Read Nomaande Lom 3 Bible Online

Lom 3 - Nomaande bible

Lom 3

¹Yaátɛ́ asana aná, ɔɔcɔ u *Besuif áŋa wu ɔbata anyía : Aátɛ́ ɔbámɔ́kɔ́nɛ́na ɔɔcɔ u Besuif ŋa hɔ́lana e ? [6] Aátɛ́ ɔbɛ́áca ŋaá basɔ́ ɔ́ɔ́lɔ e ?

²Ɛ́ɛ, bɛ́ ŋaá basɔ́ ɔ́ɔlɔ buéŋí i ihényí ikime, ananyía Bandɔ́mɛsɛ́ ŋa cáŋa ocúmeke Besuif bíáyɛ́ bɛsana.

³Mbá anyána aná, mbɔ́kɔ báábɔ́ baacɔ a bɔ́mɔtɛ́ ti ómo bú lúmitinine bɛsana eébí,[7] yiíyi yí ŋo tóŋínyi tɔ́na anyía Bandɔ́mɛsɛ́ áŋa wu olimine, u ti nyíóyísínyi cááyɛ́ esúŋe e ?

⁴Eéʼeé, tɛ́ cáŋa aáná ; baacɔ ŋá bɔ́ nyɛmana bé omenyi anyía Bandɔ́mɛsɛ́ ŋeé nyíóyísínyi cááyɛ́ esúŋe bikúlú bikime, mbá yááŋa anyía baacɔ bekime e bé ŋe bú wuúci nuusi beébe bá bɔ́ŋa bafalafala. Yááŋa yɔɔ́ŋɔ́kɔ́nɔ́ anyía : « Baacɔ ŋá bɔ́ nyɛmána bé omenyi bikúlú bikime anyía ciɔwɔ ɛmbasɔ́ áŋa ɛtálɛ́mánánɔ́, bé menyukune tɔ́na anyía ɔ ŋɔɔ́ yáka ekúlú eyí bé ŋo yóo kélísi. »

⁵Yáakɛlá bɔ́mɔtɛ́ baacɔ ŋa bɔ́ kɔɔna anyía nyíásɔ́ nyɛkɛla nyɛ́ bɛsana a bɛɛbɛ́ ŋɔ yɔ́ɔlɔ baacɔ o omenyi anyía Bandɔ́mɛsɛ́ áŋa ɔtálɛ́mánánɔ́. Aátɛ́ yí etémbí tua sɔ́ŋa tú o beébe bɛ́káma e ? Tua sɔ́ŋa tú o beébe bɛ́káma anyía Bandɔ́mɛsɛ́ tɛ á bá ɔtálɛ́mánánɔ́ ekúlú ayɛ́ u ŋaá basɔ́ bɔ́nɔ́sɛa e ?

⁶Eéʼeé, yɛ́ tɛ á bá aáná buúse bukime. Mbɔ́kɔ yiíyi aáná, keyé Bandɔ́mɛsɛ́ tɛ á bá wu okélísíki baacɔ bá ɔmɛsɛ́ bekime.

⁷Yáakɛlá bɔ́mɔtɛ́ baacɔ tɔ́na ŋa bɔ́ kɔ́ɔna anyía bíásɔ́ bɛfala ŋɔ yɔ́ɔlɔ baacɔ o omenyi anyía Bandɔ́mɛsɛ́ áŋa ɔtálɛ́mánánɔ́, mbá bé búle wuúci iínjie nuúmi. Mbɔ́kɔ yááŋa aáná, mbá anyíatɛ́ bá yánáŋa ɔ ɔcɔba ne buúse ɔ ɔ basɔ́ bɔ́nɔ́sɛa anyía tua sɔ́ŋa bakɛla maabɛ́ e ?

⁸Bɔ́mɔtɛ́ bé etémbí ŋa bɔ́ kɔ́ɔna tɔ́na anyía bé búle kɛla bɔɔbɛ́ anyía bɔmbányɛ á lɛcakana. Aáná bá ŋa bɔ́ basɔ́ óoto anyía basɔ́ tu naŋa tuasɔ́ kɔ́ɔnaka aáná. Ɛ ŋa mɛ́ banɔ́ láana anyía bɔ́nɔ́sɛ cɛ baacɔ eébé á yáaŋa ɛnyɛmánánɔ́.

⁹Ánɔ lɛcá aná ! Ya mɛáŋa otóŋgínyínyi anyía na basɔ́ Besuif na baacɔ bé etémbí tua sɔ́ŋa basɔ́ bekime na ɔtɛ́má awɔ́ ú ŋa basɔ́ hámɛ́na ɔkɛla bɔkɔ búmɔtɛ́. Ɛ́ɛhɛ́ basɔ́ Besuif tu tɛ ŋá sɔ́ hɔ́la baacɔ bé etémbí te butíkítíki.

¹⁰Aáná Ciɔɔ́ŋɛ́ ŋaá kɔɔna cɛsɛ : « Ta ɔɔcɔ ɔmɔtɛ́ tɛ á bá ɔtálɛ́mánánɔ́ eé buúse bɔ́ Bandɔ́mɛsɛ́, ta hú ɔmɔtɛ́. »

¹¹Ta ɔɔcɔ ɔmɔtɛ́ tɛ á bá ne injiŋé cɛ ɔlɔ́kɔ́máka bɔmbányɛ bɛsana bɛ́ Bandɔ́mɛsɛ́ ; ta ɔmɔtɛ́ tɛ aamba ohónyí wú o wuúci menyi.

¹²Baacɔ bekime ma bɔ́ bɛ́yúátáka ambányɛ yí ohónyí, bɔ́ bɛ́áhákɛ́na e eciké ; ta ɔmɔtɛ́ tɛ ŋá kɛ́la ambányɛ yɛ́ asana, ta hú ɔmɔtɛ́.

¹³Yááŋa anyía maabɔ́ mehúnyi ŋɔ yɔ́ɔ́nɔ́nɔ;[8] úúbú ɔtáŋa néŋékéne; maabɔ́ mehúnyi eémé áŋa háyɛ hɛlɔkɔ hɛ́ ciɔ́hɔ.

¹⁴Cáábɔ́ eété ŋe hémúnyi hú bɛahɔ́ ;

¹⁵bá bɔ́ŋa fiaŋɔ fiaŋɔ ɔ ɔkɔwɔɔ́nɔ́kɔ baacɔ.

¹⁶A bɛhaála bikime abɛ́ bá ŋa bɔ́ hɔ́la, hú ne ekume ne muuyé bé ŋe bú síkíne baacɔ aá ciabɔ́ elime.

¹⁷Bé ti ŋé bú menyi olíhe ú mbuumu na bɔsɔ́ɔ́kɔ́;

¹⁸bé ti kéke Bandɔ́mɛsɛ́ buúse bukime.

¹⁹Basɔ́ bekime tu ŋe sú ményi bɔmbányɛ anyía bɛsana bikime ebí *bikotí ŋe yéékúnyi ŋaá lɛ́cá hú baacɔ e bé ŋe bú bíékínyi ɔlátɛ́na bikotí. Bú ŋo tóŋínyi anyía ta ɔɔcɔ tɛ bɔ́ŋɔ ohónyí wú ɔbɛ́kála, tɔ́na anyía ɔɔcɔ okime áŋa na nyɛkua eé buúse bɔ́ Bandɔ́mɛsɛ́.

²⁰Yaátɛ́ asana yááŋa anyía Bandɔ́mɛsɛ́ tɛ káá kɛla anyía ta ɔɔcɔ ɔmɔtɛ́ á bá ɔtálɛ́mánánɔ́ eeyé eé buúse a nyɛlátɛ́na anyɛ́ u ŋa látɛ́na bikotí. Yááŋa anyía bikotí ŋo tóŋínyi bú tóŋínyi baacɔ anyía bé menyukune maabɔ́ maabɛ́.

²¹Mbá aámbáya Bandɔ́mɛsɛ́ mo tóŋínyi baacɔ anyána u ŋa kɛla anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ; u ti ŋeé beébe kɛla aáná a nyɛlátɛ́na anyɛ́ bá ŋa bɔ́ látɛ́na *bikotí. Ne tufule tú bikotí, ne tufule tú *behémúnyi bɛsana ŋa bɔ́ cáŋa otóŋgínyi anyía

²²Bandɔ́mɛsɛ́ ŋaá kɛ́la anyía baacɔ á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse yáaŋa anyía bá ŋa bɔ́ háya mɔŋɔlɛ́ né Yésus *Kilís ; asana eéyé ŋa lɛca baacɔ bekime e bé ŋe bú lumitinine, nyɛálɔ́nána tɛ á bá ɛ ɛkatɛ́katɛ́ cɛ baacɔ.

²³Yááŋa anyía baacɔ bekime ŋa bɔ́ kɛ́la bɛsana a bɛɛbɛ́, buátɛ́ bɔkɔ bá tɛ abɔ́ bá bá ɔkɔɔ́háma hoóhi ne nuúmi nɔ́ Bandɔ́mɛsɛ́.

²⁴Mbá Bandɔ́mɛsɛ́ ŋaá kɛla anyía baacɔ á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse e etémbí ne etémbí, a yááyɛ́ yaála yí nuubo. U ŋa hɔ́lɛ́na né Yésus Kilís ; wuúci u ŋeé beébe háŋɔ́náká a buɔ́lɛ́ bɔ́ bɔɔbɛ́.

²⁵Wuúci oócí Bandɔ́mɛsɛ́ ŋa kɛ́lá anyía bé wuúci sɔ́mbɛ́na ; maayɛ́ manɔ́ŋɔ́ mɔ́ hámɔ́kɔ́na, a asana na nyɛnyɛanɛna nyɛ́ maabɛ́[9] ma baháya mɔŋɔlɛ́ nááyá.[10] U ŋaá kɛ́láka aáná o otóŋínyi baacɔ anyía wáŋa ɔtálɛ́mánánɔ́. U ŋaá nyɛ́ánáka máábɔ́ maabɛ́, tɛ́ka ne o beébe bɔ́nɔ́sɛ́áka ;

²⁶u ŋeé beébe eéhíkínyínyí. Aámbáya aná u ŋoó tóŋínyi baacɔ anyía baháya mɔŋɔlɛ́ né Yésus á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse. U tóŋgínyi tɔ́na anyía wáŋa ɔtálɛ́mánánɔ́.

²⁷Yaátɛ́ asana ɔɔcɔ tɛ ɔ́mɔ nyɛ́mána wu obílémbíki wuúci bɛ́muátá. Yááŋa anyía tɛ́ cáŋa a nyɛlátɛ́na anyɛ́ tú ŋa sɔ́ látɛ́na bikotí, yiíyi Bandɔ́mɛsɛ́ ŋá kɛ́lá anyía basɔ́, túásɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ; mbá u ŋaá kɛ́lá aáná a asana na mɔŋɔlɛ́ amá tu ŋa sɔ́ háyá né Yésus Kilís.

²⁸Tu ŋe sú óónyísínyi anyía Bandɔ́mɛsɛ́ ŋaá kɛ́lá anyía ɔɔcɔ okime á bá atálɛ́mánánɔ́ yɛ́ ɔɔcɔ eeyé eé buúse a mɔŋɔlɛ́ amá u ŋaá háya nááyá ; tɛ́ cáŋa a nyɛlátɛ́na nyí bikotí.

²⁹Yááŋa anyía Bandɔ́mɛsɛ́ tɛ á bá hú Bandɔ́mɛsɛ́ ci *Besuif bímuócí, mbá wáŋa tɔ́na Bandɔ́mɛsɛ́ cɛ baacɔ bekime bé etémbí,

³⁰anyía Bandɔ́mɛsɛ́ áŋa hú ɔmɔtɛ́ a baacɔ bekime. Wuúci oócí u káá kɛ́la anyía baacɔ bekime, ne Besuif na baacɔ bé etémbí, á bámɔ́kɔ́na bɛtálɛ́mánánɔ́ bɛ́ baacɔ eeyé eé buúse hú a mɔŋɔlɛ́ amá bá ŋa bɔ́ háya né Yésus Kilís.

³¹Yááŋa anyía nyɛkɛla anyɛ́ Bandɔ́mɛsɛ́ ŋa kɛ́lá anyía túásɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse hú o olumitinine ti ŋeé témbúnyísi bikotí buúse bukime ; mbá nyí ŋeé biíbi óónyísínyi bú oónyísínyi.