Read Nomaande BBƐ 5 Bible Online

BBƐ 5 - Nomaande bible

BBƐ 5

¹Mbá, ɔɔcɔ ɔmɔtɛ́ ŋaá bá aáhá ne nyiínyi anyía *Ananías, úúyé oónyí ŋaá bá ɛ́cɛ Safɛ́la ; u ŋeé túé yáábɔ́ ekéti yí iisí.

²Aáná bá ŋa bɔ́ lɔ́kɔ́máná ne oónyí anyía wé huné mɔɔnyɛ́ a mɔ́mɔtɛ́, wá nambá ; u ŋé hiíte a má ŋɔ lɔ́bɔ, u ŋé ke iínjíé ná baacɔ bá ɛndɔ́ma.

³Aáná Bíel ŋeé wuúci batá ɔsɛ : « Ananías, anyána *Sátan áŋa wu onyíóyo ɔɔ́wɔ ɔ ɔtɛ́má a nyɛnamá enyí o ŋoó néŋe *Efúúménénú yí Elilé, mbá a namba mɔɔnyɛ́ a mɔ́mɔtɛ́ me ekéti yí iisí eyí ó moó túé e ?

⁴Yaŋɔ́ ɛsɛ, ekéti yí iisí eéyé ŋaá bá yɔ́ɔ́wɔ ɛ́cɛ o ti móo yiíyi túé e ? Te ekúlú eyí ó moó yiíyi túé tɛ́ka mɔ́ɔ́wɔ mɔɔnyɛ́ mááŋa e ? Mbá anyána ɔ́ mɔɔ́ kɛ́laka nyɛnamá nyɛ́ asana eeye ɔɔ́wɔ ɔ ɔtɛ́má e ? Menyi anyía tɛ́ cáŋa baacɔ ó moó néŋe, mbá Bandɔ́mɛsɛ́. »

⁵Ɛŋakɛlá Ananías áa lɔ́kɔ́ma ɔtáŋa ú Bíel oócí, u ŋá kuá, nyiwé eényí. Aáná bulíkílíki ŋeé tímbíé baacɔ bekime a bá ŋa bɔ́ lɔ́kɔ́máká asana eéyé.

⁶Bɛnɔ́kɔ́ bɛ́ baacɔ ŋa bɔ́ faáya, bɛ́ ŋá bákákɛ́na úúyé omime na ɔmbɔ́mɔ́, bí ŋgé nyie.[13]

⁷Ɛŋakɛlá ekúlú ma hɔ́la hoóhi háyɛ bɔkɔ bú injéŋí ɛ́tátɔ́, oónyí u Ananías ŋó oofíne, u ti ményi asana a yɛ́ ma bɛ́kɛ́láka.

⁸Bíel ɔsɛ nááyá : « Ɔ́ɔ mɛ laána, Meemé, ɔ́kɔ, mɔɔnyɛ́ mekime me onduné ú iisí eeme mááŋa e ? » Mbá ɔsɛ : « Ɛ́ɛ, ímeémé mááŋa mekime. »

⁹Bíel ɔsɛ : « Aátɛ́ yá kɛ́la anyía núánɔ́ lɔ́kɔ́mána ɔ ɔkɔkɔna Efúúménénú yí Elilé yí Otéŋí a Waáŋá e ? Ɔ́ɔ lɛcá, baacɔ e bé me ke bú nyie uuwu ɔnɔ́mɛ, ibeébe eé buúse bú ehenyi, bɔ́ cɔba ɔ ɔ kuɔŋɔ́ súéténe tɔ́na. »

¹⁰Hí e ekúlú eéyé, oónjú ŋá kuá owéénú eé buúse bɔ́ ɔɔcɔ u ɛndɔ́ma. Bɛnɔ́kɔ́ bɛ́ baacɔ ŋe bú óófíne, bí ŋé wuúci kuána owéénú ; bí ŋgé wuúci nyie hoóhi na ɔnɔ́mɛ.

¹¹Yaátɛ́ asana bulíkílíki ŋeé tímbíé na hiɔ́bɔ hí belumitinine Yésus hikime, na baacɔ a bá ŋa bɔ́ lɔ́kɔ́máká asana eéyé.

¹²Baacɔ bá ɛndɔ́ma ŋa bɔ́ bá bábɔ́ kɛ́laka ne bikéki bí tubílícínyínyí ne bikémése bɛ́ bɛsana biéŋí. Belumitinine bekime ŋa bɔ́ bá bábɔ́ bɛ́bándákána na ɔtɛ́má ɔ́mɔtɛ́ a yaalɛ yɛ́ Sálɔmɔn yɛ́ nɔháatɛ́ nú *Ciíbe cɛ Bandɔ́mɛsɛ́.

¹³Asana ɔ́mɔtɛ́, ta ɔɔcɔ u etémbí awɔ́ u tɛ ɔ́mɔɔ́ bá mulumitinine, ti ómoó weéhínyínyi ɔkɔlátana e úúbú ɔlɔŋɔ ; ta híáná, baacɔ bá bunɔŋɔ ŋa bɔ́ bá bébú beébe lénéke buéŋí.

¹⁴Ɔmbana ú belumitinine Yésus ŋaá bá waá kɔ́maka bikúlú bikime, ne beénjú na banɔ́mɔcɔ́.

¹⁵A asana ne bikéki bí tubílícínyínyí abɛ́ baacɔ bá ɛndɔ́ma ŋa bɔ́ bá bábɔ́ kɛ́láka, ɛ́ɛhɛ́ baacɔ beéŋí ŋa bɔ́ bá bábɔ́ cɔ́bakana bɔkɔnɔ́kɔ́nɔ i ihényí, bé beébe fienyikinyi na a maándɔ́ ne e ebúyé, anyía ekúlú eyí Bíel ŋa hɔ́la hɔ́á te hú yááyɛ́ ehuéhue é húé ɔkɔnɔ́kɔ́nɔ ɔmɔtɛ́ eé beébe, mbá u aáŋɔ́nua.

¹⁶Híáná bitúte bɛ́ baacɔ biéŋí ŋaá bá bíé húlúkúne tɔ́na a tɔbálɛ́kabálɛ́ka a túáŋa hoóhi ne Yelúsalɛm, bé hélékénéne na bɔkɔnɔ́kɔ́nɔ ne eebe abá *bɛɛbɛ́ bí bililé ŋaá bá bíé yébíki ; bekime eébé aáŋɔ́núaka.

¹⁷Yaátɛ́ asana ne *mutéŋínyi beluli nyiínjie a muáŋá na baacɔ abá u ŋaá bá ne beébe bá ɔlɔŋɔ ú *Basatusiɛ́ŋ ŋa bɔ́ bá bébú lóbísíkínyi baacɔ bá ɛndɔ́ma buéŋí.

¹⁸Aáná bé ŋeé beébe hátɛ́ákɛ́ná, bé ŋé beébe hákɛ́na eé ciíbe cɛ ɛcaná cɛ kɔ́mɛ́na.

¹⁹Mbá ne butúé, *elilé yɛ́ bɔsɔ́ma yɛ́ Bandɔ́mɛsɛ́ ŋaá faáya, yí ŋé kuúnéke bihenyi bí ciíbe cɛ ɛcaná, yí ŋé hémúnyi baacɔ bá ɛndɔ́ma, mbá yɛ́sɛ náábɔ́ :

²⁰« Ánɔ cɔbá eé *Ciíbe cɛ Bandɔ́mɛsɛ́, núé hulíkínyi baacɔ bɛsana a bɛ́ ŋa lɛ́ca yɔɔ́sɔɔ́sɔ yí olíhe eéyé. »

²¹Ɛ́makɛ́la bábɔ́ lɔ́kɔ́ma aáná, bá ŋá cɔba tútútú nɔɔ́nɔyá, bé ŋge oófókíne a nɔháatɛ́ nú Ciíbe cɛ Bandɔ́mɛsɛ́, bé ŋé túme oweékúnyi baacɔ. Ciátɛ́ nɔɔ́nɔyá eécí, ne mutéŋínyi beluli nyiínjie a muáŋá ne úúyé ɔlɔŋɔ ú baacɔ ŋa bɔ́ bándáka bekendisi Besuif e Hitúlé a hiáŋá. Bá ŋá tɔ́ma bicénji o okohéléne baacɔ bá ɛndɔ́ma abá bá ŋaá háyá eé ciíbe cɛ ɛcaná.

²²Mbá ekúlú eyí bicénji ŋgaá hámá eé ciíbe cɛ ɛcaná, beébe ta ɔkuana baacɔ bá ɛndɔ́ma hɔ́á. Bá ŋa bɔ́ hálɔ́mɔ́na, bá ŋá láákɛ́na baacɔ bé Hitúlé a hiáŋá,

²³báyɛ : « Tú ma sɔ́ kúana bihenyi bí ciíbe cɛ ɛcaná bɛfacákánɔ́ bɔmbányɛ, betétényi ciíbe cɛ ɛcaná bekime ŋa bɔ́ bá tálɛ́mákɛ́na e meése mé bihenyi ; mbá ta híáná, ekúlú eyí tuésú kúuneke bihenyi, basɔ́ ta ɔkuana ɔɔcɔ a baacɔ eébé. »

²⁴Ɛ́makɛ́la ne mutéŋínyi bicénji bí Ciíbe cɛ Bandɔ́mɛsɛ́ ne betéŋínyi *beluli nyiínjie ábɔ́ lɔ́kɔ́ma aáná, injiŋé ŋé beébe nyíme a bɛɛtɔ́ a asana eéyé ; bá bɛ́bátáka báyɛ : « Anyána asana eéyé káá bá e ? »

²⁵Aáná ɔɔcɔ a wɔmɔtɛ́ ŋaá fááya o okoó beébe laana ɔsɛ : « Ánɔ lɛcá ! Baacɔ eébé abá nú ŋa nɔ́ hátɛ́ákɛ́na, núɔ hákɛ́na eé ciíbe cɛ ɛcaná á bɔ́ŋa ehenyíé eé Ciíbe cɛ Bandɔ́mɛsɛ́, bé eékúnyíki baacɔ bɛsana. »[14]

²⁶Mutéŋínyi bicénji bí Ciíbe cɛ Bandɔ́mɛsɛ́ ŋa cɔ́bá na bááyɛ́ baacɔ ; bá ŋá ka hálámánána baacɔ bá ɛndɔ́ma o moyóyónó, anyía bicénji bɛ́muátá ŋaá bá bíé líkíméke anyía baacɔ á bɔ́ŋa bé o beébe túméke andányɛ́.

²⁷Ɛ́makɛ́la bé ke bú beébe hálámánáná, bé ŋé beébe oofínyi haála ehé Hitúlé a hiáŋá ŋaá bá ; mbá mutéŋínyi beluli nyiínjie a muáŋá meé túme obícónyi baacɔ bá ɛndɔ́ma,

²⁸ɔsɛ : « Yaŋɔ́ ɛsɛ, tu ŋá sɔ́ banɔ́ kóti buúse bukime anyía nɔtɛ háná éékúnyi bɛsana abɛ́ ɔɔcɔ oócí ŋaá bá we yéékúnyíki e ? Mbá ánɔ lɛcá bɔkɔ abɔ́ nú ma nɔ́ kɛ́laka, nú ma nɔ́ sásaka nyíánɔ́ nyiékúnyi a baacɔ bekime bá bálɛ́ka ci Yelúsalɛm ikime ; nu ŋa nɔ́ áamba ɔ basɔ́ túéhínyi owé ú ɔɔcɔ oócí a bɛɛtɔ́. »

²⁹Ne Bíel na baacɔ bá ɛndɔ́ma a bɔ́mɔtɛ́ ŋa bɔ́ bɛ́káláka, báyɛ : « Tu ŋá sɔ́ nyɛ́mána tú ɔlɔ́kɔ́mákɛ́na Bandɔ́mɛsɛ́ ɔ ɔhɔla baacɔ.

³⁰Yááŋa anyía Bandɔ́mɛsɛ́ ewú cíísú sɔ́kɔ́nɔ́ ŋaá bá cíé nyémiki, wuúci ú ŋeé héényi Yésus o owé, ooci awɔ́ nú ŋa nɔ́ ɔɔ́nɔ́ ɛ́cɛ nú ma nɔ́ aátákɛ́na ɔ ɔmbásá.

³¹Bandɔ́mɛsɛ́ ŋeé bééti Yésus ɔ Ɔmuaná a aháŋá yí úúyé ɔɔbɔ́ ú manɔ́mɛ ; u ŋé wuúci télímínyi ne Otéŋí ne Munohi baacɔ ɔ ɔkɛla anyía baacɔ bé *Islayɛ́l ábɔ́ bɔ́ŋɔ ohónyí wú ɔbɛ́kákálákɛ́na máábɔ́ maabɛ́, mbá bá sɔ́mba ɔkɔlɔ́ eé meéme, Bandɔ́mɛsɛ́ yó beébe nyɛ́anakɛna máábɔ́ maabɛ́.

³²Basɔ́ eebe, tú ŋe sú húlinyi baacɔ bɛsana a bɛ́ ŋa bɛ́kɛ́láka ; *Efúúménénú yí Elilé ayɛ́ Bandɔ́mɛsɛ́ ŋe yiínjíé ná baacɔ e bé ŋe bú wuúci lɔ́kɔ́mɛ́na ŋeé húli tɔ́na bɛsana eébí. »

³³Ɛ́makɛ́la baacɔ bé Hitúlé a hiáŋá ábɔ́ lɔ́kɔ́máka bɛsana eébí, bá ŋá bɔ fámɔ́núáka ne hilóbi ; bá ŋá bɛ́táá ɔwɔɔ́nɔ́kɔ baacɔ bá ɛndɔ́ma.

³⁴Mbá ɔɔcɔ ɔmɔtɛ́ ŋaá bá aaha, nyiínyi báyɛ Kamaliɛl.[15] U ŋaá bá ɔɔcɔ u hitúlé hɛ́ Bafalisiɛ́ŋ, wuúci muékúnyi bikotí, baacɔ bekime ŋaá bá bébú wuúci kékéke buéŋí ; ɔɔcɔ ooci ŋa hátɔ́na ɛndánáka ɛ ɛkatɛ́katɛ́ ci Hitúlé a hiáŋá, u ŋá batá bicénji anyía bía caŋá hémúnyi baacɔ bá ɛndɔ́ma a nɔháatɛ́.

³⁵Ɛ́makɛ́la bé beébe hémúnyi, mbá ɔsɛ ná baacɔ bé Hitúlé : « Banɔ́, buamɛ bú Islayɛ́l, énu bíkékényíki na bɔkɔ abɔ́ nú ŋa nɔ́ bɛ́táá ɔkɛla baacɔ eebe.

³⁶Ánɔ bɛ́tááka bɔmbányɛ anyía tuɔŋɔ tɛ ŋa hɔ́la tuéŋí ayɛ́ Tɛ́tas ɔɔcɔ a wɔmɔtɛ́ ŋe bítóŋínyí, u bíkétíki anyía wáŋa taaká cɛ́ ɔɔcɔ ; baacɔ beéŋí ŋe bú wuúci látáká hoóhi hɛɛcɔ[16] hɛ́mɔtɛ́. Mbá ekúlú ayɛ́ baacɔ ŋe bú wuúci ɔɔ́nɔ́, baacɔ bekime e bé ŋe bú wuúci látákɛ́na ŋa bɔ́ sáásíáka, ta ɔɔcɔ ta ɔlɔbɔ ɔ ɔlɔŋɔ oócí.

³⁷E elime ciayɛ́, ekúlú yɛ́ mɔfanana, Yútas, ɔɔcɔ u *Kalilé, ŋe bítóŋínyí tɔ́na ; baacɔ beéŋí ŋe bú wuúci látákɛ́ná. Mbá ekúlú eyí bé ŋeé wuúci ɔɔ́nɔ́ tɔ́na, baacɔ bekime e bé ŋe bú wuúci látákɛ́na ŋa bɔ́ sáásíáka.

³⁸Buátɛ́ bɔkɔ, ɛ ŋa mɛ́ banɔ́ láana aámbáya anyía nɔtɛ háná híite ekúlú a asana na baacɔ eebe ; énu beébe nyɛ́ána, bé súéte, anyía mbɔ́kɔ ná baacɔ ne injiŋé ne buólí abɔ́ bá ŋa bɔ́ nyiɔ ŋeé húle, bí kéé nyímúkúne buúse bukime.

³⁹Mbá mbɔ́kɔ taaká Bandɔ́mɛsɛ́ ú ŋeé beébe iínjie injiŋé cɛ ɔkɛlaka bɛsana eébí, nu tɛ anɔ́ bá nú ɔbɔ́ŋɔ ohónyí wú o biíbi menyisi ; énu bíkékényíki anyía yááŋa yɛ́ ɔbá anyía nú ma nɔ́ támba biité na Bandɔ́mɛsɛ́. » Ɔtáŋa ú Kamaliɛl ŋe bílénékíne baacɔ bé Hitúlé a hiáŋá ;

⁴⁰aáná bé ŋe bú óófínyi baacɔ bá ɛndɔ́ma, bé ŋé beébe súbéke, bé ŋé beébe háyɛ́na okotí anyía bá tɛ háná cámba nyiínyi nyí Yésus, nyi beébe nyɛana eényí.

⁴¹Baacɔ bá ɛndɔ́ma ŋa bɔ́ hátɔ́na ɛ ɛkatɛ́katɛ́ ci Hitúlé a hiáŋá, bé ŋé súéte, bé bílénéke buéŋí, anyía bú me bílénékíne Bandɔ́mɛsɛ́ anyía bábɔ́ lɔ́kɔ́máka muuyé a asana ne Yésus.

⁴²Bá ŋa bɔ́ cɔ́bá ne buúse o oweékúnyi baacɔ bɛsana, bé húlíkínyi baacɔ Ambányɛ yɛ́ Ɛsɔ́ma yí Yésus, Ɔlɔtɔ́nɔ́ u Bandɔ́mɛsɛ́, ne eé Ciíbe cɛ Bandɔ́mɛsɛ́ ne eé meébe ma baacɔ mɔɔ́sɛ́ mekime.