Read Nomaande BBƐ 10 Bible Online

BBƐ 10 - Nomaande bible

BBƐ 10

¹Ɔɔcɔ a wɔmɔtɛ́ ŋaá bá a Sɛsalɛ́ɛ,[30] nyíáyɛ́ nyiínyi ɛ́cɛ Kɔɔnɛ́yɛ. U ŋaá bá mutéŋínyi bicénji etíne atáánɔ ɔ ɔlɔŋɔ ú bicénji awɔ́ bɔ́ ŋɔ́ lɔ́ŋɔ anyía « bicénji bí Italí ».

²Ɔɔcɔ oócí ŋaá bá atálɛ́mánánɔ́ yɛ́ ɔɔcɔ, u kékéke Bandɔ́mɛsɛ́ buéŋí, ne wuúci na ciayɛ́ ciíbe cɛ baacɔ ikime. U ŋaá bá wɔ yɔ́ɔ́lɔ́kɔ basɔ́kásɔ́ka bé *Besuif buéŋí ; u bɛ́cɔ́kɔ́lɔ́kɛ́na Bandɔ́mɛsɛ́ bikúlú bikime.

³Búmɔtɛ́ buɔ́sɛ́, i injéŋí ɛ́tátɔ́ cɛ nabuɔ́sɛ́,[31] Kɔɔnɛ́yɛ ŋaá lɛ́cá eseye yɛ́ asana : Elilé yɛ́ bɔsɔ́ma yɛ́ Bandɔ́mɛsɛ́ ŋo yóófíne nááyá, yó wuúci lɔ́ŋɛ́ta yɛ́sɛ : « Kɔɔnɛ́yɛ e ! »

⁴Kɔɔnɛ́yɛ ŋé yiíyi tála eése, u líkíméke, u ŋé yiíyi batá ɔsɛ : « Aátɛ́ yááŋa e, Otéŋí ? » Elilé yɛ́ bɔsɔ́ma yɛ́ Bandɔ́mɛsɛ́ ŋé wuúci bɛ́káma yɛ́sɛ : « Bandɔ́mɛsɛ́ ŋeé bíléníne ne úúwe ɔbɛ́cɔ́kɔ́lɛ́na na nyiɔ́lɔ anyɛ́ ɔ ŋɔɔ́ wɔɔ́lɔ basɔ́kásɔ́ka ; yaátɛ́ asana u tɛ ŋɔ́ yɔ́ɔ bɛ́hɔ́ya.

⁵Aámbáya aná, tɔ́ma baacɔ eé Sobé bá kɔ́ lɔ́ŋɛ́ta ɔɔcɔ a wɔmɔtɛ́ awɔ́ bá ŋɔɔ́ lɔ́ŋɔ anyía Símon, úúyé ɔtáŋɛ́na Bíel.

⁶U ŋe límíne o ooki ú Símon, mutumbe bɛɔfɔ. Ciayɛ́ ciíbe áŋa a asálá yɛ́ nuɔmɔ́ nɔ́ makɛ́lɛ́. »

⁷Hí ahɛ́ *elilé yɛ́ bɔsɔ́ma eéyí ŋa hɔ́lá, Kɔɔnɛ́yɛ ŋɔ́ lɔ́ŋɛ́ta na bááyɛ́ bɔnyiɔnɔ a bɔ́mɔtɛ́ béfendí, ne ecénji e bicénji abɛ́ u ŋaá bá weé téŋgínyi, sɔ́ɔ́kɔ́ awɔ́ u ŋaá bá atálɛ́mánánɔ́ yɛ́ ɔɔcɔ.

⁸U ŋé beébe bíkétíkínyi bɛsana bikime a bɛ́ a bɛ́kɛ́láka, nyi beébe tɔ́ma eényí eé Sobé.[32]

⁹Ɔ ɔyá ɔyá, ekúlú ayɛ́ baacɔ eébé ŋa bɔ́ bá o ohónyí, bébú bíkósíki na bálɛ́ka ci Sobé, Bíel ŋá bááta ɔ ɔnɔŋɔ ú ciíbe ɔ ɔbɛ́cɔ́kɔ́lɛ́na Bandɔ́mɛsɛ́. Túefi[33] ŋaá bá hoóhi na ɔnyɛmana.

¹⁰Ɛcaná ŋé túme o wuúci nuana, u aambaka ɔnyíá. Ekúlú ayɛ́ bá ŋaá bá bé wuúci námbákɛ́na bɛnyɛ́ma, u ŋe síké é bítéme ciayɛ́ injiŋé ma bɛ́kɔ́ŋɔ́na, u ŋá lɛcá *eseye yɛ́ asana :

¹¹Ɔmuaná ŋeé bíhúúné, bɔkɔ háyɛ yaandándá yɛ́ sanja sɔ́ɔ́náka ɔ ɔmɛsɛ́ ne *tubéŋú túnyíse tusúŋékénú.

¹²A bɔkɔ eébú noómi, anamá ekime na cá ɛnyama, na cá mɔɔ́hɔ, ne cé tunonyí ŋaá bá hɔ́á.

¹³Aáná Bíel ŋaá lɔ́kɔ́má okelú a wɔ́mɔtɛ́ é wuúci laakɛna ɔ́sɛ : « Bíel, hátɔ́na ɛndánáka ! Ɔ́ɔ́nɔ́kɔ ɛnyama eeci, mbá e ciíci nyíáka. »

¹⁴Mbá Bíel ɔsɛ : « Buakaʼo, Otéŋí a Waáŋá, anyía ta buɔ́sɛ́ ɛ́ tɛ ŋá mɛ nyíá bɔkɔ te bú bihíŋe, ta bɔ́ mɔnyɔ́kɔ́lɔ́. »

¹⁵Okelú oócí ŋa háná á lɔ́kɔ́mána, u ŋé wuúci laána ɔ́sɛ : « Bɔkɔ bukime abɔ́ Bandɔ́mɛsɛ́ ŋaá kɔ́ɔ́na anyía búáŋa bufúúménénú, atɛ kɔɔ́na anyía búáŋa bɔkɔ bɔ́ mɔnyɔ́kɔ́lɔ́. »

¹⁶Asana eéyé ŋaá hálɔ́mɔ́nɛ́na ɔbɛ́kɛ́la aáná bikúlú bɛ́tátɔ́ ; e elime eécí, bɔkɔ eébú ŋaá hálɔ́mɔ́ná ɔbááta ɔ Ɔmuaná.

¹⁷Ekúlú eyí Bíel ŋaá bá waá bɛ́tááka nyihembule nyɛ́ asana ayɛ́ ú ma lɛ́caka, baacɔ abá Kɔɔnɛ́yɛ ŋaá tɔ́má ŋa bɔ́ bá ɛ́cɛ bá ma bɔ́ bátaka baacɔ ooki ú Símon ; bá ŋa bɔ́ bá bá búáŋa aámbáya eé buúse bú ehenyi.

¹⁸Bá ŋá lɔ́ŋɔ́kɔ baacɔ, bó beébe bata báyɛ : « Tɛ́ka aaha Símon awɔ́ bɔ́ ŋɔɔ́ lɔ́ŋɔ anyía Bíel ŋe límine e ? »

¹⁹Bíel ŋaá bá wa yánáŋa ɔ ɔbɛ́táá asana ayɛ́ wá lɛ́caka, ekúlú eyí Elilé yɛ́ Bandɔ́mɛsɛ́ ŋeé wuúci laána yɛ́sɛ : « Kuɔŋɔ́, baacɔ a bá bɔ́ŋa aaha bátátɔ́[34] ŋa bɔ́ aamba ;

²⁰hatɔ́na, sɔ́ɔ́na, mbá e súéte ɔlɔŋɔ ne beébe, eti bísúŋúnyi anyía yaŋɔ́ yémi beébe tɔ́ma. »

²¹Aáná Bíel ŋaá hátɔ́na, yɔ́ kɔ kúana baacɔ eébé, mbá ɔsɛ : « Yaŋɔ́, ya mɛ́ŋa ɔɔcɔ awɔ́ nu ŋa nɔ́ aamba. Aátɛ́ nuanɔ́ fáaya ɔ ɔkɛla e ? »

²²Báyɛ : « Tua sɔ́ŋa aaha anyía mutéŋínyi bicénji Kɔɔnɛ́yɛ ú maá basɔ́ tɔ́ma nɔ́ɔ́wɔ. Wáŋa atálɛ́mánánɔ́ yɛ́ ɔɔcɔ, u naŋa weé kékéke Bandɔ́mɛsɛ́ ; Besuif bekime ŋe bú wuúci lémbi. Elilé yɛ́ bɔsɔ́ma yɛ́ Bandɔ́mɛsɛ́ e yefúúménénú ŋeé wuúci laána anyía wɔ́ yɔ́ɔ lɔ́ŋɔ́kɔ e úúyé ooki, wá lɔ́kɔ́máka bɛsana abɛ́ ɔ ŋɔ́ɔ cɔ́ba o o wuúci laakɛna. »

²³Bíel ŋeé beébe oofínyi eé ciíbe, yó beébe fienyisi. Ɔ ɔyá ɔyá, u ŋá hatɔ́na ɔlɔŋɔ na baacɔ eébé, bé ŋé súéte. Belumitinine a bɔ́mɔtɛ́ bé Sobé ŋa bɔ́ cɔ́ba o okoó wuúci síke.

²⁴A buɔ́sɛ́ bɔ́ ɔláta, bá ŋga hámá a Sɛsalɛ́ɛ. Kɔɔnɛ́yɛ ŋaá bá weé beébe tátáka na ciayɛ́ ciíbe cɛ baacɔ na bíáyɛ́ bikendinyi bɛ́ ɔtɛ́má abɛ́ u ŋɔɔ́ lɔ́ŋɔ́kɔ́.

²⁵Ekúlú eyí Bíel ŋa sɛ́ wé yóófíne eé ciíbe, Kɔɔnɛ́yɛ ŋa cɔ́bá o okoó wuúci káha, u ŋá kuána Bíel a akɔlɔ́ o o wuúci nyemíki.

²⁶Mbá Bíel ŋeé wuúci hetúnyí, yó wuúci laana ɔsɛ : « Hatɔ́na ɛndánáka, eti mi nyemíki ; yaŋɔ́ tɔ́na, ya mɛ́ŋa ɔɔcɔ háyɛ kuɔŋɔ́. »

²⁷Aáná Bíel ŋo yóófíne eé ciíbe, bé húle táŋátáŋa na Kɔɔnɛ́yɛ ; u ŋaá kúána baacɔ beéŋí babɛ́bándánɔ́ hɔ́á.

²⁸Mbá ɔsɛ náábɔ́ : « Nú ŋe nú ményi anyía olumitinine ú Besuif ti ŋó yóókóto anyía uubú ɔɔcɔ é kendíkínyi na ɔɔcɔ u bunɔŋɔ bú etémbí, ta anyía wé yóófine e úúyé ooki. Mbá ta híáná, Bandɔ́mɛsɛ́ ŋeé mi tóŋínyí anyía ɛ tɛ ɔ́mɔ́ nyɛ́mana wu ɔlɛcaka ta ɔɔcɔ a wɔmɔtɛ́ háyɛ ɔɔcɔ u bihíŋe ta anyía u mɔnyɔ́kɔ́lɔ́, mbá i wuúci bíkíilie.

²⁹Buátɛ́ bɔkɔ ɛ́ ma mɛ́ faaya, i ti bísúkúle. Ɛ ŋa mɛ́ aamba omenyi aatɔ́ yɛ́ asana ayɛ́ ɔ́ɔ mɛ lɔ́ŋɔ́kɔ. »

³⁰Kɔɔnɛ́yɛ ɔsɛ : « Hɛ́nánɔ eeci mɔɔ́sɛ́ matátɔ́, e ekúlú eeye aana, ɛ ŋa mɛ́ bá yámɛ bɛ́cɔ́kɔ́lɔ́kɛ́na Bandɔ́mɛsɛ́[35] eémi eé ciíbe, i injéŋí ɛ́tátɔ́ cɛ́ nabuɔ́sɛ́. I ŋe síké emi bítéme ɔɔcɔ maá mɛ tálɛ́mɛ́nɛ́na eé buúse, bíáyɛ́ bɛlaŋa nɔmaka,

³¹mbá ɔsɛ : “Kɔɔnɛ́yɛ, Bandɔ́mɛsɛ́ áŋa ɔlɔ́kɔ́mánɔ́ úúwe ɔbɛ́cɔ́kɔ́lɛ́na ; u ŋa bɛ́táá nyiɔ́lɔ anyɛ́ ɔ ŋɔɔ́ wɔɔ́lɔ basɔ́kásɔ́ka.

³²Tɔ́ma baacɔ aná eé Sobé, bɔ́ kɔ lɔ́ŋɛ́ta ɔɔcɔ a wɔmɔtɛ́ awɔ́ bɔ́ ŋɔɔ́ lɔ́ŋɔ anyía Símon, úúyé ɔtáŋɛ́na Bíel. U ŋe límine o ooki ú Símon, mutumbe bɛɔfɔ. Ciayɛ́ ciíbe áŋa a asálá yɛ́ nuɔmɔ́ nɔ́ makɛ́lɛ́.”

³³Ɛ ŋaá mɛ tɔ́ma ɔ ɔtɔ́ma baacɔ ɔ ɔkɔɔ́ kuɔŋɔ́ lɔ́ŋɛ́ta. Ɔ́ mɔɔ́ kɛla bɔmbányɛ háyɛ ɔ́ mɔɔ́ faáya. Aámbáya basɔ́ eebe eé buúse bɔ́ Bandɔ́mɛsɛ́ anyía túásɔ́ lɔ́kɔ́máka bɛsana bikime ebí Otéŋí a Waáŋá ɔ́ yɔ́ɔ laakɛna anyía ɔ́ɔ basɔ́ húlíkínyi. »

³⁴Bíel ŋeé túmé ɔtáŋa ɔsɛ : « Aámbáya ɛ́ maá mɛ lɔ́kɔ́ma bɔmbányɛ bɔmbányɛ anyía Bandɔ́mɛsɛ́ tɛ á bá ne mebeé.

³⁵Míɔ háná lɛca anyía ɔɔcɔ okime ewú u ŋeé kéke Bandɔ́mɛsɛ́, u kɛlaka bɛsana a bɛtálɛ́mánánɔ́, ŋe bíléníne Bandɔ́mɛsɛ́, ta u cáŋa á bá u bunɔŋɔ bɔ́ háányɛ́ !

³⁶Bandɔ́mɛsɛ́ ŋaá tɔ́mɛ́ná baacɔ bé *Islayɛ́l Ambányɛ yɛ́ Ɛsɔ́ma o o beébe óókísi anyía mbuumu káá bá ɛ ɛkatɛ́katɛ́ ci ne wuúci na baacɔ e elime ci Yésus *Kilís, Mutéŋínyi baacɔ bekime.

³⁷Banɔ́ bɛ́muátá, nú ŋe nú ményi bɛsana a bɛ́ ŋa bɛ́kɛ́láka i iisí ci Yuté ikime o otúme a *Kalilé ekúlú ayɛ́ Sáaŋ ŋeé húlíkínyi baacɔ Ambányɛ yɛ́ Ɛsɔ́ma, yó beébe ootokine.

³⁸Nú ŋe nú ményi tɔ́na anyána Bandɔ́mɛsɛ́ ŋe yíinjíé Yésus, ɔɔcɔ u *Násalɛt, makɛ́nda me *Efúúménénú yí Elilé. Nú ŋe nú ményi tɔ́na anyána Yésus ŋaá bá u húlé á kándaka, u kɛlaka baacɔ bɔmbányɛ, u eéŋúnyísíki baacɔ bekime abá Musɔ́mɛ́na ŋaá bá mú ma hátɛakɛna. Yááŋa anyía Bandɔ́mɛsɛ́ ŋaá bá ne wuúci.

³⁹Basɔ́ bɛ́muátá, tua sɔ́ŋa bambasɔ́mbásɔ bá bɛsana bikime ebí Yésus ŋaa kɛ́láka i iisí ci *Besuif, hɔlákáhɔ́láka eé Yelúsalɛm. Bé ŋeé wuúci ɔ́ɔ́nɔ́ ɛ́cɛ bé meé wuúci aátákɛ́na ɔ ɔmbásá.

⁴⁰Asana ɔ́mɔtɛ́, Bandɔ́mɛsɛ́ ŋeé wuúci heényi o owé a mɔɔ́sɛ́ matátɔ́, yó wuúci iínjie makɛ́nda me obítóŋgínyi a baacɔ.

⁴¹U ti ómo bítóŋínyi a baacɔ bekime, mbá náásɔ́, bambasɔ́mbásɔ abá Bandɔ́mɛsɛ́ ŋa cáŋacáŋa ɔtáfáka, u ŋé bítóŋgínyi. Tu ŋe sú nyíékínyí, túó muékínyi ɛ́cɛ ú ma háanyua e biwéewé.

⁴²Yésus ŋaá basɔ́ tɔ́má anyía túésú húlíkínyi baacɔ Ambányɛ yɛ́ Ɛsɔ́ma, tu beébe tóŋgínyi anyía wuúci wáŋa taaká ooci awɔ́ Bandɔ́mɛsɛ́ ŋaá kɔ́ɔ́na anyía u káá sɔ́mbɔ́tɔ́kɔ́nɛ́na na bɔɔ́sɔ ne bewéékúnénú bɛsana.

⁴³Ɔɔcɔ oócí, Yésus, *behémúnyi bɛsana bá Bandɔ́mɛsɛ́ bekime ŋa bɔ́ táŋáká yááyɛ́ asana, bá kɔ́ɔnaka báyɛ : Ɔɔcɔ awɔ́ u ŋá háya mɔŋɔlɛ́ nááyá, Bandɔ́mɛsɛ́ ŋa nyɛ́anɛnɛna búáyɛ́ bɔɔbɛ́ e elime ci Yésus. »

⁴⁴Ekúlú eyí Bíel ŋaá bá wa yánáŋa ɔ ɔtáŋa, *Efúúménénú yí Elilé nyiofinine eényí ɛtɛ́má cɛ́ baacɔ bekime a bá ŋa bɔ́ lɔ́kɔ́máká Bɛsana bɛ́ Bandɔ́mɛsɛ́.

⁴⁵Belumitinine a bá ŋa bɔ́ fááya o okoósíke Bíel ŋa bɔ́ bá *Besuif ; bé ŋe bú kékéké buéŋí ekúlú ayɛ́ bá ŋa bɔ́ lɛ́cá anyía Bandɔ́mɛsɛ́ me yíínjie ta baacɔ a bá tɛ ábɔ́ bá Besuif Efúúménénú yí Elilé.

⁴⁶Yááŋa anyía bá ŋa bɔ́ bá bábɔ́ lɔ́kɔ́máka bábɔ́ táŋáka ɛtáŋa anamánamá, bé nyémiki bɛandándá bí *bikéki bɛ́ bɛsana bɛ́ Bandɔ́mɛsɛ́.

⁴⁷Mbá Bíel ɔsɛ : « Aámbáya baacɔ eebe a búáŋa bonyíóyónú ne Efúúménénú yí Elilé háyɛ basɔ́, aányɛ́ wáŋa wu o beébe kóti tɔ́na *obíótíne ne menyífé e ? »

⁴⁸Ɔsɛ bé beébe ootókíne eé nyiínyi nyí Yésus *Kilís, nyi beébe ootókíne eényí. Bé ŋé wuúci batá anyía wa háná límekine ɔmbana ú mɔɔ́sɛ́ ne beébe.