Read Nomaande BBƐ 19 Bible Online

BBƐ 19 - Nomaande bible

BBƐ 19

¹Hú aá yaátɛ́ ekúlú ayɛ́ Abólos ŋaá bá ɔɔ́ Kɔlɛ́ɛntɛ, Bóol ŋa hɔ́lákɛ́na a tɔkɔndɔ tú ekéti yí iisí yɛ́ Asi, u ŋgaá hámá ɛ Ɛfɛ́ɛsɛ. U ŋaá kuána hɔ́á ɔmbana a wúmɔtɛ́ ú belumitinine,

²u ŋé beébe bata ɔsɛ : « *Efúúménénú yí Elilé ŋo yóófíne náánɔ́ ekúlú eyí nu ŋe nú lumítékíníne e ? » Mbá báyɛ : « Tú tɛ ŋá sɔ́ lɔ́kɔ́ma ta bɔ lɔ́kɔ́ma buɔ́sɛ́ bá cámbaka bɔkɔ háyɛ elilé eéyé ! »

³Bóol ŋé beébe bata ɔsɛ : « Mbá nyɛnamá nyí *obíótíne nyɛ yaátɛ́ nu ŋe nú bíotine aná e ? » Báyɛ : « Nyɛnamá anyɛ́ Sáaŋ ŋaá bá we yóótokine baacɔ. »

⁴Mbá Bóol ɔsɛ : « Sáaŋ ŋaá bá we yóótokine baacɔ a bá ŋa bɔ́ bá bábɔ́ bɛ́kákálákɛ́na maabɔ́ maabɛ́, mbá bá sɔ́mba ɔkɔlɔ́ eé meéme ; u laakɛna baacɔ bé *Islayɛ́l anyía bá hákɛ́na mɔŋɔlɛ́ ná ɔɔcɔ awɔ́ u káá faaya eeyé e elime ; ɛ́cɛ anyía Yésus. »

⁵Ɛŋakɛlá bábɔ́ lɔ́kɔ́máka ɔtáŋa oócí, nyibíótókíne eényí eé nyiínyi nyí Otéŋí a Waáŋá Yésus *Kilís.

⁶Bóol ŋé beébe táláka aabá aá bɛɛtɔ́, Bandɔ́mɛsɛ́ ŋé beébe iínjíé Efúúménénú yí Elilé. Bé ŋe túme ɔtáŋa ɛtáŋa acɛ́ bá ŋa bɔ́ bá bé ti ébú ményi, bé hémúkúnyi bɛsana e bí ŋé húle ná Bandɔ́mɛsɛ́.

⁷Baacɔ eébé ŋa bɔ́ bá bɔ́ háma hoóhi bɔ́ɔ́hátá ne béfendí.

⁸Bikúlú bikime Bóol ŋaá bá waá cɔ́cɔbaka a *andaŋía yɛ́ ɔbɛ́cɔ́kɔ́lɛ́na. U ŋa kɛ́láka híáná iílí ɛ́tátɔ́, u táŋáká na bɔɔcɔ bukime, u hulikinyi baacɔ bɛsana a bɛ́ ŋa lɛ́ca *Butéŋí bɔ́ Bandɔ́mɛsɛ́ o o beébe bísúéne.

⁹Mbá baacɔ beéŋí ŋaá bá bébú nétisiki ɛtɛ́má, bé tí lumítíníne ; bé fénékíne ohónyí ú Otéŋí a Waáŋá a abɛ́bándána noómi. Bóol ŋé beébe síke, u ŋá hɔ́lákána belumitinine haála hé etémbí, u ŋé túme ɔwaásána ne beébe mɔɔ́sɛ́ mekime eé sukúlu ci Tilánus.[83]

¹⁰U ŋaá kɛ́láká aáná tuɔŋɔ túfendí, ɔ ɔkɔɔ́háma ayɛ́ baacɔ bekime a bá ŋaá bá bébú líhéke e ekéti yí iisí yɛ́ Asi ŋa bɔ́ lɔ́kɔ́máká Bɛsana bí Otéŋí a Waáŋá, ne *Besuif na *Bakɛlɛ́k áyá.

¹¹Bandɔ́mɛsɛ́ ŋe yiínjíé Bóol makɛ́nda ma ɔkɛlaka bɛandándá bí *bikéki bɛ́ bɛsana.

¹²Aáná bá ŋaá bá bé keé híítékíne bɔkɔnɔ́kɔ́nɔ bikéti bɛ́ malaka a bɛ́mɔtɛ́ a bɛ́ ŋaá bá bíé bítíséke Bóol ; bé beébe óóyókíne ne biíbi. Ɛkɔnɔ manaka, *bɛɛbɛ́ bí bililé hámɔ́kɔ́na aá cɛɛ́tɔ cɛ́ baacɔ.

¹³*Besuif a bɔ́mɔtɛ́ a bá ŋa bɔ́ bá bé húlé ábɔ́ kándaka bɛhaála bɛhaála o ohémúnyi bɛɛbɛ́ bí bililé aá cɛɛ́tɔ cɛ́ baacɔ ŋa bɔ́ bɛ́kánáka ɔbɛ́kɛ́lɛ́na tɔ́na nyiínyi nyí Yésus, bá láakɛna bililé báyɛ : « Ɛ ŋa mɛ́ banɔ́ láana ne esise eé nyiínyi nyí Yésus ewú Bóol ŋe húlinyi baacɔ yááyɛ́ asana anyía, ánɔ hámɔ́kɔ́na aá cɛɛ́tɔ cɛ ɔɔcɔ ooci ! »

¹⁴(Yááŋa anyía baacɔ a bá ŋa bɔ́ bá bábɔ́ kɛ́laka aáná ŋaá bá baáná a banɔ́mɔcɔ́ bétíndétú nɔ́mɔ bé *mutéŋínyi beluli nyiínjie a mɔmɔtɛ́, Sɛ́ɛfa, ɔɔcɔ u Besuif.)

¹⁵Mbá *aabɛ́ yí elilé yó beébe bɛ́káma yɛ́sɛ : « I ŋe mí menyi Yésus, i menyukune tɔ́na aányɛ́ wáŋa Bóol, mbá banɔ́ʼo, nua nɔ́ŋa báányɛ́ e ? »

¹⁶Hí e ekúlú eéyé ɔɔcɔ awɔ́ u ŋaá bá na aabɛ́ yí elilé ŋeé beébe miɔ́mɔ́kɛ́na beébe bekime na makɛ́nda, u beébe súbéke a nyɛnamá anyɛ́ bá ŋa bɔ́ bɛ́hɔ́ɔ́kɔ, bɔ́ hámɔ́kɔ́na na ɔtɛ́tá eé ciíbe eécí ɛ́cɛ bá búáŋa cɛɛ́tɔ etémbí, ne imbéŋé haála hekime.

¹⁷Baacɔ bekime bá Ɛfɛ́ɛsɛ ŋa bɔ́ lɔ́kɔ́máká asana eéyé, ne Besuif na *Bakɛlɛ́k áyá. Bulíkílíki ŋé beébe tímbíéke, bé ŋé túme okéke nyiínyi nyí Otéŋí a Waáŋá Yésus.

¹⁸Baacɔ beéŋí e bé ŋe bú lumítékíníne ŋa bɔ́ bá bábɔ́ fáakɔna ɛ ɛkatɛ́katɛ́ cɛ baacɔ, bá bɛ́kɔ́tɔ́kɔ maabɔ́ maabɛ́, bá námbɔnaka bíábɔ́ bɛbɔ́kɔ́bɔ́kɔ.

¹⁹Híáná baacɔ beéŋí a bá ŋa bɔ́ bá bábɔ́ kɛ́láka bɛsana bɛ́ maŋála ŋe bú hélékénéné túábɔ́ tufule tɔ́ maŋála, bé ŋe tuútu lulíki eé buúse bɔ́ baacɔ bekime. Bá ŋa fánáka ɔmbana ú mɔɔnyɛ́ e tufule eétú, bɔ́ lɛca anyía tú ŋá nyɛmána tu ɔháma tɔ́sɛ́na etíne éfendí ne imbuke cíɔ́hátá.[84]

²⁰Aáná Bɛsana bɛ́ Bandɔ́mɛsɛ́ ŋaá saásíáká, bɛ́ lɔ́kɔ́mákána haála hekime a makɛ́nda me Otéŋí a Waáŋá.[85]

²¹E elime cɛ bɛsana eébí, Bóol ŋaá sɔ́mbɔ́tɔ́na anyía wé súéte eé Yelúsalɛm. U aambaka ɔhɔlɛna ne i iisí cɛ Masɛtuán na cɛ Akayí, mbá ɔsɛ : « Ɛkákɛ́la yé ké mi húle eé Yelúsalɛm, ɛ ŋá mɛ́ nyɛmána tɔ́na wu ɔkɔlɛ́ca *Lóom. »

²²Aáná u ŋaá tɔ́má bááyɛ́ banásɛ́ béfendí a Masɛtuán : Ne Timoté na Ɛlásɛt. Wuúci bɛ́muátá u ŋá kakána lɔ́bɔ ɔmbana ú mɔɔ́sɛ́ e ekéti yí iisí yɛ́ Asi.

²³E ekúlú etéeyé, etuŋulinyi yɛ́ makɛ́nda ŋaá kuá ɛ Ɛfɛ́ɛsɛ a asana na nyɛlátɛ́na nyí ohónyí ú Otéŋí a Waáŋá.

²⁴Mutábɔ́na iyelí a mumɔtɛ́, nyiínyi ɛ́cɛ Temetilíyus, ŋaá bá waá tábɔ́náka tubílícínyínyí tú ihúényínyí ci ciíbe cɛ bandɔ́mɛsɛ́ e ciénjú Aatemis.[86] U ŋaá bá weé tuútu tábɔ́náka ne eléŋú eyí bé ŋeé tuníne mɔɔnyɛ́. Bɔnyiɔnɔ bé buólí eébú ŋa bɔ́ bá bábɔ́ hɔ́mákɛ́na mɔɔnyɛ́ meéŋí eé tuútu.

²⁵Aáná ɔɔcɔ oócí ŋeé beébe bándáká beébe bekime búmɔtɛ́ buɔ́sɛ́, na baacɔ bé etémbí a bá ŋa bɔ́ bá bábɔ́ nyíɔkɔ nyɛnamá nyí buólí eényí, mbá ɔsɛ náábɔ́ : « Buamɛ eé, nu ŋe nú ményi anyía e buólí eebu tu ŋa sɔ́ nɔ́hɛna, tu hɔ́mákɛ́na.

²⁶Mbá, tɛ́ka nu ŋa nɔ́ lɛ́ca, nɔ lɔ́kɔ́máka tɔ́na bɛsana ebí Bóol ŋa kɛ́la e ? Baabá eéyé ŋaá kɔ́ɔna anyía bɛbandɔ́mɛsɛ́ abɛ́ baacɔ ŋá bɔ́ tábɔ́na tɛ á bá taaká cɛ́ bɛbandɔ́mɛsɛ́. Ú me bísúékíne baacɔ beéŋí anyía bá ŋa bɔ́ lɔ́kɔ́ma anyía asana ayɛ́ u ŋa kɔ́ɔna áŋa taaká. Tɛ́ cáŋa hí aaha ɛ Ɛfɛ́ɛsɛ, mbá hoóhi baacɔ bekime bé ekéti yí iisí yɛ́ Asi.

²⁷Ɔtáŋa oócí áŋa hoóhi na ɔcaŋɛna búásɔ́ buólí. Wáŋa wu ɔcaŋgɛna tɔ́na nuúmi nɔ́ yaandándá yɛ́ bandɔ́mɛsɛ́ e ciénjú Aatemis. Aáná u tɛ ká háná e yóómo, yiíyi anyía wuúci baacɔ bekime e bé ŋe bú límine e ekéti yí iisí yɛ́ Asi ŋe bú nyémi, na baacɔ bá ɔmɛsɛ́ okime áyá. »[87]

²⁸Ahɛ́ baacɔ ŋa bɔ́ lɔ́kɔ́máká ɔtáŋa ú Temetilíyus oócí, nyɛfamɔnuaka eényí ne hilóbi, bé ŋé túme ɔbɔmɔ beébe bekime, bá kɔ́ɔ́naka báyɛ : « Aatemis u Bɛɛfɛɛsiɛ́ŋ áŋa waáŋá ɔ ɔhɔla ! »

²⁹Etuŋulinyi eéyé ŋa yáányáná baacɔ bá bálɛ́ka bekime. Bé ŋé fulé miɔ́mɛ́na na Káyus na Alisitáak, bé ŋe beébe hɔlána. Bífendí eébí ŋa bɔ́ bá baacɔ bé iisí cɛ Masɛtuán, bikendinyi bí Bóol. Ahɛ́ bé ŋé beébe hɔlána, etúte yɛ́ baacɔ eéyé ŋé ke óófókíne o owoofokine aá haála há abɛ́bándána a ciáŋá há Ɛfɛ́ɛsɛ.[88]

³⁰Bóol ŋa sɛ́ wá háma eé buúse bɔ́ nyɛkɔca eényí, mbá belumitinine ŋe bú wuúci koti.

³¹Baláayɛ́, bɔnyiɔnɔ kɔ́mɛ́na, ŋe bú wuúci tɔ́mɛ́na ɛsɔ́ma anyía u ti bítúne ɔcɔba a andaŋía a yaáŋá eéyí.

³²Hú aá yaátɛ́ ekúlú baacɔ bé hitúlé ŋa bɔ́ sáyákána eété. Eebe túméke tɔkɔma eetu, ebenyíé túméke tú etémbí, mbá baacɔ beéŋí tɔ́na ŋaá bá bé ti ébú ményí asana ayɛ́ bá ŋaá bɛ́bándákána eé yiíyi.

³³Baacɔ a bɔ́mɔtɛ́ bá nyɛkɔca ŋe bú hémbúlékíné Alɛkɛsándɛlɛ asana ekime. Wuúci *Besuif ŋaá bá bébú télímíkínyi eé buúse ɔ ɔtáŋáka asana yí bífendí abɛ́ bá ŋaá hátɛ́na. U ŋá nandɔ́na na ɔɔbɔ́ anyía wá táŋáka eé buúse bɔ́ nyɛkɔca nyɛ́ baacɔ.

³⁴Mbá ahɛ́ bé ŋe ményí anyía wáŋa ɔɔcɔ u Besuif, beébe bekime ŋé bú túme ɔbɔmɔ mehúnyi mɔmɔtɛ́, bá kɔ́ɔnaka báyɛ : « Aatemis u Bɛɛfɛɛsiɛ́ŋ áŋa waáŋá ɔ ɔhɔla ! » Bá hálɔ́mɔ́kɔ́nɛ́na ɔkɔɔna aáná hoóhi injéŋí ífendí.

³⁵E elime eécí muɔ́ŋɔ bɛsana mu kɔ́mɛ́na ŋá kɛla anyía baacɔ é lésíkínyi mbuumu. Mbá ɔsɛ náábɔ́ : « Banɔ́, baacɔ bá Ɛfɛ́ɛsɛ, aányɛ́ ú ŋa nána aaha anyía bálɛ́ka cɛ Ɛfɛ́ɛsɛ ciáŋa mutétényi ne ciíbe cɛ yaandándá yɛ́ bandɔ́mɛsɛ́ e ciénjú a yɛ́áŋa nyiínyi anyía Aatemis ne hííyé hibílícínyínyí e hí ŋeé húle ɔ ɔmuaná e ?

³⁶Ta ɔɔcɔ ti ŋé súŋinyi. Yaátɛ́ asana nuánɔ́ nyɛmána nu olésíkínyi mbuumu, nɔtɛ kɛlá buála.

³⁷Yááŋa anyía nú me nú héléne baacɔ eebe aaha. Beébe bó ti ómó bú bítíse bɔkɔ ta búmɔtɛ́ eé ciíbe cɛ ciasɔ́ bandɔ́mɛsɛ́ e ciénjú, te bu wuúci féníne.

³⁸Mbɔ́kɔ ne Temetilíyus na bááyɛ́ bɔnyiɔnɔ á bɔ́ŋa na asana yɛ́ ɔkákálákɛ́na ɔɔcɔ, mɔɔ́sɛ́ me okélísíki bɛsana áŋa hɔ́á ; bekélísi bɛsana tɔ́na hɔ́á, bé kéé beébe sɔ́mɔ́kɛ́na.

³⁹Mbɔ́kɔ nua nɔ́ŋa na bɛsana bí etémbí bɛ́ ɔbataka, bé kéé biíbi cikiliekene a buɔ́sɛ́ abɔ́ andaŋía ŋá bɛ́bándána.

⁴⁰Énu menyí anyía bááŋa bá ɔ basɔ́ kákálákɛ́na a asana a yɛ́ maá bɛ́kɛ́láka hɛ́nánɔ. Tu tɛ asɔ́ bá ne ohónyí ú ɔbɛ́káláka anyía tuésú tóŋínyi aatɔ́ yí buhúnyi yɛ́ nyɛbɛ́bándána eenyi. » Ɛŋakɛlá muɔ́ŋɔ bɛsana mɔ kɔ́mɛ́na maá táŋáka aáná, u ŋé beébe óólísíki.