Read Nomaande BBƐ 16 Bible Online

BBƐ 16 - Nomaande bible

BBƐ 16

¹Bóol ŋa cɔ́bá, u ŋga hámá na a bálɛ́ka cɛ Tɛlɛ́bɛ ne ci Lisitɛ́lɛ. Mulumitinine a mumɔtɛ́ ŋaá bá hɔ́á nyiínyi ɛ́cɛ Timoté ; iinyí ŋaá bá mulumitinine Yésus, itónyi cí *Besuif, mbá síkíne ŋaá bá ɔɔcɔ u *Kɛlɛ́k.

²Belumitinine Yésus ne bé Lisitɛ́lɛ na bá Ikóniyom ŋa bɔ́ bá bébú lémbíki olíhe ú Timoté.

³Bóol ŋaá bá weé lénéke anyía we wuúci hiíte, bébú súéte. Ɛŋakɛlá wé wuúci hiíte, u ŋé wuúci aacá a asana ne Besuif a bá ŋaá bá hɔ́á, anyía beébe bekime ŋa bɔ́ bá bébú ményukune anyía síkíne ci Timoté áŋa ɔɔcɔ u Kɛlɛ́k.

⁴A bálɛ́ka hí ikime ecí ne Bóol ne Sílas ŋa bɔ́ bá bábɔ́ hɔ́laka, bé ŋe bú bíkétíkínyí belumitinine bɛsana abɛ́ na baacɔ bá ɛndɔ́ma ne *bekendisi belumitinine bé Yelúsalɛm ŋa bɔ́ sɔ́mbɔ́tɔ́kɔ́ná ; bá láakɛna baacɔ anyía bá látákɛ́na bɛsana eébí.

⁵Tuɔ́bɔ tú belumitinine ŋaá bá túá kɛ́ndáka o olumitinine noómi. Ɔmbana ú belumitinine tékéke mɔɔ́sɛ́ mekime.

⁶Bá ŋa sɛ́ bé ke bú húlíkínyi baacɔ bé ekéti yí iisí yɛ́ Asi[62] bɛsana bɛ́ Bandɔ́mɛsɛ́, mbá Efúúménénú yí Elilé ŋeé beébe kotí. Buátɛ́ bɔkɔ bá ŋa bɔ́ hɔ́láka ci ohónyí, bá tɛ tálɛ́mɛ́na i iisí ne ci Filiki na cɛ Kalasi.[63]

⁷Ekúlú ayɛ́ bá ŋga bɔ́ hámá hoóhi na ɔlɛla ú iisí ci Misí,[64] bá ŋa sɛ́ bábɔ́ cɔ́ba i iisí ci Bitini, mbá Elilé yí Yésus tɛ háná beébe oókóto.

⁸Aáná bá ŋa bɔ́ sɔ́mbɔ́tɔ́nɛ́ná i iisí ci Misí, bá ŋá cɔbá a bálɛ́ka cɛ Tɔlɔwás.

⁹Nebutúé, Bóol ŋá lɛca *eseye yɛ́ asana : Ɔɔcɔ u Masɛtuán ŋaá bá tálɛ́mɛ́na ɛndánáka, u wuúci bɛ́cɔ́kɔ́lɔ́kɛ́na ɔsɛ : « Faáya a Masɛtuán ɔ ɔkɔɔ́ basɔ́ ɔɔ́lɔ́. »

¹⁰Hí e elime ci eseye yɛ́ asana eéyé eyí Bóol ŋaá lɛ́cá, tú ŋa sɔ́[65] aámbáka ohónyí wú osúéte a Masɛtuán, anyía tú ŋe sú menyi taaká anyía Bandɔ́mɛsɛ́ u ŋáa basɔ́ lɔ́ŋɔ o okohúlinyi baacɔ bá hɔ́á Ambányɛ yɛ́ Ɛsɔ́ma.

¹¹Tú ŋe sú óófíne eé sitíme a bálɛ́ka cɛ Tɔlɔwás, túɔ cɔ́ba ɔ ɔcɔba i iisí cɛ́ Samɔ́tálas a cɛ́áŋa ɛ ɛkatɛ́katɛ́ cɛ nuɔmɔ́. Ɔ ɔyá ɔyá, tu ŋa sɔ́ cɔ́bá a bálɛ́ka cɛ Nɛyabólis.[66]

¹²Hɔ́á tú ŋa sɔ́ hátɔ́na, túɔ cɔ́ba a bálɛ́ka ci Filibí. Filibí áŋa bálɛ́ka ci buúsebuúse ci ekéti yí iisí yɛ́ Masɛtuán,[67] ciíci tɔ́na bálɛ́ka a cɛmɔtɛ́ ci butéŋí bú Lóom. Tu ŋe sú límékíne a bálɛ́ka eécí ɔmbana ú mɔɔ́sɛ́ weéŋí.

¹³A *buɔ́sɛ́ bú ehélúme bú *Besuif, tú ŋa sɔ́ hátɔ́na a bálɛ́ka noómi, túɔ cɔ́ba a asálá yí nuúci ; tuesú kétiki anyía tua sɔ́ŋa tú ɔlɛca haála a hɔ́mɔtɛ́ ehé Besuif naŋa bábɔ́ bɛ́cɔ́kɔ́lɔ́kɛ́na Bandɔ́mɛsɛ́. Tú ŋe sú límíne ɔ ɔmɛsɛ́, túɔ waásánáka ne beénjú a bá ŋa bɔ́ bá hɔ́á babɛ́bándákánɔ́.

¹⁴Ɔmɔtɛ́ eé beénjú eébé nyiínyi ɛ́cɛ Lɛ́tɛa ŋaá bá u Tɛatíil, u nyemiki Bandɔ́mɛsɛ́. U ŋaá bá waá kɛ́laka onduné ú bɛlaŋa e bibólótoto bɛ́ mɔɔnyɛ́ meéŋí. U ŋá tákɛ́na eetú ɔ ɔlɔ́kɔ́maka bɛsana. Otéŋí a Waáŋá ŋé wuúci húúne ɔtɛ́má ɔ ɔlɔ́kɔ́máka bɔmbányɛ bɛsana ebí Bóol ŋaá bá waá kɔ́ɔnaka.

¹⁵Bé ŋeé wuúci ootíne, na bááyɛ́ baacɔ bé ooki áyá. U ŋá basɔ́ lɔ́ŋɔ́kɔ nááyá, ɔsɛ : « Mbɔ́kɔ nu ŋá nɔ lɛ́ca bɔmbányɛ anyía ɛ ŋá mɛ háya taaká mɔŋɔlɛ́ né Otéŋí a Waáŋá, ánɔ faáya, nué ke límékíne eémi o ooki. » Aáná u ŋaá basɔ́ eékínyí anyía tuésú lúmítíne okolímine e úúyé ooki.

¹⁶Buɔ́sɛ́ a búmɔtɛ́ abɔ́ tú ŋa sɔ́ bá tuasɔ́ cɔ́cɔbaka aá haála há ɔbɛ́cɔ́kɔ́lɛ́na, tu ŋa sɔ́ ɔndɛ́mánána na ɔbɔ́la a wɔmɔtɛ́, munyiɔnɔ mɔ baacɔ a bɔ́mɔtɛ́. U ŋaá bá na *aabɛ́ yí elilé a yɛ́ ŋaá bá yé wuúci iínjíékíne makɛ́nda me omenyukune bɛsana a bɛ́ káá bɛ́kɛ́láka. Cííyi síkíne cí buólí ŋaá bá cɛ́á hɔ́máka mɔɔnyɛ́ meéŋí a núáyɛ́ nɔbúa.

¹⁷Aáná ɔbɔ́la oócí ŋaá bá waá basɔ́ látákɛ́na na basɔ́ ne Bóol, u húlé kɔ́ɔnaka okelú ɔ ɔmuaná ɔsɛ : « Baacɔ eebe á bɔ́ŋa bɔnyiɔnɔ bá Bandɔ́mɛsɛ́ a wáŋa fáátɛ ɔ Ɔmuaná ; bá ŋa bɔ́ banɔ́ húlinyi bɛsana a bɛ́áŋa bɛ́ ɔ banɔ́ iínjíékíne olíhe. »

¹⁸Aáná u ŋaá bá waá kɛ́laka aáná mɔɔ́sɛ́ meéŋí ɔ ɔkɔɔ́háma eyí hilóbi ŋá nɔ́nákɛ́na Bóol, yɔ́ bɛ́kɔ́ŋɔ́na búmɔtɛ́ buɔ́sɛ́, yɔ́ láana aabɛ́ yí elilé a yɛ́ ŋaá bá ná ɔbɔ́la oócí ɔsɛ : « A makɛ́nda me nyiínyi nyí Yésus *Kilís ɛ ŋa mɛ́ ɔ láana anyía háma aá cɛɛ́tɔ cɛ ɔbɔ́la ooci ! » Hí a yaátɛ́ ekúlú aabɛ́ yí elilé eéyé ŋá háma.

¹⁹Ɛŋakɛlá síkíne cí buólí cɛ́ ɔbɔ́la oócí á lɛca anyía cɛ́ tɛ á bá na mɔŋɔlɛ́ mɔ ɔhɔ́máka mɔɔnyɛ́ aá cíáyɛ́ elime, nyɛhatɛakɛna eényí ne Bóol ne Sílas ; cí ŋé beébe súéténe a haála há nyɛkála eé buúse bú bekélísi bɛsana.

²⁰Cí ŋé beébe télímínyi eé buúse bú bekélísi bɛsana bé butéŋí bú *Lóom, mbá cɛ́sɛ : « Nu ŋa nɔ́ lɛ́ca e ? Baacɔ eebe ŋe bú túŋulinyi ciasɔ́ bálɛ́ka, tɔ́na bá bɔ́ŋa bibíényi bí *Besuif.

²¹Bé ŋe bú eékúnyi baacɔ bɛɛsɔ a bɛ́mɔtɛ́ abɛ́ basɔ́, baacɔ bé Lóom, tu tɛ ɔ́mɔɔ́ sɔ́ nyɛmána tú olumitine ta anyía túɔ́ látákɛ́na. »

²²Baacɔ a bá ŋa bɔ́ bá aáhá ŋa bɔ́ lɔ́kɔ́mɛ́ná ne Bóol ne Sílas hilóbi. Bekélísi bɛsana ŋe bú iínjíé makɛ́nda me o beébe laŋɔnaka ; bá ŋá kɔɔ́na tɔ́na anyía bé beébe súbéke ne mesue.

²³Ɛ́makɛ́la bé é beébe súbéke buéŋí ne mesue, bé ŋé beébe háya eé ciíbe cɛ ɛcaná. Bé ŋé oónyísínyi ɔlaana mutétényi ciíbe cɛ ɛcaná anyía wé beébe tétényíki bɔmbányɛ, ta ɔmɔtɛ́ ti nyíme.

²⁴Hí ayɛ́ mutétényi ciíbe cɛ ɛcaná ŋaá lɔ́kɔ́má aáná, u ŋé beébe cɔbána e ekéti yí ciíbe cɛ ɛcaná a yɛ́mɔtɛ́ a yɛ́ ŋaá bá oówo noómi, u ŋé beébe hákɛ́na akɔlɔ́ a bɛfɔka.

²⁵Ekúlú ayɛ́ ɛkatɛ́katɛ́ ci butúé ŋaá bá cɛ́ á yáaŋa hoóhi, ne Bóol ne Sílas ŋa bɔ́ bá bábɔ́ bɛ́cɔ́kɔ́lɔ́kɛ́na Bandɔ́mɛsɛ́, bé wuúci nyemiki na maŋana. Baacɔ bé ciíbe cɛ ɛcaná bé etémbí ŋa bɔ́ bá bábɔ́ lɔ́kɔ́máka.

²⁶Bé ŋe síké ébú bítéme, ɔmɛsɛ́ me bínyíétíne na makɛ́nda ɔ ɔkɔɔ́háma eyí u ŋeé fúkíté tɔ́na ciíbe cɛ ɛcaná ɔ ɔkɔɔ́háma i indíné ; bihenyi bikime bíó bíkúuneke. Hí ekúlú eéyé, bɛfɔkɛ́nɛ́na bɛ́ baacɔ bekime bí ciíbe cɛ ɛcaná ŋá bɛ́áŋíáka.

²⁷Mutétényi ciíbe cɛ ɛcaná ŋá bálátána e hiiné, yɔ́ lɛ́ca bihenyi bí ciíbe cɛ ɛcaná bikúúnékénú. Ɛŋakɛlá wáá lɛ́ca aáná, u ŋɔ́ sɔmɔ́ núáyɛ́ nɔsala nɔ́ ɔhána a abákála anyía wá bɛ́ɔ́nɔ́. Nyíáyɛ́ nyibíkéti ŋaá bá anyía baacɔ bé ciíbe cɛ ɛcaná bekime ma bɔ́ cábakɛna.[68]

²⁸Mbá Bóol ŋoó bókíté na mááyɛ́ makɛ́nda mekime ɔsɛ : « Atɛ bɛ́kɛ́la bɔɔbɛ́, anyía tua sɔ́ŋa aáhá basɔ́ bekimeʼo. »

²⁹Aáná mutétényi ciíbe cɛ ɛcaná ŋaá bátá anyía bé wuúci héléníne *lámba ; bé ŋe wuúci héléníné. U ŋgó oofine o owoofine e ekéti yí ciíbe eéyé, u nakamaka hú bakɔ bakɔ bakɔ ; u ŋá bɛ́áhɛ́nɛ́na ne Bóol ne Sílas a akɔlɔ́.

³⁰U ŋé beébe hémúnyi a nɔháatɛ́, ɔsɛ náábɔ́ : « Cíími síkíne, anyána ya mɛ́ŋa wu ɔkɛla anyía yámɛ nɔhɔ e ? »

³¹Mbá báyɛ nááyá : « Háya mɔŋɔlɛ́ né Otéŋí a Waáŋá Yésus, mbá ɔ kɔ́ɔ́ nɔhɔ na kuɔŋɔ́ na bɔ́ɔ́wɔ baacɔ bé ooki áyá. »

³²Hí ekúlú etéeyé nebutúé, mutétényi ciíbe cɛ ɛcaná ŋeé beébe súéténé e úúyé ooki ɔ ɔkɔɔ́wáándɛ́na cííbú imbéŋé. Bé ŋé beébe aafɛ́na. Ne Bóol ne Sílas ŋe bú húlíkínyí ne mutétényi ciíbe cɛ ɛcaná na bááyɛ́ baacɔ bé ooki bekime Bɛsana a bɛ́ ŋa lɛca Otéŋí a Waáŋá, bá ŋa bɔ́ hákɛ́ná mɔŋɔlɛ́ né Yésus. Bé ŋe yootíne o owootine ne mutétényi ciíbe cɛ ɛcaná na bááyɛ́ baacɔ bé ooki. Bá ŋa bɔ́ bá bébú bílénéke anyía bá ma bɔ́ hákɛ́na mɔŋɔlɛ́ ná Bandɔ́mɛsɛ́.

³⁵Ɔ ɔyá ɔyá, bekélísi bɛsana bé Lóom ŋa bɔ́ tɔ́má baacɔ anyía bá laána mutétényi ciíbe cɛ ɛcaná anyía wá nyɛána baacɔ eébé.

³⁶Mutétényi ciíbe cɛ ɛcaná ŋé óókísi Bóol ɔsɛ : « Bekélísi bɛsana ma bɔ́ tɔ́ma baacɔ anyía bá banɔ́ nyɛ́ánáka ; nua nɔ́áŋa nú osúéte aámbáya e mbuumu noómi. »

³⁷Mbá Bóol ŋaá láána baacɔ abá bá ŋa tɔ́má ɔsɛ : « Bekélísi bɛsana ŋa bɔ́ basɔ́ súbéké ne mesue eé buúse bɔ́ baacɔ bekime ; beébe ta ɔ basɔ́ kélísi háyɛ yɛ́ ŋa bɛ́ámba, yiíyi anyía basɔ́ tɔ́na tua sɔ́ŋa baacɔ ebé butéŋí bú Lóom ŋee ményi.[69] Bá ŋá basɔ́ háya tɔ́na eé ciíbe cɛ ɛcaná. Mbá aámbáya bá bɔ́áŋa ɔ ɔwaamba ɔ basɔ́ nyɛ́ana indiitie, baacɔ ti menyi. Eéʼeé, buakaʼo ! Bá faáya beébe bɛ́muátá bá ka basɔ́ hémúnyi. »

³⁸Baacɔ eébé ŋga bɔ́ láákɛ́na bekélísi bɛsana bé Lóom ɔtáŋa oócí. Bulíkílíki ŋé beébe tímbíé ekúlú eyí bé ŋe bú ményí anyía ne Bóol ne Sílas á bɔ́ŋa baacɔ bé butéŋí bú Lóom.

³⁹Aáná bá ŋa bɔ́ fááya o okoó beébe bata ɔnyɛanɛna. Bé ŋé beébe hémúnyi eé ciíbe cɛ ɛcaná, bé ŋé beébe bɛ́cɔ́kɔ́lɔ́kɛ́na anyía bá hatɔ́na a bálɛ́ka, bé súéte.

⁴⁰Ɛ́makɛ́la ne Bóol ne Sílas ábɔ́ háma eé ciíbe cɛ ɛcaná, bá ŋá cɔbá o ooki ú Lɛ́tɛa ; bá ŋá lɛcákána na báábɔ́ benyíinyí bé olumitinine, bé ŋé beébe kíndísíki ɛtɛ́má. Nyíábɔ́ nyisúéte eényí.