Read Nomaande 1Kɔ 1 Bible Online

1Kɔ 1 - Nomaande bible

1Kɔ 1

¹Yaŋɔ́ Bóol, *Bandɔ́mɛsɛ́ ŋaá háŋá ɔ mɛ lɔ́ŋɛ́ta anyía yámɛ bá *ɔɔcɔ u ɛndɔ́ma u *Yésus *Kilís. Tua sɔ́ŋa na yaŋɔ́ ne uusú onyíinyí u olumitinine, Sosotɛ́n.[1]

²Tu ŋa sɔ́ banɔ́ ɔ́ɔ́ŋɛ́na nufule eenu, banɔ́ abá nua nɔ́ŋa hiɔ́bɔ hí belumitinine Bandɔ́mɛsɛ́ hɛ́ Kɔlɛ́ɛntɛ, banɔ́ abá Bandɔ́mɛsɛ́ ŋɔɔ́ lɔ́tɔ́kɔ ɔ ɔbá e nyimónjóló ne Yésus Kilís. U ŋaá banɔ́ fúúmínyí ɔlɔŋɔ ne eebe bekime a bɛhaála bikime e bé ŋe bú nyémi nyiínyi nyí uusú Otéŋí a Waáŋá Yésus Kilís, wáŋa ne uubú Otéŋí a Waáŋá ne uusú áyá.

³Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sayábákɛ́na, bá banɔ́ iínjíékíne mbuumu e cíínú ɛtɛ́má noómi.

⁴Ɛ naŋa yémi iínjíékíne ciamɛ Bandɔ́mɛsɛ́[2] bitéŋíti ekúlú ekime a asana ayɛ́ u ŋaá banɔ́ bóósíki e elime ci Yésus Kilís.

⁵Yááŋa anyía nua nɔ́ŋa e nyimónjóló ne wuúci ; aáná Bandɔ́mɛsɛ́ áŋa ɔ banɔ́ nyɛ́hɛ́tɛ́nánɔ́ bɛmbányɛ bɛ́ bɛsana bikime, na ɔ ɔtáŋa ne o omenyi áyá,

⁶anyía Ambányɛ yɛ́ Ɛsɔ́ma yí Yésus *Kilís ayɛ́ tú ŋá sɔ́ banɔ́ húlíkínyi áŋa yɔɔ́nɛ́nánɔ́ na makɛ́nda e cíínú ɛtɛ́má noómi.

⁷Yaátɛ́ asana ta bɔkɔ a búmɔtɛ́ a bɛnyɛ́ma abɛ́ Bandɔ́mɛsɛ́ ŋé yíinjie aayá a baacɔ tɛ ŋá banɔ́ bɛ́ámbɛ́na, banɔ́ abá nu ŋa nɔ́ táta na mɔŋɔlɛ́ buɔ́sɛ́ ebú uusú Otéŋí a Waáŋá Yésus Kilís kéé bítóŋínyi náásɔ́.

⁸Yésus Kilís oócí u káá banɔ́ kíndísíki ɔ ɔkɔɔ́háma a nyɛmana, ananyía nuánɔ́ bámɔ́kɔ́na tɛ́ka na hɛkɔma buɔ́sɛ́ abɔ́ u ká ka hálɔ́mɔ́na o okokélísi baacɔ.

⁹Bandɔ́mɛsɛ́ u ŋaá banɔ́ lɔ́ŋɔ́kɔ́ anyía núánɔ́ bámɔ́kɔ́na e nyimónjóló ne uuyé Ɔɔ́nɔ́ Yésus Kilís, uusú Otéŋí a Waáŋá. Wáŋa ooci ewú u ŋé nyíóyísínyi cááyɛ́ esúŋe ekime.

¹⁰Isíʼo, banɔ́ báámɛ benyíinyí, ɛ ŋa mɛ́ aamba ɔ banɔ́ láana a makɛ́nda me uusú Otéŋí a Waáŋá Yésus *Kilís anyíaʼo : Cɔ́kɔ́lɛ, ánɔ bámɔ́kɔ́na nyuúté nyɛ́mɔtɛ́ ; nuti lumítíne anyía eetíé á banɔ́ sálɔ́tɔ́kɔ́na ; mbá ánɔ bámɔ́kɔ́na balatákánɔ́ e nyimónjóló bɔmbányɛ bɔmbányɛ, na a nyɛánɔ́ nyɛbɛ́táá, na a bɛsana abɛ́ nu ŋa nɔ́ tákɛ́na ɔkɛla.

¹¹Banɔ́, báámɛ benyíinyí, yááŋa anyíaʼo : Baacɔ bá hɛnyɛ́nɔ́ hí Kolowé[3] ŋa ka bɔ́ mɛ́ laakɛ́na anyía tukókó má kúákɔna aanɔ́ ɛ ɛkatɛ́katɛ́.

¹²Yááŋa anyía bɔ́mɔtɛ́ baacɔ aanɔ́ ɛ ɛkatɛ́katɛ́ ŋa bɔ́ kɔɔna báyɛ : « Basɔ́, tua sɔ́ŋa elime ne Bóol. » A bɔ́mɔtɛ́ báyɛ : « Basɔ́, tua sɔ́ŋa elime na Abólos. »[4] A bɔ́mɔtɛ́ báyɛ : « Basɔ́, tua sɔ́ŋa elime na Sɛfas ». Eebe a bɔ́mɔtɛ́ tɔ́na báyɛ : « Aá basɔ́, tua sɔ́ŋa elime ne Kilís ».

¹³Ééʼ buamɛ, mbá Kilís áŋa ɔbɛ́sálɔ́tɔ́kɔ́nánɔ́ e ? Ɔ́kɔ, bá ŋa yaátákɛ́na Bóol ɔ ɔmbásá ɔ ɔmuaná a yáánɔ́ asana, ta anyía e nyiínyi nyí Bóol bá ŋaá banɔ́ ootókíne e ?

¹⁴Aá yaŋɔ́, i ŋeé mi iínjie Bandɔ́mɛsɛ́ bitéŋíti anyía i ŋe mí ootíne hú ne Kilíbus[5] na Káyus[6] aanɔ́ ɛ ɛkatɛ́katɛ́.

¹⁵Aáná ta ɔɔcɔ tɛ á bá wu ɔsána ɛŋɔ́nɔ anyía bá ŋaá banɔ́ óótókíne eémi e nyiínyi.

¹⁶Ɛ́ɛ, ɛ́ ma mɛ́ bɛ́táá, i ŋeé mi ootókíne tɔ́na baacɔ bé ciíbe cɛ baacɔ cɛ Ɛsɛtɛfánas, ɛ tɛ ŋa háná ámɛ bɛ́táá anyía i ŋeé mi ootíne tɔ́na ɔɔcɔ u etémbí.

¹⁷Yááŋa anyíaʼo, Kilís tɛ ɔ́mɔɔ́ mɛ tɔ́ma hú o okowóotine baacɔ, mbá u ŋaá hɔ́lá ɔ mɛ tɔ́ma o okoó beébe húlínyi Ambányɛ yɛ́ Ɛsɔ́ma ; tɛ́ka ne tusiŋítí tɔ́ ɔtáŋa tɔ́ baacɔ, ɔ ɔkɛla anyía owé ú Kilís ɔ ɔmbásá ɔ ɔmuaná tɛ́ háma buólí bú nubókó.

¹⁸Yááŋa anyíaʼo, nyihulinyi baacɔ asana yí owé ú *Kilís ɔ ɔmbásá ɔ ɔmuaná áŋa háyɛ asana yɛ́ buála a baacɔ a bá bɔ́ŋa o ohónyí wú bunyímé, mbá a basɔ́ abá tua sɔ́ŋa o ohónyí wú nyɛnɔhɔ, ú ŋaá basɔ́ cíbúníne makɛ́nda ma Bandɔ́mɛsɛ́.

¹⁹Aáná yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : « Ɛ ká mɛ́ ááŋíaka a bɛɛtɔ́ injiŋé ci benjiŋénjíŋe, mío témbúnyísíki omenyi ú bemenyi bɛsana ».

²⁰Onjiŋénjíŋe weényi aná e ? Háányɛ́ *muékúnyi bikotí áŋa e ? Ta anyía musuŋunyi bɛsana mɔ hɛɛya eehi e ? Aá taaká, Bandɔ́mɛsɛ́ áŋa otóŋgínyínyi baacɔ anyía injiŋé cɛ baacɔ bá ɔmɛsɛ́ áŋa injiŋé cɛ buála.

²¹Yááŋa anyíaʼo, haála ahá Bandɔ́mɛsɛ́ ŋoó tóŋgínyí baacɔ bɛsana na ciayɛ́ injiŋé, beébe te o wuúci menyutune a ciabɔ́ injiŋé ; yaátɛ́ asana Bandɔ́mɛsɛ́ ŋa sɔ́mbɔ́tɔ́ná onohiki baacɔ e bé ŋe bú lumitinine nyi-beébe-hulinyi owé ú Yésus Kilís a nyɛ́áŋa háyɛ asana yɛ́ buála.

²²*Besuif ŋa bɔ́ báta anyía bé beébe oónyísíkínyinyi ne bikéki bí tubílícínyínyí ; *Bakɛlɛ́k, beébe bábɔ́ áambaka anyía bé beébe oónyísíkínyi na ɔtáŋa ú injiŋé.

²³Mbá aá basɔ́, tu ŋe sú húlínyi baacɔ asana yí Kilís a waátákɛ́nánɔ́ ɔ ɔmbásá ɔ ɔmuaná. Yiíyi Besuif ŋa bɔ́ lɛca háyɛ aabɛ́ yɛ́ asana[7], baacɔ a bá tɛ ábɔ́ bá Besuif ébú hiíteke háyɛ asana yɛ́ buála.

²⁴Mbá a aháŋá na baacɔ abá Bandɔ́mɛsɛ́ ŋɔɔ́ lɔ́ŋɔ́kɔ́, te Besuif ta Bakɛlɛ́k, Kilís áŋa makɛ́nda ma Bandɔ́mɛsɛ́, wuúci tɔ́na ciayɛ́ injiŋé,

²⁵ananyía asana ayɛ́ baacɔ bá ɔmɛsɛ́ ŋa bɔ́ lɛca háyɛ yaála yí injiŋé yɛ́ Bandɔ́mɛsɛ́ áŋa ne injiŋé a cɛ́ á hɔ́la omenyi ú baacɔ ; híáná tɔ́na asana ayɛ́ bá ŋa bɔ́ lɛca háyɛ bɔnɔ́nɔ́ bɔ́ Bandɔ́mɛsɛ́ ŋaá kɛ́nda ɔ ɔhɔla makɛ́nda ma baacɔ.

²⁶Banɔ́, báámɛ benyíinyí, énu menyi anyía Bandɔ́mɛsɛ́ u ŋaá banɔ́ lɔ́ŋɔ́kɔ́ ; ánɔ bɛ́lɛ́ca aná : Baacɔ beéŋí aanɔ́ ɛ ɛkatɛ́katɛ́ tɛ́ ábɔ́ bá ne injiŋé a nyɛlɛca nyɛ́ baacɔ bá ɔmɛsɛ́, beéŋí tɛ́ka baacɔ bá maatá masáánɔ́, beéŋí tɔ́na tɛ́ka baacɔ bé eénye.

²⁷Mbá Bandɔ́mɛsɛ́ ŋaá bɛ́kɛ́lákɛ́na bɛsana abɛ́ baacɔ ŋa bɔ́ lɛca anyía bɛ́áŋa tuálaála tɔ́ bɛsana o otémbúnyísi injiŋé cɛ baacɔ bá ɔmɛsɛ́, yɔ́ bɛ́kɛ́lákɛ́na tɔ́na bɛsana bɛ́ ɔmɛsɛ́ abɛ́ baacɔ ŋa bɔ́ lɛca anyía bɛ́áŋa na butɔmbɔ́ o otémbúnyísíki eebi a bɛ́áŋa na makɛ́nda.

²⁸Bandɔ́mɛsɛ́ ŋaá bɛ́kɛ́lákɛ́na bɛsana bikime bɛ́ bunjúálɛ́ eébí abɛ́ baacɔ ŋa bɔ́ bábɛ́na, bé biíbi hiiteke háyɛ bɛsana bí etémbí ne etémbí omenyisiki eebi a bɛ́áŋa hɔ́á,

²⁹ɔ ɔkɛla anyía ta ɔɔcɔ ti bíbééti eeyé eé buúse.

³⁰Yááŋa anyía nááyá nua nɔ́ŋa e nyimónjóló ne Yésus Kilís. Wuúci wá yáaŋa ciasɔ́ injiŋé e ci ŋeé húle ná Bandɔ́mɛsɛ́, wuúci u ŋaá basɔ́ télímíkínyí na bɛtálɛ́mákánánɔ́ bɛ́ baacɔ, ne bifúúmékénénú, na bɛháŋɔ́nákánɔ́ eé buúse bɔ́ Bandɔ́mɛsɛ́.

³¹Háyɛ yááŋa yɔɔ́ŋɔ́kɔ́nɔ́ anyía : « Ɔɔcɔ awɔ́ u ŋa yáamba obíbééti é bíbéétíki a asana ne Otéŋí a Waáŋá ».