ́ nu ŋa nɔ́ lɔ́kɔ́máká ná cianɔ́ síkíne. »

³⁹Besuif báyɛ nááyá : « Tú ma sɔ́ ɔ laana anyía ciasɔ́ síkíne áŋa Abɛ́laham. » Mbá Yésus ɔsɛ : « Mbɔ́kɔ nuanɔ́ bámɔ́kɔ́nɛ́na baáná bá Abɛ́laham, keyé nu ŋa nɔ́ kɛ́la maayɛ́ mekilíkínyí.

⁴⁰Mbá aámbáya, banɔ́ eebe ɛ́ naŋa yámɛ banɔ́ laána taaká acɛ́ Bandɔ́mɛsɛ́ ŋé mi tóŋgínyi, nu ŋa nɔ́ áamba ɔ mɛ ɔ́ɔ́nɔ. Abɛ́laham tɛ ɔ́mɔ́ bɛ́kɛ́lɛ́na a nyɛnamá eényí !

⁴¹Maanɔ́ mekilíkínyí áŋa bɔkɔ búmɔtɛ́ na ma cianɔ́ síkíne. » Mbá báyɛ : « Tu tɛ asɔ́ bá baáná bá ɛnjɔkɔ́nɔ́nɔ ; tua sɔ́ŋa baáná bá Bandɔ́mɛsɛ́ bé obíbíéníne. »

⁴²Mbá Yésus ɔsɛ : « Mbɔ́kɔ nuanɔ́ bámɔ́kɔ́nɛ́na baáná bá Bandɔ́mɛsɛ́ bé obíbíéníne, keyé nu ŋe nú mi léne anyía i ŋeé mi húle nááyá. A yááyɛ́ asana ya mɛ́ŋa aaha ; ɛ tɛ ɔ́mɔ́ bɛ́fáayɛna, mbá wuúci u ŋaá mɛ tɔ́ma.

⁴³Anyíatɛ́ nu tɛ ŋá nɔ́ lɔ́kɔ́ma bɔmbányɛ úúmi ɔtáŋa e ? Nu tɛ ŋá nɔ́ lɔ́kɔ́ma bɔmbányɛ úúmi ɔtáŋa anyía ú ŋaá banɔ́ hɔ́la ; nu tɛ ŋa nɔ́ bá na makɛ́nda ma ɔlɔ́kɔ́ma.

⁴⁴Musɔ́mɛ́na áŋa cianɔ́ síkíne ; a asana eéyé nú ŋe nú léne ɔkɛla háyɛ bú ŋeé wuúci hɛkɛna. Muá báka ɔŋána feeké. Mu tɛ́ ŋaá bá aá taaká noómi anyía taaká tɛ á bá nááyá. Ekúlú ayɛ́ mu ŋaá táŋa bɛfala, mu ŋe nyíóyísínyi nyíáyɛ́ nyɛbá. Mu ŋa kɛ́la aáná anyía muáŋa ɔfalafala, muúmu tɔ́na síkíne cɛ afala.

⁴⁵Mbá ahɛ́ yaŋɔ́ ɛ ŋa mɛ́ táŋa taaká, ɛ́ɛhɛ́ nu tɛ anɔ́ bá nú olumitinine úúmi ɔtáŋa.

⁴⁶Aányɛ́ wáŋa wu otóŋínyi bɔɔbɛ́ abɔ́ ɛ́ ŋa mɛ́ kɛlaka e ? Mbɔ́kɔ ɛ ŋaá mɛ́ táŋa hú taaká, anyíatɛ́ nu ti ŋé nú lumitinine úúmi ɔtáŋa aná e ?

⁴⁷Ɔɔcɔ a wáŋa u Bandɔ́mɛsɛ́ ŋaá lɔ́kɔ́ma ɔtáŋa ú Bandɔ́mɛsɛ́. Mbá nu tɛ anɔ́ bá bá Bandɔ́mɛsɛ́ ; yaátɛ́ asana nu tɛ ŋá nɔ́ lɔ́kɔ́ma. »

⁴⁸*Besuif ŋa bɔ́ bɛ́kámá Yésus báyɛ : « Tɛ́ka ɔ́ mɔɔ́ lɛca anyía tua sɔ́ŋa aá taaká ekúlú ayɛ́ tu ŋa sɔ́ kɔ́ɔna anyía ɔ ɔ́ŋa u Samalí, tu kɔɔnaka tɔ́na anyía ɔ ɔ́ŋa na aabɛ́ yí elilé e ? »

⁴⁹Mbá Yésus ɔsɛ : « Ɛ tɛ ámɛ bá na *aabɛ́ yí elilé. I ŋe mí nyemi ciamɛ Síkíne, mbá banɔ́, nu ŋe nú mi nyókóli.

⁵⁰Ɛ tɛ ŋá mɛ aamba núámɛ nuúmi. Mbá ú etémbí áŋa hɔ́á ewú u ŋé mi nuúnu aambɛna. Wuúci u kéé ményi háyɛ u káá bɔ́sɔ́na.

⁵¹Ɛ ŋa mɛ́ banɔ́ láana aá taaká anyía : Ɔɔcɔ awɔ́ u ŋá látɛ́na úúmi ɔtáŋa ti kéé wé ta buɔ́sɛ́. »

⁵²Ɛ́ɛhɛ́ Besuif báyɛ : « Aámbáya tú ma sɔ́ lɛ́ca taaká taaká anyía ɔ ɔ́ŋa na aabɛ́ yí elilé ! *Abɛ́laham ŋeé wé, *behémúnyi bɛsana bá Bandɔ́mɛsɛ́ tɔ́na bó wéékúne. Mbá kuɔŋɔ́ ɔ ŋɔɔ́ kɔɔna anyía mulátɛ́na úúwu ɔtáŋa tí kéé wé.

⁵³Hú Abɛ́laham, ciasɔ́ síkíne é wé, ɛ́cɛ anyía kuɔŋɔ́, ɔ ŋɔɔ́ waamba obíhíite waáŋá o o wuúci hɔla e ? Behémúnyi bɛsana bá Bandɔ́mɛsɛ́ ŋe bú wéékúne. O ŋoó bíkéti ɔmuátá anyía ɔ ɔ́ŋa aányɛ́ e ? »

⁵⁴Yésus ɔsɛ náábɔ́ : « Mbɔ́kɔ yaŋɔ́ bɛ́muátá i ŋe mí bíhííte waáŋá, keyé nuámɛ́ nuúmi áŋa etémbí. Ciamɛ Síkíne u ŋeé mi iínjie nuúmi. Waátákána awɔ́ nú ŋa nɔ́ kɔɔ́na anyía wáŋa cianɔ́ Bandɔ́mɛsɛ́,

⁵⁵nu ti wuúci menyi ; yaŋɔ́ i ŋe mí wuúci menyi. Yámɛ banɔ́ láana anyía i ti ŋé mi wuúci menyi, keyé ya mɛ́ŋa ɔfalafala háyɛ banɔ́. Mbá i ŋe mí wuúci menyi, ɛ látákɛ́na tɔ́na úúyé ɔtáŋa.

⁵⁶Abɛ́laham, cianɔ́ síkíne, ŋeé bílénéké buéŋí, u bíkétíki anyía u káá lɛ́ca nyíámɛ́ nyɛfaaya aaha ɔ ɔmɛsɛ́. U ŋeé nyiínyi lɛ́cá, yó túné bílénéke ɔ ɔhɔla. »

⁵⁷Mbá Besuif báyɛ nááyá : « Ɔ tɛ ŋɔɔ́ háma tuɔŋɔ etíne éfendí ne imbuke cíɔ́hátá, asɛ ɔ ŋɔɔ́ lɛcáka Abɛ́laham e ? »[34]

⁵⁸Mbá ɔsɛ : « Ɛ ŋa mɛ́ banɔ́ láana aá taaká isíʼo : Abɛ́laham ŋe síké é bíbíéne ɛ́cɛ yaŋɔ́, ya mɛ́ŋa hɔ́á. »[35]

⁵⁹Aáná Besuif ŋa bɔ́ kɔcaka andányɛ́ o o wuúci túméke. Mbá u ŋeé beébe bɛ́nándɔ́náka, nyɛháma eényí eé *Ciíbe cɛ Bandɔ́mɛsɛ́.