Read Nomaande Lom 1 Bible Online

Lom 1 - Nomaande bible

Lom 1

¹Yaŋɔ́ Bóol, ɛ ŋa mɛ́ banɔ́ ɔ́ɔ́ŋɛ́na nufule eenu ; ya mɛ́ŋa munyiɔnɔ mu *Yésus *Kilís. *Bandɔ́mɛsɛ́ ŋa mɛ lɔ́tɔ́, yɔ́ mɛ tɔ́ma *ɔɔcɔ u ɛndɔ́ma o okohúlinyi baacɔ yááyɛ́ Ambányɛ yɛ́ Ɛsɔ́ma.

²Buáyá u ŋaá bɛ́tánɛ́ná baacɔ Ambányɛ yɛ́ Ɛsɔ́ma eéyé eé nyuúté nyɛ́ bááyɛ́ *behémúnyi bɛsana, bó yiíyi ɔ́ɔ́ŋɔ́kɔ a Ciɔɔ́ŋɛ́ e Cifúúménénú noómi.

³Ambányɛ yɛ́ Ɛsɔ́ma eéyé ŋo tóŋínyi asana yí uuyé Ɔɔ́nɔ́, Yésus Kilís, uusú Otéŋí a Waáŋá. A aháŋá na baacɔ, bé ŋeé wuúci bíéné a hɛnyɛ́nɔ́ hí Otéŋí *Táfit. A aháŋá ne Elilé, Bandɔ́mɛsɛ́ ŋeé wuúci télímínyí uuyé Ɔɔ́nɔ́ a makɛ́nda me *Efúúménénú yí Elilé e nyiheenyi enyí u ŋeé wuúci héényi e biwéewé.[1]

⁵E elime ci uusú Otéŋí a Waáŋá, Bandɔ́mɛsɛ́ ŋeé mi tóŋínyí yááyɛ́ yaála yí nuubo, yɔ́ mɛ lɔtɔ uuyé ɔɔcɔ u ɛndɔ́ma o okohúlinyi mɔnɔŋɔ me etémbí mekime yááyɛ́ Ambányɛ yɛ́ Ɛsɔ́ma ananyía bé wuúci lumítékíníne, bé wuúci lɔ́kɔ́mákɛ́na. Aáná bé ké bú nyémiki Yésus Kilís.

⁶Banɔ́ tɔ́na, nua nɔ́ŋa ɔ ɔmbana ú baacɔ eébé ebé Yésus Kilís ŋɔɔ́ lɔ́ŋɔ́kɔ́.

⁷Ɛ́ɛhɛ́ ɛ ŋá mɛ́ banɔ́ ɔ́ɔ́ŋɛ́na nufule eenu, banɔ́ bekime abá nua nɔ́ŋa o *Lóom ; nua nɔ́ŋa baacɔ bá ɔtɛ́má bá Bandɔ́mɛsɛ́. Wuúci u ŋaá banɔ́ lɔ́ŋɔ́kɔ́ anyía nuánɔ́ bámɔ́kɔ́na bááyɛ́. Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sayábákɛ́na, bá banɔ́ iínjíékíne mbuumu ɛ ɛtɛ́má noómi.

⁸Ɛ ŋa mɛ́ caŋa o wiínjie Bandɔ́mɛsɛ́ bitéŋíti e elime ci Yésus *Kilís a yáánɔ́ asana aá banɔ́ bekime, anyía bá ŋa bɛ́sɔ́mɔ úúnú olumitinine ɔ ɔmɛsɛ́ okime.

⁹Yááŋa anyía ɛ ŋaá mɛ bɛ́cɔ́kɔ́lɛ́na Bandɔ́mɛsɛ́ a yáánɔ́ asana ekúlú ekime eyí i ŋe mí wuúci bɛ́cɔ́kɔ́lɛ́na. Bandɔ́mɛsɛ́ áŋa uumi ɔmbasɔ́mbásɔ a asana eéyé. Wuúci ɛ ŋa mɛ́ nyiɔnɔ na ɔtɛ́má okime buólí bú ohulikinyi baacɔ Ambányɛ yɛ́ Ɛsɔ́ma yɛ́ asana yí uuyé Ɔɔ́nɔ́.

¹⁰Ɛ ŋaá mɛ bɛ́cɔ́kɔ́lɛ́na Bandɔ́mɛsɛ́ aáná, ɛ tɛ tɔmbɔ, anyía wé mi iínjíe ohónyí aámbáya wú ɔfaaya ɔ ɔkɔɔ́ banɔ́ lɛ́ca, mbɔ́kɔ u ŋéé lénéke.

¹¹Yááŋa anyía ya mɛ́ŋa na ɛcaná ciéŋí ɔ ɔhɔla anyía yámɛ́ faáya ɔ ɔkɔɔ́ banɔ́ lɛ́ca, anyía yámɛ banɔ́ iínjíé nyiínjie a nyɛ́mɔtɛ́ nyí Elilé a nyɛ́áŋa nyí okíndísíki úúnú olumitinine.

¹²Ɛ ŋa mɛ́ aamba ɔkɔɔna yáaŋa anyía túésú kíndísíkínyínyi o olumitinine ɔ́mɔtɛ́ awɔ́ u maá basɔ́ láta basɔ́ bekime.

¹³Baláamɛ, ɛ ŋa mɛ́ banɔ́ láana anyía ya mɛ́ŋa ɔwaámbákánɔ́ bikúlú biéŋí ohónyí wú ɔfaaya ɔ ɔkɔɔ́ banɔ́ lɛca, anyía búámɛ buólí a lɛcána tɔ́na náánɔ́ háyɛ bú ŋa lɛcakana ɔ mɔnɔŋɔ me etémbí ; mbá, ɔ ɔkɔɔ́háma aámbáya ohónyí tɛ ŋá lɛ́cána.

¹⁴Bandɔ́mɛsɛ́ u ŋeé mi túéhínyi buólí eébú, ɛ́ɛhɛ́ ya mɛ́ŋa oweékínyínyi anyía yémi hulíkínyi baacɔ bekime bá ɔmɛsɛ́ Ambányɛ yɛ́ Ɛsɔ́ma ; ta *Bakɛlɛ́k, te becikécíke, te bemenyi bɔkɔ, te be-ti-menyí bɔkɔ.

¹⁵Yaátɛ́ asana ya mɛ́ŋa na ɛcaná ciéŋí cɛ ɔfaaya náánɔ́ ɔ ɔkɔɔ́ banɔ́ húlinyi tɔ́na Ambányɛ yɛ́ Ɛsɔ́ma eéyé, banɔ́ eebe ebé nu ŋe nú líhe o *Lóom.

¹⁶Yááŋa anyía ɛ tɛ ŋá mɛ lɔ́kɔ́ma aatɔ́ ɔlama ekúlú eyí i ŋe mí hulinyi baacɔ Ambányɛ yɛ́ Ɛsɔ́ma. Ne Yiíyi Bandɔ́mɛsɛ́ ŋó tóŋínyi maayɛ́ makɛ́nda o onohiki baacɔ a bá ŋa bɔ́ háya mɔŋɔlɛ́ né Yésus *Kilís : Eé buúsebuúse né *Besuif, e elime eécí na baacɔ a bá tɛ ábɔ́ bá Besuif.

¹⁷Aáná yí ŋo tóŋínyi anyána Bandɔ́mɛsɛ́ ŋa kɛ́la anyía ɔɔcɔ á bá atálɛ́mánánɔ́ yɛ́ ɔɔcɔ eeyé eé buúse hú ɔ mɔŋɔlɛ́ amá u ŋaá háya nááyá. Aáná yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : « Ɔɔcɔ okime awɔ́ u ŋaá háya mɔŋɔlɛ́ ná Bandɔ́mɛsɛ́, Bandɔ́mɛsɛ́ ŋa kɛla anyía wá bá atálɛ́mánánɔ́ yɛ́ ɔɔcɔ eeyé eé buúse ; wuúci u kéé líhéke taaká ci olíhe. »[2]

¹⁸Yááŋa anyía Bandɔ́mɛsɛ́ ɔ Ɔmuaná noómi ŋo lóbisinyi baacɔ anyía bá ŋa bɔ́ kɛ́la bɛɛbɛ́ bɛ́ bɛsana, bé tí wuúci kéke. Yáábɔ́ aabɛ́ yɛ́ nyɛbɛ́kɛ́lɛ́na ŋeé húé ciayɛ́ taaká,

¹⁹yiíyi anyía bé ŋe bú ményi nyɛbá nyɛ́ Bandɔ́mɛsɛ́, anyía u ŋeé beébe nyiínyi tóŋínyi bɔmbányɛ bɔmbányɛ.

²⁰Yááŋa anyía, o otúme e nyiketi nyɛ́ na ɔmɛsɛ́ na ɔmuaná, bɛnyɛ́ma bikime ebí u ŋeé kétíki ŋo tóŋínyi baacɔ na maayɛ́ makɛ́nda me ekúlú ekime na nyíáyɛ́ nyɛbá, yiíyi anyía bé tí ŋé bú wuúci lɛca. Ɛ́ɛhɛ́ ohónyí wú ɔnyɛanɛnɛna ɔɔcɔ tɛ á bá.

²¹Ta ayɛ́ bé ŋe bú ményi Bandɔ́mɛsɛ́, bé me bú kine ne o wuúci iínjie nuúmi ne o wuúci iínjie bitéŋíti e bí e wuúci nyɛmana ; mbá cííbú ibíkéti cɛ́ buála me beébe nenisiki ; cííbú ɛbɛ́táá cí etémbí ne etémbí me beébe kuusiki ibíne.

²²Bé ŋe bú bíbééti ɔbá ne injiŋé, yiíyi anyía bá bɔ́ŋa bɛála.

²³Na anyía bébú nyémíki buáŋá bɔ́ Bandɔ́mɛsɛ́, wuúci Indiwé, bé ŋe bú nyémi bɛbɔ́kɔ́bɔ́kɔ ; bɛ́ hɔ́áka na baacɔ e bé ŋe bú wé, ne tunonyí, na ɛnyama, na mɔɔ́hɔ.

²⁴Yaátɛ́ asana Bandɔ́mɛsɛ́ mé beébe bɛ́yúátaka anyía bábɔ́ kɛ́laka bɛɛbɛ́ bɛ́ bɛsana e bí ŋeé beébe hámɛ́na ɛ ɛtɛ́má ; aáná bé ŋe bú tífíle cííbú cɛɛ́tɔ beébe ne beébe na bɛsana bikime bɛ́ aatɔ́ ɔlama.

²⁵Bá má bɔ́ nyɛ́anaka taaká cɛ́ bɛsana a cɛ́ ŋa lɛ́ca Bandɔ́mɛsɛ́, bɔ́ látáka bɛfala. Bé ŋe bú nyemi bɛnyɛ́ma abɛ́ Bandɔ́mɛsɛ́ ŋeé kétíki, bé biíbi nyiɔkɛna, na anyía bébú nyemíki Ooci ewú u ŋeé biíbi ketíki bikime ! Wuúci bímuócí bá á nyɛmána bé onyemiki. *Híáná yááŋa !

²⁶Buátɛ́ bɔkɔ Bandɔ́mɛsɛ́ meé beébe bɛ́yúataka anyía bábɔ́ kɛlaka bɛɛbɛ́ bɛ́ bɛsana bɛ́ aatɔ́ ɔlama e bí ŋeé beébe hámɛ́na ɛ ɛtɛ́má. Báábɔ́ beénjú tɛ ŋa háná ebú límine na banɔ́mɔcɔ́ háyɛ Bandɔ́mɛsɛ́ ŋeé kétíki, mbá bé ŋe bú límenenene.

²⁷Híáná banɔ́mɔcɔ́ tɔ́na tɛ ŋa háná abɔ́ fiananana beénjú háyɛ Bandɔ́mɛsɛ́ ŋeé kétíki, mbá ɔfiananana bɔsɔ́ɔ́kɔ́ banɔ́mɔcɔ́, wuúci ú ŋeé beébe hámɛ́na ɛ ɛtɛ́má buéŋí. Bá ŋa bɔ́ kɛla bɛsana bɛ́ aatɔ́ ɔlama beébe ne beébe. Biíbi bí ŋeé beébe héléníne bɛnamá abɛ́ á nyɛmana na bɔɔbɛ́ abɔ́ bá ŋa bɔ́ kɛ́la.

²⁸A asana ayɛ́ baacɔ eébé ti ŋé bú léne omenyinyi na Bandɔ́mɛsɛ́, ɛ́ɛhɛ́ ú meé beébe bɛ́yúataka anyía bábɔ́ látákɛ́na ne cííbú ɛbɛ́táá cí etémbí ne etémbí, bá kɛ́laka tɔ́na bɛsana abɛ́ bá tɛ́ ɔmɔ́ bɔ́ nyɛmana bá ɔkɛlaka.

²⁹Bá bɔ́ŋa ne bibébékénú bɛ́ ɛtɛ́má, bí mo nyíóyóko na bɛɛbɛ́ bɛ́ bɛsana hú mbiɔ́kɛ ! Bá ŋa bɔ́ áákɛ́na bɔsɔ́ɔ́kɔ́, beébe na nyɛŋána ; bá bɔ́ŋa na bɛɔtɛ, bá ɔ́ɔ́nɔ́kɔ bɔsɔ́ɔ́kɔ́, bé lénéke ɛsáká ; beébe ne menjiŋé a bɛɛtɔ́, ne tusiŋítí tɔ́ ɔnyíákɛ́na bɔsɔ́ɔ́kɔ́ ; bá ŋa bɔ́ sɔ́mbɛ́na bɔsɔ́ɔ́kɔ́ bɛsana,

³⁰bé ŋe bú óóto bɔsɔ́ɔ́kɔ́ ; bé líŋekine Bandɔ́mɛsɛ́, beébe ne tuféne. Bá bɔ́ŋa na bumálá, bé bíbéétíki tɔ́na. Bá bɔ́ŋa ekúlú ekime hoóhi na ɔkɛla bɔɔbɛ́ ; bá ŋa bɔ́ kɛ́lɛna bíábɔ́ bibíényi aatɔ́ ɔnata.

³¹Bá tɛ abɔ́ bá na bɛɛtɔ́. Ɔɔcɔ tɛ á bá wu ɔháya mɔŋɔlɛ́ náábɔ́ ; bé ti ŋe bú léne bɔsɔ́ɔ́kɔ́, bá tɛ bɛ́cáma ɔɔcɔ mahana.

³²Ta ayɛ́ bé ŋe bú ményi bɔmbányɛ anyía Bandɔ́mɛsɛ́ ŋaá kɔɔna anyía baacɔ a bá ŋa bɔ́ kɛla anamánamá cá bɛɛbɛ́ bɛ́ bɛsana eécé ŋá bɔ́ nyɛmana bé owéékúne, bá ŋa bɔ́ cɔba hú ne buúse o o biíbi kɛla. Tɛ́ cáŋa ɔmanɔ́ oócí : Ekúlú ayɛ́ bá ŋa bɔ́ lɛ́ca baacɔ bé etémbí ábɔ́ kɛlaka bɛɛbɛ́ bɛ́ bɛsana, bé ŋe bú beébe lémbi anyía bá cɔbáka ne buúse ɔ ɔkɛla híáná.